YouVersion Logo
Search Icon

JÚMÁN HRƆ́ 3

3
Otɛ lɛnɛ-phɔ́wo bɛn phɔ jan
1Ńjuka bɛn, Piɛ le Jan ɔ́nmɔn lo Yankan-khúthé éla njuka wáchɛn bhwaliá hrómɛn Yankan. 2Lephan bɛn khɛ́n álɛ́nɛ bha phɔ, bha chre Yankan-nkhú njɛ, agbo óche “Agbo Bhwábhwá phɔ”. Lɛnɛ-phɔ́wo lókɔn ɔn, ácí khúnbrɛn wo hɔ́n-ɛn bha chré lóne, ló néphan khɛ́n ebhá Yankan-khúthé, ansá nkɔn jɛtɛn. 3Ńwu Piɛ le Jan ɔ́nmɔn ebhá Yankan-khúthé, ló ansá nkɔn yí. 4Piɛ le Jan ɔ́nmɔn sa mɛ tre ɛnɛ́n nkɛ kɔ́nkɔ́nkɔ́n, ló Piɛ kranman nkɛ sa:
– Tɛmɛ ɛnɛ́n lo tɛɛ.
5Ló sɛ lókɔn lɔ gɛmɛlé enɛ́n nkɔn. Anmú salé nkɔn ebhá se yíbɛn. 6Khɛ́n Piɛ kranman nkɛ sa:
– Mɛn nɛn pɛ jɛtɛn, saji mɛn nɛn pɛ ncí lɔ. Mɛn yí mɛn pɛ khɛ́n mɛɛ́n gɛ sé hɛ nɔn ali salé: Jezwi-Krisi Nazarɛ́thi sɛ hɛ́n hrómɛn, tɛmɛ ɛnɛnsi!
7Ńhɔn nkɛ liémɔn mɔ́n, ló ńti nkɛ chanfe. Lóyámɛ́n, lɛnɛ-phɔ́wo nta kpɔ́kprɔmɛ́n grɛ, 8ńyo chwá ya tho, ló ánnɛnsi. Mɛ́n le Krisi-mranchɛ́mán ɔ́nmɔn wo hɛn Yankan-khúthé, anyó, ló ánnri Yankan hwa. 9Ápasá khúnbrɛn lɔ wu salé nkɛ énɛnsi, ló nkɛ élri Yankan hwa. 10Lóka wo yɛn salé nkɛ nɔn nkɛ li lephan áchré Yankan-nkhú Gbo Bhwábhwá phɔ sá yí, lótɛ ákhwíthá ka wo khúnbrɛn hrómɛn, ló etán wo hɛ́nmɛn, mɛ́n phɔ ajan hɛ́nthé.
Piɛ bhwe atɔ Yankan-khúthé
11Lónian mɛn khɛ́n ánnɛn chán Piɛ le Jan ɔ́nmɔn phɔ féne, etán néphan khúnbrɛn hɛ́nmɛn, ló wo wa lo gɛ nkɔn ńkpémɛn si othan yí dwan pɛ, khɛ́n óche “Salomɔn Gbanmɛn”. 12Lóka Piɛ wu lóyí lókɔn, ló ánkranmán ápasá lée:
– Izraɛ khúbhɛ́nɛ́n, bítɛ khɛ́n lephan lókɔn phɔ ajan bhwe etán hɔ́n hɛ́nmɛn yábhɛ nɛn ɛ? Ló Bítɛ khɛ́n hɔ́n éwan lo sa áyíbɛn lo khɔ lo nbrɛn sɛ́npɛ́ le lo Yankan lo ji bánban ɔ́nmɔn hrómɛn tɛ ɛ? 13Ábrahámɛn, Izakhi le Jakɔ́phu ɔ́nmɔn Yankan khɛ́n ali lo jisɛmánhɔn Yankan nɔn abho nguhá se Jezwi, ali mɛ́n nɛnkhwɛ́nwo. Hɔ́n nbrɛn ɔ́n hɔ́n nkɛ se ákhúbhɛ́-óthemánhɔn, ló Piláthi hɛ́nmɛn, ɔ́n tɔ gbée salé ɔ́n ne yɛn, khɛ́n Piláthi-ɛ pɔ salé anyɔ́ nkɛ ká. 14Ɔ́n tɔ gbée salé ɔ́n ne yɛn lephan atɛ créncré, ali lephan apriman, ló ɔ́n kránman Piláthi lée khokhroháwo-ɛ nɔn andiman. 15Ɔ́n chɛ wo wɛn ńmɛpɔ́bhá-óthe, lókhɛ́n Yankan chɛ nkɛ chan khúnɔn mɛn fe, ló lo li lóphɔ ndalefɛlímán. 16Jezwi sɛ́npɛ́ hrómɛn le mɛ́n hɛ́n lo bhu mímí, nɔn ase lephan lókɔn sɛ́npɛ́, hɔ́n nbrɛn lɔ hɔ́n ewui, ló ɔ́n yɛn. Jezwi lo bhu mímí nɔn achɛ lephan lókɔn phɔ jan hwáán phu, sa ló hɔ́n ewú a.
17Lókhɛ́n hɔnsɛ́nhɔn, mɛn yɛn salé áphɔkhrɛ mɛn nɔn hɔ́n le hɔ́n hwánthemánhɔn ɔ́nmɔn ɔ́n khɔ tɛ Jezwi yí yábhɛ lókɔn. 18Khɛ́n Yankan bhwe lócí-áan aphrɛ khɔ bhwetɔ́trémán khúnbrɛn phɔ tɔtre ɔn, lóyí nɔ ńtɛ simɛ́n salé: mɛ́n Mesi bha lí gbre. 19Lóhɛ́nthé, tɛmɛ ɔ́n jrɛn hɔ́n yítɛ́, ɔ́n sa hɛ́nmɛn nrwɛn Yankan, ló anphu hɔ́n ne khúnbrɛn yɛn. 20Lótɛ Hwánthe bha cu chɛ́ hɔ́n gɛ áfíkhwá cí, ló ánman chɛ́ Jezwi ali Mesi khɛ́n lócí ńphrɛ san tre hɔ́n lé osáji bhá. 21Thénthé ka lókɔn ɔn, áyɔn se sa Jezwi ojran átho lóne, kábrɛ kábrɛ odi lóka áyí khúnbrɛn bha jrɛn pɔ́-npɔ́, sa lósi lócí-áan, Yankan khɔ mɛ́n bhwetɔ́trémán créncré phɔ tɔ lóbhwe tre a. 22Khankhan mímí, Moyízi nbrɛn tɔ sa: “Hwánthe ali hɔ́n Yankan bha chɛ́ bhwetɔ́tréwo bɛn atɛsa mɛn a, bhá bha gɛ hɔ́n, ánman ní hɔ́n khúbhɛ́ lephan. Ló ábhwe khúnbrɛn khɛ́n ánman tɔ sé hɔ́n, tɛmɛ ɔ́n yé. 23Lephan tɛɛ abha le dɛn yé bhwetɔ́tréwo lókɔn bhwe, wo bhá trɛnmɛn yɛn Yankan-gbemán hrómɛn, ló wo bhá wɛn.” 24Bhwetɔ́trémán tɛɛ achan Sanmiɛ cí tho-áan tɔ bhwe ɔn, wo brɛ brɛ khúnbrɛn wo tɔ lócíhɔn lókɔn phɔ bhwe. 25Áyí Yankan khɔ bhwetɔ́trémán phɔ tɔ salé mɛ́n man tɛ́, áyí lókɔn ɔn, áli hɔ́n ékɛ, ló akprɔbha khɛ́n Yankan gɛ hɔ́n jisɛmánhɔn ɔ́nmɔn si, hɔ́n lɔ ɔ́n ma lóhrómɛn, lóka ánkranmán Ábrahámɛn lée: “Man khɔ́ hɛ jímiɔn phɔ mɔ́ ámándonɛ́n khúnbrɛn abha áthéji ndu.” 26Lóhɛ́nthé Yankan chɛ mɛ́n nɛnkhwɛ́nwo phrɛ bha gɛ hɔ́n khɛ́n, ló ńchɛ nkɛ bha bhɔ hɔ́n ndu, sa nkɛ sa hɔ́n brɛ brɛ hɛ́nmɛn yɛn hɔ́n yí phromɛn phromɛntɛ́ phɔ.

Currently Selected:

JÚMÁN HRƆ́ 3: ENT96

Highlight

Share

Copy

None

Want to have your highlights saved across all your devices? Sign up or sign in