JÚMÁN HRƆ́ 4

Piɛ le Jan ɔ́nmɔn bha Kwabhɔ́mán khónkhó hɛ́nmɛn

1Piɛ le Jan ɔ́nmɔn ya étɔ bhwe sé ápasá yé ntɔ́nyán tɛɛ, lókhɛ́n nphahamán, Yankan-nkhú bómán-óthemánhɔn le Sadusenɛ́n ɔ́nmɔn thándi lóne. 2Krisi-mranchɛ́mán mɔn yí lókɔn élie néphan, khɛ́n étɔlé Jezwi chan khúnɔn mɛn fe ɔn, élri wo gbre, ábhwe lókɔn élie salé mɔngumán gɛ saji bhá mɛpɔ́. 3Wo khwɛn nkɔn ha khúthé tre wo ébo ácí ocí khɛ́n, átɛsalé lóka lókɔn ácí gu mɔn. 4Lókhɛ́n néphan aye Krisi-mranchɛ́mán bhwe atɔ, wo hromɛn búdúbúdú bhu mímí, áchɛ́se krethiɛnmán bha elí lephan akpɛn-mwannán nbrɛn-áan.

5Lóka áyé lɛ, Jwifunɛ́n-óthemánhɔn, mrɔ́khómán le bidíyɛ́nmán ɔ́nmɔn bhúrɛhɛ́n Jeruzalɛ́mɛn. 6Néphan abha wo hromɛn nɔn ali Ánan ali nphaháwo bhrɔ́khó le mɛ́n bháthónɛ́n khúnbrɛn, Kayífu, Jan le Alɛzandre ɔ́nmɔn. 7Wo chɛ okhwɛn Krisi-mranchɛ́mán bha wo hɛ́nmɛn, ló wo ébhi nkɔn sa:

– Lósɛ́npɛ́ yábhɛ bɛn mɛn, saji abɛn hɛ́n hrómɛn nɔn, ɔ́n khɔ tɛ lephan lókɔn phɔ jan ɛ?

8Nánnánmi Créncré ka Piɛ phɔ, ló ńkránman nkɔn sa:

– Ákhúbhɛ́-óthemánhɔn, le mrɔ́khómán: 9lónian mɛn khɛ́n ncɛ́n lo tɛ yíbhwá se lɛnɛ-phɔ́wo áphɔ jan, khɛ́n ɔ́n ma hɔ́n ébhi lo áphɔján lókɔn phɔ bhwe, lókhɛ́n hɔ́n énɛn ɔ́n yɛ́n lósi mɛ́n phɔ khɔ jan ɔn, 10lóhɛ́nthé, tɛmɛ hɔ́n khúnbrɛn ɔ́n yɛ́n, ló Izraɛ khúbhɛ́nɛ́n khúnbrɛn lɔ oyɛ́n salé: Jezwi-Krisi achan Nazarɛ́thi, ɔ́n chɛ ha áyábhletre phɔ, lókhɛ́n Yankan chɛ achan khúnɔn mɛn fe ɔn, mɛ́n hɛ́n sɛ́npɛ́ hrómɛn nɔn achɛ lephan lókɔn phɔ jan ya hɔ́n hɛ́nmɛn. 11Ló Jezwi phɔ bhwe nɔn Yankan hrɔ́ tɔ sa:

“Ábhú khɛ́n hɔ́n, ńkhúthánmán

ɔ́n hɔn fɔnká bu ɔn,

lónɔn acu li ńkhú ngrɛmɛ́n bhú khóo.”

12Mɛ́n míbrɛ nɔn ánswa lephan, átɛsalé áthéji si khúnbrɛn, néphanmiɔn khúnbrɛn hrómɛn, álepɛ lephan nankhɛ bɛn Yankan se lo, khɛ́n óbha khɔ́ mɛ́n phɔ swa lo.

13Lóbhwe etán Kwabhɔ́mán khónkhó hɛ́nmɛn, wo wu Piɛ le Jan ɔ́nmɔn mwasrui apɛ, wo yɛn salé nkɔn le li néphan mímí bɛn lɔ, saji áyí lɔ nkɔn le yɛn, lókhɛ́n wo yɛn salé nkɔn phrɛ gɛ Jezwi thá. 14Lókhɛ́n wo ewú sɛ áphɔ jan lɔ nɔn aya nkɔn njɛ, ló wo le wú lóbhwe wó gɛ tɔ npɔhɔ́n. 15Lótɛ wo chɛ nkɔn chan wo kwabhɔ́ khúthé thándi, wo nchán wo ya wo thethé wo étalí bhwe, 16ló wo ébhi wo bɛn nbrɛn sa:

– Ébí nbrɛn nɔn óbha tɛ́ néphan lókɔn ɛ? Jeruzalɛ́mɛn khúbhɛ́nɛ́n khúnbrɛn yɛn salé, nkɔn nɔn nkɔn tɛ hɛ́nmɛntányí lókɔn, ló óle gɛ lɛ́ lóphɔ mɛ́n. 17Óbha di wo bi ńmɛ́n khrákhrá mɛn salé wo le cu lú Jezwi hɛ́n tɔ bhwe sé lephan brɛ oyé npɔhɔ́n, ochɛ́sé lóbhwe lókɔn okpá léhɛ́n pí si khúnbrɛn.

18Lóhɛ́nthé wo chɛ nkɔn saji bha, ló wo di nkɔn bi salé nkɔn le cu lú Jezwi hɛ́n, ló nkɔn le khɔ́ nkɛ hɛ́n hrómɛn lɔ lie néphan yí npɔhɔ́n. 19Lókhɛ́n Piɛ le Jan ɔ́nmɔn kranman nkɔn sa:

– Hɔ́n nbrɛn ɔ́n wɛsɛ wú, wú ápriman Yankan hɛ́nmɛn sa oji hɔ́n brɛn Yankan? 20Khɛ́n lo ɔn, lo yí lo wu le lo bhwe lo ye, lóphɔ, lo bha lé gɛ témélé.

21Kwabhɔ́mán fo nkɔn, ló wo yɔ nkɔn khwa. Wo le wú lósi wo khɔ́ tɛ́ yí dri nkɔn phɔ, átɛsalé ápasá khúnbrɛn élri Yankan hwa, nkɔn yí lókɔn nkɔn tɛ hɛ́nthé. 22Lephan lókɔn khɛ́n wo khɔ hɛ́nmɛntán mɛn tɛ nkɛ phɔ jan ɔn, ńmúri npá grebhɛ.

Krethiɛnmán Yankan ala

23Lóka nkɔn diman wo, lótɛ Piɛ le Jan ɔ́nmɔn lo gɛ wo jɔn gbemán, ló ábhwe khúnbrɛn khɛ́n nphahamán-óthemánhɔn le mrɔ́khómán ɔ́nmɔn tɔ se wo ɔn, wo lɛ lómɛ́n se nkɔn ye. 24Krethiɛnmán ka aye ábhwe lókɔn, ló wo éla Yankan mɛ́nbrɛ mɛn sa:

– Hwánthe, hɛ nɔn ɛtɛ átho, áyíta, gwe le áyí khúnbrɛn abha lóhrómɛn. 25Hɛ nɔn ɛkhɔ Nánnánmi Créncré hɛ́n hrómɛn tɔ bhwe ha lo jisɛ Davi ali hɛ nɛnkhwɛ́nwo míthé sa:

“Bítɛ khɛ́n aféchwe éfe

wo phɔ tho áféke mɛn yábhɛ nɛn ɛ?

Bítɛ khɛ́n aféchwe ésri

ákhúbhɛ́dó phɔ bhwe wrɛ́ yábhɛ nɛn ɛ?

26Áthéji mringbilímán bhra tha ya,

athemánhɔn bhɔha,

ló wo bho bhwe tre Hwánthe

le mɛ́n Mesi ɔ́nmɔn lé.”

27Áli mímí nbrɛn salé ákhúbhɛ́ lókɔn hromɛn, Erɔde le Phɔ́nsu Piláthi ɔ́nmɔn tɛ brɛ, wo le néphan aleli Jwifunɛ́n le Izraɛ mándonɛ́n ɔ́nmɔn, ló wo bho bhwe tre hɛ nɛnkhwɛ́nwo créncré ali Jezwi lé, Jezwi lókɔn ali lephan ɛsan, khɛ́n ali Mesi. 28Ló áyí khúnbrɛn khɛ́n ɛkhɔ hɛ sɛ́npɛ́ le hɛ thɛ́npɔ́ ɔ́nmɔn hrómɛn phrɛ sri lóbhwe tre ɔn, wo tɛ́ osímɛ́n. 29Ló Hwánthe, thénthé tɛmɛ ɛwú wo dwasan yí wo etɛ́, ló ɛchɛ́ hɛ nɛnkhwɛ́nmán otɔ hɛ bhwe ńmwasrui mɛn. 30Tɛmɛ ɛtia hɛ mɔ́n, ló hɛ nɛnkhwɛ́nwo créncré ali Jezwi hɛ́n hrómɛn, hɛ́nmɛntányí le áphɔgóyí ɔ́nmɔn otɛ́ símɛ́n.

31Lóka wo la Yankan phu, lótɛ ási wo bhurɛhɛ́n éjika, átɛsalé Nánnánmi Créncré ka wo khúnbrɛn phɔ, ló wo étɔ Yankan bhwe, ńmwasrui mɛn.

Krethiɛnmán ya wo thethé élwa wo yí wo pɛ

32Krethiɛnmán bhɔ́ha sibrɛ, ńthɛ́n brɛ mɛn le nánnánmi brɛ mɛn. Álepɛ lephan átɔlé mɛ́n yí mɛ́n pɛ, áli mɛ́n brɛ ékɛ, lókhɛ́n áli wo npasá yí. 33Ńsɛ́npɛ́ khóo nɔn Krisi-mranchɛ́mán bho elí ndalefɛ, Hwánthe Jezwi khúnɔn mɛn achanfe phɔ, ló Yankan se wo khúnbrɛn ndubhɔ́ khóo. 34Wo hromɛn, álepɛ lephan tɛɛ áyíbɛn emián, lókhɛ́n nɛ́n gɛ lóyí lókɔn. Khankhan mímí, wo khúnbrɛn khɛ́n wo pɛ bithe le ńkhú ɔ́nmɔn, wo khwɛ́n phɛ́lí, ló lójɛtɛn wo gɛ, 35wo khwɛ́n bhá Krisi-mranchɛ́mán hɛ́nmɛn, ló wo lwa. Lephan hɛ yí khɛ́n ábha gɛ dɔnmán hɛ mɔ́n, lónɔn wo sé hɛ.

36Lóbɛn atɛ lóyí khɛ́n wo ebhó thwelí bhwe tɔ, nɔn ali Jozɛfu, levi sɛ khɛ́n wo ho Chiphre khúbhɛ́, ló Krisi-mranchɛ́mán hɛ́n aha nkɛ nɔn ali Banabási (lóthé nɔn ali, “Lephan ákhɔnmán néphan phɔ”). 37Ńpɛ bithe bɛn, ńhɔn phɛni, ló ńkhwɛn lójɛtɛn man se Krisi-mranchɛ́mán.

Currently Selected:

JÚMÁN HRƆ́ 4: ENT96

Highlight

Copy