YouVersion Logo
Search Icon

JÚMÁN HRƆ́ 7

7
Ethiɛ́nɛn bhwe atɔ
1nphaháwo bhrɔ́khó ébhi Ethiɛ́nɛn sa:
– Wú mímí?
2Ló Ethiɛ́nɛn tɔ sa:
– Hɔnsɛ́nhɔn le nthemánhɔn, tɛmɛ ɔ́ndi njɛlé yé ábhwe khɛ́n mɛn mán tɔ. Lóka lo jisɛ Ábrahámɛn bha Mezophotami, khɛ́n ńnɛn ka no chre Haran khúbhɛ́, 3ńguhá Yankan lɛ nkɛ mɛ ló ńkránman nkɛ sa: “Tɛmɛ ɛchán hɛ khúbhɛ́ le hɛ bháthónɛ́n ɔ́nmɔn hrómɛn féne ló ákhúbhɛ́ khɛ́n mɛn mán nie hɛ.” 4Ábrahámɛn chan Kade khúbhɛ́ fi, ló ńno chre Haran. Lómánji Ábrahámɛn nthe khu, ló Yankan chɛ Ábrahámɛn chan Haran fi bha ákhúbhɛ́ bɛn khɛ́n ncɛ́n wo khwa lóhrómɛn. 5Lóne Yankan le se yíɛkɛ brɛ, áyíta phɛ́n bhrií nwɛ́ lɔ le pi. Lókhɛ́n Yankan tɔtre salé, mɛ́n man mó lókhúbhɛ́ lókɔn sé nkɛ, ló ábha lí nkɛ jímiɔn lɔ ékɛ. Lóka lókɔn, Ábrahámɛn le ka ho yípɔ. 6Khɛ́n ábhwe Yankan tɔ se nɔn ali salé: “Hɛ jímiɔn bha chré ákhúbhɛ́ bɛn ali ńthekhunɛ́n khúbhɛ́, wo bhá jrɛn nkɔn gangánmán, ló nkɔn bha lri wo gbre kábrɛ kábrɛ ńpa ya-bhwelí. 7Ló aféchwe khɛ́n ábha khwɛ́n wo tɛ́ wo gangánmán, mán mɔ́ wo kwa. Lómánji wo bhá chán lóne khúbhɛ́ fi, ló lóne bha lí ási wo bhá la mɛn.” 8Lómánji, Yankan gɛ Ábrahámɛn ɔ́nmɔn si akprɔbha bɛn, ló akprɔbha lókɔn, lóyítɛ́ abha lóhrómɛn nɔn ali ákhɛnján. Lóhɛ́nthé nɔn lóka wo ho Izakhi khɛ́n ácímɛ́n do, Ábrahámɛn jan nkɛ khɛn. Lóyábhɛ brɛ Izakhi lɔ jan Jakɔ́phu ékɛ. Jakɔ́phu bha, ló mɛ́n lɔ ńjan mrɔ́khómán áwɔ́-mɔn ékɛ.
9Wo mrɔ́khómán wo sa Jozɛfu mɛ, ló wo hɔn nkɛ phɛli sa nkɛ jrɛn gangánwo Ejiphithi khúbhɛ́. Khɛ́n Yankan bha mɛ́n phɔ; 10ló ńdo nkɛ yɛn nkɛ yíkhúphɔ khúnbrɛn hrómɛn. Yankan chɛ Jozɛfu gɛ bhweyɛ́n Ejiphithi bhringbi ali Faraɔn hɛ́nmɛn, ló mɛ́n bhwe khwá Faraɔn hɛ́nmɛnlé. Éjiphithi khúbhɛ́, Faraɔn san nkɛ li guvɛnɛ, ló ńkhwɛn mɛ́n bháthó yí khúnbrɛn ha nkɛ mɔ́n mɛn. 11Khɛ́n áko di Ejiphithi le Kanan ɔ́nmɔn khúbhɛ́ khúnbrɛn hrómɛn. Áyíkhúphɔ gɛlé, ló lo jisɛmánhɔn le wú nɛn alí. 12Khɛ́n lóka Jakɔ́phu yɛn salé ble bha Ejiphithi khúbhɛ́, ńchɛ lo jisɛmánhɔn phrɛ thwasi lo lóne dɔnbɛn. 13Ńdɔn mɔn hrómɛn ka wo lo ɔn, lónɔn Jozɛfu chɛ mɛ́n hɔnsɛ́nhɔn yɛn, ló Faraɔn lɔ yɛn néphan ali Jozɛfu bháthónɛ́n. 14Ló Jozɛfu chɛ wo do mɛ́n the Jakɔ́phu le mɛ́n mándonɛ́n khúnbrɛn ɔ́nmɔn bha, wo li néphan mɔ-bhwaliá le áwɔ́-mwannán. 15Jakɔ́phu lo Ejiphithi khúbhɛ́, ńkhu lóne, ló lo jisɛmánhɔn lɔ khu lóne. 16Wo khwɛn wo ɔ́nmɔn bha Sichɛmɛn khúbhɛ́, ló álínɔn khɛ́n Ábrahámɛn phɛ Ɛmɔ miɔn yé, lóhrómɛn nɔn wo bho wo khúnbrɛn.
17Yankan yí atɔ lóbhwe tre salé mɛ́n man tɛ́ sé Ábrahámɛn ɔn, lóka lócí esí, lótɛ lo khúbhɛ́nɛ́n cu bhɔtho Ejiphithi. 18Khɛ́n Éjiphithi khúbhɛ́, bhringbi ale yɛn Jozɛfu nɔn thénthé achre yákhru tho. 19Bhringbi lókɔn khrɛ lo khúbhɛ́nɛ́n, saji ńtɛ yí dri lo jisɛmánhɔn phɔ, lo ńsi nkɔn ha sa nkɔn yɔ́ nkɔn miɔn pwɛ́-npwɛ khwá okhú. 20Lóka lókɔn nɔn wo ho Moyízi, ali sɛbhri bɛn ayɔn, akhwa Yankan hɛ́nmɛnlé. Wo gbɛ nkɛ mɛ́n the hwan ɔɔ, áli pɛ bhwaliá. 21Lóka wo yɔ nkɛ fɔnka, Faraɔn mi bhie nɔn ahɔn-ɛn lo gbɛ sa mɛ́n nbrɛn mɛ́n bhi a, 22lónɔn achɛ Moyízi yɛn Ejiphithi khúbhɛ́nɛ́n bhwe khúnbrɛn phu, ló ńkhɔ mɛ́n yítɛ́ le mɛ́n bhwetɔ́ ɔ́nmɔn hrómɛn jrɛn sɛ́npɛ́wo khóo.
23Lóka Moyízi gɛ npá ágrebhɛ, ńno anwú Izraɛ khúbhɛ́nɛ́n ali mɛ́n hɔnsɛ́nhɔn. 24Lóka nɔn ńwu Ejiphithi sɛ bɛn échrwa nkɔn hromɛn lephan bɛn, ńwɛn Ejiphithi sɛ, ló ńdo lephan khɛ́n wo échrwa nkalé. 25Ńmu hɛ́nphe salé Izraɛ khúbhɛ́nɛ́n ali mɛ́n hɔnsɛ́nhɔn bha yɛ́n salé Yankan ebhá khɔ́ mɛ́n phɔ swa wo, khɛ́n wo lé wú lóbrɛ bhrɔ́ɔ́. 26Lóka ácí ci, Moyízi wu Izraɛ khúbhɛ́nɛ́n mɔn ya ekúdi. Ánnɛn annrwɛn nkɔn, ló ńkránman nkɔn sa: “Mɛn jɔn bhwá, khɔ́ hɔnsɛ́nhɔn nɔn ale hɔ́n o, ló bítɛ khɛ́n hɔ́n ekúdi ɛ?” 27Mɛ́n khɛ́n ánsranmán bhwe thu Moyízi thá, ló ńkránman nkɛ sa: “Abɛn nɔn asan hɛ sa ɛlí lo the, khɛ́n ɛbhɔ́ lo kwa ɛ? 28Wú ɛ́nɛn ɛwɛ́n mɛn sa npi si ɛkhɔ wɛn Ejiphithi sɛ?” 29Lóka Moyízi ye bhwe lókɔn, lótɛ ńchan lóne wa féne, ló ńno chre Madian gotho. Lóne nɔn ńho nsɛbhiɔ́ mɔn.
30Ámɔn ɔɔ, áli npá grebhɛ, lómánji Yankan-mranchɛ́wo bɛn lɛ Moyízi mɛ ánánkhuthé agbali Sinayi bhóbhó, áyápɔ́ bɛn ethɔ́ntɛn hromɛn. 31Lóka Moyízi wu lóyí lókɔn, etɛn hɛ́nmɛn, ńti annó lóphɔ no wú mwámwá, ló Hwánthe tɔ́ édɛn sa: 32“Mɛn nɔn mɛn ni hɛ jisɛmánhɔn Yankan, Ábrahámɛn, Izakhi le Jakɔ́phu ɔ́nmɔn Yankan”. Moyízi esókhú, ánfa, ló ánnɛn gɛ nɛ́n lóne. 33Ló Hwánthe kranman nkɛ sa: “Tɛmɛ esán hɛ ngbawa yɛn hɛ nta, lée ási lókɔn ɛya, áli áyíta créncré. 34Mɛn wu mɛn hwannɛ́n gbre elí Ejiphithi gotho, mɛn yé wo pán wo épan, ló mɛn dithé ma mɛɛ́n do wo nká.” Thénthé tɛmɛ ɛbhá, ló man chɛ́ hɛ ló Ejiphithi.
35Moyízi brɛ lókɔn khɛ́n Izraɛ khúbhɛ́nɛ́n thu thá, khɛ́n akranman nkɛ lée: “Abɛn san hɛ lée ɛlí lo the, khɛ́n ɛbhɔ́ lo kwa ɛ?” mɛ́n Moyízi brɛ nɔn Yankan chɛ ńkhɔ Yankan-mranchɛ́wo khɛ́n alɛ mɛ áyápɔ́ bhri ethɔ́ntɛn mɔ́ndɔ́nman hromɛn ni athe le adókáwo. 36Moyízi nɔn achɛ Izraɛ khúbhɛ́nɛ́n chan Ejiphithi khúbhɛ́ thándi, ló ńtɛ áphɔgóyí le hɛ́nmɛntányí lóne khúbhɛ́, gwe Nannan hromɛn le ánánkhuthé, kábrɛ kábrɛ ádi ńpá grebhɛ. 37Mɛ́n Moyízi brɛ nɔn ńcu kranman Izraɛ khúbhɛ́nɛ́n lée: “Yankan bha sé hɔ́n bhwetɔ́tréwo bɛn ali hɔ́n nbrɛn khúbhɛ́ léphan atɛsa mɛn a.” 38Izraɛ khúbhɛ́nɛ́n ka abhurɛhɛ́n ánánkhuthé, Moyízi bha wo phɔ: ńma lo jisɛmánhɔn le Yankan-mranchɛ́wo atɔ bhwe se Sinayi bhóbhó tho ɔ́nmɔn phɔ, ló Yankan bho ńmɛpɔ́bhá bhwe se antɔ sé lo.
39Khɛ́n lo jisɛmánhɔn le pɔ salé wo ji nkɛ bhwe, wo thu nkɛ thá, ló wo énɛn wo saji ló Ejiphithi khúbhɛ́. 40Wo kranman Arɔn lée: “Tɛmɛ ɛtɛ́ yankan dɔnbɛn othwási nɛnsi lo hɛ́nmɛn, lée lo le yɛn lóyí atɛ Moyízi khɛ́n achɛ lo chan Ejiphithi khúbhɛ́ thándi.” 41Wo tɛ ndwa sɛ bɛn, wo ha npha se ńfan lókɔn, ló wo nbrɛn mɔ́n yí atɛ, lónɔn énimán wo, ló wo elí phɔhá. 42Ló Yankan chan wo mánji féne, ńyɔ wo khwa wo éla pɛ ɔ́nmɔn le ácɛ́nmɛ ɔ́nmɔn abha átho, sa lósi wo khɔ lrɛ ha bhwetɔ́trémán hrɔ́ hrómɛn tre sa:
“Izraɛ khúbhɛ́nɛ́n, hɔ́n ka ɔ́n ma ánánkhuthé
kábrɛ kábrɛ ádi ńpá ágrebhɛ ɔn,
wú mɛn nɔn ɔ́n khwɛn ńbranmán le áyí
nánkhɛ ɔ́nmɔn ha npha se mɛn?
43Chɛchɛ, Molɔ́khi ali ńfan nɔn ɔ́n mu nvra se,
ló Refan ali hɔ́n mo pɛmwe nkpáyásopí
ńfan lókɔn khɛ́n ɔ́n tɛ ɔn, lónɔn hɔ́n éla.
Lóhɛ́nthé, mán khwɛ́n hɔ́n chán Babilɔ́nɛn
nó thwethwemɛn-áan.”
44Lo jisɛmánhɔn ka abha ánánkhuthé, wo pɛ ádɛgɔn-nkhú, khɛ́n akprɔbha hrɔ́ bha lóhrómɛn. Lósi Yankan khɔ lie Moyízi lée antɛ́, lónɔn ńtɛ: khankhan mímí, Yankan kranman Moyízi lée ló ɛwu ɔn, lócɛ́ɛ́ nɔn ɛtɛ́. 45Ádɛgɔn-nkhú lókɔn, wo hɔn tre lo jisɛmánhɔn abha mánji lé. Lóka Jozwe do wo ɔ́nmɔn élo, wo hɔn ka phɔ. Aféchwe khúnbrɛn tɛɛ wo khɔ nkɔn gotho, Yankan thu nkɔn thá, ló wo do nkɔn khúbhɛ́. Ádɛgɔn-nkhú lókɔn bha wo mɔ́n mɛn, kábrɛ kábrɛ ádi Davi cí tho. 46Ńgɛ Yankan nfɛkhuwú, ló ńmi nkɛ sa, nkɛ se mɔ́nsi mɛ́n tɛ́ áchrési bɛn sé Jakɔ́phu Yankan. 47Khɛ́n Salomɔn nɔn athan nkhú bɛn se.
48Khɛ́n Yankan abha átho, mɛ́n, ńkhú khɛ́n néphanmiɔn bho mɔn than ɔn, ánnɛn chré lóhrómɛn sa bhwetɔ́tréwo bhwe atɔ a:
49“Hwánthe tɔlé, átho li mɛ́n bhringbi yákhru,
ló áyíta li mɛ́n nta chágbó.
Bí nkhú yábhɛ bɛn nɔn ɔ́n ma gɛ thán sé mɛn ɛ?
Saji lósi yábhɛ bɛn nɔn mɛn mán gɛ chré ɛ?
50Lóyí khúnbrɛn lókɔn ɔn,
wú léli mɛɛ́n nbrɛn mɛn tɛ?”
51Óo, hɔ́n khɛ́n ɔ́n ni néphan ńthɛ́n khɔnman, khɛ́n ńjɛ ethú Yankan bhwetɔ́ phɔ, ácí khúnbrɛn ɔ́n gɛ Nánnánmi Créncré ɔ́nmɔn hɔ́n éswan! Mímí, ɔ́n khɔ hɔ́n jisɛmánhɔn kábrɛ! 52Lóbhwetɔ́tréwo bɛn nɔn hɔ́n jisɛmánhɔn le lri gbre ɛ? Lephan brɛ apriman khɛ́n ebhá bhá, néphan atɔ nkɛ phɔ bhwe ɔn, wo wɛn nkɔn. Ló thénthé hɔ́n lɔ, ɔ́n hɔn lephan lókɔn phɛli, ló ɔ́n wɛn. 53Ɔ́n khɔ Yankan-mranchɛ́mán phɔ gɛ Yankan bidí, khɛ́n ɔ́n ne ji ábidí lókɔn!
Ethiɛ́nɛn si akhɔ khu
54 Kwabhɔ́mán khónkhó ka aye ábhwe lókɔn ɔn, ńthɛ́nyan bhro bribri bɛn wa ka wo hromɛn, ló wo khúnbrɛn wo échrui nɔ́thá thɛ́nyan mɛn sé Ethiɛ́nɛn. 55Khɛ́n Nánnánmi Créncré bha Ethiɛ́nɛn phɔ, annɛ́n átho, ló ńwu Yankan nguhá le Jezwi khɛ́n aya Yankan liémɔn si, 56ló ántɔ sa:
– Ɔ́ndi njɛlé, mɛn wu átho phwan ka, ló Lephan Mi ya Yankan liémɔn si.
57Wo khanlé, wo ba wo njɛ pɛ, ló wo dɛn mrwɛn nkɛ. 58Wo ti nkɛ hwɛlé chan ákhúbhɛ́ hrómɛn thandi, ló wo ekúmú dia nkɛ wɛ́n. Wo khɛ́n wo etɛ́ lóyí ɔn, wo khwɛn wo dɛgɔn ha sɛbhri bɛn óche Sɔ́lu mɔ́n mɛn. 59Néphan édiɛ nmú, lótɛ khɛ́n Ethiɛ́nɛn Yankan éla nɔn ali sa:
– Hwánthe Jezwi, do mɛn nánnánmi!
60Lótɛ ńmɔ ntráhɛ́nlé, ló ńnukhwɛ́ átɔ́ khrákhrá mɛn sa:
– Hwánthe, ɛle bhó ńne lókɔn bhɔ́ wo pɔn!
Lóka mɛ́n mɛ́n ka, lótɛ ńkhu.

Currently Selected:

JÚMÁN HRƆ́ 7: ENT96

Highlight

Share

Copy

None

Want to have your highlights saved across all your devices? Sign up or sign in