Məfaʼə 8

1 Sɔlə a Tsaŋkə̂ Nkyeetə pɔ́ pə́ Əsê

1Pə́ kə tə́ ńjwítə Stifən lə́ Sɔl a kə kə́ ńchîə ají ə́wə́.

Tsɔʼə alě wɨ́d wə̂, pə́ chúʼə á mə́ chígə́ nə́ tsaŋkə̂ nkyeetə pɔ́ pə́ Əsê á Jɛlusalɛmə. Ŋwu ntsəm páʼ a nə ḿbí nə́ nə́ Yeso pó nə shamnə̂ ə́fɛ́lə Jɛlusalɛm ńkə ńgɛn nə́ əlá aláʼə Judya pó Samalya tə ńdéʼtə məntú mə́ Yeso. 2Pɨ pətsə́ páʼ pó nə̈ ḿbɔ́g nə́ Əsê pó tíʼ ńdɔgə̂ akwûə Stifən ńgɛn ńtwə́ŋ, ńtíʼ ḿbyádnə ńkyéŋə yí məngye mɔ́b mə́ kɔ́ʼə atǐə. 3Lə́ Sɔlə a pə́ ńchúʼə á mə́ fɛ̂ nə́ ngə́ʼ nə́ nkyeetə pɔ́ pə́ Əsê. Ə́fɛ́lə nə táʼ ndɛ̂ ńkwúnə nə́ yitsə̌ ńgwam mbyâŋnə pópə pəngyě ə́soŋə̂ ńgɛnə̂ ńnéŋə á nkáʼə atsáŋə.

1 Filibə a Sóŋə Anǔəsê á Samalya

4Pə́ kə shamkə̂ nkyeetə pɔ́ pə Əsê lə́, aliʼə́ atsəm pó kwú nə́ ə́wɨ́ pó sóŋə anǔəsê. 5Filibə a tsó ńgɛnə̂ á aláʼ yitsə̌ á Samalya ə́sóŋə anu ńté Yi Ńtsəʼ nə́ á mbô pó. 6Mboŋ pɨ nə ńtə́gə atû ńjwə́ʼtə anu páʼ Filibə a nə̈ sóŋ nə́, ndzaŋ pó nə ńjɨ́ nə́ əkɨʼnəmə́nu páʼ a nə̈ ńgɛd nə́. 7Əjwi təpɔŋ ə́ nə fɛ́lə á mə́m pɨ pi nɨ́ nə́ ńkyéŋə nə́ tə́kɔʼ ngye. Pəkɔ́ŋə́sê pópə pɨ pə́ nə ńkwû nə́ táʼ əlá pi nɨ́ nə́ pə́ nə ńgyáŋə. 8Ńdaŋ ə́lɨ́d mbɨ ngaŋ tə́kɔʼ tɔ̂ŋ yi wɨ́ ə́ pyádnə ḿbɔŋə̂.

1 Saamun Ngaŋnəkaŋə a Pímə Anǔəsê

9Ŋwu tsə̌ a nə ńdáʼ ńchîə aláʼə Samalya nə́ məndɛd mətsɨ́ pə́ fóŋə nə́ Saamunə, ńgɛlə̂ nəkaŋə a kɨʼnə̂ a ŋwu ntsəmə. A nə ńdɔg mbɨ əjǐ ńgə́ yí lə́ ŋwu yi ngweŋə́. 10Ŋwu ntsəmə á mə́mə aláʼ ńchúʼ nə́ asáŋəsáŋə́ ńkɔ́ʼ ńkoʼ nə́ pɨ pi weŋə́ kə zá ńdzóʼə á mbô yí ńtíʼə ə́sóŋə ńgə́, “Ŋwu nə́ lə́ mətɨ mə́ Əsê zə̂ páʼ pə́ fóŋ nə́ nə́ ‘Mətɨ mimə weŋ lə̂.’ ” 11Pó nə̈ ńdzóʼə á mbô yí ńté ńgə́ a nə ńkɔ́g ńchwáakə á mə́ ghɛd nə́ əkɨʼnəmə́nu nə́ nəkaŋ tə ndi sagə̂. 12Əghâ ándó pó nə ńdzóʼ nə́ ńkə́ néŋ ntɨ́ əghɔ́b nə́ nkɨ yi əshîʼnə páʼ Filibə a nə́ ńgyǐ nə́ nə́ wɨ́d ńté Anuə Nəfoonə Əsê pó əlɛ́n Yeso Klisto lə́, ŋwu ntsəmə á tíʼ ńkwá nkǐə, mbyâŋnə pópə pəngyě. 13Saamunə a kə́ néŋ əyí ntɨ́ nə́ nkɨ yi əshîʼnə wə́ ńkwá nkǐ ńtíʼə ńdzoŋə̂ Filib ńgɛnə̂ á aliʼə́ atsəm. Əkyeʼmə́nu pópə pətə́kɔʼ pə́ əkɨʼnəmə́nu páʼ a nə ńjɨ́ nə Filibə ä ghɛlə̂ ə́ nə ńkɨʼnə̂ yə́.

14Əghâ ándó məntú mə Yeso mə́ nə ńchî nə́ á Jɛlusalɛm pó nə ńdzóʼ nə ńgə́ pɨ pə́ Samalya pó pímə anǔəsê lə̂, ńtíʼ ńtúmə Pita pó Jɔnə á mbô pó. 15Pó nə ńgyǐ ńkoʼ ə́wɨ́ lə́ ńchaʼtə́sê atû pó ńgə́ mbɔʼ pó kwáalə Ajwǐəsê. 16Ńté ńgə́ Ajwǐəsê a nə ńkě á mə́m ŋwu əghɔb yitsə̌ kə́ kwúnə pô. Pó nə ńkə́ ńkwá lə́ tsɔʼə nkǐ nə́ əlɛ́n Mmaʼmbî Yeso. 17Pita pó Jɔn tíʼ ńnoŋkə̂ mbô móobə́ á ndu pó, Ajwǐəsê a tíʼ ńkwúnə á mə́m pó.

18Saamun a jɨ́ ńgə́ Ajwǐəsê a nə̈ ńkwúnə á mə́m pɨ ńdaŋə̂ lə́ ndzaŋ məntú mə́ Yeso mə́ nə̈ ńnoŋkə̂ nə́ mbô a atû pəənə. Ńtíʼ əfɛ̂ nkáb nə́ pó, 19ə́sóŋ ńgə́, “Fɛ̂ nə́ mətɨ mɨ nə́ maŋ ńjî ńgə́ ŋwu ntsəm maŋ noŋkə̂ nə́ á apô mə á ndu yí, Ajwǐəsê a kwúnə a mbɨ yə́.”

20Pita a kwěe ńgə́, “Pɨ pə nkáb əzo ə́ kɛ́lə á mógə́, ndzaŋ páʼ gho kwaŋ nə́ ńgə́ mbɔʼ gho júnə ajú páʼ Əsê á fɛ̂ nə́ kətaŋ lə́! 21Gho kě nə́ anu yətsə́ á mə́mə afaʼ jɨ kwéʼnə ńchî pô, ńté ńgə́ ntɨ́ gho kě á mbi Əsê ŋwaʼ pô. 22Kwúblə á mə́m ndzaŋ təpɔŋ jɨ ńtíʼ ńchaʼtə́sê á mbô Mmaʼmbî əghâ tsə́ a yǐ ńdəgnə̂ təpɔŋ əgho nə́ ndzaŋə akwaŋ páʼ gho pěʼ nə́ ńtúg lə̂. 23Ńté ńgə́ maŋ jɨ́ ńgə́ ŋwéetə́ á lwɛ́nkə á ntɨ́ gho, təpɔŋə á tíʼ ńdɔgə̂ gho ə́sɛlə̂ a ngaŋətsáŋ ə́wə́.”

24Saamunə a tíʼ ə́sóŋ nə́ Pita pó Jɔn ńgə́, “Chaʼtə̂ nə́ Əsê á mbô maŋ, ḿbóʼmbô nə́ Mmaʼmbî ńjî ńgə́ kɔ anu yətsə́ pɨ sóŋ nə́ á ghɛlə̂ mə.”

25Əghâ ándó pó nə sóŋ nə́ anu pó nə ńjî nə́ ńté Yeso ńkə́ ḿbɨ ə́sóŋə anǔəsê lə̂, Pita pó Jɔn tíʼ ḿbəənə̂ á Jɛlusalɛm ńnyinə̂ ə́sóŋə anǔəsê á mə́m əláʼ pi nɨ́ nə́ á Samalya.

Ngaŋəfaʼ yi Ngweŋə́ á Ntɔ́ʼ Əfo Etopya a Kwúblə Ńdzoŋ Ndzəm Yeso

26Ntseŋndɛ̂sê yi Mmaʼmbî a sóŋə á mbô Filib ńgə́, “Lǒ əsê ńtsó ńgɛnə̂ á alaŋə́sêndú páʼ á fɛ́d nə́ Jɛlusalɛm ńgɛnə̂ á Gaza lə̂.” (Pə́ kě alaŋə́ wɨ́d ghɛn ə́sɛ̂n pɛ́lə ńdaŋə̂ pô). 27A tíʼ ə́fɛ́d ńtə́ ńgɛnə̂ ńjwánə a ngaŋəfaʼ ntɔ́ʼ Etopya yi ngweŋ yitsə̌, a nə ḿbə́ lə́ ŋwu páʼ a nə̈ ńdɔʼkə̂ nə́ nkáb Kandesə páʼ a nə ḿbə́ nə́ Əfo Məngyě á Etopya. Ŋwu yi wə́ a nə ńgɛnə̂ Jɛlusalɛmə lə́ mə́ ghóʼkə nə́ Əsê. 28Ńgyǐ ńtə́ ḿbəənə̂ lə́ ńnáanə á mə́m muto əyǐ páʼ pələəmə́ pə́ sóŋ nə́ ńtə́ ə́fóŋə aŋwaʼlə ntûsê Izaya. 29Ajwǐəsê a sóŋə á mbô Filib ńgə́, “Ghɛn ńtégə muto páʼ pələəmə́ pə́ sóŋ nə́ lə́ ńtə́ ńnyinə̂ á nəpɛnə́ ə́wə́.” 30Filibə a tíʼ ńkə ńgɛnə̂ á nəpɛnə́ wɨ́ ńtíʼ ńdzóʼ ndzaŋ páʼ ŋwu wə̂ a fóŋ nə́ aŋwaʼlə ntûsê Izaya. Filibə a pítə yí ńgə́, “Gho fóŋə lɛ̌ tə ńdzóʼə anu páʼ aŋwaʼlə yəwə́ ä sóŋ nə́?”

31Ŋwu wə̂ a kwěe ńgə́, “Mbɔʼ maŋ pə́ ńdzóʼ ə́lɛ́ tə ńdéʼtə ŋwu tsə̌ a tsoŋkə̂ ńtyáatə á mbô maŋə.” Ńtíʼ ńgwúnə Filib ńgə́ a yǐ ńkɔ́ʼ ńnáanə ḿbáatə yə́ á mə́m muto páʼ pələəmə́ pə́ soŋ nə́ lə̂. 32Ngaŋəfaʼ yi ngweŋ wə̂ a nə̈ fóŋə lə́ aliʼə́ aŋwaʼlə jɨ páʼ ä sóŋ nə́ ńgə́,

“A kə chîə ándó mbéŋ páʼ pə́ lɔg nə́ ńtə́ ńgɛnə̂ á mə́ wad nə́,

ńkə́ ńchî lə́ ándó mɔ́ aŋkoomə páʼ pə́ tə́ nə́ ńkóomə mənoŋ míə á kě tə́ ńkyéŋə pô,

ńkě ntso əyí kwíʼnə ŋ́ŋáʼ pô.

33Pə́ nə ńnéŋ əsə́ənə atû yí, ŋwu tsə̌ a kě ə́wɨ́ chî təmbɔʼ a sáʼ əsáʼ əyí ndə̌ŋdəŋ pô.

Ŋwu tsə̌ a kě ə́wɨ́ chî təmbɔʼ a sóŋə anu ńté ngwud əjǐ pô.

Ńté ńgə́ nchîmbî əjǐə á ndu mbî zɨ́d měe.” 34Ŋwu yí wə́ a tíʼ ḿbítə Filib ńgə́, “Fiʼtə̂ mə ńgə́ ntûsê a sóŋə anu jɨ ńté lə́ mbɨ əjǐ kɨ ńté lə́ ŋwu ndaʼə?” 35Filibə a tíʼ ńchúʼ tsɔʼə nə́ aliʼə́ aŋwaʼlə jɨ́d zə̂ á mə́ tsáb nə ńtíʼ ə́fiʼtə̂ yí nə́ nkɨ yí əshîʼnə ńté Yeso.

36Ndzaŋ pó nə ńtə́ nə́ ńnyinə̂ lə́, ńgyǐ ńkoʼə̂ á ntso nkǐ yitsə̌ ngaŋəfaʼ yi ngweŋ wə̂ a sóŋ nə́ Filib ńgə́, “Zə́ənə! Lɛ̌ nkǐə, akə̂ a yǐ nə́ zɔŋ ńgə́ kɔ maŋ kwá nkǐə?” #8.36Pətsə́ əŋwaʼlə ə́ kě nkaŋ 37 túg pô. Wə́ələ́ á sóŋə ńgə́, “Filibə a kwěe ńgə́, ‘Təmbɔʼ gho kwá nkǐə, páʼ təmbɔʼ gho pí nə́ ntɨ́ əghô ətsəmə.’ Ŋwu wə̂ a kwěe ńgə́, maŋ pímə, maŋ pí ńgə́ Yeso Klisto lə́ mɔ́ Əsê.” 38Ŋwu wə̂ a tíʼ ə́sóŋ ńgə́ pə́ tɨ́ nə́ yə́. Pə́ tɨ́, pó Filib tíʼ ńtsó ńgɛnə̂ á mə́m nkǐ, Filibə a tíʼ ə́fɛ̂ nkǐ nə́ yə́. 39Əghâ ándó pó nə fɛ́d nə́ á mə́m nkǐ ńkɔ́ʼə á asəg lə́, Ajwǐəsê a lɔgə̂ Filib ńgɛn nə́ yə́. Ngaŋəfaʼ yi ngweŋ wə̂ a kě yí pɨ ńjɨ́ pô. Lə́ ḿbə́ ńtə́ ńgɛnə̂ yí akɔŋtə á lwɛ́nkə ntɨ́ yə́. 40Filibə a tíʼ ńdeŋ mbɨ əjǐə á pə́ Azotos ńtíʼə ńkéelə ńnyinə̂ á mə́m əláʼ ətsəm ńnáŋkə nkɨ yi əshîʼnə tə ńgɛn ńkoʼə̂ a Kasalya.

Currently Selected:

Məfaʼə 8: azo

Highlight

Copy