JÚMÁN HRƆ́ 5

Ananiási le Safira ɔ́nmɔn

1Lókhɛ́n sɛ bɛn óche Ananiási, khɛ́n mɛ́n bhia hɛ́n li Safira, áhɔn mɛ́n bithe phɛli, 2ńjan jɛtɛn khu tre mánji, ló ńmo lókhu man se Krisi-mranchɛ́mán. Mɛ́n bhia lɔ yɛn mɛ́n yí ńtɛ. 3Ló Piɛ bhi nkɛ sa:

– Ananiási, bítɛ khɛ́n Abhɔsɛ́mɔ́n ka hɛ thɛ́n hrómɛn, lókhɛ́n ńchɛ hɛ li nkpakprá se Nánnánmi Créncré, lókhɛ́n ɛjan hɛ bithe jɛtɛn khu tre mánji ɛ? 4Ábithe lókɔn ɛphɛli, áli hɛ nbrɛn bithe, lóka ɛphɛli lɔ lójɛtɛn li hɛ brɛ ékɛ, wú léliló? Ńthé kalósi akhɔ tɛ khɛ́n hɛ thɛ́n le sokhú, lókhɛ́n ɛtɛ áyí yábhɛ lókɔn e? Lóhɛ́nthé, ɛyɛ́n salé léli néphanmiɔn nɔn ɛli nkpakprá se, khɛ́n Yankan nɔn ɛli nkpakprá se.

5Ananiási ka aye bhwe lókɔn, ńhalé, ló ńkhu. Ló néphan khúnbrɛn khɛ́n aye lóbhwe wo esókhú. 6Ńmiɔ́-nsɛ bha, wo go nkɛ ndu, ló wo hɔn nkɛ lo bho.

7Lóthethé fɔn bhɛ́lé kpɛ́bɛn, áli wáchɛn bhwaliá nbrɛn, khɛ́n Ananiási mia bha, saji ńnɛn yɛn lóyí atɛ. 8Ló Piɛ bhi nkɛ sa:

– Hɔ́n bithe khɛ́n ɔ́n phɛ́lí ɔn, wú lóyí nbrɛn tɛɛ ɔ́n gɛ nɔn ali lókɔn?

Ló ńdɛn lée:

– Ee, lójɛtɛn nbrɛn tɛɛ lo gɛ e.

9Ló Piɛ kranman nkɛ sa:

– Kalósi ɔ́n khɔ hamɛ́nsi tre salé ɔ́n ma sú Hwánthe Nánnánmi wú e? Ɛyé nɔn, néphan khɛ́n ahɔn hɛ ca lo bho nɔn adi khúmɛ́n, ló wo bhá hɔ́n hɛ lɔ lo bhó.

10Lóyámɛ́n, ńhalé Krisi-mranchɛ́wo nta mɛn ló ńkhu. Ńmiɔ́-nsɛ hɛn khúthé, wo wu sa nkɛ khu, ló wo hɔn-ɛn lo bho mɛ́n ca njɛ. 11Yankan-gbemán khúnbrɛn ka aye lóbhwe, ákhwíthá ka wo hromɛn.

Hɛ́nmɛntányí búdúbúdú wo tɛ

12 Krisi-mranchɛ́mán tɛ hɛ́nmɛntányí le áphɔgóyí búdúbúdú aféchwe thethé. Krethiɛnmán khúnbrɛn gba bhurɛhɛ́n Salomɔn gbanmɛn si okhwɛn mú thóntho dwan pɛ. 13Álepɛ lephan nankhɛ brɛ adɛn eló wo phɔ, lótɛ khɛ́n wo bhwe ekhwá aféchwe hɛ́nmɛnlé. 14Ápasá búdúbúdú, ńsɛ le ńmie ɔ́nmɔn khɛ́n ebhú Hwánthe mímí, ehɛ́n nkɔn gbe hrómɛn. 15Néphan ekhwɛ́n lɔ́phɔmán lá sɔ́nfa le ntɛ́trɛ ɔ́nmɔn tho bhá ábhácathé, ochɛ́sé lóka Piɛ bhuri ehɛ́n, mɛ́n nánphɔ wrɛ́ oká nkɔn phɔ. 16Néphan npasá chan ákhúbhɛ́ dɔndɔn agbali Jeruzalɛ́mɛn khwɛn lɔ́phɔmán le néphan khɛ́n nánnánmi phromɛn phromɛn élri wo gbre ɔ́nmɔn wá bha, ló wo khúnbrɛn wo phɔ jan.

Wo élri Krisi-mranchɛ́mán gbre

17Lótɛ nphaháwo bhrɔ́khó le néphan abha mɛ́n phɔ khɛ́n ali Sadusenɛ́n gbemán ɔ́nmɔn ekú Krisi-mranchɛ́mán kré, ló wo énɛn wo tɛ́ nkɔn yíbɛn. 18Wo khwɛn Krisi-mranchɛ́mán, ló wo khwɛn nkɔn lo ha ápasá khúthékámán-nkhú hrómɛn. 19Khɛ́n Hwánthe-mranchɛ́wo bɛn bha phwan ákhúthéká-nkhú khúmɛ́n si mréci mɛn, ńchɛ Krisi-mranchɛ́mán thándi, ló ńkránman nkɔn lée:

20– Ɔ́n nó Yankan-khúthé, ló ɔ́n tɔ ńmɛpɔ́bhá pɔ́pɔ́ phɔ bhwe sé aféchwe oyé.

21Krisi-mranchɛ́mán ji lóbhwe: ló ńjuju fítaan, wo lo Yankan-khúthé wo élie néphan yí.

Nphaháwo bhrɔ́khó le néphan khɛ́n abha mɛ́n phɔ ɔn, wo bhurɛ Jwifunɛ́n mrɔ́khómán le Kwabhɔ́mán khónkhó ɔ́nmɔn hɛ́n, ló wo chɛ néphan lo ákhúthéká-nkhú hrómɛn ekhwɛ́n Krisi-mranchɛ́mán bhá. 22Khɛ́n ngbumán wo chɛ yí ka adi ákhúthéká-nkhú hrómɛn, wo le gɛ nkɔn lóne, ló wo saji bha kranman Kwabhɔ́mán khónkhó 23sa:

– Lo lo, ákhúthéká-nkhú khúmɛ́n si phrwa, ngbumán lɔ ya wo khúmɛ́n dɔndɔn. Khɛ́n lóka wo phwan si, wo le gɛ lephan brɛ khúthé.

24Yankan-nkhú bómán-óthe le nphahamán-óthemánhɔn ka aye lóbhwe, wo le wú lóbhwe yábhɛ brɛ wo gɛ tɔ Krisi-mranchɛ́mán lókɔn phɔ, ló wo ébhi wo bɛn nbrɛn lóyí yábhɛ ebhá tɛ́. 25Khɛ́n lephan bɛn bha ékranmán nkɔn sa:

– Hɔ́n eye! Néphan khɛ́n ɔ́n khwɛn ha khúthé, wo bha Yankan-khúthé wo élie ápasá yí.

26Ngbumán-óthe le mɛ́n hwannɛ́n ɔ́nmɔn lo lóne, ló wo khwɛn Krisi-mranchɛ́mán, khɛ́n wo le tɛ nkɔn yíɛkɛ, ápasá wo esó hɛ́nthé, kpɛnɛn nkɔn kpá kúmú dia wo. 27Lóka wo do nkɔn bha, wo khwɛn nkɔn lo Kwabhɔ́mán khónkhó hɛ́nmɛn, ló nphaháwo bhrɔ́khó ébhi wo bhwe, 28ló ántɔ sa:

– Khɔ́ lo di hɔ́n bi mɛ́n khrákhrá mɛn salé ɔ́n ne cu lú lephan lókɔn hɛ́n lie yí npɔhɔ́n, ńthé ébí nɔn ɔ́n tɛ lómánji ɛ? Ɔ́n nie lóbhwe lókɔn pi Jeruzalɛ́mɛn khúbhɛ́ khúnbrɛn hrómɛn, ló élie salé lo nɔn lo chɛ owɛn!

29Khɛ́n Piɛ le Krisi-mranchɛ́mán ɔ́nmɔn tɔ sa:

– Áyɔn salé lo ji Yankan brɛn néphanmiɔn. 30Jezwi lókɔn ɔ́n chɛ ha áyábhletre phɔ khɛ́n akhu, Yankan khɛ́n ali lo jisɛmánhɔn Yankan ɔn, mɛ́n nbrɛn nɔn ńcu chɛ nkɛ bha mɛpɔ́. 31Yankan hɔn nkɛ chre mɛ́n liémɔn si, ló ńchɛ nkɛ li Athe le Adókáwo, ochɛ́sé Izraɛ khúbhɛ́nɛ́n ojrɛn wo yítɛ́, ló wo gɛ wo ne yɔ́phɔ́. 32Nánnánmi Créncré khɛ́n Yankan bhó sé néphan éji ɔn, lo le mɛ́n ɔ́nmɔn nɔn lo li lóyí lókɔnhɔn phɔ ndalefɛlímán.

33Kwabhɔ́mán khónkhó ka aye ábhwe lókɔn, ńthɛ́nyan brɛn wo mɔ́n, ló wo énɛn wo wɛ́n Krisi-mranchɛ́mán. 34Khɛ́n Fariziɛn sɛ bɛn óche Gamaliɛ, ali bidíyɛ́nwo bɛn ápasá khúnbrɛn ji, ńchánfe tho ya Kwabhɔ́mán khónkhó thethé, ló ántɔ salé ochɛ́ Krisi-mranchɛ́mán othándi kpɛ́bɛn. 35Lótɛ ńkránman hɛ́nbhúrɛmán sa:

– Izraɛ khúbhɛ́nɛ́n, ɔ́n há hɔ́n nbrɛn mwanhɛ́n, áyí hɔ́n ebhá tɛ́ néphan lókɔn hɛ́nthé. 36Npijɔn tɛɛ, Tedasi khɛ́n ebhú mɛ́n nbrɛn lephan khó, mɛ́n lɔ ńtɛ mɛ́n ékɛ bha hɛn. Ńsɛ abha elí néphan ya bhwelí nbrɛn-áan, áfe gɛ nkɛ thá, khɛ́n wo wɛn nkɛ, áchɛ́se néphan khúnbrɛn agɛ nkɛ thá chranmanlé, ló lógbe lókɔn bhɔ. 37Mɛ́n mánji, lócí wo ekán néphan, Judasi ali Galile sɛ lɔ fe mɛ́n ékɛ tho. Ńdo ápasá búdúbúdú ha mɛ́n phɔ, khɛ́n mɛ́n lɔ owɛn, ló néphan khúnbrɛn khɛ́n agɛ thá lɔ chranmanlé. 38Thénthé mɛɛ́n kranmán hɔ́n: ɔ́n ne bhu néphan lókɔn phɔ mwanhɛ́n, tɛmɛ ɔ́n yɔ́ wo khwá wo lo. Kasé wo júmán wo elí áchan néphan yé, ló nbrɛn bha lɔ. 39Lókhɛ́n kasé mímí nbrɛn wo júmán lókɔn chan Yankan yé, ló-ɛ ɔ́n ma lé gɛ tɛ́ lɔ. Lóhɛ́nthé nɔn kasé ɔ́n ne hamwanhɛ́n, ábha tɛ́sa Yankan nɔn ɔ́n gɛ ɔ́nmɔn hɔ́n éswan!

Kwabhɔ́mán khónkhó dɛn ye Gamaliɛ bhwe atɔ. 40Wo che Krisi-mranchɛ́mán bha, wo chɛ ochrwa nkɔn, ló wo di nkɔn bi salé nkɔn le cu lú Jezwi hɛ́n tɔ bhwe npɔhɔ́n, ló wo yɔ nkɔn khwa. 41Ló áphɔhá mɛn, Krisi-mranchɛ́mán chan Kwabhɔ́mán khónkhó thethé féne, Yankan dɛ́n adɛn khɛ́n Krisi hɛ́nthé, nkɔn tɛ wo yí phromɛn phromɛn. 42Ló ácí khúnbrɛn, Yankan-khúthé le ábháthó hrómɛn ɔ́nmɔn, wo mɛ́n le thú, khɛ́n wo lie néphan yí, ló wo tɔ Ábhwe Bhwábhwá ali Jezwi Mesi phɔ bhwe.

Currently Selected:

JÚMÁN HRƆ́ 5: ENT96

Highlight

Copy