Jɔnə 16

1“Maŋ sóŋ mənu mi mətsəm á mbô pɨ lə́ ńjî ńgə́ kɔ nə́ pɨ nəndzəmə. 2Pó yǒ kəmə̂ áwə́ənə́ á mə́m məndɛ̂ mə́ Əsê mə́ pəjusə, ndɛd kə́ ńtə́ ńgyǐəə páʼ təmbɔʼ ŋwu ntsəm páʼ a yǐ nə́ jwítə áwə́ənə́ a yǐ nə́ kwaŋ ńgə́ a faʼə̂ lə́ afaʼ yə əshîʼnə á mbô Əsê. 3Pó yǐ faʼ mənu mɨ lə́ ńté ńgə́ pó kě Tǎ kəənə mə jî pô. 4Lə́ maŋ sóŋ mənu məənə́ á mbô pɨ ńgə́ təmbɔʼ ndɛd əzɔb yǒ ńgyǐ nə kwúmtə ńgə́ maŋ nə ḿbɛ́dtə fiʼtə̂ áwɨ́ nə́ anu ńté ághóobə́.”

Afaʼ Páʼ Ajwǐəsê ä Faʼ nə́

“Maŋ nə ńkě mənu məənə́ á mbô pɨ fiʼtə̂ ə́fɛ́lə á nəfɛdnə́ lə́ ńté ńgə́ maŋ nə́ ńchî pɛnə̂. 5Lə́ nə́ pə́ əghâ nə́ mäŋ ghɛnə̂ lə́ á mbô yí páʼ a nə ńtú nə́ mə. Lə́ ŋwu əwɨ yitsə̌ a pə́ ńkě chî təmbɔʼ a pítə mə ńgə́, gho ghɛnə̂ lə́ ə́fó pô? 6Lə́, ńté ńgə́ maŋ sóŋ mənu məənə́ á mbô pɨ, afɨnə á lwɛ́nkə məntɨ́ mə́ənə́. 7Lə́ maŋ fiʼtə̂ áwɨ́ lə́ nə́ ndə̌ŋdəŋ ńgə́, á yǐ pɔŋə̂ á mbô pɨ ńgə́ maŋ ghɛnə̂ mə, ńté ńgə́ mbɔʼ maŋ chî ghɛn pô, Nkwáalə a yǐ kě á mbô pɨ yǐ pô, lə́ təmbɔʼ maŋ ghɛnə̂, maŋ yǐ ńtúmə a yə́ á mbô pəənə́. 8Lə́ əghâ páʼ a yǐ nə́ yǐ, a yǐ nɨd pɨ pə́ mbî ńgə́ anu pó kwaŋ nə́ ńté təpɔŋ, pó mətɨ nə́ ndə̌ŋdəŋ ḿbɨ́ ḿbə́ nə́ ndzaŋ əsê á yǒ nə́ sáʼ əsáʼ pəənə á ndu mbî ghɛn, əkwaŋ pipə wɨ́ kě koʼnə̂ pô. 9Akwaŋə azɔ́b ńté təpɔŋə á kě koʼnə̂ pô, ńté ńgə́ pó kě néŋ məntɨ́ mɔ́b nə́ maŋ pô; 10Akwaŋə azɔ́b ńté mə́ tɨ nə́ ndə̌ŋdəŋ á kě kə́ ńkoʼnə̂ pô ńté ńgə́ maŋ ghɛnə̂ a mə lə́ á mbô Tǎ, nə́ yǐ ńkě mə pɨ ńdzɨ́ pô; 11Anu pó kə́ nə́ ńkwaŋ ńté ndzaŋ páʼ Əsê á yǐ nə́ sáʼ məsáʼ mə́ pəənə á ndu mbî ghɛnə́ á kě kə́ ńkoʼnə̂ pô ńté ńgə́ a pɛ́dtə sáʼ əsáʼ ŋwunə á sáʼ nə́ mbî zəənə́.”

12“Maŋ pɛ́d ńtúg mənu mimə nɨ́ nə́ á mə́ sóŋ nə́ á mbô pəənə́, lə́ mɨ́d mə́ yǐ tyantə̂ tsɛɛlə̂ áwə́ənə́ mə́ zóʼ nə, atûə azə́ənə́ a kě nə́ mɨ́d kə́ ńdá pô. 13Əghâ ándó Ajwiə ndə̌ŋdəŋ á yǐ nə́ yǐ lə́, a yǐ ghɛd nə́ jîə ndə̌ŋdəŋ mənu ntsəmə. A yǐ kě pɨ pɛlə tséebə lə́ nə́ mətɨ mí pô, lə́ a yǐ tséebə lə́ anu páʼ a zóʼ nə́. A yǐ fiʼtə̂ áwɨ́ nə́ mənu mətsəm mə́ chî nə́ á mə́ yǐ nə́. 14A yǐ fɛ̂ nəgháʼə á mbô maŋə, ńté ńgə́ a yǒ lɔg lə́ mənu páʼ mə́ pə́ nə́ məmá ə́fiʼtə̂ áwɨ́ nə́ mə́ələ́. 15Ajúmə atsəm páʼ Tǎ túg nə́ lə́ azéemə; Lə́ ghɛd ə́lɨ́d maŋ sóŋ ńgə́ a yǐ lɔg lə́ mənu páʼ mə́ pə́ nə́ məmá ə́fiʼtə̂ áwɨ́ nə́ mə́ələ́.”

Afɨnə Pó Akɔŋtə

16“Tsɔʼə ngǎ pɛ̌ lə́ nə́ kě mə pɨ ńdzɨ́ pô, lə́ nə́ mɔ́ akəmə ndɛd yitsə̌ nə́ pɨ ńdzə́ənə a mə.”

17Ngaŋə́zoŋə́ndzəm əjí yitsə̌ tíʼə ńtséebə tətɨ pó ə́sóŋə ńgə́, “Lɛ̌ lə́ akə̂ anu páʼ a sóŋ nə́ á mbô pɛn ńgə́, ‘Tsɔʼə ngǎ pɛ̌ nə́ kě mə pɨ ńjɨ́ pô, lə́ nə́ mɔ́ akəmə ndɛd yitsə̌ nə́ pɨ ńdzə́ənə́ mə, ḿbɨ́ ńkə́ ńgə́ mäŋ ghɛnə̂ lə́ á mbô Tǎ.’ 18Pó pítə á ndzɔʼ pó ńgə́, Nətɛ́n nə́ ‘mɔ́ akəmə ndɛd’ zɨ lə́ ńgə́ akə̂?” Pəg kě anu páʼ atsáb yəwə́ a sóŋ nə́ jî pô.

19Yeso a jîə anu pó lɔ nə́ á mə́ pítə nə́ yí ə́wɨ́ ńtíʼ ə́sóŋ nə́ pó ńgə́ “Maŋ pěʼ sóŋ ńgə́ tsɔʼə ngǎ pɛ̌ nə́ kě mə pɨ ńdzɨ́ pô, lə́ nə́ mɔ́ akəmə ndɛd nə́ pɨ ńdzə́ənə mə. Lɛ̌ anu nə́ pítə nə́ tətɨ pɨ lə́? 20Lə́ ndə̌ŋdəŋ maŋ fiʼtə̂ nə́ áwɨ́ ńgə́: nə́ yǒ kyéŋ tə ḿmɨ́ʼə, lə́ mbî pə́ ńtə́ ńkɔŋtə̂. Nə́ yǒ chîə á mə́m afɨnə lə́ afɨnə azə́ənə́ á tíʼ sɛdnə̂ ḿbə́ akɔŋnə. 21Əghâ ándó məngyě a zóʼ nə́ mɔ́ lə́, a chîə á mə́mə afɨnə ńté ńgə́ ndɛd ngə́ʼ əjǐ ə́ koʼə̂. Lə́ əghâ ándó a pî nə́ mɔ́ yi wɨ́ lə́ a ləgnə̂ yí ngə́ʼ əjǐə, ńté ńgə́ a tə́ ńkɔŋtə̂ ńgə́ a pîə a móonə á mə́m mbîə. 22Lə́ pɨ, pɨ kə́ nə́ ńchîə á mə́mə afɨnə əghâ nə́, maŋ yǐ pɨ zə́ənə áwɨ́ nə́ tíʼə ńkɔŋtə̂, ŋwu tsə́ aláʼ ńkě akɔŋnə azə́ənə́ á mbô pɨ kwá pô.”

23Alě yi ə́wə́ a láʼ koʼ lə́ nə́ kě ajûtsə́ á mbô maŋ pítə pô. Lə́ ndə̌ŋdəŋ maŋ fiʼtə̂ nə́ áwɨ́ ńgə́, “Tǎ yǐ fɛ̂ ajúmə atsəm á mbô pɨ páʼ pɨ pítə nə́ nə́ əlɛ́nə mə. 24Tə́ koʼ nə́ pə́ əghâ nə́ nə́ mǎ ḿbɛ́d tə ḿbítə ajú yətsə́ nə́ əlɛ́nə mə, təmbɔʼ nə́ pítə tə ḿbə́ pɨ yǐ kwáalə, ńjî ńgə́ akɔŋtə azə́ənə́ á lwɛ́nkə.

Ndzaŋə Ándó Yeso a Maʼ nə́ Ntso Ńtsɛ Mbîə

25Maŋ fiʼtə̂ áwɨ́ nə́ mənu mɨ lə́ nə́ ətsábnə́múʼə́. Lə́ ndɛd tə́ ńgyǐəə páʼ maŋ yǒ kě á mbô pɨ nə́ ətsábnə́múʼ pɨ tsáb pô lə́ ə́ tíʼə tséebə á mbô pɨ nə́ ndú mbɔʼ ŋwu ntsəmə á zóʼə. 26Á yǒ pə́ alě yi wɨ́ lə́ nə́ tíʼə ḿbítə yí nə́ əlɛ́nə mə. Maŋ kě sóŋ lə́ ńgə́ maŋ yǒ tíʼə chaʼtə́sê té atûə azɨ́ pô, 27ńté ńgə́ Tǎ nə́ nkɔ̌ʼmbɨ əyí a kɔŋə̂ áwə́ənə́. A kɔŋə̂ áwɨ́ lə́ ńté ńgə́ nə́ kə́ ńkɔŋə̂ mə ńkə́ ḿbɨ́ ńgə́ maŋ lǒo lə́ á mbô Tǎ. 28Maŋ nə ńdǒo lə́ á mbô Tǎ ńtíʼ ńgyǐəə á mə́m mbîə, lə́ nə́ pə əghâ nə́ maŋ yǐ mɛdtə̂ mbî ə́ ghɛnə̂ á mbô Tǎ.”

29Ngaŋə́zoŋə́ndzəm əjí tíʼ sóŋə á mbô yí ńgə́, “Náŋə, gho tsáb əghâ nə́ á mbô pəg lə́ nə́ ndú páʼə atûə azə́gə́ á lá nə́, gho kě pɛ́lə ńtséebə lə́ nə́ ətsábnə́múʼ pô. 30Pəg jî ńgə́ gho jî mənu mətsəm əghâ nə́, gho kě pɨ ńdɔ ńgə́ ŋwu tsə́ a pítə á gho nə́ apítə atsáb pô. Zə́ənə́ á nɨd ńgə́ pəg jî ńgə́ gho lǒo lə́ á mbô Əsê.”

31Yeso a kwěe ághɔ́b ńgə́, “Nə́ pí əghâ nə́? 32Ndɛd tə́ ḿbáatə, lə́ ndɛd pɛ́d tə ńgyǐəə, páʼ pə́ yǒ nə́ shamkə̂ áwɨ́ tsɔʼə pətsəmə, ŋwu ntsəmə a ghɛnə̂ á ngyaʼə́ yə́, ə́ tíʼ ḿmɛdtə̂ mə maŋ təjiʼə. Lə́ maŋ kě lə́ maŋ təjiʼ chî pô, ńté ńgə́ Tǎ chî pəg yə́. 33Maŋ pɛ́dtə ə́sóŋə anu zəənə́ á mbô pɨ ńgə́ nə́ chî nə́ mbwɔ́dnə ndzaŋə ándó pɨ pádnə nə́ maŋ lə́. Mbî yǒ ghɛd nə́ zɨ́ ngə́ʼə, lə́ tɨ́ nə́ ńtyantə̂ ńté ńgə́ maŋ pɛ́dtə ńtsɛ mbî ntsəmə.”

Currently Selected:

Jɔnə 16: azo

Highlight

Copy