YouVersion Logo
Search Icon

JÚMÁN HRƆ́ 2

2
Nánnánmi Créncré ka abha
1 Pantekɔ́thi ka abha, krethiɛnmán khúnbrɛn bhurɛhɛ́n sibrɛ. 2Lóyámɛ́n áyé jangba elé vuvu átho, átɛsa ádúgran si akhɔ́ jan, ló ádo ákhúthé hrómɛn khúnbrɛn si wo chre. 3Wo wu álɛ́ atɛsa átɛn ethɔ́n, ábha tre lephan brɛ brɛ hɛ́n tho. 4Nánnánmi Créncré ka wo khúnbrɛn phɔ, ló wo élɛ ncan nankhɛ khɛ́n Nánnánmi echɛ́ wo lɛ.
5Jwifunɛ́n ali néphan mwámwá atɛ́ Yankan yí, chan ákhúbhɛ́ khúnbrɛn abha áthéji si atre mɛ́n lé bha chre Jeruzalɛ́mɛn . 6Ákhwɛ́ ka édɛn, wo khúnbrɛn wo gba bhurɛhɛ́n npasá mɛn, ló etán wo hɛ́nmɛn, lósi akhɔ tɛ ɔn, lephan brɛ eyé salé nkɔn élɛ mɛ́n nbrɛn khúbhɛ́ ncan. 7Etán wo hɛ́nmɛn, khɛ́n áphɔ ehá wo lɔ, ló wo étɔ sa:
– Néphan khúnbrɛn lókɔn khɛ́n aya étɔ bhwe ɔn, wú léli Galile khúbhɛ́nɛ́n? 8Ńthé kalósi akhɔ tɛ khɛ́n wo khɔ lo nbrɛn khúbhɛ́ ncan mɛn wo étɔ bhwe sé lo yé e? 9Lo hromɛn ápɛ néphan achan: Pháthi, Medi le Elami, Mezophotami, Jude, Kaphadɔ́su, Phɔn le Azi gotho. 10Ápɛ wo khɛ́n wo chan Friji, Panfili, Ejiphithi le Sirɛnɛn abha Libi gotho; ápɛ wo khɛ́n wo chan Rɔ́mɛn, 11ápɛ Jwifunɛ́n líhɛ le néphan khɛ́n thénthé éla Jwifunɛ́n Yankan, Khrɛ́thi le Arabi ɔ́nmɔn khúbhɛ́nɛ́n, lótɛ khɛ́n wo khúnbrɛn lókɔn ɔn, lo ye wo khɔ lo ékhúbhɛ́ ncan mɛn wo étɔ Yankan yí khónkhó atɛ phɔ bhwe sé lo yé!
12Etán wo khúnbrɛn hɛ́nmɛn, wo le yɛ́n lóhɛ́nphe yábhɛ wo gɛ bhú, ló wo ébhi wo bɛn nbrɛn sa:
– Lóthé nɔn ali bíyí ɛ?
13Khɛ́n dɔnbɛn éha krethiɛnmán lia, ló wo étɔ sa:
– Ńdɛ ekú wo!
Piɛ bhwe atɔ
14Ló Piɛ le Krisi-mranchɛ́mán áwɔ́-brɛ ɔ́nmɔn chanfe ya, ántɔ bhwe átɔ́ khrákhrá mɛn, ló ánkranmán ápasá sa:
– Hɔ́n Jwifunɛ́n le hɔ́n khúnbrɛn khɛ́n ɔ́n ma Jeruzalɛ́mɛn khúbhɛ́, ɔ́ndi njɛlé mwámwá yé ábhwe khɛ́n mɛn mán tɔ sé hɔ́n. 15Néphan lókɔn aya ɔn, ńdɛ le ku wo sa lósi ɔ́n khɔ hɔ́n ebhú, lée ńthé khɛ́n ácí li ńjuju wáchɛn bhrɔ tɛɛ. 16Lókhɛ́n bhwetɔ́tréwo Joɛ bhwe atɔ ɔn, lóyí nɔn etɛ́:
17“Yankan nkɛé, áyí khɛ́n ebhá tɛ́ ácí aphuji hromɛn,
lónɔn ali lókɔn.
Mɛn mán chɛ́ mɛn Nánnánmi ká
néphan khúnbrɛn phɔ,
hɔ́n miɔnsɛ le hɔ́n miɔnmie ɔ́nmɔn
bha lɛ Yankan mɛ́n tho bhwe,
hɔ́n miɔn nsɛbhiɔ́ bha wú ńmɛlrɛ yí
ló hɔ́n mrɔ́khómán bha ju ná.
18Mímí, lócí lókɔn,
mán chɛ́ mɛn Nánnánmi ká mɛn nɛnkhwɛ́nmán le mɛn
nɛnkhwɛ́nyá ɔ́nmɔn phɔ,
ló wo bhá tɔ Yankan bhwe.
19Mɛn mán tɛ́ áphɔgóyí khónkhó tré átho,
khɛ́n mɛn mán tɛ́ hɛ́nmɛntányí tré áthéji:
ló ńká, átɛn le ńtɛngbran ɔ́nmɔn
bha bhɔ́ thándi,
20ácɛ́nmɛ bha jrɛn mro bribri,
ló pɛ bha nɔ́n kpénkpé sa ńká a,
khɛ́n ábha sé Hwánthe cí ábha bhá,
ácí lókɔn khɛ́n ali nguhá cí khóo.
21Ló lephan khúnbrɛn khɛ́n ábha lúkhwɛ́ che Hwánthe
lócí lókɔn hromɛn ɔn,
wo bhá swa nkɛ.”
22Izraɛ khúbhɛ́nɛ́n, ábhwe mɛn mán tɔ, tɛmɛ ɔ́ndi njɛlé yé: Jezwi Nazarɛ́thi sɛ lókɔn, Yankan bho nkɛ sɛ́npɛ́ lie hɔ́n, átɛsalé mɛ́n phɔ nɔn Yankan khɔ tɛ áphɔgóyí le hɛ́nmɛntányí ɔ́nmɔn hɔ́n thethé, ló hɔ́n nbrɛn lɔ ɔ́n yɛn lóbhwe khúnbrɛn lókɔn. 23Wo hɔn nkɛ se hɔ́n, sa lósi Yankan nbrɛn khɔ tɔ lóbhwe tre mɛɛ́n nbrɛn thɛ́npɔ́ hrómɛn a. Ɔ́n chɛ nemán hɔ́n nkɛ chɛ ha áyábhletre phɔ, ló ńkhu. 24Khɛ́n Yankan chɛ nkɛ cu bha mɛpɔ́, ló ńswa nkɛ yɛn ákhú yíkhúphɔ hromɛn, átɛsalé ákhú le gɛ mɔ́nsi ádo nkɛ jran mɛ́n sɛ́npɛ́ hrómɛn. 25Mímí, mɛ́n bhwe nɔn Davi tɔ sa:
“Mɛn Hwánthe ya mɛn hɛ́nmɛn ákakhúnbrɛn,
ńya mɛn njɛ, lónɔn achɛ mɛn gɛlé ya.
26Lóhɛ́nthé nɔn mɛn ní phɔhá mɛn thɛ́n khúnbrɛn hrómɛn,
ló mɛn né yáya mɛn bhwetɔ́ hrómɛn.
Ló kasé ákhú bhwá nbrɛn khɛ́n mɛn khú lɔ,
mɛn mán pɛ mwasrui,
27átɛsalé ɛbha le yɔ́ mɛn jran mɔ́ngu,
ló ɛbha le dɛn salé mɛn lókɔn khɛ́n mɛn ni lephan agɛlé
ya hɛ phɔ, mɛn bɔn álínɔn hromɛn.
28Átɛsalé ɛchɛ mɛn yɛn ásitó
khɛ́n ábha chɛ́ mɛn gɛ mɛpɔ́bhá,
ló hɛ bhá ɛbháne ɔn,
áchɛ́se áphɔ ehá mɛn kábrɛ.”
29Hɔnsɛ́nhɔn, mɛn gɛ mɔ́nsi mɛɛ́n tɔ Davi ali lo jisɛ phɔ bhwe mwámwá sé hɔ́n yé. Ńkhu, ló wo mrwɛn, lókhɛ́n ncɛ́n cí bhwá nbrɛn lɔ, mɛ́n línɔn bha lo thethé. 30Lókhɛ́n ńni bhwetɔ́tréwo, ló ńyɛn salé Yankan bhɔli phɔ tɔtre salé, nkɛ bhá chɛ́ mɛ́n jímiɔn hromɛn lephan bɛn bha lí bhringbi, sa lósi nkɛ nbrɛn lɔ, nkɛ khɔ li bhringbi a. 31Davi phrɛ wu áyí ebhá tɛ́, ló ńtɔ Mesi khúnɔn mɛn chánfe phɔ bhwe, lóka ántɔlé:
“Wo le yɔ nkɛ kalé
khɛ́n ánjran mɔ́ngu,
ló mɛ́n nánmí lɔ
le bɔn álínɔn hromɛn.”
32Ló Jezwi lókɔn khɛ́n mɛɛ́n tɔ mɛ́n bhwe ɔn, Yankan chɛ ńcu ma mɛpɔ́, ló lo khúnbrɛn lo li lóphɔ ndalefɛ. 33Ńchre Yankan liémɔn si, ló Nánnánmi Créncré khɛ́n Nthe phrɛ tɔ mɛ́n phɔ bhwe tre ɔn, ńmo se nkɛ: ló ńchɛ lo lɔ lo gɛ Nánnánmi Créncré lókɔn. Lóyí nɔn hɔ́n ewú, saji lóbhwe nɔn hɔ́n eyé. 34Khɔ́ Davi nbrɛn le pha lo tho a, lókhɛ́n ńtɔ sa:
“Hwánthe kranman mɛn Hwánthe sa:
bha chré mɛn liémɔn si,
35kábrɛ kábrɛ odi lóka mɛn chɛ́
hɛ chaya hɛ mɛsamán tho
sa óchaya áyákhru tho a.”
36Tɛmɛ Izraɛ khúbhɛ́nɛ́n khúnbrɛn oyɛ́n mímí salé: Jezwi lókɔn khɛ́n ɔ́n chɛ́ ha áyábhletre phɔ, mɛ́n nɔn Yankan chɛ ńni Hwánthe le Mesi!
37Lóka wo ye ábhwe lókɔn, áphɔgbɔ́n khóo ka wo phɔ. Ló wo ébhi Piɛ le Krisi-mranchɛ́mán nánkhɛ ɔ́nmɔn sa:
– Hɔnsɛ́nhɔn, ébí nɔn ayɔn se salé lo tɛ́ ɛ?
38Ló Piɛ kranman nkɔn sa:
– Ɔ́n jrɛn hɔ́n yítɛ́, ló lephan brɛ brɛ ochɛ́ wo hɛ nduhɛ́n Jezwi hɛ́n hrómɛn, ochɛ́sé oyɔ́ hɔ́n ne phɔ́ hɔ́n. Lótɛ Yankan bha sé hɔ́n yí, lónɔn ali Nánnánmi Créncré. 39Átɛsalé Yankan bhwe atɔtre, áli hɔ́n le hɔ́n miɔn ɔ́nmɔn bhwe, ńtɔ se néphan nankhɛ abha thwethwemɛn lɔ, ló néphan khúnbrɛn khɛ́n lo Hwánthe Yankan nbrɛn bha che, wo lɔ áli wo bhwe.
40Piɛ cu tɔ áphɔkhɔ́nman bhwe búdúbúdú nánkhɛ ha nkɔn, ochɛ́sé nkɔn do ábhwe lókɔn, ló ánkranmán nkɔn sa:
– Hɔ́n swá wo bhá swa hɔ́n, ɔ́n do lóbhwe, ló áhóthóbhɛ́mán lókɔn khɛ́n ali néphan alia, ɔ́n ne ló wo phɔ!
41Wo hromɛn, néphan búdúbúdú dɛn ye Piɛ bhwe, ló oha wo nduhɛ́n. Lócí lókɔn, néphan pɔ́-npɔ́ khɛ́n ahɛn krethiɛnmán hrómɛn ɔn, wo li néphan akpɛn bhwaliá. 42Krisi-mranchɛ́mán yí élie, wó di njɛlé yé, ló wo hɔn pɛ kpɛ́ɛ́n, wo bha sibrɛ sa néphan ali hɔnsɛ́nhɔn, wo lí nɛn sibrɛ, ló wó la Yankan sibrɛ.
Lósi énɛn lée krethiɛnmán okhɔ́ tɛ́ yí wo nbrɛn thethé
43 Krisi-mranchɛ́mán hɛ́nmɛntányí le áphɔgóyí búdúbúdú lókɔn etɛ́ hɛ́nthé, ákhúsó ka lephan brɛ brɛ khúnbrɛn hrómɛn. 44Krethiɛnmán khúnbrɛn bhɔha sibrɛ, ló wo yí khúnbrɛn wo pɛ wó ya wo thethé lwa. 45Wo yí wo pɛ, wo khwɛ́n phɛ́lí, lójɛtɛn wo gɛ, wó lwa sé lephan khúnbrɛn, ló lephan, áyí ábha gɛ dɔnmán hɛ mɔ́n, lónɔn wo sé hɛ. 46Ácí brɛ brɛ khúnbrɛn, wó bhurɛhɛ́n Yankan-khúthé, ló wo bháthó hrómɛn, wo lí nɛn sibrɛ, wo lí nɛn áphɔhá le ńthɛ́nkhwálé ɔ́nmɔn hrómɛn. 47Wo élri Yankan hwa, áchɛ́se wo yítɛ́ khwá lephan khúnbrɛn hɛ́nmɛn lé, ló néphan wo swa, ácí khúnbrɛn, Hwánthe chɛ́ nkɔn hɛ́n wo gbe hrómɛn.

Currently Selected:

JÚMÁN HRƆ́ 2: ENT96

Highlight

Share

Copy

None

Want to have your highlights saved across all your devices? Sign up or sign in