Luka 12

Eing'odia ꞉Yeso neitogol ltung'ana

1 # Mat 16:6; Mrk 8:15 Kore inia kata, payie eiturrurro nkalupuni o nkalupuni e siamu ana metabaki neidacha ninche maate, neng'asu Yeso ajoki looiteng'eni lenyena, <<Errita ate te mukate naisiicho ee Lparisayo aa nkitaakino enche. 2#Mrk 4:22; Luka 8:17Meatae ntoki naisiapa nemeibalieki, anaa naisudoro nemeyielouni. 3Neaku naa kore pooki nitejo ta naimin kening'oi to wong'an, naa kore pooki nitukurraka ltung'ani taatua lgilat le atua nkaji, naa kelikori tee nkeperi ee nkajijik.

4<<Kajoki naa ntae lchoreta lainien, emiurie lolo oaar sesen, laa kore tesiedi inia nemeatae nkae naaidim aataas. 5Kake kore loyiere niureii naa kaliki ntae: Enturia ilo laa kore payie eidip atara sesen metua, neata aitoki ngolon nanang'akinyie lmoti le nkima. Ee, kajoki ntae, enturia ninye! 6Amaa, mara memiri ntiitiini imiet tee sintii oare? Merikinoi sii hooyia nabo enche tekue Nkai. 7Kore abaki lpapit loo nkuechi inchi naa keikena pooki. Emiurieicho naa amu irara ntae le tipat aalang ntiitiini kumo.

8<<Kajoki ntae, kore pooki ng'ae laaibalie nanu tekue ltung'ana, naa keibalie sii ninye ꞉Nkerai e ltung'ani tekue lmalaikani le Nkai, 9kake kore laamiki nanu tekue ltung'ana nemikini sii ninye tekue lmalaikani le Nkai. 10#Mat 12:32; Mrk 3:29Kore pooki ng'ae oiro rerei torno oipirita Nkerai e ltung'ani naa kepalikini, kake mepalikini ilo odek Ltau Sinyati. 11#Mat 10:19,20; Mrk 13:11; Luka 21:14,15Naa teneriki ntae tekue Sinagogini o tekue laitoriak o tekue loaata nkitoo, eming'aing'ai to nkoitiei nimitietie ate tanaa too lomon lijoijo, 12Amu kore Ltau Sinyati, naa keiteng'en ntae inia kata, inia nayiere nijoijo.>>

Nkitanyanyukoto e lgarsis

13Kore taatua inia siamu, nejoki ꞉ltung'ani obo Yeso, <<Laiteng'enani tiaaki lalache lai maatooriki njung'ore ang.>> 14Kake newoliki ajoki, <<Lolee, ng'ae /laaitaa nanu ladung'oni tanaa ilo ooriki ntae njung'ore inchi?>> 15Neitoki ajoki ninche, <<Entodol ate! Errita ate to luboi pooki, amu kore ltung'ani naa mara nkumoin ee ntokitin naata eichiwue.>> 16Neliki ninche nkitanyanyukoto ajoki, <<Ketiiwua apa lchampa lo ltung'ani garsis ndaa kitok. 17Kore ilo tung'ani garsis, neng'asu ajo ta ltau lenye, <Kaa aas? Nemeatae napik ndaa e lchampa lai.> 18Nejo, <Nchi aas, kaar lkompeii lainien nachet lkulie kutuaa oaalang kulo, napik nkano pooki e lchampa lai o nkulie masaa ainien inie. 19Najoki nanu nkurruk ai, <<Naa kurruk ai, iyata ntokitin kumo supati nikituchumakaki taa larin kumo. Iyeng'iyeng'ai taa, ninya, nimat, ning'ida.>>> 20Kake nejoki ꞉Nkai ninye, <Lo madai! Kore ana kuarie keyieuni ltau lino. Naa amaa, ntokitin ninteng'elika koon, na ng'ae eaku?> 21Naa nejia etiu ltung'ani oiteng'elaki koon ntokitin kake mara ninye parakuoni ta mbata e Nkai.>>

Emiirrana

(Matayo 6:25–34)

22Nejoki ꞉Yeso looiteng'eni lenyena, <<Kajoki naa ntae, emiirrana tee nkichoni inchi, aajo nyo inyanya, tanaa sii tee seseni linchi, aajo nyo inchopchop. 23Amu kore nkichui naa keata tipat alang ndaa, naa kore sii sesen keata tipat alang nkichopo. 24Eng'ura lkurruki: meunicho ninche, nemedung'ucho, nemeata sutooni anaa lkompeii, kake keitoti ake ꞉Nkai ninche. Kebaa sa irara ntae le tipat aalang nkueeny! 25Naa amaa taa ntae, ng'ae eirrana oidim neponiki nkichui enye saa nabo? 26Amaa tanaa mindimdim aatoponiki nkini toki nemeiput abaki ndap, aanyo payie iirranana too nkulie pooki? 27#1Lki 10:4–7; 2Ng'a 9:3–6Eng'ura neiko ntapuka tenebulu, nemenyok aasicho nemepiyaicho, kake kajoki ntae, eitu abaki eichopo Solomon te nkitoo enye pooki ainyunyukore nabo ee nana tapuka. 28Oi siake ntae oaata nkurukoto kini! Amaa, tanaa keichop ꞉Nkai nkujit naabulu anapar ta ang'ata neikenyu teisiere nenang'akini atua nkima, kebaa sa eitulusoo aichop ntae! 29Emiyiaya naa ntae ntoki ninyanya anaa nimatmat, nimiirranana taa mparrunot inchi. 30Amu kore kuna tokitin pooki, naa ninche eyiaya loreren le ana nkop lemeyielo Nkai, kake keyielo Papa linchi ajo iyieuu sii ntae. 31Kake entang'as naa enteyiai nkitoria e Nkai, naa keitokini aaponiki ntae nenia pooki.

32<<Emiurieicho ntae mboo kini, amu ketachamayie Papa linchi aicho ntae nkitoria. 33Entimir ntokitin niatata ninchocho laisinak ntoki nintamita. Entibiraki naa ate lbenia lememusanu o lchumati le chumata lemeng'oru, amu mebaki naa lapurroni inie, nemebaki lkurui atama aitarruoo. 34Amu kore netii parakuoicho inchi, naa inie sii etii ltauja linchi.

Enterretenata

35 # Mat 25:1–13 <<Enchoo naa metaa keena nkiji inchi, ninchocho lkilang'ilang'eta linchi metaa keilu! 36#Mrk 13:34–36Naa entaa ana ltung'ana oaanyuta lkitok lenche meeu eing'uaa latim le nkiyema, paa kore tenelotu aikodkod ltim netum aatoboloki ninye nabokata. 37Emayiana lolo aisiaayiak laa tenelotu lkitok lenche neirrachu erripicho. Kedede kajoki ntae, kerretena ninye, neitoomon aicho ndaa, neisiaai ninche. 38Naa teneyewuo te nkiji e nkuarie tanaa etaa keikenyu, neirrachu ake ninche erripicho, emayiana siake lolo aisiaayiak! 39#Mat 24:43,44Kake enteyielo ana, tanaa keyielo lopeny nkaji ng'amata nalotu lapurroni, anata meicho nkaji enye metigili. 40Naaku enterretenata naa, tankaraki ng'amata nimintiekiki kenya elotunyie Nkerai e ltung'ani.>> 41Nejo Petero, <<Laitoriani iyioo dei ijokita ana kitanyanyukoto, ana ltung'ana pooki?>> 42Nejoki ꞉Laitoriani, <<Ng'ae naa laramatani oisiligai nera ng'en, oichoo ꞉lkitok lenye meitoria laisiaayiak lenyena, neichoo metaa ninye ooriki laisiaayiak ndaa ta nkata nairirikino? 43Emayiana ilo aisiaayiani, laa kore payie errinyunyie lkitok lenye, neirrachu easita nejia. 44Kesipa naa kajoki ntae, keicho ninye meitoria ntokitin enyena pooki. 45Kake kore payie ejo ilo aisiaayiani ta ltau lenye <Keimalmal lkitok lai>, neng'asu aidong laisiaayiak o nkaisiaayiak, nenya ndaa, nematicho, nemerai, 46naa kelotu lkitok le ilo aisiaayiani nkata nemeiteki ajo kelotu o nkata nemeyielo, naa kedung ninye katare, neituchulaki lolo leitu eiruk. 47Naa kore ilo aisiaayiani oyielo yieunot e lkitok lenye, neitu erretena anaa eas ana nayieu lkitok, naa keidong'i oleng. 48Kake kore ilo lemeyielo, netaasa ntoki naichiaakino payie eidong'i, neidong'i peneu. Kore pooki oichooki nkumo, neyieunyieki nkumo, kore lotipikakaki ntokitin kumo, neiparrunyieki nkumo oleng te ilo.

Eyewua ꞉Yeso oro

(Matayo 10:34–36)

49<<Kayewuo aisuroki nkop nkima, naa oi siake aa ketarrapa! 50#Mrk 10:38Naa kaata naa nkipatisare nairirikino payie aaipatisieki, naa kaaitanyamalita ana meitabari kenya! 51Ijoijo sa ntae kayewuo ayau sotua nkop? Kajoki naa ntae, mara nejia kake oro ayewua! 52Kore ang'asu taata, kore taatua nkaji, netii ltung'ana imiet ooro, aa keorore ꞉okuni oare, neorore ꞉oare okuni,

53 # Mika 7:6 <neoro menye o layieni lenye,

neorore ꞉layieni menye,

neorore ꞉ng'otonye ntito enye,

neorore ꞉ntito ng'otonye,

neorore ꞉nkautani ntomononi e layieni lenye,

neorore ꞉ntomononi e layieni lenye nkautani enye.> >>

Ninkoko tiniyielou ng'amata

(Matayo 16:2–3)

54Nejoki ꞉Yeso siamu, <<Tinidoldol nkidis edooyo to ndoyioroto e ndama, nijoijo nabokata, <Eyewuo girrarri>, neasai naa ake nejia. 55Kake kore payie idoldol lkutati le kopikop ekutunye, nijoijo, <Kelotu ldama oirewua>, neasai naa ake inia. 56Koree ntae looitaakino, iyielolo ake aatilimu seerri e nkop o loing'ang'e, kake aanyo payie miyielolo aatilimu ana ng'amata e taata?

Temeletie litarare

(Matayo 5:25–26)

57<<Naa aanyo payie migelulu ntae maate inia nadede? 58Kore tanaa iriamari o litarare alo nedung'ieki nkiguana, tonyuaa temeletie to nkoitiei, eitu kirikoki aitabaki netii ladung'oni le nkiguana. Amu kore ladung'oni naa ikintarasaki sikarii, nikipik sikarii atua jila aen. 59Kaajoki, mimpung'u iyie te inie mara italaa sintii le siedi.>>

Currently Selected:

Luka 12: saq

Highlight

Copy