Yoana 8

1nelo Yeso Lowua loo Lng'erriyio.

Ntomononi naibung'ieki loloito

2Kore payie eikienyu nelo aitoki Yeso nkaji e Nkai. Nepuonu ltung'ana pooki aaiturrurrokino, newuon, neng'asu aiteng'en ninche. 3Neyau ꞉laiteng'enak loo nkitanapat o Lparisayo ntomononi naibung'aki easita loloito, neitacheyie tekue Yeso. 4Nejoki Yeso, <<Laiteng'enani, keibung'aki ana tomononi easita loloito. 5#Lal 20:10; Nkit 22:22–24Naa kore tee Nkitanapat, keitanapa apa iyioo Musa ajoki, kore ntomonok naatuwuana ana, naa keichiaakino nenang'i too soito metuata. Kaa ijo iyie?>> 6Naa keiparuta ana payie etum ntoki naibung'ie Yeso, nelikoo meiguanareki. Neirrigo Yeso, neng'asu aiger nkop to lkumojino. 7Kore payie epuo kue eiparichiere, neapunye ꞉Yeso nejoki ninche, <<Enchoo ilo taa ntae leitu aikata eas ng'oki, eaku ninye lekue onang ninye to soit.>> 8Neitoki aitoki airrigo, neiger nkop.

9Kore payie ening ꞉ninche inia, nepuo ma obo obo, aang'asu lkutuaa ana metung'ari Yeso apeny o inia kitok eitache tekue ninye. 10Neapunye Yeso neipar inia kitok ajoki, <<Natomononi, koree laaduo tung'ana? Meatae duaake ltung'ani obo likidung'oki nkiguana?>> 11Nejoki, <<Lkitok meatae hooyia.>> Nejoki ꞉Yeso ninye, <<Kore abaki nanu, naa maadung'oki nkiguana, chomo kake mintoki awuon taatua ng'ok.>>

Yeso oara wong'an e nkop

12 # Mat 5:14; Yoa 9:5 Neitoki Yeso ajoki lolo tung'ana, <<Kara nanu wong'an e nkop, kore pooki ng'ae laairukurukore, naa melo aikata taatua naimin kake keata wong'an e nkichon.>> 13#Yoa 5:31Nejoki ꞉Lparisayo, <<Sipata nikimpirita ilimuta, naaku medede inia limunoto ino.>> 14Nejoki ꞉Yeso ninche, <<Kore abaki tanalimu sipata naaipirita, naa kedede limunoto ai, amu kayielo naing'uaa, nayielo sii naloito. Kake miyielolo ntae naing'uaa, nimiyielo sii naloito. 15Idung'okiki ntae ltung'ana nkiguana ana ltung'ana, namadung'oki ꞉nanu hoo ltung'ani obo. 16Kake tanaa duaake kadung'oki nanu ltung'ani nkiguana, naa kedede nkiguana ai, amu mara nanu ake apeny oas inia. Kore Papa laairriwua naa ketii tenebo o nanu. 17#Nkit 19:15Kore abaki tee nkitanapat e Nkai nirukurukorere naa keigero ajo kore tanaa kelimu ltung'ana oare sipata nabo naipirita mbae naje, naaku keikeni ajo kedede inia limunoto enche. 18Kalimu nanu sipata naaipirita, nelimu sii Papa lai lairriwua.>> 19Neipar ꞉ninche Yeso aajoki, <<Kore Papa lino?>> Nejoki ꞉Yeso, <<Mikiyielolo nanu nimiyielolo sii Papa lai. Tanaa duaake ikiteyielo nanu, anata sii iteyielo Papa lai.>>

20Keiroro ꞉Yeso kuna baa pooki eiteng'enicho ta nkaji e Nkai, tankalo sanduku loo nkichoorot. Nemeatae ltung'ani oibung'a ninye, amu ewuon apa eitu ebau nkata enye.

Mindimdim aachom neloito ꞉Nkerai e Ltung'ani

21Neitoki Yeso ajoki ninche, <<Kaloito aing'uaa ntae, naa iking'oruru, niyeye taatua ng'ok inchi. Kore inie naloito, naa mindimdim aaotu.>>

22Nejo larikok loo Lyiaudi, <<Amaa, kejo sa payie ear koon metua? Tankaraki natejo, <Kore inie naloito, naa mindimdim aaotu>?>>

23Nejoki ꞉Yeso, <<Ing'uaa ntae ana kop e abori, naing'uaa nanu ne keper, nirara lena kop, nara nanu le chumata. 24Naa katiaka ntae iyeye taatua ng'ok inchi, amu tinimikurukuruk aajo kara nanu ilo lara naa iyeye taatua ng'ok inchi.>> 25Neipar aajoki, <<Ng'ae dei ira iyie?>> Nejoki ꞉Yeso, <<Kara ilo tung'ani latilika apake ntae ta ng'asunoto ajo kara. 26Kaata mbaa kumo nayieu najo naaipirita ntae o mbaa kumo nadung'okinyie ntae nkiguana, kake kore ilo laairriwua naa loosipat, naa nenia ake natining'o te ninye aliki nkop.>>

27Neitu apa eyielou ninche aajo mbaa naaipirita Papa lenye elikita ꞉Yeso. 28Nejoki ꞉Yeso ninche, <<Kore tiniliepiepie Nkerai e Ltung'ani#8:28 Tiniliepiepie Nkerai e Ltung'ani naa keipirita ncheto e Yeso to lmusalaba. Toduaa Yoana 3:14. niyielouu aajo kara nanu ilo lara. Naa meatae ntoki naas nanu te nkitoria ai makoon, kake kore nenia naatuutaka Papa lai naa ninche aairo. 29Kore ilo laairriwua naa kaatii tenebo, eitu aaing'uaa aa nanu apeny, amu kaas nkata pooki nenia naiting'id ꞉ninye.>> 30Kore lkumo ootining'o Yeso elimu kuna baa, neiruk ninye.

Kelaku ntae ndedei

31Nejoki ꞉Yeso lolo Yiaudi ooiruko ninye, <<Kore tiniwuenini taatua rerei lai, naa irara looiteng'eni lainien katukul, 32niyielouu ndedei, nelaku ntae inia dedei.>> 33#Mat 3:9; Luka 3:8Nejo ninche, <<Kore iyioo naa ikira ichoi e Abraam, neitu aikata kiaku iyioo rrindiki lo ltung'ani. Naaku aji inko tinijo <Kelakuni ntae>?>>

34Newoliki ꞉Yeso ajoki, <<Kajoki ntae sipata nadede, kore pooki ng'ae oas ng'ok naa rrindik loo ng'ok. 35Kore rrindik nemeata ninye mbikoto ta nkang natii, kake kore inoti le inia ang, naa le inia ang ake ninye ntarasi. 36Kore tenelaku ntae inia Kerai inoti, naaku ilakunono katukul. 37Kayielo ajo irara ichoi e Abraam. Kake kore eyia, ikiyieitata aar matua, amu meata rerei lai mpaach taatua ntae. 38Kore nenia nairo, naa nenia natoduaa aboitiere Papa, kake kore nenia niasias naa nenia nitining'o ta papa linchi.>>

39Newoliki aajoki, <<Kore papa lang naa Abraam.>> Nejoki ꞉Yeso, <<Kore tanaa kedede nkera ee Abraam irara, anata iasias naataasa apa ninye. 40Kara ꞉ltung'ani otining'o sipata naing'uaa Nkai, naa kore taata ikiyieuu nikiarrar matua. Eitu aikata eas Abraam mbae naijo inia! 41Kore ntae naa asat e papa linchi iasitata.>> Newoliki Yeso aajoki, <<Mikira iyioo nkera naataluno! Lobo ake papa likiata, naa Nkai ilo.>> 42Nejoki ꞉Yeso, <<Kore tanaa Nkai Papa linchi, anata kichamcham amu netii Nkai aing'uaa nanu. Neitu alotu makoon kake ninye laairriwua. 43Aanyo payie mining'ung'u inia najoito? Tankaraki nimindimdim aaibung'a rerei lai. 44Kore ntae naa irara nkera e papa linchi Chitani, niyieuu niasias mbaa naang'uar ninye ataasa. Kore ninye naa larani apake ta ng'asunoto oar ltung'ana metuata, nemeitache ta mbata e ndedei, amu metii ndedei atua ninye. Kore payie esapicho ninye naaku mbaa naatiu te ninye eiro, amu lasapani ninye nera aitoki menye saparia. 45Kake kore tankaraki sipata alikita ntae, naa inia payie mikirukuruk. 46Ng'ae taa ntae laaidim aitukurru ajo kataasa ng'oki? Amaa tanaa sipata alikita ntae, aanyo payie mikirukuruk? 47Kore pooki ng'ae oara le Nkai naa kening rerei le Nkai. Kore payie mining'ning ntae rerei le Nkai, naa tankaraki nimirara lenyena.>>

48Newoliki ꞉lolo Yiaudi Yeso aajoki, <<Medede sa tinikijo ira iyie Samariai niata aitoki lairirua?>> 49Nejoki ꞉Yeso, <<Maata nanu lairirua. Kayanyit ꞉nanu Papa, nikintamtam ꞉ntae nanu anyit. 50Maing'oru nanu maaterrepi, kake keatae loing'oru, naa ninye odung nkiguana. 51Kajoki ntae sipata nadede, kore pooki ng'ae oibung rerei lai nemeichamcham aikata lkiye.>>

52Nejoki ꞉lolo arikok loo Lyiaudi ninye, <<Kiteyieloutua taata aajo iata lairirua. Ketua apa Abraam, netuata sii loibonok le Nkai, eji nijo iyie kore ꞉pooki ng'ae oning rerei lino, nemeichamcham aikata lkiye. 53Ira sa iyie kitok ta papa lang Abraam? Ketua apa ninye netuata sii loibonok le Nkai. Ng'ae dei intaa iyie koon?>> 54Newoliki ꞉Yeso ajoki, <<Tanaa koon arrep naaku meitoki inia rrepet. Kore laaicho nanu rrepet naa ꞉Papa lai, ilo laa ninye ijoijo Nkai inchi. 55Miyielolo ninye kake kayielo nanu. Naa tanaa kajo mayielo, naaku lasapani atuwuana ntae. Kake kayielo ninye, naibung rerei lenye. 56Kore apa papa linchi Abraam naa keting'ide ejo keichori metoduaa mparri ai, nedol, neng'ida.>> 57Nejoki Yeso, <<Kore iyie eitu intabaki larin onom, tung'ai duo inia nijo itodua Abraam!>> 58Newoliki ꞉Yeso ajoki, <<Kajoki ntae sipata nadede, kore ewuon meatae Abraam, natii nanu.>> 59Kore te inia kata, nerrapu ninche soito aanang Yeso, kake neisudori ninye, neipung ta nkaji e Nkai.

Currently Selected:

Yoana 8: saq

Highlight

Copy