Genesis 17

Ja strato ja Dyos sok ja Abrami

1Ja yajni ayxa yi'oj chan tajb'e sok b'alun lajune jab'il, (99) ja Abrami, je'ji sb'ajyi yuj ja Dyosi, ti alji yab'a:

—Ke'non ja Dyos it jel ja kipi. K'u'an ja k'ab'al spetsanil k'ak'ui, cho ajyan toj. 2Oj ka' jun jtrato amok ja we'n: jel oj ka pojxuk wa wintil jumasa.

3-9Yajni yab' ja Abram ja jastal iti, ti snujts'in ja s'olomi, man sta'a ja lu'um ja spatani. Ti alji yab' yuj ja Dyosi:

—Ja b'a trato it oj k'u'luk a mok ja we'n, jach' oj k'u'luk a wi jastal iti: Yuj ja we'n jel jitsan oj pojxuk ja kristyano jumasa, —xchi ja Dyosi. Ja'yuj mixa Abram oj ja b'i'iluk, man ya'n wa b'i'ili Abraham, yuj ja we'n tatal oj ajyan yuj jitsan lek ja kristyano jumasa. Sok jel jitsan wa wintil jumasa oj ochuke mandaranumil. Ja trato it wax k'u'lan a moki, jach' oj cho jk'u'l sok wa wintil jumasa, mi oj ajyuk stik'anal. Ke'n a Dyoson ja we'n, cho ke'nani Dyos oj ajyukon yuj wa wintil jumasa. Ja lu'um b'a Canaan b'a majan ita aya ja ya'n, we'n oj ka'wi sok wa wintil jumasa.

—Ja we'n sok wa wintil jumasa jel t'ilan oj ja k'u'lukex 10ja iti: spetsanil winik oj kupxukyi xet'an ja sk'unili. 11Ja wax kupxi xet'an wa k'unilexi, ja ti' wax na'xi ja trato it jk'ulunejtiki. 12-13Man ya'n spetsanil yal kerem oj manxuk a mokexi, t'ilan oj kupxuk xet'an ja sk'unil ja yajni sts'ikwi ja waxake k'ak'u. Ja lo'il iti, oj makunuk yuj spetsanil ja ma ti oj manxuk a mok we'nlexi, wa wa'tijumex ma' a manunejex sok tak'in sok ja ma'tik tuk chonab' jakeli, a'nima mi yuj a wintiluk we'nlex. Ja b'a sje' ja trato oj jk'u'luk a mokexi, ti oj ja wi' b'a wa b'ak'telex, yujni jun lo'il sb'a oj alb'uk spetsanil k'ak'u'a. 14Ja winik ma' mi oj ya' sb'aji, yujni wa'n sk'okjel ja lo'ila, sok mi oj b'ob' ajyuk sak'an a mokex ja we'nlexi.

15Mi kechanuka, ja Dyosi, cho yal yab' ja Abrahami:

—Man ya'n, wa che'umi mixa oj sb'i'iluk Sarai, ja sb'i'il oj yi'i, Sara. 16Jel lek oj kil ja ye'n, ojni ya' ajyuk a wi jun yal kerema, jaxa b'a yintil jumasa, jel oj pojxuk ja kristyano jumasa, ay chab' oxe ja ye'nle oj ochuke mandaranumil.

17Ja Abrahami, snujts'in ja s'olom b'a sti' sat ja Dyosi, man sta'a ja lu'um ja spatani, och tse'nuk, ti yala'a: —¿Jastal ojto ajyuk kuntikil, ayxa ki'oj jo' tajb'e jab'il tak? (100) ¿Jastal oj b'ob' ajyuk yal ja Sara ayxa yi'oj chan tajb'e sok lajune jab'il tak? (90). Ja'yuj kechan och tse'nuk, 18ti alji yab' yuj ja Dyosi:

—Ja'xa wa'yi ja Ismael ja slekil it wa'na yaljeli—

19Ti alji yab' yuj ja Dyosi:

—A'nima mixa k'u'an, ja Sara ojni ya'wi jun yal kerema, jaxa we'n oj wa sb'i'iluk Isaac.#17:19 Ja b'i'ilal iti, wa sk'ana yale tse'iji. Ja jtrato sok ja ye'n yuj ja yintil jumasa, yujni sb'a spetsanil k'ak'u'a. 20Cho jach'ni sok ja Ismaeli, jmaklata ja jas wana sk'anjel yuj ja ye'n, jachuk ja ye'n jel lek oj kil oj ka'yi jitsan lek ja yintil jumasa. Sok ja ye'nle'i, oj el lajchawe ja ma' niwak oj ajyuk ja ya'tele'i, sok jel jitsane. 21Jasa ja jtrato kechan ke'n oj jna' sok ja Isaaki, la kaltik ja yal ja Sara it oj sman b'a yojol jun jab'ili.

22Yajni ch'ak lo'lanuk ja Dyos sok ja Abrahami, ti'xa spila sb'aj ja. 23-27Ja k'ak'u jaw ja Abrahami, skupu yi xet'an ja sk'unil ja yunin Ismaeli, sok spetsanil ja winik jumasa ma ti'xa manxita b'a yoj slujmali, ma sok ja ma'tik smanunej sok tak'ini. Jach'ni ja Abrahami, cho kupxini xet'an ja sk'unila, b'a jach' k'ot smeranil ja jas alji yab' oj sk'u'l yuj ja Dyosi. Ja k'ak'u ch'ak kupxuk ja sk'unile'i, ja Abrahami ay yi'oj chan tajb'e sok b'alun lajune jab'il (99) jaxa yunin Ismaeli, ayxa yi'oj ox lajune (13) jab'il.

Currently Selected:

Genesis 17: YABD

Highlight

Copy