MATEO 11

Le máaxo'ob túuxta'abo'ob tumen Juan Bautista

(Lc 7.18-35)

1Jesuse' le ca j dzo'oc u dzáic tzol xiquino'ob ti' u doce j canbalo'obe', j luk te'elo' ca j bin ca'ansaj yéetel tze'ec tu caajilo'ob le lu'umo'.

2Juan máax kala'ane', j kuch u yojéelt ba'ax cu beetic Cristoe'. Tu túuxtaj túun dze'edzec ti' u j tzaypacho'obe' u yilo'ob Jesús, 3u ti'al ca u káat chi'ito'ob ti': ¿Teech wa le Cristo bin talaco', wa unaj c pa'atic u yaanal?

4Jesuse' tu núucaj ti'ob: Xene'ex ca a wa'ale'ex ti' Juan ba'ax ca wilique'ex yéetel ba'ax ca wu'uyique'ex. 5Tzicbalte'ex ti' bix u paacat le ch'óopo'obo', bix u xíimbal le móocho'obo', bix cu yutztalo'ob ti' jáaway le koja'ano'obo', bix u yu'ubajo'ob le cóoco'obo', bix u ca'a púut cuxtal le quimeno'obo', yéetel ti' le otzilo'obo' cu tze'ecta'al u ma'alob péectzilil tocsajil. 6Qui' yóol le máax ma' tu lúubul u yóol ti' tene'.

7Le ca j bino'obe', Jesuse' jo'op' u t'aan tu yo'olal Juan ti' le máaco'obo', ca tu ya'alaj: ¿Ba'ax bine'ex a wile'ex te x tocoy lu'umo' jun cúul jalal cu yúunta'al tumen iik? 8Wa ma' leti'e', ¿ba'ax bine'ex a wile'ex? ¿Jun túul máac u búuquintma co'ocoj nooko'ob? Te'exe' a wojele'ex le máaxo'ob cu búuquintico'ob co'ocoj nooko'obe' ti' yano'ob tu yotoch ajawo'obo'. 9U dzo'oque' ¿ba'ax bine'ex a wile'ex? ¿Jun túul aj bóobat? Bey tu jaajil, jun túul máac asab nojoch ti' jun túul aj bóobat. 10Juane' leti' le máax tu yo'olal cu ya'alic le quili'ich dzíibo':

Tene' quin túuxtic in aj bisaj t'aan ta táan, u ti'al u nu'ucbes a beel.

11Tu jaajil quin wa'alic ti' te'ex, ti' ichil tuláacal le máaxo'ob dzo'oc u síijilo'ob tac bejela'a', mix máac asab nojoch ti' Juan Bautista; ba'ale' le asab chichan tu ajawil ca'ane' asab nojoch ti' leti'.

12Cáajic le kiin ca j taal Juan Bautista tac bejela'e', u ajawil ca'ane' cu ch'a'abal yéetel muuk, le máaxo'ob mu'uka'antaco'obo' u káato'ob u ti'alinto'ob. 13Tuláacal le aj bóobato'obo' yéetel le a'almaj t'aano', j t'aanajo'ob tu yo'olal le ajawilo', tac ca j taal Juan; 14wa te'ex a káate'ex a wocsaj óolte'exe', Juane' leti' le aj bóobat Elías unaj u taalo'. 15Le máax yaan u xiquine' u'uyajnac. 16¿Ba'ax yéetel bíin in quet u cajnáalilo'ob le kiino'oba'? Beyo'ob je'el bix le mejen paalal cu cutalo'ob báaxal te j kíiwico'obo' yéetel cu yawtico'ob ti' u yéet báaxalo'ob: 17T paxaj ti' te'ex jalal, ba'ale' ma' óokotnaje'exi'; t kayaj ti' te'ex okom kayo'ob ba'ale' ma' okolnaje'exi'. 18Tumen j taal Juan máax ma' tu janal mix tu yukule', te'ex túune' ca wa'alique'ex yaan jun túul kaakas pixan ti'. 19Ca j taal u Paal Máac máax cu janal yéetel cu yukule', te'ex túune' ca wa'alique'ex jun túul máac jach ya'ab u janal yéetel u yukul, u yéet bisajbáa j kebano'ob yéetel j kam patano'ob. Ba'ale' u yojéelaj Jajal Diose' cu kaj óolta'al tu yo'olal ba'ax cu beetic.

Le caajo'ob j ma' u'uyaj t'aano'ob

(Lc 10.13-15)

20Jesús túune' jo'op' u yayaj t'antic le caajo'ob tu'ux tu beetaj asab ya'ab chíiculalo'obo', tumen u cajnáalilo'ob le cúuchilo'obo' ma' tu kexaj u cuxtalo'obi'. Jesuse' tu ya'alaj: 21¡Yaj yanilech Corazín! ¡Yaj yanilech Betsaida! Tumen wa ca beeta'ac ca'ach tu caajilo'ob Tiro yéetel Sidón le chíiculalo'ob dzo'oc u beeta'al ichile'exo', bejla' úuch kéexec u cuxtalo'obe', yéetel dzo'oc ca'ach u cutalo'ob ichil u ta'anil káak u búuquintmajo'ob tóotol nooke'. 22Ba'ale' quin wa'alic ti' te'exe' tu kiinil p'is óole' te'exe' yaan a kamique'ex asab nojoch jaadz ti' le cun u kam u cajnáalilo'ob Tiro yéetel Sidono'. 23Cux túun teech, Capernaum, ¿ca tucultic wa yaan a líikesa'al tac ca'an? ¡Yaan a wéensa'al tac metnal! Tumen wa ca beeta'ac ca'ach tu caajil Sodoma le chíiculalo'ob dzo'oc u beeta'al ichile'exo', le caajo' dzo'oc ca'ach u p'áatal tac ti' le kiino'oba'. 24Ba'ale' quin wa'alic ti' te'exe' tu kiinil p'is óole' te'exe' yaan a kamique'ex asab nojoch jaadz ti' le cun u kam u cajnáalilo'ob u lu'umil Sodomao'.

Co'otene'ex ti' teen ca a je'elsaba'ex

(Lc 10.21-22)

25Ti' le kiino'obo' Jesuse' tu ya'alaj: Quin qui'iqui' t'antiquech, in Yuum, u Yuumtzil ca'an yéetel lu'um, tumen ta we'esaj ti' le máaxo'ob cabal u yóolo'obo' le ba'axo'ob ta ta'acaj ti' le máaxo'ob aj ojéelajo'obo' yéetel yaan u na'ato'obo'. 26Bey in Yuum, tumen bey ta wóoltilac teech. 27In Taatae' dzo'oc u kubic ti' teen tuláacal ba'al. Mix máac u kaj óol tu jaajil le Paalo', chéen le Taatao'; mix máac xan u kaj óol tu jaajil le Taatao', chéen le Paalo', yéetel le máax dza'an ti' tumen le Paal ca u kaj óolto'. 28Co'otene'ex ti' teen, tuláacale'ex máaxe'ex ca'anane'ex ti' a meyaje'ex yéetel aal a cuche'ex, teen bíin in beet a je'elele'ex. 29Bise'ex in cuch ta wóokole'ex, yéetel canbalnene'ex ti' teen, tumen tene' chuca'an in wóol yéetel cabal u yóol in pucsi'ikal; beyo' bíin a caxte'ex je'elel u ti'al a pixane'ex. 30Tumen in cuche' ma' aali' yéetel sáal u bisa'al.

Currently Selected:

MATEO 11: YUA04Ev

Highlight

Copy