Marko 1

Likoroto e Yoana Laipatisani

(Matayo 3:1–12; Luka 3:1–18; Yoana 1:19–28)

1Kore Lomon Supati ooipirita Yeso Kristo, Nkerai e Nkai naa ketang'asua, 2#Mal 3:1ana naigero loiboni le Nkai Isaya ejo:

<<Teyielo ajo, kareu lkipaaret lai tekue iyie,

likintibiraki nkoitiei ino>>

3 # Isa 40:3 <<Ening'o ltoilo le ilo obuakita te lkees ejo,

<Entibiraki Laitoriani nkoitiei,

entorioi nkoitieii kunini enyena.> >>

4Nelotu taa ltung'ani oji Yoana Laipatisani aipung'oki lkees, elikoo nkipatisare e nkirriidunoto ee ng'ok, nayau mpalikinoto ee ntorrok. 5Nedotunyie ꞉nkop pooki e Yudea o ltung'ana lo lkerenket le Yerusalem aapuo netii ninye, neipatis ninche te sere e Yordan, eibalie ꞉ninche ng'ok enche. 6#2Lki 1:8Kore apa Yoana neichopito nkilani naaitibirieki lpapit le ntames, nerretenita nkimeente e nchoni te nkiji enye, nenya lmaat o naichuo e soro. 7Nelikorita ninye ejo, <<Kore lolotu tesiedi nanu, naa keata ngolon kitok alang nanu, namaaichiaakino abaki nanu tanairrigo alak nkeenita ee namuka enyena. 8Kaipatis nanu ntae ta nkare, naa kore ninye keipatis ntae ta Ltau Sinyati.>>

Nkipatisare e Yeso

(Matayo 3:13; Luka 3:21–22, 4:1–13)

9Kore tee nenia perot nelotu Yeso eing'uaa lkerenket le Nasaret e Galilaya, neipatis ꞉Yoana te sere e Yordan. 10Kore ake pee eipung'u Yeso taatua nkare, nedol chumata eoro abolo o Ltau Sinyati edou te nkitanyanyukoto e nkutukurruk, newuenie ninye. 11#Ng'as 22:2; SNk 2:7; Isa 42:1; Mat 3:17, 12:18; Mrk 9:7; Luka 3:22Nening'oi ltoilo oing'uaa chumata ejo, <<Ira iyie Nkerai ai nacham, niata omom ta nanu.>>

Ntemat e Yeso

(Matayo 4:1–11; Luka 4:1–13)

12Kore ake te inia kata nereu ninye ꞉Ltau Sinyati mechomo lkees, 13newuon te inie mperot artam etemita ꞉Chitani, neboitiere ng'uesi e soro, neisiaaita ꞉lmalaikani ninye.

Looiteng'eni lekue ooipoto ꞉Yeso

(Matayo 4:12–22; Luka 4:14–15, 5:1–11)

14Kore eidipaki aateen Yoana, nelo Yeso Galilaya alikoo Lomon Supat le Nkai. 15#Mat 3:2Nejo, <<Etabawua nkata, netinyikua nkitoria e Nkai. Erriidu nirukuruk Lomon Supati le Nkai.>>

16Kore eloito Yeso te nchepata e mpaso e Galilaya, nedol Simon o lalache lenye oji Andirea enang'akita lgiitani ooibung'ieki sinkirri atua nkare, amu kera apa ninche laibung'ak loo sinkirri. 17Nejoki ꞉Yeso ninche, <<Ootu erukurukoreeki, naa kaitaa ntae laibung'ak loo ltung'ana.>> 18Neing'uaa nabokata lolo giitani, nepuo aairukurukore ninye.

19Kore pee eikonyi ninye alo teinie, nedol Yakobo layieni le Sebedayo o lalache lenye oji Yoana, etii atua meli aaitibirita lgiitani. 20Neipot ninche nabokata, neing'uaa papa lenche Sebedayo tenebo o laisiaayiak lenyena ooigero metaasa siaai te meli, nepuo aairukurukore ninye.

Eichiunyie ꞉Yeso ltung'ani oata lairirua

(Luka 4:31–37)

21Nepuo lkerenket le Kapernaum, naa kore ake pee ebau mparri e Sabato, nejing Yeso atua Sinagogi neng'asu aiteng'en ltung'ana. 22#Mat 7:28,29Neing'asia ltung'ana te inia kiteng'ena enye, amu keiteng'ena ninche ana ilo oata nkitoria, nemetuwuana ana laiteng'enak lenche loo nkitanapat. 23Kore ake te inia kata, netii apa ltung'ani oata lairirua#1:23 Kore lairirua naa ltau lemesinya too Lgirriki. inia Sinagogi enche. Nebuak to ltoilo sapuk, 24ejo, <<Yeso le Nasaret, nyo iyieunyie iyioo? Iyewuo aar iyioo? Kayielo ajo ng'ae ira, ira ilo Sinyati le Nkai.>>

25Nekusakan ꞉Yeso aing'ode ajoki, <<Tigirai, mpung'u tung'ai ninye!>> 26Neipuch ꞉lairirua ilo tung'ani, nebuak to ltoilo sapuk, neipung aing'uaa ninye.

27Neing'asia ltung'ana pooki, neipara ninche maate aajo, <<Aa bae ana? Nkiteng'ena ng'ejuk naata nkitoria! Kebuaaki abaki ꞉ninye lairiruani, nening ninye!>> 28Kore taatua nkini kata nebulaa lomon le Yeso too lubot pooki e Galilaya.

Eichiunyie ꞉Yeso ltung'ana kumo

(Matayo 8:14–17; Luka 4:38–41)

29Kore ake payie eipung ninche aaing'uaa Sinagogi, nepuo tenebo o Yakobo o Yoana nkang e Simon o Andirea. 30Kore nkautani e Simon naiu ntomononi enye naa keperito ninye emuai tankaraki naata nkirewua. Nelikini Yeso nabokata lomon lenyena. 31Nelo netii ninye. Kore payie eibung nkaina enye, nerrapu, neing'uaa ninye ꞉inia kirewua, neng'asu aicho ninche ndaa.

32Kore teipa, nochi nadoorie ndama, neyakini Yeso ltamoyia pooki o lolo oaata lairiruani. 33Netodotunyie ilo kerenket pooki, aiturrurrokino nkutuk e inia aji. 34Neichiunyie ꞉Yeso lkumo oata moyianitin kumo naapaapaacha, nearaa meeipung'o lairiruani kumo, kake eitu eicho lolo airiruani meiroro, amu keyielo ꞉ninche ninye.

Likoroto e Yeso ta Galilaya

(Luka 4:42–44)

35Kore tasiran ewuon emismis pii, neinyuototo Yeso aipung te inia aji, nelo ng'oji neliyio, neomon. 36Neng'asu Simon o lboitieii lenyena aayiaya ninye oleng. 37Netum ninye nejoki, <<Ikiyieita iyie ꞉ltung'ana pooki.>>

38Nejoki Yeso, <<Maapetin nkae ng'oji, maapetin lkulie kerenketi oaataana, paatum sii atilikoi Lomon Supati teinie, amu inia apa paa ayewuo nkop.>> 39#Mat 4:23, 9:35Nemanaa ninye te inia kop e Galilaya pooki elikoo Lomon Supati tee Sinagogini enche, nearaa sii lairiruani meeipung'o.

Eichiunyie ꞉Yeso ltung'ani oata nkeeya ee lbolot

(Matayo 8:1–4; Luka 5:12–16)

40Nelotu ltung'ani oata nkeeya ee lbolot netii Yeso, elejita negilaki kung, ejoki, <<Laitoriani, tanaa iyieu, naa ikindim aichiunyie matusupata.>>

41Kore tankaraki natoduaka ꞉Yeso lng'er, neitorio nkaina enye neiseyie, nejoki, <<Kayieu! Tusupata!>> 42Kore nabokata, neing'uaa ninye ꞉inia keeya ee lbolot, neichiu ninye.

43Nereu ꞉Yeso ninye nabokata mechomo, neing'ode ajoki, 44#Lal 14:1–32<<Nchoo metaa meata hoo ltung'ani liliki ana. Kake chomo, ntoduaa koon laitainoni la lasar, nincho nkichooroto nairirikino bioticho nitumo, ana napa naitanapichie Musa, metaa limunoto naitisipu nkichiunoto ino tee ninche.>> 45Kake kore abaki etilikaki neas, neng'asu ninye alikoo kulo omon oleng aitubulaa inia naitaasaki. Naaku, merekure eidim Yeso atijing'a atua lkerenket hoo obo eyieloi, kake newuon ake too ng'ojitin neeliyio. Kore ake etiu nejia, nepuonu ltung'ana too lubot pooki netii ninye.

Currently Selected:

Marko 1: saq

Highlight

Copy