Luk 1

Luk osirizir akar faragha zuim

(Sapta 1:1-4)

1-4 # Jon 15:27; Aposel 1:1; 11:4; 15:28; Hibru 2:3; 1 Pita 5:1; 1 Jon 1:1 Gumazir aruam, Tiofilus, nɨ fo, gumazamizir avɨriba God en tongɨn amizir bizibar ganigha, dar gun osirasava ami. E uari uan damazibar ganizir gumazamizibar akam baraki. Me faragha Godɨn akamɨn ingangarir gumazamizibar otivigha, an akam akuri. Kamaghɨn amizɨ, kɨ uaghan akar kam osirigh nɨ bagh anemangasa. Egha kɨ deraghavɨra dar mɨngaribagh foghasa ingara ghua dagh foghava, nɨ bagha bar deravɨrama da osiri. Nɨ dar gan fogh suam, bizir nɨ oraghizir kaba da guizɨn biziba.

Jon Gumazamiziba Ruer Gumazimɨn amebam a batezir dughiam ko Maria Iesus batezir dughiamɨn mɨgɨrɨgɨam

(Sapta 1:5--2:52)

Ensel Sekaraian mɨgɨa ghaze, Jon otogham

5 # 1 Eghaghaniba 24:10 Dughiar kamɨn Herot Judian atrivimɨn itima, Godɨn ofa gamir gumazir mamɨn ziam Sekaraia, an Abiyan adarazir gumazir mam. Ezɨ an amuim Elisabet, a Aronɨn ovavim. 6#Jenesis 17:1; 1 Atriviba 9:4; Aposel 23:1; Filipai 3:6Aning bar deraghavɨra Godɨn Akar Gavgaviba ko bizir a damuasa e mɨkemeziba, aning dar gɨn zui. Ezɨ God aningɨn garima, aning an damazimɨn bar dera. 7Elisabet furabar iti, kamaghɨn amizɨ aning boriba puvatɨgha, dughiar ruarim pura ikia ghua bar ghuri.

8 # 1 Eghaghaniba 24:19; 2 Eghaghaniba 8:14; 31:2 Ezɨ dughiar mamɨn ofa gamir gumaziba ingarima, Sekaraia uaghan ofa gamir gumazimɨn mɨn Godɨn damazimɨn ingari. 9#Ua Me Ini 30:7-8; 1 Samuel 2:28; 2 Eghaghaniba 29:11Ezɨ me Godɨn Dɨpenimɨn ofa gamir gumazibar arazibar gɨntɨgha, gumazim amɨsɨvasa me dagɨaba akuri. Ezɨ God Sekaraia amɨsefe. Eghtɨ Sekaraia Godɨn Dɨpenimɨn aven mangɨ mɨgharir mughuriar aghuim zuim dapongam.#1:9 Kar men arazim, God gumazim uan ingangarim bagh anemɨsɨvasa, me ikararer kam gami. Ikararer kam a Satun ikararer biziba iniasa ikararemɨn amir puvatɨ. 10#Ofa Gami 16:17; Akar Mogomem 8:3-4Ezɨ mɨgharir mughuriar aghuim zuim dapongamin dughiam otozɨma, gumazamizir Godɨn ziam feba, Godɨn Dɨpenimɨn mɨriamɨn uari akuvagha God ko mɨgei.

11Ezɨ Ekiamɨn Ensel a batogha, pauran mughuriar aghuim tuamin ofa gamir dakozimɨn agharir guvimɨn amadaghan tughav iti. 12#Gumazir Dapaniba 6:22; Daniel 10:8; Luk 1:29; Aposel 10:4Ezɨ Sekaraia an apigha dɨgavir kuram gamigha bar atiatingi. 13Ezɨ ensel kamaghɨn a mɨgei, “Sekaraia, nɨ atiatingan markɨ, nɨ God ko mɨkemezir mɨgɨrɨgɨam, God a baraki. Ezɨ nɨn amuim Elisabet nɨ bagh otarim bategham. Eghtɨ nɨ ziar kam, Jon a datɨgh. 14-15#Dɨboboniba 6:3; Gumazir Dapaniba 13:4; Jeremaia 1:5; Galesia 1:15Egh nɨ bar akuegh navir amɨrizimɨn ikɨ. Eghtɨ a Godɨn damazimɨn ziar ekiam iniam, kamaghɨn amizɨ gumazamizir avɨriba an otoghamin dughiamɨn bar akuegham. Eghtɨ a wain ko dɨpar onganibar aman kogham. A uan amebamɨn navir averiamɨn aven ikɨvɨra ikɨtɨ, Godɨn Duam bar a gizɨvagham. 16#Malakai 4:5-6Egh a uam Israelɨn gumazamizir avɨriba inigh, men Ekiam God bagh mangam. 17#Malakai 3:1; 4:5-6; Matyu 11:14; 17:11-13; Mak 9:12Eghtɨ Elaijan itir Godɨn Duam ko gavgavir kamra Jonɨn ikɨtɨ, a Ekiamɨn faragh mangɨva, afeziabar amutɨ me ua uan boribagh ifueghɨva, akɨriba ragha God gasaraziba ua me damutɨ, me ua nɨghnɨzir aghuibar gumazamizibar amuva, egh gumazamizibav kɨmtɨma me uari akɨrɨghasɨ, egh Ekiam bagh mɨzuam ikiam.”

18 # Jenesis 18:11 Ezɨ Sekaraia enselɨn azara, “Kɨ ghurizɨ, nan amuim uaghan ghurigha gɨfa. Kamaghɨn amizɨ, kɨ manmaghɨn guizbangɨra bizir kam gɨfogham?”

19 # Daniel 8:16; 9:21; Matyu 18:10; Hibru 1:14 Ezɨ ensel an akam ikaragha ghaze, “Kɨ Gebriel. Kɨ Godɨn damazimɨn tughav iti. God uabɨ na amadazɨma, kɨ akar aghuir kamɨn nɨ mɨkɨmasa ize. 20#Esekiel 3:26; 24:27; Luk 1:45Nɨ nan akaba baregha nɨghnɨzir gavgavim dar itir puvatɨ. Bizir kam bangɨn nɨ mɨkɨman kogh mamaghɨra ikɨtɨ, bizir kaba otivamin dughiam otogham.”

21Ensel Sekaraia mɨgeima, gumazamiziba azenan ikia Sekaraia mɨzua ghuav amɨragha pura nɨghnɨsi, manmaghɨn amizɨma, a dughiar ruarimɨn Godɨn Dɨpenimɨn aven iti? 22Ezɨ an azenan otogha, me mɨkɨman asaghasaki. Ezɨ me fo, a ti Godɨn Dɨpenimɨn aven irebamɨn mɨn bizitamɨn gani. Egha an akamɨn me mɨgeir puvatɨgha dafaribara me mɨgei.

23 # 1 Eghaghaniba 9:25 Ezɨ an ingangarir dughiam gɨvazɨma, a uan nguibamɨn ghu. 24Dughiar maba ghua gɨvazɨma, an amuim Elisabet navim ada 5plan iakɨnibar uabɨ modo. 25#Jenesis 30:23; Aisaia 4:1; 54:1; 54:4Egha a kamaghɨn mɨgei, “Ekiam na bagha bizir kam gami. A nan apangkuvigha nan aghumsɨzim gumazamizibar damazimɨn anedangi.”

Ensel Maria bagha akam inigha zui

26Elisabetɨn navir adasem 6plan iakɨnimɨn otozɨma, God ensel Gebriel Nasaretɨn anemada, kar Galilin Distrighɨn aven itir nguibar ekiam. 27#Matyu 1:18; Luk 2:5Ezɨ ensel ghua, guivir igiar gumazitam koma akuizir puvatɨzim bato, an ziam Maria, me gumazim Josepɨn ikiasa a ginaba. Josep, an Atrivim Devitɨn ovavimra. 28#Gumazir Dapaniba 6:12; Daniel 9:23; 10:19Ensel a bagha ghua kamaghɨn a mɨgei, “Dughiar aghuarim Maria. Ekiam nɨ gifongegha deravɨra nɨ gamua egha nɨ ko iti.”

29Ezɨ Maria an akam baregha dɨgavir kuram gamigha pura nɨghnɨsi, “Kar akar manmaghɨn amizim?”

30Ezɨ ensel kamaghɨn a mɨgɨa ghaze, “Maria, nɨ atiatingan markɨ, God bar nɨ gifuegha nɨ ko iti. 31#Aisaia 7:14; Matyu 1:21; Luk 2:21Nɨ oragh, nɨ navim asegh otarim bateghɨva, ziar kam Iesus, a datɨgh. 32#Onger Akaba 132:11; Jeremaia 23:5; Mak 5:7#2 Samuel 7:12-16; Aisaia 9:7A ziar ekiam ikɨtɨ, me suam, kar Godɨn Bar Pɨn Itimɨn otarim. Eghtɨ God a damightɨ, a uan ovavim, Atrivim Devitɨn mɨn ikiam. 33#Daniel 2:44; 7:14; 7:27; Maika 4:7; Jon 12:34; Hibru 1:8Eghtɨ a Jekopɨn adarazir atrivimɨn ikɨvɨra ikiam. Eghtɨ a Bizibagh Ativamin Dughiar kam gɨvaghan kogham.”

34Ezɨ Maria kamaghɨn enselɨn azara, “Kɨ guivir igiar patamɨn itir puvatɨzim. Ezɨ bizir kam manmaghɨn na batogham?”

35 # Matyu 1:20; 14:33; Jon 1:34 Ezɨ ensel an akam ikaragha kamaghɨn mɨgei, “Godɨn Duam nɨ bagh izeghtɨ Godɨn Bar Pɨn Itimɨn gavgavim nɨ avaragham. Eghtɨ borim Godɨn damazimɨn zueghtɨ me Godɨn Otarim a darɨgham. 36-37#Jenesis 18:14; Jeremaia 32:17; Sekaraia 8:6; Matyu 19:26; Rom 4:21Bizitam Godɨn aven kozir puvatɨ. Nɨn anabam Elisabet, a ghuri, egha a uaghan navim adai. Me ghaze, a navim asangan kogham, ezɨ an navir adasem datɨrɨghɨn iakɨnir 6plan tu.”

38Ezɨ Maria kamaghɨn ensel ikara, “Kɨ Godɨn ingangarir amizim. Nɨ mɨkemezir moghɨra God bizibar na damu.” Ezɨ ensel anetegha ghu.

Maria Elisabetɨn ganasa zui

39Ezɨ dughiar kamɨn Maria uan biziba akɨrighava, zuamɨra nguibar ekiar Judian Distrighɨn mɨghsɨamɨn itimɨn ghu. 40Egha a Sekaraian dɨpenimɨn aven ghugha dughiam Elisabet ganɨngi. 41#Luk 1:15Ezɨ Elisabet Marian tiarim barazima, an borim an navimɨn aven aguaghfa, ezɨ Godɨn Duam Elisabet gizɨfa. 42#Godɨn Araziba 28:4; Gumazir Dapaniba 5:24Ezɨ a pamtemɨn tiarim akarigha kamaghɨn mɨgei, “Nɨ amizibagh afirazɨ God bar bizir aghuim nɨ gami. Egh a uaghan bizir aghuim borir nɨ oteghamim gami. 43Ezɨ God tizim bagha deravɨra na gami, ezɨ nan Ekiamɨn amebam na bagh izi? 44Nɨ dughiam na ganɨdima, kɨ nɨ barazir dughiamra, borir nan navir averiamɨn itim bar akuegha aguaghfa. 45#Luk 1:20Nɨ nɨghnɨzir gavgavim Godɨn iti, ezɨ Ekiam nɨ mɨkemezɨ moghɨn bizibar nɨ gami. Kamaghɨn amizɨ nɨ bar akongegh.”

Marian ighiam

46-49 # 1 Samuel 2:1-10; Onger Akaba 34:2-3; 71:19; 111:9; 126:2-3; Habakuk 3:18 # 1 Samuel 1:11; Onger Akaba 138:6; Malakai 3:12; Luk 1:25; 11:27 Ezɨ Maria kamaghɨn mɨgei:

“Kɨ pura Ekiamɨn ingangarir amizim,

kamaghɨn amizɨma a na ginɨrɨ.

Kamaghɨn amizɨ nan navim Ekiamɨn ziam fe.

Ezɨ nan duam God bagha bar akonge, a nan akurvazim.

God a bar gavgavigha bizir bar ekiabar na gami.

Ezɨ an ziam bar zuegha dera.

Kamaghɨn amizɨ, datɨrɨghɨn tugh mangɨ gumazamiziba na mɨkɨm suam,

God deravɨra nɨ gami.

50 # Ua Me Ini 20:6; Onger Akaba 103:13-18 God gumazamizir an atiatiava an apengan itibar apangkufi.

A kamaghɨra datɨrɨghɨn itir gumazamizibar amu,

egh gɨn izamin gumazamizibar amu mamaghɨra ikiam.

51 # 2 Samuel 22:28; Onger Akaba 98:1; Aisaia 40:10; 1 Pita 5:5 A uan dafarimɨn bizir bar gavgavibagh ami.

Gumazamizir uarira uan ziaba feba,

a men agɨrazɨ me are.

52 # 1 Samuel 2:6; Jop 5:11; 12:19; Onger Akaba 147:6 God atrivibar gavgavim dɨkabɨragha

gumazamizir kɨniba fe.

53 # 1 Samuel 2:5; Onger Akaba 34:10; 107:9 A bizir aghuiba isava mɨtiriaba azibagh anigha,

biziba bar izɨvaziba amangizɨma me pura ghue.

54-55 # Jenesis 17:7; 17:19; 18:18; 22:17; Onger Akaba 98:3; 132:11; Aisaia 41:8; Maika 7:20; Rom 11:28; Galesia 3:16 A uan ingangarir gumazim Israelɨn akura.

Egha en ovavibagh amizir Akar Gavgavim gɨnɨghnɨghavɨra iti.

Egha Abrahamɨn apangkuvigha,

gɨn otivamin gumazamizibar apangkuvigh mamaghɨra ikiam.”

56Maria iakɨnir pumuning ko mɨkezimɨn Elisabet ko ikegha gɨn uamategh uan nguibamɨn ghu.

Elisabet Jon batezir dughiam

57Elisabet otamin dughiam otozɨma, an otarim bate. 58An boroghɨra itir darazi ko an anababa kamaghɨn oraki, Ekiam an apangkuvigha bizir aghuimɨn a gamizɨ, me a ko bar akonge. 59#Jenesis 17:12; Ofa Gami 12:3; Luk 2:21Ezɨ an 7plan arueba gɨvazɨma, me borimɨn mɨkarzir mogomemɨn inim aghorasa izi. Egha me an afeziamɨn ziam Sekaraia a darɨghasa. 60#Luk 1:13Ezɨ an amebam kamaghɨn me mɨgei, “Puvatɨ! E Jon a darɨgham.”

61Ezɨ me kamaghɨn a mɨgei, “Nɨn anabatam ziar katam itir puvatɨ.” 62Egha me dafarimra an afeziamɨn azangsɨsi, a ziar manatam uan otarim darɨgham.

63Ezɨ Sekaraia an ziam osirasa biziba bagha dafaribara men azangsɨsi. Egha kamaghɨn osiri, “An ziam Jon.” Ezɨ me kamaghɨn ganigha bar aguaghfa. 64Ezɨ an akam zuamɨra kuiaghirɨzɨma an mɨzem fɨriaghɨrɨzɨ, a maghɨra mɨgɨava Godɨn ziam fe. 65Ezɨ an boroghɨn itir darazi kamaghɨn ganigha, bar atiatingi. Ezɨ Judian Distrighɨn itir nguibar mɨghsɨabar itibar gumazamiziba bizir otivizir kaba baregha dar gun uariv gei.

66 # Jenesis 39:2; Onger Akaba 80:17; Aposel 11:21 Ekiamɨn gavgavim borir kam ko iti. Ezɨ me bar moghɨra bizir kam baregha, a gɨnɨghnɨgha a bagha azangsɨsi, “Borir kam bar manmaghɨram otogham?”

Sekaraian ighiam

67 # Joel 2:28 Ezɨ an afeziam Sekaraia Godɨn Duam a gizɨvazɨma, a Godɨn nɨghnɨzimɨn gun mɨgei:

68 # Onger Akaba 41:13; 72:18; 106:48; Luk 7:16 “Ekiam iza uan gumazamiziba ua me ini,

kamaghɨn amizɨ, e an ziam fe,

a Israelian God.

69 # Onger Akaba 18:2 God en akurvaghasa

uan ingangarir gumazim Devitɨn adarazir aven gumazir bar gavgavim amɨsefe.

70 # Jeremaia 23:5-6; Daniel 9:24; Aposel 3:21; Rom 1:2 Godɨn akam inigha izir gumaziba

bizir kamɨn gun fomɨra kamaghɨn me mɨkeme.

71 # Onger Akaba 106:10 An en apaniba ko en atara pazav e gamibar dafaribar e iniasa ize.

72 # Jenesis 17:1; 17:7; Ofa Gami 26:42; Onger Akaba 105:8-9; 106:45 Egh apangkuvim en ovavibar akakaghɨva,

uan Akar Dɨkɨrɨzir Gavgavim ginɨrɨgham,

73 # Jenesis 22:16-17; Maika 7:20 Akar Gavgavir en ovavim Abraham ganɨngizim.

74 # Rom 6:18; 6:22; Hibru 9:14 Egh en apanibar dafaribar uam e inigh,

en amamangatɨghtɨ,

e an ingarsɨ atiatingan kogham.

75 # Efesus 4:24; 2 Timoti 1:9; Taitus 2:12-14; 1 Pita 1:15; 2 Pita 1:4 Egh an damazimɨn arazir aghuir a ifongezibar gɨn mangɨtɨ,

a ifongezir arazir aghuir kaba en ikiam.

76 # Aisaia 40:3; Malakai 3:1; 4:5; Matyu 3:3; 11:10 Ezɨ nɨ nan borim, nɨ faragh mangɨ Ekiam bagh tuavim akɨr.

Kamaghɨn amizɨ, me Godɨn Bar Pɨn Itimɨn akam inigha izir gumazim nɨ darɨgham.

77-78 # Aisaia 60:1-2; Jeremaia 31:34; Mak 1:4; Luk 3:3 Godɨn apangkuvim e ko itima,

a uan gumazamiziba ua me iniamin fofozim me ganɨga,

men arazir kuraba gɨn amadi.

Aruemɨn angazangarim Godɨn Nguibamɨn ikegh

e bagh izighiram.

79 # Aisaia 9:2; 49:9; 58:8; Matyu 4:16; Aposel 26:18 Egh angazangarim mɨtarmemɨn ikiava aremeghasava amibagh feghɨva,

egh navir amɨrizimɨn tuavim en suebar akagham.”

80 # Matyu 3:1; 11:7; Luk 2:40 Ezɨ Jon gɨn aghua gavgavizɨ, an duam uaghan aghua gavgafi. A ghua Judian gumazamiziba puvatɨzir danganimɨn ikegha, gɨn Israelɨn gumazamizibar damazimɨn azenan oto.

Currently Selected:

Luk 1: AruBib20

Highlight

Copy