Məfaʼə 6

Pə́ Tsɔ́ʼ Pɨ Pɛ́n Asaambɛ̂ Ńgə́ pó tə́ Ńkwáatə

1Nə́ ndɛd jɨ́d zə̂, ndzaŋ ngaŋə́zoŋə́ndzəm Yeso kə̈ peg nə́ ndɛn əghɔ́b ńgɛnə̂ nə́ mbi lə́, azɔŋə a tíʼ ə́fɛ́lə á tətɨ Pəjus páʼ pó nə̈ ńtsáb nə́ atséebə Glik pópə Pəjus páʼ pó nə̈ ńchî a Jɛlusalɛmə. Lə́ kə pə́ ńgə́ Pi páʼ pó nə̈ ńtsáb nə́ Glik lə́ pó nə ńgə́ Pi pó chî nə́ Jɛlusalɛm pə́ nə̈ ḿmyaʼə̂ pəpɔ́b pəkog á əlě ətsəm pó ghab nə́ məjîə. 2Məntú mə́ Yeso mə̂ ntsɔb pɛ̌ mə́ tíʼ fóŋə apuʼə ngaŋə́zoŋə́ndzəm Yeso zə̂ tsɔʼə ətsəm ə́sóŋ nə́ pó ńgə́, “A kě pɔŋə̂ á mbô pɛnə̂ á mə́ mɛdtə̂ nə́ á mə́ tə́ nə́ sóŋə anǔəsê tə́ náŋə anu té məjî pô. 3Pəlim, tsɔ́ʼ nə́ pɨ pɛ́n asaambɛ̂ á mə́m pɨ páʼ nə́ jî nə́ ńgə́ pó túgə mbɔ́ yi əshîʼnə, ńdwɛ́nkə nə́ Ajwǐəsê ńkə́ ńtúgə ajíənuə, ńjî ńgə́ pəg mɛdtə̂ afaʼə agheebə məjî zəənə́ á mbô pó, 4ńtíʼ ńnéŋ ntɨ́ əwə́gə́ á mə́ chaʼtə̂ nə́ Əsê ə́ kə́ sóŋə anǔəsê.”

5Anu jɨ pó nə ə́sóŋ nə́ lə́, á nə ḿbɔŋə̂ ŋwu ntsəmə á mə́m nkyeetə. Pó tíʼ ńtsɔ́ʼə Stifən páʼ a nə ńdwɛ́nkə nə́ nə́ mbimə́ pó Ajwǐəsê. Ńkə́ ńtsɔ́ʼə Filib pó Plokɔlɔs nə́ Nikano ḿbɨ ḿbə́ nə́ Timɔn pó Pamɛna ḿbéenə Nikolas páʼ a nə ḿbə́ nə́ Təjǐsê ə́fɛ́lə Antiok pə́ yǐ ńtíʼ ə́sɛdkə̂ yə́ a tíʼ ḿbə́ ŋwu Jusə. 6Pó tíʼ ńdɔgə̂ ághɔ́b ńgyǐ nə́ pó á mbô məntú mə́ Yeso mə̂ pó tíʼ ńnoŋkə̂ mbô móobə́ á atû pó ńchaʼtə́sê nə́ pó.

7Atséebə Əsê a tíʼ ńgɛn nə́ mbiə á mə́ kwú nə́ a mətôglə pɨ pipə nɨ́ nə́. Ndɛn ngaŋə́zoŋə́ndzəm Yeso á Jɛlusalɛm ə́ tíʼə ńkwíŋə tsɔʼə nə́ mətɨ mətəənə. Ngaŋə́pêsê yi nɨ́ nə́ ə́ pí ńdzoŋ ndzəm Yeso.

Pə́ Waamə̂ Stifənə

8Apɔŋə́ntə́əmə Əsê pó mətɨ mə́ Əsê mə́ nə́ ńdwɛ́nkə á mbɨ Stifən a tíʼə ńgɛlə̂ pətə́kɔʼ pə́ mənu mimə yɛ́d nə́ yɛ́d nə́ pópə əkyeʼmə́nuə á mə́m pəənə. 9Pɨ pətsə́ pó nə ńchwáakə á mə́ kǐ nə́ anu páʼ Stifənə a nə̈ sóŋ nə́ ńkə́ ńgɛlə̂. Lə́ nə́ ḿbə́ pɨ pə́ ndɛ̂sê Pəjusə páʼ pə́ nə̈ fóŋ nə́ ághɔ́b ńgə́ (pɨ pə fɛ́d nə́ á mə́mə apoʼə). Pó nə ə́fɛ́lə á Silien pó Alekzanda. Pó pətsə́ Pəjus páʼ pó nə fɛ́d nə́ á Silisya pó Esya pó chúʼə á mə́ zɔŋ nə́ pópə Stifənə. 10Lə́ Ajwǐəsê a pə́ ə́fɛ̂ ajíənuə á mbô Stifən nə́ əsêndú ńgə́ mbɔʼ a tsáb, ŋwu tsə̌ a kě pɨ ḿbəŋ pô.

11Pó tíʼ ḿbánə ńtóotə pɨ pətsə́ ńgə́ pó sóŋ ńgə́, “Pəg nə ńdzóʼ ndzaŋ páʼ ä tsáb nə́ atséebə atság ńdzɔmtə̂ Mosisə pó Əsê.”

12Pó tíʼ ńgɛd məndě mə́ pɨ mə́ záŋnə, ḿbá mətû mə́ aláʼ ḿbɨ ḿbə́ nə́ ngaŋə́zéʼkə pənoŋkə, pó tíʼ ńgɛn ńdzǎ Stifən ńgyǐ nə́ yə́ á mbi ngaŋə́sáʼə́məsáʼə. 13Ńtíʼ ńdɔg pɨ pətsə́ ńkwú nə́ pó ńgə́ pó tsɨd ntsəələ atû yí ńgə́, “Ŋwu nə́ a zá ńtséebə təpɔŋ ńté Tə́kɔʼndɛ̂sê pó məntəgə́ mə́ Mosisə. 14Pəg nə ńdzóʼə a sóŋ ńgə́ Yeso Mɔ́ Nazalɛd ghɛn a yǐ shaʼtə̂ Tə́kɔʼndɛ̂sê ghɛn ə́ pɨ kə́ kwúblə pənoŋkə páʼ Mosisə a nə ə́fɛ̂ nə́ nə́ pɛnə̂.”

15Ŋwu ntsəm páʼ a nə ńnáanə nə́ á aliʼə́sáʼə́məsáʼ a tíʼ ńtə́g əmə́g nə́ Stifən ńtíʼ ńjɨ́ ńgə́ əshî əyí ə́ nə ńchîə pə́ ándó əshî ntseŋndɛ̂sê.

Currently Selected:

Məfaʼə 6: azo

Highlight

Copy