Mariko 2

Yesu ugumuforya munya ighandi

(Mat 9:1-8; Luk 5:17-26)

1Nënaa matiku makevuu akëra, Yesu agasuka uKafarinaumu, antu vëgahanga sayu mwino chu naa wuukhaya. 2Uvii, vëgaja antu vingë ino iyoma rëgavura ugënyamwaango. Yesu naauguvatanantëya ukhani, 3Itungo rësëë agaja muntu umwe munya ighandi ageetwa kunë mweeso ukenketwe na antu vane. 4Gusoko a mwirundo wa antu vëgatumba umutoa fifë kunë Yesu. Uvii, vëgarëkhomoa itembe faafo kunë naa Yesu urë. Nënaa vahanga iyoma, vëgamusimya uree umukeka. 5Yesu nënaa woona uhuvëi wawe, agamwëëra munyighandi wasuu, “Mwananë, warekewa amahutye ako.”

6Mukhatë a asëyi va seria nënaa vëkhee faafo, vëgasëghanëya munkhoo yawe, 7“Ugusoya wurë uyuu urëghëtya uvii? Ugumuraghanëëya Muungu! Gutie muntu nëudahite uheya mahutye, Muungu imwenedu unë udahite.” 8Yesu agamanya mugënyafaafo masëgho awe agavëra, “Asikë nëmuusëgha uwuu munkhoo yanyu? 9Rëëfë nëryoro nanguu: umukhanëa muntu uyuu nëukure ighandi, ‘Warekewaa mahutye ako,’ namba umukhanëa, ‘Imëka! Hora mukeka wako wendeende?’ 10Uvii, ngufenja mumanye mwino MwaaMuntu ukwetë udaho wa uvarekea antu mahutye muurëmi.” Faafo agamwëra munyaighandi wasuu, 11“Nagwiira, imëka, hora mukeka wako wende ukhaya!” 12Muntu wasuu agimëka, na muugënyafaafo agahora mukeka agenda kunë wiinjë usonge awe, na uvii voong'e vëgataka na umukumajua Muungu vëuhanya, “Gwinoonaa mbanduvë intu gëtë ërëë.”

Lawi Ugutaanwa

(Mat 9:9-13; Luk 5:27-32)

13Yesu agenda kangë umpëo a irambo. Mwirundo wa antu vëgamwendea, mweeso noo agandya uvasëya. 14Nënaa ukëanëye, agamwoona Lawi mwana amwa Alifayo, wëkhee mu ofisi a uhangwëyo wa nangu. Yesu agamwëëra, “Ng'onga!” Lawi agimëka, agamuhonga.

15Yesu nënaawikhaa mumesa, ukhaya amwa Lawi, ahwaangwëya nangu vingë anë anya mahutye naavëmuhongie Yesu na vingë mukhatë awe vëgëkhaa mumesa itambëëmwe na mweeso na asëywi vakwe. 16Uvii, mukhatë a asëyi va Seria nënaa Afarisayo nënaa vamwoona Yesu ugula itambëëmwe na antu nëvina mahutye na ahwaangwëya nangu, vëgavoorya asëywi vakwe, “Asikë nëugula itambëëmwe na ahwaangwëya nangu na anya mahutye?” 17Yesu nënaa wategheeya, agavakhanëa, “Antu në mëvëë awe mëfanga vëtiufenja mughanga, nëvëumufenja u vasaa nëvërue. Ntinajaa uvataana antu në aja, ëgweeso anya mahutye.”

Ihanyo ra udëa ula

(Mat 9:14-17; Luk 5:33-39)

18Guna itungo rëmwe nënaa asëywi vamwa Yohana na asëywi va Afarisayo naa vafungie vëtiula. Uvii, antu vëgaja vëgamuurya Yesu, “Gusokokë asëywi vamwa Yohana anë va Afarisayo vëfungie vëtiula, ëgweeso asëywi vako vëtifungie?” 19Yesu agasucha, “Nëvereekiwe muuvire vëudaha wurë ufunga vëkeula nëkëë mukumwiima wëitambëmwe inaawe?” Itungo roong'e nëkëë vëitambëmwe namukumwiima vëtëudaha ufunga udëa ula. 20Ëgweeso itungo ëkëë rëjëe nëvëjie uhegheywa munya uvëra, itungo rasëë unëvëjie ufunga na udëa ula.

21“Gutie muntu nëugutemaa gëraaka ufuma isaa nëifya na ugëtumëra mwilengu. Mbesa atende uwuu, gëraaka gësëë nëgëfya gëuhafuka ufuma mwilengu rasëë ryeso noo rëuruvëka nanguu. 22Kangë gutie muntu nëugutendea divai nëmpya muntafai në ya khee. Nëmba atende uvii, divai ëguyitamua ntafai yasii, divai ësëë itambëëmwe na ntafai yuuruvëka. Divai nëmpya eguvëkwaa mu ntafai nëmpya!”

Ihanyo ra Sabato

(Mat 12:1-8; Luk 6:1-5)

23Itiku rëmwe ra Sabato, Yesu naaukëëre umeunda a ngano. Aseywi vakwe vëgandya guuna mbëvë ya ngano munjëa. 24Afarisayo vëgamwëra, “Raraava! Gusokokë nëvëutenda intu nërëtinoneye utendwa itiku ra Sabato?” 25Yesu agavasucha, “Wurë, ëkëë mwinasomaa rësëë nënaagarëtenda Daudi itungo nënaawahumwa njaa? Mweeso itambëëmwe na vooyakwe vëgahumwa njaa, 26Mweeso agëngëa mu nyumba a Muungu agala mëkate ësëë nënaëvëkëwe usonge a Muungu. Intu ërëë rëgatendeka itungo nënaa Abiatari mukumbëki në mukuu. Naa akumbëki atufu nënaa ëvanoneye ula mëkate ësëë. Ëgweeso Daudi agamëla, kangë noo agavafa anë ayakwe.” 27Yakhonda Yesu agavëëra, “Sabato avëkiwe gwa faida a mwaamuntu, na ti mwaamuntu gusoko a Sabato! 28Uvii, MwaaMuntu une Müküü noo wa Sabato,”

Currently Selected:

Mariko 2: RNT

Highlight

Copy