San Lucas 14

Jesús beyonhe to bene rhaka xhwe'e rhe gui nia'a ne'e

1Goka kan to dza sabdo, Jesús guiaje yajtawe lo yo'o ki to bene yajlo fariseo, na yebalaka fariseos rkozajke le'. 2Le'aksikan na' ze'a, to bene rhaka xhwe'e rhe gui nia'a ne'e. 3Jesús gnabene ka muestro ki xhba'a le'an ka fariseos:

—¿A dia lataj chen to bene yeyonhe to bene rhaka xhwe'e dza sabdo, achen labi?

4Na le'ake labibi gne'ake. Na'arhe le' gdanhe bene rhaka xhwe'e, beyonhe le' na gochhie le' beyiaj. 5Na gochhie ka fariseos:

¿Noxhalhe lén, chen xhi'inle o be'achhi kie'alhe sladzoba lo ye'arho, alhabi rhebeajlheba tzadi, za'akalha naka dza sabdo?

6Na labi gokake biyochhi'ike kie'.

Bene bledzake to goe' wago

7Jesús ble'ene bene noledzake lo lani, rbekene bango za'aka, te gochhie le'ake:

8Kati no' gledza loe' to lani ga' rhaka wetzagana', labi koelho lataj yajlo, na'akalha xhchhin yeto' bene za'akarhe ka' loe'; 9na bene bledze rhopalhe, kide na ye'e loe': "Bde' lataj kio' ki bene ni." Na'arhe tzeajlho do rhedoelho zajchelho lataj yelhalhe. 10Nakarhe chhia'a, kati gledzake loe', gre'e lo lataj yelhalhe, kinda kati xhchhin bene bledze loe', ye'e loe': "Migo, gde na yiajche' lo to lataj mazirhe yajlo." Nakan silho yelabalan lo ka bene rhe'eke le'an loe'. 11Le'a no' rhon kuinhe xhen, weyega'anditaj; na no' rhon kuinhe nexaj, waka xhen.

12Le'aksikan gochhie bene bledze le':

—Kati gdelho to xhoe o to xhtze'e, bigledzalho ka migo kio', nika bin bichilho, nika dia'adza kio', nika bene rhoayo'o lalea kio' rze'akiekene; le'a le'ake, lagazi kan, yoledzake loe' te kan yezi'ilho ta chibdelho. 13Mazirhe chhia'a, kati loe' gdelho to goe' wago, bledza ka bene ye'achi, ka bene naxhike, ka bene birhaka sa'ake le'an ka bene birle'ekene; 14te soalho chhia'a tzawe. Le'a le'ake bise'akiekene yeguixhajke kio', na loe' wapalho ta rdolalo dza kati bene wen yeyasayebanke.

Xhkodza didza ki xhtze'e xhen

(Mt 22.1-10)

15Nan benhenhe ten, to bene rhele'anhe Jesús, gochhie le':

—¡Chhia'a naka ki bene nake koenda tzeajke goe' wago lo yelarne'abe'a ki Diozo!

16Jesús gochhie le':

—To bene bde'e to xhtze'e xhengolha, te bledze bene zengolha. 17Nan gola laze gagoke xhtze'e, gsele we'anchhin kie' zajechhie ka bene noledze: "Leda', le'a chinaka xhtze'e gagolhe." 18Te yogokate' gzolhoke rnabake sixhenhe. Bene nerho gne': Lhagdete'a bezia'a to yo', na rhe'anhe tza'a zajyoa. Rhatayoa loe' sixhenlo." 19Yetoe' gne': Beya'awa gayo koe' be'achhi go'on, te zajyoa a rhankaba. Rhatayoa loe' sixhenlo." 20Na yetoe' gne': "Lagdete'a btzagana', te labi gaka guida'." 21We'anchhin ni bebie'e, na bsnisiene xanhe. Na'arhe xanhe bdze'e, na gochhie we'anchhin kie': "Guiaj stika lo neza xhen le'an ka neza dzodi ki layechhi ni, na gche'a ni ka bene ye'achi, bene naxhike, bene birle'ekene, kan bene birhaka sa'ake. 22Goka tochi'i, bene we'anchhin gne': "Xanha, chibe'anha ka' gne'alho, le'an diarhe lataj." 23Na'arhe xanhe na gochhie we'anchhin kie': "Guiaj lo neza yalhaj le'an ka neza lasi, na be'an balen guidake yebalake te tzo'oke, kinda yedza' lichhia' ni. 24Le'a rhapa lén, nito' bene bledza' ta nerho gagoke xhtze'e kia' ni."

Tan za'aka gorha Cristo

(Mt 10.37-38)

25Bene zen noke Jesús; te le' beyekiaje na gne': 26«Chen nolhelhe rheanhelhe golhe ne'adia, le'an labi rhe'akielhe ne'adia mazirhe ka xozilhe, ka xhnalhe, ka nigolha kie'alhe, ka xhi'inle, ka bichilhe, ka zanle, le'an mazirhe ka' kuinle, labi se'akielhe gonle ne'adia tozi. 27Te no' labi rzoe reaje goa taze'adi kie', le'an rho ne'adia, labi se'akie gon ne'adia tozi. 28Chen nolhelhe lén rhe'anhelhe gonle to yo'o xhen, ¿alaga' koe'ajlhe koenda gakati gago, kinda snisielhe chen napalhe domi ta yosiochhilhe? 29Chen xoe' xhanie'e le'an dena'a labise'akiene yosiochhie, yogote'a no' sle'eke solhoke gxhichhiekene le'. 30Te sne'ake: "Bene ni gzolhoe rhonhe yo'o, le'an labi gxhe'akiene yosiochhie." 31O chen to bene rne'abe rhala tzeaje lo dila le'an yeto' bene rne'abe, ¿alaga' koe'aje koenda chen le'an chi milhe bene, se'akiene yezoe' lo bene zajgale le'an galaj milhe bene? 32Na chen labi se'akiene yezoe', kati yeto' bene rne'abe ne zee zito, sele ka bene zajoake rson zajnabake yekoake chhia'a. 33Kan xha, chen nolhelhe lén labi rsan na'alhe diarha tan dia kie'alhe labi se'akielhe gonle ne'adia tozi.

Kati zedi rhede' chie'e

(Mt 5.13; Mc 9.50)

34»Zedi naka wen; na chen rhede' chie'e, ¿nonaka yeyonka chhin? 35Birhon chhin ni lo yo' ni ga' rhe be'abi yanha, ze'alhote'a ro'onke. Ga' zoa nagalhe, leyenhe.»

Currently Selected:

San Lucas 14: ZAALuk

Highlight

Copy