Luka 8

Ntomonok /naairiamari o Yeso

1Kore tesiedi inia, nemanaa Yeso too lkerenketi o nkang'ite, alikoo Lomon Supati le nkitoria e Nkai. Netii loochi ooiteng'eni tomon o oare tenebo o ninye, 2#Mat 27:55,56; Mrk 15:40,41; Luka 23:49netii sii ntomonok /naataarayieki lairiruani taatua ninche o neichiunyieki moyianitin: aa taa Maria naji Magadalena naataarayieki lairiruani sapa taatua, 3o Njoana, nkitok e Kusa oara laisiaayiani kitok le Erode o Susana o nkulie kumo, naaitaitua ntokitin enche aaisiaayie Yeso o Lkipaareta.

Nkitanyanyukoto naipirita launoni laa lantarara

(Matayo 13:1–17; Marko 4:1–12)

4Naa kore eiturrurrunyie lturrur kitok, nepuonuta ltung'ana eing'uaa lkerenket o lkerenket neti Yeso, nejo ꞉ninye te nkitanyanyukoto, 5<<Kore apa, nelo launoni aisuaaya lantarara lenyena. Naa kore eisuaaya lantarara aun, nedoki lkulie nkoitiei, neidachi, nenya ꞉nkueeny e nkeper e nkai aamut. 6Nedoki lkulie lkarkar, kore payie ebulu, netoi amu meata nkare. 7Nedoki lkulie atua lkeek loo lkuku, nebulu tenebo, neiding'aki ꞉lkuku, negor. 8Nedoki lkulie nkuluponi supat, nebulu, kore lobo neiu ip.>>

Kore ejoito ana, neitoki abuak ajo, <<Kore loata nkiyiaa naaning'ichere, nchoo ening.>>

9Kore ꞉looiteng'eni lenyena neipar kipirte ena kitanyanyukoto. 10#Isa 6:9Nejoki ꞉Yeso ninche, <<Ntae eichooki enteyielo nkisudorot e nkitoria e Nkai, kake kore lkulie keyielou tee nkitanyanyukot, paa,

<kore abaki eing'or nemedol

nening abaki nemeyielou.>

Limunoto e nkitanyanyukoto naipirita launoni laa lantarara

(Matayo 13:18–23; Marko 4:13–20)

11<<Naa ana eipirita ana kitanyanyukoto: Kore lantarara naa rerei le Nkai. 12Kore lolo ootodokita nkoitiei naa lootining'o, nelotu Chitani aitai ilo rerei taatua ltauja lenche, payie meiruk nejeu. 13Kore lootii lkarkar naa lolo ooning, laa kore tenening ilo rerei neng'amaa te ng'ida. Kake meata ninche ntana, keiruk nkiti kata, kore payie etum ntemat nerriaa. 14Kore lolo ootodokita atua lkuku naa looning, negor nyamali ee ltauja o parakuoicho o rraa e nkichon. Nemeiu ꞉ninche lng'anayio ooku. 15Kore lantarara ootodokita nkuluponi supat, naa lolo ooning rerei neibung taa ltauja supati oodede, neiu lng'anayio te ng'iriata.

Lkilang'ilang'et oisudoro

(Marko 4:21–25)

16 # Mat 5:15; Luka 11:33 <<Meatae ltung'ani ooinok lkilang'ilang'et, nepukuroki loket tanaa eitulutoo lkorror, kake keik te nkeper e ng'oji netala, payie edol ltung'ana oojing'u wong'an. 17#Mat 10:26; Luka 12:2Amu meatae naisudoro nemeibalunyieki, anaa naing'opa nemeipung'unyieki atua wong'an. 18#Mat 25:29; Luka 19:26Neaku naa, errita ate ninkoko tinining'ning, amu kore loata neponikini, kore lemeata neoruni abaki inia najo ninye keata.>>

Lalachera Yeso o ng'otonye

(Matayo 12:46–50; Marko 3:31–35)

19Nepuonu lalachera Yeso o ng'otonye netii Yeso, kake eitu eidim aatinyikaki ninye tankaraki lturrur. 20Nejokini Yeso, <<Eitache ng'utunyi o lalachera linono to boo, naa ikiyieu ꞉ninche nikidol.>> 21Newoliki ajoki, <<Kore yieyio lai o lalachera lainien, naa lolo ooning rerei le Nkai neas ana nejo.>>

Eitigira ꞉Yeso lkutati

(Matayo 8:23–27; Marko 4:35–41)

22Kore apa mparri nabo nejing ꞉Yeso meli o looiteng'eni lenyena, nejoki ninche, <<Matalang aapuo ildo kokun le mpaso!>> Neinyuototo aapuo. 23Kore elang'ita ꞉ninche neya ninye njuo. Neinyuototo lkutati nelotu nedoki mpaso, neng'asu nkare aiput meli, nenyamalu ninche oleng. 24Nepuo aainyoyie nejoki, <<Lkitok, Lkitok, kindaaitie!>>

Neinyuototo, nebuaaki aing'ode ilo kutati o laing'ok le nkare. Neperoo ilo kutati o laing'ok le nkare, neitirring'a nkare. 25Nejoki, <<Amaa, kore nkurukoto inchi?>>

Kake neiputukuny ninche, neing'asia, neipara maate aajo, <<Aa ng'ae dei ele, aa kore payie ejoki lkutati o nkare nchi, nening ninye?>>

/Eichiunyieki ltung'ani oata lairirua

(Matayo 8:28–34; Marko 5:1–20)

26Nelang nkare aapuo ildo kokun le nkop ee Lgerasin, naitalang'akinere nkop e Galilaya. 27Kore payie edou Yeso te meli, nenang'are ꞉ltung'ani oing'uaa lkerenket oata ꞉ninye lairiruani. Neitu eichop nankan tee mperot kumo, nemewuon ta nkang, kake too nkuraren ewuon. 28Kore payie edol Yeso, nebuak, nerriaakino tekue ninye. Nejo to ltoilo kitok, <<Nyo kiyieunyie nanu iyie, Yeso, Nkerai e Nkai naisul pooki? Kaalej mikintam sina.>> 29Ketejo nejia amu ketiaka ꞉Yeso inia kata ilo airirua metung'ai ilo tung'ani. Naa kore amu keibung'a ninye nkatitin kumo, neeni nkaik o nkejek tee senke payie etumi aatirrip, kake ketudung'o ninye nenia senke nkatitin pooki. Nemiraki ꞉lairiruai neliyio. 30Neipar ꞉Yeso ninye ajoki, <<Ikijuae iyie nkarna?>>

Nejo, <<Njore kitok,>>#8:30 Kore njore kitok neji ta nkae tukuk legion naa kore kipirte, naa sikarini oobaya nkalupuni ile too Rroman. amu lairiruani kumo ootijing'a ninye. 31Nelej ꞉lairiruani Yeso nkatitin kumo, payie mearaa ninche amiraki lodo le nkop.

32Netii inie mboo kitok ee mbitiro naadaa to lowua. Nelej ꞉lolo airiruani ninye meichoo mpaach najing'ie atua ninche, neicho. 33Neipung'u te ilo tung'ani, nejing atua mbitiro. Nejo dii ꞉inia boo aaitutori te ilo owua, nedoki atua mpaso, neya nkare.

34Kore payie edol lchekuti nataase, neisig nepuo aalikoo inia bae te lkerenket o taa nkang'ite. 35Neipung'u ltung'ana aapuo aadol nataase. Nepuonu netii Yeso, nedol ilo tung'ani otung'aitie lairiruani ewuon tankalo nkejek e Yeso, eichopito nankan, nemeng'or mparrunot enyena. Neguretu pooki. 36Kore lolo ootoduaa inia, neliki ninche, neikunaki payie eichiunyieki ilo oata lairiruani. 37Kore ltung'ana kumo ootii nkalo inia kop ee Lgerasin, nejoki ꞉pooki Yeso mechomo aing'uaa ninche, amu ketumo ngureticho kitok. Nejing ninye meli alo achuko. 38Neomon Yeso ꞉ilo tung'ani oipung'unyie lairiruani mpaach payie ewuon eboitiere ninye, kake nechuk ninye mechomo, nejoki, 39<<Tuchukoi chomo nkang ino, nilikoo nana nikintaasa Nkai.>> Nechuko ninye alo alikoo taatua lkerenket nana pooki naaitaasa Yeso.

Eichiunyie ꞉Yeso ntito e Yairo o nkitok namuai

(Matayo 9:18–26; Marko 5:21–43)

40Kore payie echuko Yeso to nkop ee Lgerasin, neitoomon ꞉ninye lturrur kitok tankaraki keanyuta ꞉pooki ninye. 41Kore ake inia kata, nelotu ltung'ani oji nkarna Yairo, oara lkitok le Sinagogi. Nerriakino tekue nkejek e Yeso, nelej meeu nkang enye, 42amu ketaa keye ntito enye nabo ake natiiwua, naata larin oobaya 12.

Kore eloito Yeso, neiding'aki ꞉lturrur taa mbat pooki ana metala mpaach nayeng'ie. 43Naa ketii inie nkitok nabo, naturukie lodo larin 12, netaapare koon to ntoki pooki naata too labaak neitu etum ltung'ani oichiunyie ninye. 44Neimu tooriong Yeso ninyikaki, neiseyie sakurdai le nanka enye, nedung'o rukoi e lodo nabokata. 45Nejo Yeso, <<Ng'ae laaiseyie?>>

Nemiki ltung'ana pooki. Nejo Petero, <<Lkitok, ikingerutua ltung'ana nikinding'akita!>> 46Kake nejoki ꞉Yeso, <<Ketii ltung'ani laaiseyie, amu kayielo ajo kaaipung'o ngolon aing'uaa.>> 47Kore payie edol ꞉ana kitok ajo etukurruaki, nelotu eikirikira, nerriaa tekue Yeso. Nelimu tekue ltung'ana pooki ajo aanyo payie eiseyie o neikuna payie eichiunyieki nabokata. 48Nejoki ꞉Yeso ninye, <<Ntitai, /kinchiunyie nkurukoto ino. Chomie seriani.>>

49Kore ake ewuon eirorita ꞉Yeso, nelotu ltung'ani ta nkang e ilo kitok le Sinagogi, nejoki Yairo, <<Etaa etua ntito ino, mintoki taata aitanyamal Laiteng'enani.>> 50Kore payie ening ꞉Yeso inia nejoki ninye, <<Mimputukuny, iruko ake apeny iyie, naa keichiu ninye.>> 51Kore payie ebaki ꞉Yeso inia aji, nemitiki ltung'ana ejing atua tenebo o ninye, mara ake Petero o Yoana o Yakobo o menye o ng'otonye nkerai. 52Kore lolo tung'ana pooki naa keichirita neisinanio oleng tankaraki ninye. Nejoki ꞉Yeso ninche, <<Emiinchir, amu eitu eye nkerai kake keilura ake.>> 53Nekueniyie ꞉ninche ninye amu keyielo aajo keidipa atua. 54Kake neibung ninye nkaina e inia tito, neipot ajoki, <<Nakerai inyuo!>> 55Nechukokino ꞉nkichui enye, neitache nabokata. Nejoki ꞉Yeso ninche meichoo ndaa. 56Kore ntoiwuo enyena, neing'asia oleng, kake nejoki ꞉ninye ninche payie meliki hoo ltung'ani nataase.

Currently Selected:

Luka 8: saq

Highlight

Copy