Máakúsʉ 15

Yěso pə́ mbi Piláto

(Mat 27.1-2,11-26; Lks 23.1-5,13-25; Jâŋ 18.28-40; 19.4-16)

1Pətə́-ndə̂ pənuŋú-poʼ Sê*, pəkə̌m lâʼ*, pəkeʼtə́-lə́pə́ʉ Mə̌usə̂i* gháp pə kəitə pəsǎʼ lâʼ yi jwǐ* pə́tsəm mə̂ʉ mbaʼa-mbaʼ, ə́ ngʉ̌ cûʼtə, ə́ nkə́r Yěso, ə́ ndǎghʼ yé ńdə́r ngwo ńŋə́ lə́ Piláto*. 2Piláto* túŋu yé ngô: «Ô fou pəyúda áa?» Yěso pwôr lə́ zʉ́ ngô: «O lâʼ yə́rə́.» 3Pətə́-ndə̂ pənuŋú-poʼ Sê* pə̂ nkâp məno tə nzáa tû zʉ́. 4Piláto* kə̂ ncí ntúŋú yé ngô: «O lʉ̂ŋtə lʉŋtə́ mo? Kôo pə́ nzûʼ ndwuŋ məno mi pə́ pûtə gho ńté měi lo mo?» 5Lə́ káa Yěso pwôr yé có no, ə́ kəʼə Piláto* gháʼate.

6Ə́ lə pə́ mpfu ntsəm yi pə́ pə́ nzʉ̂ lətsei pəyúda yi pə́ fûŋ ńgó Pásʉ́ka*, Piláto* kwarə́ tâʼ ngaŋə-tsâŋ yi lâʼ tsóʼ yé, ə́ nyêr yé a lə̂r. 7Ə́ ghi pə́ mpfu wêi, cǒ ŋuu pə̂ ndə̂-tsâŋ gháp pə ngaŋə-ku yé, ləjôghʼ yé pə̂ Barabásʉ, mə́i pə́ lə mâʼ tághʼə́ cər túsoŋ, gháp sô mə́u ńjwí ŋuu. 8Lâʼ wo ntôʼ ńjwó Piláto*, ə́ ndâʼ lə́ zʉ́ ńgó a ghʉ̂ ghíʼ a lə̌i ncí ngʉ̂ mpfu lətsei. 9Piláto* pwôr lə́ páp ngô: «Pei koŋ ńgó məŋ nkwárə́ fou pəyúda ńnyér lə́ pei?» 10A lə lâʼ yə́rə́, ńté no, a lə pə́ njî ńgó pətə́-ndə̂ pənuŋú-poʼ Sê* lə ghwo ŋwítə́ lə́ Yěso mboŋə́ pútə́ yé mbó zʉ́. 11pətə́-ndə̂ pənuŋú-poʼ Sê* zûʼ ghíʼ a lǎʼ yə́rə́, ə́ ntwótə́ lâʼ ńgó gháp lâʼ lə́ Piláto ńgó â* kwárə́ pə́ Barabásʉ.

12Piláto* kə̂ ncí ntúŋú lâʼ ngô: «Pei nkoŋ ńgó məŋ ngʉ́ gháʼá lə́ ŋuu yi pei fûŋ yé ńgó fou pəyúda lə̂?» 13Lə́ lâʼ pou nâa máʼ wâr, ə́ ndǎʼ ngô: «Kʉ̌ʉ yé lə̂ tʉ̌-mbʉ̂ŋtə.» 14Piláto* túŋu gháp ngô: «Kwaʼ no tə́poŋ yi a ghʉ̌ ə̂ zárə́?» Lə́ gháp ghâʼ lə̂ máʼ wâr ngô: «kʉ̌ʉ yé lə̂ tʉ̌-mbʉ̂ŋtə!» 15Piláto* jwô ńgó a wo ghʉ̌ zə̂u yi ə́ poŋə́ lâʼ, ə́ nkwarə́ Barabásʉ ndə̂-tsâŋ, ə́ mbǒu ngʉ́ pə́ laghʼ ngwaa sə́u Yěso. Ə́ féi yé ńŋə́ ńgó pə wo nkʉ̌ʉ yé lə̂ tʉ̌-mbʉ̂ŋtə.

Pəlwóʼó-ntso pə́ ndyaŋə Yěso

16Pəlwóʼó-ntso laghʼ Yěso ńdə́r tə nkə́u zǎa, ə́ kəitə́ có ngaŋə-ku záp tsəm. 17Gháp mâʼ ndǐ ləfou ndəu Yěso, ə́ mbǒu ndághʼ mə́kǎp-kǎp ḿbáʼ nkaghʼə ńsǒ tû zʉ́. 18Ə́ ncʉ́ʼ nkə́ njí lə̂ tsêʼtə́ yé, ə́ mə́ ndâʼ ngô: «Paghʼ pə̌ sóghʼə ghô fou pəyúda!» 19Ə́ mə́ ndâghʼ kəkaʼa sə̂u tû yé, ə́ mə́ ntyə̂ghʼ mətê lə́ zʉ́, ə́ mbǒu ntó ńŋúʼu mbi zʉ́, ə́ sóghʼə yé. 20Gháp zoutə yé tə ə́ nkuʼ, gháp fú ndəu zʉ́ ə́ nsǒr ndǐ ləfou, ə́ mǎʼ kwaʼ mé məndǐ ndəu zʉ́, ə́ ndǎghʼ yé fú yʉʼ wó ńdə́r lə̂ ngwó nkʉ̌ʉ yé lə̂ tʉ̌-mbʉ̂ŋtə.

Pə́ kʉʉ Yěso lə̂ tʉ̌-mbʉ̂ŋtə

(Mat 27.33-44; Lks 23.26-43; Jâŋ 19.16-24)

21Gháp lə pə́ ndâghʼ yé ńdə́r, ə́ mbəutə́ cǒ ŋuu Silêinə ghíʼ a pə̌ nkwô tyer, ləjôghʼ yé pə̂ Síməu, ə́ mbə́ tə́ pə Alezâŋdələ gháp Rofísʉ. Pəlwóʼó-ntso ghou yé, ə́ ndǎghʼ təʉ ńgʉ́ a khwôr tʉ̌-mbʉ̂ŋtə Yěso. 22Gháp laghʼ Yěso ńdə́r lə̂ yʉʼ yi pə́ fûŋ ńgó Golgóta, ə́ laghʼ ndâʼ ngô: «Yʉʼ Kwěi-tû.» 23Gháp kə̂u yʉʼ wó, ə́ ŋə́ məluʼ mi pə́ cóghʼ có ntû ləghěi yi pə́ fûŋ ńgó mîrə*#15.23 Mîrə wêi lə pə́ lə̂ ndághʼ ńgʉ̌ ńgó koo a kə̂ nzúʼ tə́poŋ tə́sə́ʉ. mə́u lə́ Yěso, a lə̂ʼ yé lə̂ nó. 24Gháp kʉ̂ʉ yé lə̂ tʉ̌-mbʉ̂ŋtə, ə́ ntə̂m pyêr ndaghʼ ńgâptə́ məndǐ mé təcər páp.

25Gháp lə kʉʉ yé lə̂ tʉ̌-mbʉ̂ŋtə yə́rə́, lə́ pəmə́nəu ləpfuʼú mbaʼa-mbaʼ. 26Pə́ lə ŋwáʼa wʉ no yé nkʉ̌ʉ lə̂ tʉ̌-mbʉ̂ŋtə ngô: fou pəyúda. 27Gháp lə kə́ ncí nkʉ̂ʉ pəcó pətsǒŋ pə́pwô lə̂ máp mətʉ̌-mbʉ̂ŋtə. Tâʼ pə̂ lə̂ ndyəghʼə́ pô yé yi təʉ, cǒ pə̂ lə̂ ndyəghʼə́ yi kwap. [28Ə́ laghʼ ḿbə̂utə lə́ yʉʼ ŋwaʼa Sê yi ə́ pə́ ndaʼ ngô: «Pə́ lə nkwaʼ yé nou məfwôr.»]

29Pəndei-laŋə́-ndə̂u lə pə́ ndyáŋə záp yé, ə́ nzôutə́ yé ndâʼ ngô: «Hôo, gho yi o voghʼ ndə̂ Sê*, ə́ ndaghʼ leʼé tárə́ ńkə́r, 30Pfú tû zô pə́ gho, ə́ fú lə̂ tʉ̌-mbʉ̂ŋtə shíʼ lə!» 31Pətə́-ndə̂ pənuŋú-poʼ Sê* gháp pə pəkeʼtə́-lə́pə́ʉ Mə̌usə̂i* pə̂ nzôutə záp Yěso, ə́ ndâʼ təcər páp ngô: «A lə pfû pəcó pye mbô ləwʉ̂ gháp cwôr, káa a póu nkûʼ yé lə̂ mpfú tû-mbəʉ yé áa?» 32Ə́ pə́ ntúŋu ńgó Nzaʼ-nkʉ yi Sê lə ghʉ̌ ndaʼá mə́u lə̂ ngʉ́ ŋə́*, ə́ yi a pə̌ fou pye Ísə́lahêl fú lə̂ tʉ̌-mbʉ̂ŋtə mpfu wo shíʼ, paghʼ jwô yə́rə́ ə́ mbə́i no yé! Pye pi pə́ lə nǎa gháp pə pǎp nkʉ̂ʉ lə̂ mətʉ̌-mbʉ̂ŋtə lə̂ kə́ mə́ nzôutə záp yé lə́wó.

Yěso kwʉ̌

33Ə́ pə̂ ntə̌ʉ-nəu, yʉʼ tsəm ndəu ndesé naa shʉ́ŋ, tə ngwó nkə́u lə́ pəmə́nəu pə́tárə́ mbwǒr-nəu. 34Ə́ pə̂ lə́ pəmə́nəu pə́tárə́ mpfu mbwǒr-nəu, Yěso kóʼo nji ye ńŋə́ tʉ́, ə́ ngeʼtə́ ngô: «Eloyî, Eloyî, lama sabatanî», ə́ ndaghʼ ńdâʼ ngô: «Sê zâa, Sê zâa, o mêʼ ghâa ńté hó?» 35Pəcó pye pǐ lə pə́ yʉʼ wó zûʼ yə́rə́, ə́ ndǎʼ lə̂ təʉ ngô: «Pei zúʼ, a pə mə́ fûŋ Elyê*.» 36Cǒ ŋuu lə́ páp khʉ̂tə ńgwó ńtsə̌p zə̂u-ndí lə̂ lətǐ, ə́ shóghʼə́ lə́ tâʼ kəkaʼa, ə́ ncaghʼə́ ḿbárə́ ntsʉ Yěso ńgó â shwétə́, ə́ ndǎʼ ngô: «Pei nyér, paghʼə zʉ́ʼtə́ ńjwó ńgó kəʉ Elyê* wo tó shúʼú yé!»

37Lə́ Yěso ghêʼtə lə̂ təʉ, ə́ ntsə́ʉ ńgó kəpə́. 38Zə̂u-ndí yi pə́ lə laghʼ ńkhʉ́ŋə́ yʉʼ lənuŋú poʼ jwǐ cər ndə̂ Sê* sâa paghʼ pwô lə̂ fú tʉ́ ngwo ńkə́u sê. 39Fou pəlwóʼó-ntso pəlóma yi a lə tə́ʉ mbi zʉ́ mə́ nâŋ yé, jwô mbə̂u yi a lǎghʼ ńkwʉ́, ə́ ndǎʼ ngô: «Kwaʼ lə́nə́ʉ, ŋuu wo kə pə́ Môu Sê.»

40Pəcó pəngyě lə tə̂ʉ záp pə́ ndǐ təsə mə́ náŋ, ə́ mbə́ Mǎyaa, ə́ mbə́ Salomê, ə́ mbə́ Mǎyaa yi cər lâʼ Mǎghʼdala, Mǎyaa yi a pə̌ mə́ pə Yosês gháp Jâghʼ yi nkhʉ̂. 41Gháp lə tsə́ʉ nzəm Yěso, ə́ mə́ ntôutə yé mpfu yi a lə pə́ Galilêi. Ə́ ngʉ̌ pəcó pəngyě tə nzáa pi gháp lə tsə́ʉ nzəm Yěso, gháp pə pǎp kôʼ ńdə́r lə́ Yelúsalêm.

Pə́ côghʼ pfû Yěso cər ləshi

42Ə́ pə̂ mpfu-ngwʉ̂ leʼé yi pə́ ntsuŋtə mbəʉ ńté leʼé nji pəyúda*, 43Yosêp ŋuu Arimatê tô, ə́ mbə̂ cǒ ŋuu njwǐ cər kəitə pəsǎʼ lâʼ, ə́ ndə nyǎŋ nkə́ mə́ mbâp yé mpfu yi Sê tú mbəʉ yé lə̂ wo cʉ́ʼ pə́ sâʼ nzʉ̂, ə́ shə̌ghʼ nzoʼ ńgwó ńjwó Piláto*, ə́ ndóu yé pfû Yěso lə̂ ngwó ntʉ́ŋ. 44Piláto* zûʼ ńgó Yěso yaa mə́ nkwʉ́, ə́ kəʼə yé gháʼate, a fûŋ fou pəlwóʼó-ntso nkʉ, ə́ ntúŋú yé ngô: «Ə̂ no lə́nə́ʉ ńgó Yěso kwʉ́ mə́ áa?» 45A lâʼ yé ńgó a yaa mə́ ndáʼ nkwʉ́. Piláto* cʉ̂ʼ nkə́ mbə́i ńgó Yosêp wó nkéʼ pfû Yěso. 46Yosêp wô nzə́u pô ndǐ, ə́ ngwǒ shúʼú pfû Yěso lə̂ tʉ̌-mbʉ̂ŋtə, ə́ ndǎghʼ pô ndǐ zêi ńzə́mtə́, ə́ nkhwǒr ńgwó ńcóghʼ cər ləshi yi pə́ lə shʉ̌ʼ shʉʼʉ́ lə̂ ləghǒ, ə́ mbǒu ntyêtə́ có ləghǒ ńdaghʼ ńgúʼú ntsʉ wěi. 47A lə ghí pə́ côghʼ pfû Yěso cər wó, Mǎyaa Mǎghʼdala gháp Mǎyaa mə́ pə Yosês pə̂ njwó.

Currently Selected:

Máakúsʉ 15: NLA

Highlight

Copy