Marko 3

Eichiunyie ꞉Yeso ltung'ani oikaolo nkaina ta mparri e Sabato

(Matayo 12:9–14; Luka 6:6–11)

1Neitoki Yeso ajing atua Sinagogi, netii inie ltung'ani oikaolo nkaina. 2Newueni ltung'ana aaleen tanaa keichiunyie ꞉Yeso ilo tung'ani ta mparri e Sabato payie etum aatilikoi ninye meiguanareki. 3Nejoki Yeso ilo tung'ani oikaolo nkaina, <<Wou ntacho te nkiji e ene!>>

4Neipar ꞉Yeso ninche, ajoki, <<Kaa naichiaakino tee nkitanapat ta mparri e Sabato, teneasi supat ana teneasi ntorno? Tanaa sii, teneitopoki ana teneri metua?>> Kake nejo ꞉ninche tau!

5Neitamanaa nkonyek aing'or ninche to ngoro, eisinanio oleng tankaraki e ngolon ee nkuechi enche, nejoki ilo tung'ani, <<Ntusunyai nkaina ino!>>

Neitusunyaa nkaina enye, neichiu asupatu aitoki. 6Neipung Lparisayo nabokata aaiguana tenebo o lolo tung'ana le Erode, aayiaya loseg oaarie Yeso metua.

Eotuo lturrurri kumo netii Yeso

7Neing'uaa Yeso inie, nelo o looiteng'eni lenyena nchepata e mpaso, neirukurukore lturrur kitok ninche oing'uaa Galilaya. 8Naa kore tankaraki naning'orita ltung'ana mbaa kumo e nking'asia naasita Yeso, nepuonu eing'uaa Yudea o Yerusalem o Idumea o lkokun le Yordan o looing'uaa aitoki Tiro o Sidon, netii ninye. 9#Mrk 4:1; Luka 5:1–3Naaku kore tankaraki ilo turrur kitok, nejoki ꞉Yeso looiteng'eni lenyena meitibira meli pee meiding'akini ninye. 10Amu /keichiunyie apa lkumo, metaa kore lolo pooki oata moyianitin, nediding'unye aayiaya nkoitiei naiseyie ninye. 11Naa kore aitoki nkata pooki nadol ninye ꞉lairiruani, nerriaa ninche tekue ninye neichir aabuak, aajo, <<Ira iyie Nkerai e Nkai.>> 12Kake neing'ode ꞉Yeso ninche ajoki, pee melikoo aajo ng'ae era.

Ngelunoto ee lkipaareta tomon o oare

(Matayo 10:1–4; Luka 6:12–16)

13Neiliep Yeso alo lowua, neipot lolo ooyieu ꞉ninye, nepuonu ninche netii ninye. 14Negelu tomon o oare, neicho nkarna ajo <<lkipaareta>>, pee eaku tenebo o ninye, netum sii airruai ninche mechomo aalikoo Lomon Supati. 15Neicho nkitoria naararie lairiruani meeipung'o, neichiunyie moyianitin. 16Naa kulo tomon o oare taa apa etegelua ninye:

Simon oichoo nkarna naji Petero

17o Yakobo layieni le Sebedayo

o lalache lenye oji Yoana, oichoo ninche nkarna naji Boanerges aa keji layiok le nkurrukurroto

18o Andirea

o Pilipo

o Batolomayo

o Matayo

o Tomas,

o Yakobo layieni le Alpayo,

o Todayo

o Simon ilo agoloni

19o Yudas Isikariot, lapa otilikoyie Yeso meibung'i.

Yeso o Beelsebul

(Matayo 12:22–32; Luka 11:14–23, 12:10)

20Nejing Yeso nkang, neitoki ltung'ana aaiturrurrokino ninye o looiteng'eni lenyena, metala ninche neiko tenenya ndaa. 21Kore pee ening ꞉nkang enche ana, nepuo aibung ninye ayau, amu ketejo merekure ebore nkue.

22 # Mat 9:34, 10:25 Nejo laiteng'enak loo nkitanapat ooing'uaa Yerusalem, <<Keitoria ninye ꞉Beelsebul, naa te ilo kitok laa lairiruani earaa ꞉ninye lairiruani meeipung'o.>>

23Neipot ꞉Yeso ninche meotu netii, neirorie ninche tee nkitanyanyukot ajoki, <<Aji eiko Chitani tenearaa chitani meeipung'o? 24Naa kore teneoro nkitoria arere koon, meidim inia kitoria aitacho. 25Kore teneoro nkaji arere koon naa meidim inia aji aitacho. 26Naa teneinyuototo Chitani arere koon netum oro, naa meitache nkitoria enye kake keiting. 27Nemeatae ltung'ani oidim atijing'a nkaji e ltung'ani ogol neisimaa aya ntokitin enyena, mara keteena ang'as ilo tung'ani ogol. Kore inia kata netum atupurro nkaji enye. 28Kake kedede kajoki ntae sipata nadede, kore pooki ng'oki o pooki deket odekicho ꞉ltung'ana menya ajo ldeket otuwuaja edekicho, naa kepalikini. 29#Luka 12:10Kake kore ꞉ltung'ani odek Ltau Sinyati, naa mepalikini ninye aikata, amu etaasa ninye ng'oki nabik ntarasi.>>

30Naa nejia etiaka ꞉Yeso ninche, tankaraki najoito, <<Keata ꞉ninye lairirua.>>

Ng'ae ng'otonye o lalachera Yeso?

(Matayo 12:46–50; Luka 8:19–21)

31Nebau taa ng'otonye Yeso inie o lalachera lenyena. Kore eitachoo to boo, neirruaaya ltung'ani meipoto ninye. 32Netii apa lturrur owuon aigilu Yeso, nejoki ꞉ninche ninye, <<Ng'ura, ikiyeita iyie ꞉ng'utunyi o lalachera linono to boo.>> 33Neng'amaa ꞉Yeso ninche ajoki, <<Ng'ae dei yieyio naa oo ng'ae lalachera lainien?>> 34Neitamanaa ninye nkue aing'or lolo oowueni aigilu ninye, nejoki, <<Kore yieyio o lalachera lainien naa kulo! 35Amu kore pooki ng'ae oas yieunoto e Nkai, naa ninye lalache lai o nkanache ai o yieyio lai.>>

Currently Selected:

Marko 3: saq

Highlight

Copy