Yoana 6

Eitiemua ꞉Yeso ltung'ana nkalupuni imiet

(Matayo 14:13–21; Marko 6:30–44; Luka 9:10–17)

1Kore tesiedi inia, nelang ꞉Yeso mpaso e Galilaya, naitokini aajo mpaso e Tiberias. 2Neirukurukore ninye ꞉lturrur kitok tankaraki nadolita apa asat naasita naaitodolu nkitoo enye, eichiunyie ltamoyia. 3Neitoki Yeso ailiep alo ndonyuo, newuon o looiteng'eni lenyena teinie. 4Kore apa inia kata naa ketinyikua ntasim ee Lyiaudi naji Pasaka.

5Kore payie eapu ꞉Yeso nkonyek nedol lturrur kitok elotuta netii ninye, nejoki Pilipo, <<Kaji kinyieng'unyie ndaa naitiemu kulo tung'ana?>> 6Keiparua ake Yeso ana bae payie esaan Pilipo, kake keyielo apake ajo kaa eas. 7Nejoki ꞉Pilipo, <<Mebaki abaki laata ee lapatin isiet ainyiang'u ndaa naichamicham ꞉ltung'ani pooki otii ene!>> 8Kore loiteng'eni obo oji Andirea, lalache Simon Petero, nejo, 9<<Ketii layieni ene oata mukateni imiet#6:9 Kore mukateni imiet naa kejo Yoana nchere keidong'unyieki nochi ano nanya ltung'ana dorropu, nadung'i lapatin oare ewuon eng'or ndung'oto e nkano. o sinkirri oare, kake nyo ana tele turrur owuenyi?>> 10Nejoki ꞉Yeso, <<Entowuana ltung'ana pooki.>> Kore apa inie, naa kebore nkujita. Newueni lewa, oobaya apa nkalupuni imiet. 11Nerrapu ꞉Yeso naaduo mukateni, neicho Nkai nache, neoroki ltung'ana pooki oowueni teinie. Neitoki aiko nejia sinkirri, neicho ꞉ltung'ani pooki ana nayieu.

12Kore payie enya ltung'ana ndaa aaimu, nejoki ꞉Yeso looiteng'eni lenyena, <<Enturrurro ng'urrot ee mukateni o sinkirri ootelekunye, paa meatae hoo ntoki naim siu.>> 13Neiturrur ꞉ninche inia daa pooki natelekunye, neiput nkikapuni tomon o oare mbelesat ee naaduo mukateni imiet, naatelekutua ꞉lolo tung'ana oaatama ndaa.

14Kore payie edol ꞉ltung'ana inia bae e nking'asia nataasa ninye naitodolu nkitoo enye, nejo, <<Kesipa ele taa ꞉ilo oiboni le Nkai olotu nkop.>> 15Kore amu keyielo apa Yeso ajo keyieu ꞉ninche nepuonu aaibung ninye aaisimaki metaa lkinkii, neing'uaa inie ng'oji nelo adir naduo donyuo apeny.

Etoporoyie ꞉Yeso nkeper e nkare

(Matayo 14:22–33; Marko 6:45–52)

16Kore payie eaku teipa, nedoyio looiteng'eni le Yeso aapuo mpaso, 17nedir meli aalang aapuo Kapernaum. Kore inia kata naa ketimisimiso, newuon eitu elotu Yeso netii ninche. 18Neinyuototo lkutati kitok aliman nkare, neinyoyie lopir. 19Kore payie ereu ꞉looiteng'eni meli kilomitani oabaki imiet anaa ile, nedol Yeso eporu nkare alotu anyikaki meli, neiputukuny. 20Nejoki ꞉Yeso ninche, <<Emimputukuny! Nanu dei ele!>> 21Naaku, neyieu ꞉ninche payie ediru ninye meli, naa kore ake inia kata, nebaki inia meli ildo kokun oloito duo.

Yeso ndaa naichoru nkichui

22Kore mparri naijipu inia, neyielou ꞉ilo lturrur otii lkokun ajo meli nabo ake natii ng'ole inie, neitu sii ejing Yeso tenebo o looiteng'eni lenyena, kake looiteng'eni lenyena aapeny oochomo. 23Nepuonu nkuti melin eing'uaa Tiberias nkalo ng'oji netamie ltung'ana mukateni, eidipa Laitoriani aichoo Nkai nache. 24Kore payie edol lturrur ajo meti Yeso o looiteng'eni lenyena inie, nejing nenia melin, nelang aapuo Kapernaum ayiaya ninye.

25Kore payie etum ꞉lolo tung'ana Yeso teilo kokun le Kapernaum, nejoki, <<Laiteng'enani, anu dei iyewuo ene?>> 26Nejoki ꞉Yeso, <<Kajoki ntae sipata nadede, miking'orutata tankaraki nitoduaa asat naaitodolu nkitoo ai, kake tankaraki nitama naapa mukateni aaimu. 27Eminyok aas siaai payie itumtum ndaa narroyo, kake entaas siaai payie itumtum ndaa nemerroyo nayau nkichui ee ntarasi. Kore inia daa naa Nkerai e Ltung'ani naicho ntae, amu ninye etipika ꞉Nkai Papa lminchire lenye le nkitoo.>>

28Nejoki ꞉ninche Yeso, <<Nyo kias payie kitum aataas siaatin oyieu Nkai?>> 29Nejoki ꞉Yeso, <<Kore siaai e Nkai naa payie irukuruk ilo oirriwua ꞉ninye.>> 30Nejo ꞉ninche, <<Kaa asata naitodolu nkitoo ino nias payie kidol, nikiruk iyie? Kaa naa ias iyie? 31#Nai 16:4,15; SNk 78:24Kore apa ꞉lmakui lang naa ketama mana#6:31 Kore mana naa ndaa naichoo ꞉Nkai ltung'ana le Isirael too lkees. to lkees, ana nejo Lkigerot Sinyat, <Keichoo ninche mukate naing'uaa chumata metama.> >>

32Nejoki ꞉Yeso, <<Kajoki ntae sipata nadede, mara Musa oichoo ntae inia daa naing'uaa chumata, kake kore ndaa e chumata nadede naa Papa lai oichoru. 33Kore inia daa e Nkai naa ilo otodowua eing'uaa chumata, neicho nkop nkichui.>> 34Nejo ꞉ninche, <<Lkitok, nchoo iyioo ana daa nkata pooki.>> 35Nejoki ꞉Yeso, <<Kara nanu inia ndaa e nkichui. Kore pooki ng'ae olotu natii, nemear aikata sumach, naa kore laairuk, nemetir aikata nkure. 36Kake katilika apa ntae ana, <Kindipa aatodol, newuon ake mikirukuruk.> 37Kore lolo pooki laaicho ꞉Papa, naa kepuonu natii. Naa kore pooki ng'ae olotu natii, mamiraa aikata. 38Amu katodowua nanu to chumata payie aas inia nayieu ꞉ilo laairriwua, namara payie aas inia nayieu makoon. 39Naa kore nayieu ꞉ilo lairriwua nanu naa payie maiminie lolo laichoo ꞉ninye, kake payie aitipiu te inia parri e nkiting'oto. 40Amu kore nayieu ꞉Papa lai, naa metaa kore pooki ng'ae ooing'or Nkerai enye neiruk, netum nkichon nemeiting. Naa kaitipiu nanu ninche te inia parri e nkiting'oto.>>

41Kore inia kata neng'asu larikok loo Lyiaudi aaing'unyung'uny tankaraki ninye, amu ketejo, <<Kara nanu ndaa natodowua to chumata.>> 42Nejo ꞉ninche, <<Aa mara Yeso dei ele, layieni le Yosep, likiyielo menye o ng'otonye? Naaku aji eiko taata payie ejoito, <Te chumata atodowua>?>> 43Newoliki ꞉Yeso ajoki, <<Emintoki aaing'unyung'unyakino. 44Meatae ltung'ani oidim ayeu natii nanu mara ake ilo oyietu ꞉Papa lairriwua, naa kaitipiu nanu ninye te inia parri e nkiting'oto. 45#Isa 54:13Keigero too loibonok le Nkai ajo, <Keiteng'en ꞉Nkai ninche pooki.> Kore pooki ng'ae oning Papa neyielou mbaa naaing'uaa ninye, naa ninye olotu natii. 46Majoito naa keatae ꞉obo otodua Papa. Kake ꞉ilo oing'uaa netii Nkai, ninye ake otodua Papa. 47Kajoki ntae sipata nadede, kore ilo oiruk naa keata nkichon nemeiting. 48Kara nanu ndaa e nkichui. 49Ketama apa ꞉lmakui linchi mana to lkees, kake ketuata eyia. 50Kore ana daa natodowua eing'uaa chumata naa nchi etiu: kore pooki ng'ae oanya nemeye. 51Kara nanu ndaa naichu natodowua eing'uaa chumata. Naa kore tanaa kenya ltung'ani ana daa, naaku keichu ntarasi. Kore ana daa naa sesen lai, oichoruaki payie etum nkop nkichui.>>

52Neng'asu larikok loo Lyiaudi aaikarnyasa maate aajo, <<Kaji eiko ele tung'ani teneidim aichoo iyioo sesen lenye matam?>> 53Nejoki ꞉Yeso ninche, <<Kajoki ntae sipata nadede, kore tiniminyanya sesen le Nkerai e Ltung'ani, nimatmat lodo lenye, naa miatata nkichui taatua ntae. 54Kore pooki ng'ae oanya sesen lai, nemat lodo lai naa keata nkichon nemeiting, naa kaitipiu ninye ta mparri e nkiting'oto. 55Amu kore sesen lai naa ndaa nadede, naa kore aitoki lodo lai naa matata nadede. 56Kore ꞉pooki ng'ae oanya sesen lai, nemat lodo lai, naa kewuon taatua nanu, nawuon sii nanu taatua ninye. 57Naa kore ana naairriwua nanu ꞉Papa oichu, naa kaichu sii nanu tankaraki ninye, naa nejia sii etiu pooki ng'ae oanya sesen lai, nchere keichu ninye tankaraki nanu. 58Kore ndaa natodowua eing'uaa chumata, naa metuwuana ninye napa daa natama lmakui linchi, neitoki ake aaye. Kore loanya ana daa naa keichu ntarasi.>>

59Kore kuna baa, naa ketejo Yeso eiteng'enicho te Sinagogi ta Kapernaum.

Eing'uaa lbata loo ltung'ana Yeso neirukurukore lkulie

60Kore lkumo loo looiteng'eni lenyena ootining'o ana nejo, <<Kegol ana kiteng'ena oleng, ng'ae sa oidimare?>>

61Kore amu keyielo apa Yeso ta ltau lenye ajo keing'unyung'unyuta looiteng'eni lenyena tankaraki inia, nejoki ninche, <<Amaa, kerrek dei ntae ana? 62Oo sa tinidoldol Nkerai e Ltung'ani eiliep alo chumata naing'uaa apa? 63Kore Ltau Sinyati naa ninye oichoru nkichui, naa kore ngolon e ltung'ani naa meitoki eidim ataasa. Kore rerei latiaka ntae, naa nkiyeng'et o nkichui. 64Kake kore taatua ntae, naa keatae lolo lemeiruk.>> Amu keyielo apake ꞉Yeso ta ng'asunoto ajo kakua too lolo tung'ana lemeiruk, naa kalo olikoo ninye. 65Neitoki ajo, <<Naa inia payie atiaka ntae nchere, meatae ltung'ani oidim ayeu natii, mara ꞉Papa oidimie.>>

66Kore tankaraki inia, neibelekenya looiteng'eni lenyena kumo aing'uaa, mekure eirukurukore ninye. 67Nejoki ꞉Yeso loochi ooiteng'eni lenyena tomon o oare, <<Oo ntae, mara mikiyieuu sii niking'uaa?>>

68 # Mat 16:16; Mrk 8:29; Luka 9:20 Newoliki ꞉Simon Petero ajoki, <<Laitoriani, neti ng'ae kipuo iyioo? Iata iyie rerei le nkichon nemeiting. 69Kore iyioo, naa ikiruko, nikiteyielo nchere, iyie ilo Sinyati le Nkai.>> 70Nejoki ꞉Yeso, <<Mara dei nanu otegelua ntae pukura tomon oare? Naa kore eyia, kore lobo taatua ntae naa lairirua.>> 71Kore apa ilo oimakita ninye naa Yudas, layieni le Simon oji Isikariot, ilo kenya olikoo ninye. Kore apa ninye naa kera lobo lo lolo tomon oare.

Currently Selected:

Yoana 6: saq

Highlight

Copy