Marko 14

Eyieita ꞉Lparisayo loseg oibung'ie Yeso

(Matayo 26:1–5; Luka 22:1–2; Yoana 11:45–53)

1Mperot are ake naang'or pee eaku Pasaka o ntasim ee mukateni nemeisiichieki,#14:1 Kore Pasaka o ntasim ee mukateni nemeisiichieki naa ntasimi naang'idakino ltung'ana le Isirael eparru neikuna apa Nkai payie eitung'aa ninche nkop e Misiri, naa kenya ꞉ltung'ana mukateni nemeisiichieki. Lal 23:5–8; Nai 12:1–30. neyieita laitainok kutuaa la lasar o laiteng'enak loo nkitanapat neiko payie eibung Yeso to loseg o neiko payie ear metua. 2Kake nejo ninche, <<Mara ta ng'amata e ntasim pee meing'olng'ola ltung'ana.>>

Eelieki Yeso lata narropili te Betania

(Matayo 26:6–13; Yoana 12:1–8)

3 # Luka 7:37,38 Kore etii Yeso Betania, nkaji e Simon oata nkeeya ee lbolot, anyeita ndaa, nelotu ntomononi inie enapita lkidong. Kore ilo kidong naa soit oji alabasta eitibirunyieki, netii lata narok narropili nagol nkinyiang'a naji Nardo. Kore payie eiper ilo kidong abol, nebukoki inia lata nkue e Yeso.

4Negoro lbata loo ltung'ana ootii inie nejokino, <<Aanyo pee eimieki ana lata siu? 5Anata duaake etimiraki aaitam ropiyiani naarisere laata e laisiaayiani e lari obo,#14:5 Kore aaitam ropiyiani naarisere laata e laisiaayiani e lari obo naa kejo Marko dinarini ip uni. neichori laisinak!>> Neilemlemakini inia kitok. 6Kake nejoki ꞉Yeso, <<Entung'ai ninye, aanyo pee intanyamalmal? Kaitaasa nanu mbae supat. 7#Nkit 15:11Amu kore laisinak naa icheche ake aata tenebo o ntae, naa kore tiniyieuu, indimdim aaitaasa ninche supati, kake mikicheche aata nanu nkata pooki. 8Etaasa ninye naidim, eelie sesen lai lata tankaraki nukaroto ai, ewuon eng'or inia kata. 9Kedede kajoki ntae, kore ng'oji pooki nelikorieki kulo omon supati to nkop nalulung'a, naa kelikori abaki ana bae nataasa ninye pee eparrunyieki.>>

Etachamayie Yudas alikoo Yeso

(Matayo 26:14–16; Luka 22:3–6)

10Kore Yudas Isikariot, lobo loo lolo tomon oare, nelo netii laitainok kutuaa la lasar pee etum atilikoi Yeso, nepik nkaik enche. 11Kore pee ening ꞉ninche, neng'ida, neitaki lekutuk oichorie ninye silinkini. Neyiaya ꞉Yudas mpaach supat naichoorie ninye meibung'i.

Etama ꞉Yeso ndaa e Pasaka o looiteng'eni lenyena

(Matayo 26:17–25; Luka 22:7–14,21–23; Yoana 13:21–30)

12Kore mparri ekue e ntasim e mukate nemeisiichieki, nkata nayieng'i lkuo leker le Pasaka, neipar ꞉looiteng'eni lenyena ninye aajoki, <<Aji iyieu nikipuo aitibiraki iyie, payie inyiayie ndaa ee Pasaka?>>

13Neirruaaya oare loo looiteng'eni lenyena, nejoki, <<Enchom lkerenket, naa kenang'are ntae lpayian onapita moti e nkare, erukurukore ninye. 14Kore nejing, entiaki lopeny nkaji, <Kejo Laiteng'enani, <<Kore nkaji ee lomon, nanyayie Pasaka o looiteng'eni lainien?>>> 15Naa keitodol ntae nkaji kitok e keper, naitibira netii ntokitin pooki atua naasichiereki. Entibiraki naa iyioo ndaa te inie.>>

16Neinyuototo laaduo ooiteng'eni aapuo, nebaya lkerenket, netum etuwuana ana natiaka. Neitibir ndaa e Pasaka.#14:16 Kore ndaa e Pasaka naa lkuoo leker o mukateni neitu eisiichieki o lkeek oodua o naicho e lmusabibu o lata. Lal 23:5–8.

17Kore pee eaku teipa, nebau o looiteng'eni lenyena tomon o oare. 18#SNk 41:9Kore enyeita ndaa tenebo, nejo Yeso, <<Kedede kajoki ntae, kaapik ꞉lobo linchi nkaik ee ltung'ana - ilo taa onyeita ndaa tenebo o nanu.>>

19Neng'asu ninche aaisinanio, neipar ninye maa obo obo, <<Mara mara nanu sa?>>

20Nejoki ninche, <<Lobo taa ntae tomon o oare, ilo oitodokita nkaina ncharaa tenebo o nanu. 21Amu keing'uaa Nkerai e Ltung'ani ana kop ana inia naigeroki naipirita ninye, kake oi siake ꞉ilo tung'ani oichooyo Nkerai e Ltung'ani! Eikach te ilo tung'ani teneitu aikata eini!>>

Ndaa e siedi natama ꞉Yeso o looiteng'eni lenyena

(Matayo 26:26–30; Luka 22:15–20; 1 Lkorinto 11:23–25)

22Kore enyeita ninche ndaa, nerrapu Yeso mukate, nemayian, negil, neicho ninche nejoki, <<Entang'amai, sesen lai ele.>> 23Neitoki arrapu lkikompe, kore payie eidip aichoo Nkai nache, neicho ninche, nemat ꞉pooki.

24 # Nai 24:8, Yer 31:31–34 Nejoki ninche, <<Lodo lai ele lo lning'o, oibukori tankaraki lkumo, 25kedede kajoki ntae maitoki amat inia naing'uaa lng'anayio lo lmusabibu, ana metabaki inia parri namat eteng'ejuko taatua Nkitoria e Nkai.>> 26Kore pee eidip aatarany sinkoliotin#14:26 Kore Sinkoliotin oaaranyi apa inia kata naa ketii SNk 115—118., neinyuototo aapuo Lowua loo Lng'erriyio.

Etilimua Yeso ajo kemiki ꞉Petero

(Matayo 26:31–35; Luka 22:31–34; Yoana 13:36–38)

27 # Sak 13:7 Nejoki ꞉Yeso ninche, <<Irriaa pooki, amu keigero ajo,

<Kaar lchekut,

nesachari nkerra.>

28 # Mat 28:16 <<Kake kore payie aidip atipiu, naituruk tekue ntae alo Galilaya.>>

29Nejoki ꞉Petero ninye, <<Kore abaki tinikutung'aitie ninche pooki, maaing'uaa nanu katukul.>> 30Nejoki ꞉Yeso ninye, <<Kedede kaajoki, kore ade ana kuarie, ewuon eitu eiru lkoko nkatitin are, ikimiki nkatitin uni.>>

31Kake nereki ꞉ninye ajoki, <<Kore abaki tanaa kairiam o iyie, maamiki hooyia.>> Nejo pooki nejia.

Nkomono e Yeso te Getesemane

(Matayo 26:36–46; Luka 22:39–46)

32Nepuonu ninche ng'oji#14:32 Kore ng'oji neji Getesemane naa lchampa too Lomon Supati le Yoana 18:1. neji Getesemane, nejoki ꞉Yeso looiteng'eni lenyena, <<Entewueni tene aomonito.>> 33Nerik ꞉Yeso Yoana o Petero o Yakobo, neng'asu ninye aisinanio oleng nenyamalu. 34Neitoki ajoki ninche, <<Kaata sina kitok te nkurruk ai, metaa kaye. Entewueni tene, naa entirripicho.>>

35Kore pee elo nkiti rioto, neirrabalakino nkop, neomon ajo tanaa keidimai pee epaachere ꞉inia kata e sina. 36Nejo, <<Aba,#14:36 Kore Aba naa Papa te nkutuk ee Aramaik. Papa, kore ntokitin pooki naa keidimai te iyie, ntapaachereeki ele sina#14:36 Kore ntapaachereeki ele sina naa kejo too Lgirriki tooruaaki ele Kikompe., kake mara ana nayieu nanu, kake ana niyieu iyie.>>

37Nelotu neirrachu ninche eilura, nejoki Petero, <<Simon, ilura? Aaku miindim atirripicho nkini kata? 38Entirripicho niomonmon payie mijing'jing atua ntemat, kore ltau naa keata yieuna, kake kechal sesen.>> 39Nelo aitoki aomon ejo laaduo rereii. 40Neigil alotu netii ninche, neirrachu eilurate amu keinaurita too njuo ana metaa meidim hoo aatewueni. Naaku meyielo nawoliki ninye.

41Nechukunyie nkata e uni nejoki ninche, <<Ewuon ake ilurara niyeng'iyeng'ang'a? Eidipe taa ana! Etabawua nkata! Kore Nkerai e Ltung'ani naa kepiki nkaik ee loopeny ng'ok. 42Enyuoto maapetin! Leilo laalikoo oatabawua!>>

Nkubung'ata e Yeso

(Matayo 26:47–56; Luka 22:47–53; Yoana 18:3–12)

43Kore ake ewuon eirorita, nchoo Yudas lobo loo loochi tomon o oare, nelotu tenebo o lturrur. Kore ilo turrur neata lalema o runkun, naa keing'uaa ninche netii lkutuaa laa laitainok la lasar o laiteng'enak loo nkitanapat o lkutuaa loo lpayiani.

44Kore ilo otilikoyie naa keichoo apa ninche nkitodolunoto, ejo, <<Kore ilo lagus, naa ninye embung'a, niyaya irriprrip.>> 45Kore pee elotu Yudas, nelo nabokata netii Yeso nejoki, <<Rrabi!#14:45 Kore Rrabi naa Laiteng'enani to nkutuk ee Lyiaudi. >>, negus. 46Nepik Yeso nkaik, neibung. 47Kore lobo loo lolo ooitachoo teinie, nechutu lalem lenye, neoch rrindik la laitainoni kitok la lasar, nedung'oo nkiyok.

48Nejoki Yeso ninche, <<Amaa, lapurroni dei ara payie kiotuo aaibung iatata lalema o runkun? 49#Luka 19:47, 21:37Kore chiaake, kawuon mperot pooki ta nkaji e Nkai aiteng'enicho, neitu kimbung'bung. Kake ketaasate kuna pee ebaya Lkigerot Sinyat.>> 50Neing'uaa ninye ꞉looiteng'eni pooki, nekuet aaisig.

51Netii ꞉lbarnoti obo oirukurukore Yeso, erretenita nkini anka napuyiapui apeny. Neibung ꞉ninche ninye, 52kake neing'uaa inia anka, nejo kar aisig meichopo.

Yeso tekue lkiama laa larikok loo Lyiaudi

(Matayo 26:57–68; Luka 22:54–55, 22:63–71; Yoana 18:13–14,19–24)

53Nerik Yeso netii laitainoni kitok la lasar. Netumo laitainok kutuaa pooki la lasar o lpayiani o laiteng'enak loo nkitanapat. 54Kore Petero neirukurukore elakuaniki ana metabaki boo e nkaji namanya lkitok laa laitainok la lasar, newuon tenebo o laisiaayiak aij nkima.

55Neyiaya lkutuaa laa laitainok la lasar o lkiama laa larikok pooki laa lpayiani ntoki naibung'ie Yeso pee etum aatar metua, kake nelau. 56Amu keiteenikita ninye lkumo, kake kore rereii lenche nepaacha.

57Neinyuototo lkulie aaiteeniki aajo, 58#Yoa 2:19<<Kitining'o ninye ejo, <Kauroo nanu ana Aji e Nkai natechetaki taa nkaik ee ltung'ana, naa kore tee mperot uni, nachet nkae nemecheta taa nkaik ee ltung'ana.> >> 59Kake kore etiu nejia, kepaacha limunot enche.

60Neinyuototo laitainoni kitok la lasar te nkiji enche, neipar Yeso ajoki, <<Amaa, miata wolet nimitunyie koon? Kakua baa kuna nikitipika ꞉kulo tung'ana?>> 61Kake negira ninye eitu ewoliki toki.

Neitoki laitainoni kitok la lasar aipar ninye, <<Iyie dei Mesia likianyuta, inia Kerai e ilo Oisisi?>> 62#Dan 7:13Nejoki ꞉Yeso, <<NANU ILO. Naa idoldol Nkerai e Ltung'ani ewuon ta mbata e tetene e Lopeny ngolon, elotu taatua nkidisin e loing'ang'e.>>

63Nekij ꞉laitainoni kitok la lasar nkilani enyena nejo, <<Aanyo aitoki payie kiyiaya lkulie oolimu? 64#Lal 24:16Itining'o ldeket lenye. Aa duata iatata ntae?>> Nedung pooki nkiguana nchere keichiaakino lkiye. 65Neng'asu lkulie lenche aanataki nkamlak, neisiap nkomom enye, neoch ninye taa nkaik, nejoki, <<Mbonoki iyioo!>> Neya ꞉lolo aisiaayiak le inia kiguana ninye aaidong.

Etimika ꞉Petero Yeso

(Matayo 26:69–75; Luka 22:56–62; Yoana 18:15–18, 18:25–27)

66Kore etii Petero taabori inie netii Yeso to boo e nkaji, nelotu nkaisiaayiani nabo e laitainoni kitok la lasar. 67Naa kore payie edol Petero eiijito nkima, neing'or asipu nejoki, <<Itii abaki apa iyie tenebo o ilo tung'ani lo kerenket le Nasaret, oji Yeso.>> 68Kake nemiki ꞉Petero nejo <<Mayielo, namaning sii nijoito iyie.>> Neinyuototo aipung nelo boo e oriong, neiru lkoko.

69Kore payie edol naduo aisiaayiani ninye, neng'asu aitoki ajoki lolo ooitachoo te inie <<Kore ele tung'ani naa lobo lenche.>> 70Neitoki ꞉ninye amiki. Kore eicha nkini kata, nejoki aitoki ꞉lolo ooitachoo te inie Petero, <<Kesipa ira lobo lenche, amu ira sii iyie loo Lgalilaya.>> 71Neng'asu aipotoki koon ldeketa, nenya lmumai ajo, <<Mayielo nanu ilo tung'ani liroritata ntae lomon lenyena.>>

72Kore inia kata, neiru lkoko nkata e are. Neparru Petero netiaka ꞉Yeso ninye, <<Kore ewuon eitu eiru lkoko nkatitin are, ikimiki nkatitin uni.>> Nejo lkiyio rrua, neichir.

Currently Selected:

Marko 14: saq

Highlight

Copy