JÚMÁN HRƆ́ 6
6
Wo san ńsɛ ákhwache odɔnmán Krisi-mranchɛ́mán mɔ́n
1Lóka lókɔn ɔn, yíchwɛmán lɔ ebhɔ́tho háne, ló Jwifunɛ́n khɛ́n álɛ Grɛ́khi ncan épɛgbo sé Jwifunɛ́n khɛ́n akhwa wo nbrɛn gotho, ló wo étɔlé: ácí khúnbrɛn, kasé nkɔn élwa nɛn, grwanyá abha nkɔn hromɛn ɔn, nkɔn lé dɛn ha nkɔn bhwa. 2Lóhɛ́nthé, Krisi-mranchɛ́mán áwɔ́-mɔn bhúrɛ yíchwɛmán gbemán khúnbrɛn hɛ́n, ló wo kranmán nkɔn sa:
– Áleyɔn salé lo yɔ́ Yankan bhwetɔ́ ká bha tɛ́ nɛn yí. 3Lóhɛ́nthé hɔnsɛ́nhɔn, hɔ́n hrómɛn, tɛmɛ ɔ́n sán ńsɛ ákhwache khɛ́n néphan tɔ bhwe lú wo hɛ́n bhwá, khɛ́n Nánnánmi Créncré bha wo phɔ, ali néphan apɛ bhweyɛ́n, ló lo bhó júmán lókɔn há wo mɔ́n mɛn, 4lónɔn lo bhá gɛ mɔ́nsi la Yankan, ló lo bhá tɔ Yankan bhwe.
5Ló wo khúnbrɛn wo dɛn do Krisi-mranchɛ́mán bhwe atɔ. Wo san Ethiɛ́nɛn ali sɛ apɛ mímíbhú, khɛ́n Nánnánmi Créncré bha mɛ́n phɔ, le Filíphu, Phrokhɔ, Nikanɔ, Thimɔn, Phamenási le Nikhola achan Anthiɔ́su, khɛ́n lócí aphrɛ bha Jwifunɛ́n yankanla yítɛ́ hrómɛn. 6Wo do nkɔn lo se Krisi-mranchɛ́mán ola Yankan sé nkɔn, ló nkɔn bhó mɔ́n tré nkɔn tho.
7Yankan bhwetɔ́ epí si khúnbrɛn, yíchwɛmán lɔ ebhɔ́tho Jeruzalɛ́mɛn khúbhɛ́, ló nphahamán búdúbúdú bhu Krisi mímí.
Wo hɔn Ethiɛ́nɛn
8Ethiɛ́nɛn gɛ sɛ́npɛ́, Yankan ndubhɔ́ bha mɛ́n phɔ, ló antɛ́ áphɔgóyí le hɛ́nmɛntányí khónkhó aféchwe thethé. 9Néphan fe bho gbo ka nkɛ phɔ: wo nɔn wo li, néphan achan hɛ́nbhúrɛ si óche “Gangánmán wo swa”, ló wo hromɛn, ápɛ Jwifunɛ́n achan Sirɛnɛn le Alɛzandri khúbhɛ́, ló fe lɔ li Jwifunɛ́n achan Selesi le Azi ɔ́nmɔn gotho. Wo le Ethiɛ́nɛn ɔ́nmɔn wo étalí bhwe. 10Khɛ́n wo le pi nkɛ mɛ́n, átɛsalé Nánnánmi bhweyɛ́n ase, lóphɔ nɔn ankhɔ́ tɔ bhwe. 11Wo ha néphan mɛ́n sa nkɔn tɔlé: “Lo nbrɛn lo ye Ethiɛ́nɛn tɔ bhwe phromɛn phromɛn ha Moyízi le Yankan ɔ́nmɔn tho!” 12Lóyábhɛ nɛn, wo echɛ́ aféchwe, mrɔ́khómán le bidíyɛ́nmán ɔ́nmɔn fe wo phɔ tho, ló nkɔn gɛ nkɛ ɔ́nmɔn sranmán bhwe. Wo tigbali Ethiɛ́nɛn, ló wo hɔn nkɛ lo Kwabhɔ́mán khónkhó hɛ́nmɛn. 13Ló wo sranman néphan ábha phɛ́ bhwe há nkɛ tho:
– Ló néphan lókɔn étɔlé, ákakhúnbrɛn lephan lókɔn tɔ bhwe há lo Yankan-nkhú créncré le Moyízi bidí ɔ́nmɔn tho! 14Lo ye ántɔlé Jezwi achan Nazarɛ́thi bha ca Yankan-nkhú lókɔn khwálé, ló Moyízi yí khúnbrɛn alie ɔn, ánman hɔ́n lólɔ jrɛn.
15Néphan khúnbrɛn khɛ́n akhwa ákwabhɔ́ si sa mɛbhí tre enɛ́n Ethiɛ́nɛn, wo wu salé nkɛ hɛ́nmɛn jrɛn, ló ákhɔ Yankan-mranchɛ́wo bɛn hɛ́nmɛn.
Currently Selected:
JÚMÁN HRƆ́ 6: ENT96
Highlight
Share
Copy
Want to have your highlights saved across all your devices? Sign up or sign in
Ebrié New Testament © Bible Society of Côte D'Ivoire, 1996.
