Yoana 10

Nkitanyanyukoto e lchekut

1<<Kajoki ntae sipata nadede, kore ꞉ltung'ani lemejing'u sum ee nkerra aimu nkutuk, kake kediraki adoki ta nkae ng'oji, naa kera ꞉ninye lapurroni, nera laisimani. 2Kore ltung'ani laa nkutuk e sum ake eeim tenejing sum, naa lchekut loo nkerra. 3Neboloki ninye ꞉larriponi nkutuk e sum, nening ꞉nkerra ltoilo lenye. Naa keipotu ꞉ninye nenia kerra enyena taa nkarn enche, nerikoo aipungie. 4Kore payie eipung'ie nenia kerra enyena pooki, nelo tekue ninche, neirukurukore ꞉nenia kerra ninye, amu keyielo ltoilo lenye. 5Meirukurukore ltung'ani leiching'a, kake keisig aaing'uaa ninye, amu meyielo ltoilo leiching'a.>> 6Ketilika ꞉Yeso ninche ana kitanyanyukoto, kake eitu ening'u ninche mbaa naalikita.

Yeso lchekut supat

7Neitoki Yeso ajoki ninche, <<Kajoki ntae sipata nadede, kara nanu nkutuk e sum najing'akinyieki nkerra. 8Kore lkulie pooki ootuo tekue nanu naa lapurrok o laisimak, kake eitu ening ꞉nkerra ninche. 9Kara nanu ltim. Kore pooki ng'ae ojing'u aimu nanu naa keitajeuni, newuon ta lakunoto, netum ng'oji nedaare.#10:9 Kore newuon ta lakunoto naa kejo Yoana Kejing'u ninye neitoki aipung. 10Kore lapuroni naa kelotu ake ninye, apurroo, near, neitarruoo. Kake kayewuo nanu payie etum ninche nkichon, netum ebore.

11<<Kara nanu lchekut supat. Kore lchekut supat naa keitai nkichui enye tankaraki nkerra. 12Kore ltung'ani oigero naa kedol suyian elotu naa kore tankaraki namara ninye lchekut openy nkerra, neing'uaa nkerra aisig, nelotu suyian aibung nkerra nesachaa. 13Keisig ltung'ani oigero aing'uaa nkerra amu mara nkerra toki te ninye. 14#Mat 11:27; Luka 10:22Kara nanu lchekut supat naa kayielo nkerra ainien, naayielo sii nanu ꞉ninche, 15ana naayielo nanu Papa, nayielo sii nanu ninye. Naa kaitai nanu nkichui ai tankaraki nkerra. 16Kaata sii nkulie kerra namara nana boo, naa kariku ninche, nening ltoilo lai, neaku mboo nabo naata lchekut obo. 17Kaacham nanu ꞉Papa tankaraki naitai nkichui ai, paatum aitoki atang'amai. 18Meatae ltung'ani laar nanu matua, mara ake kaichooyie koon maatari matua. Kaata sipata naichoorie nkichui ai, naata sii aitoki sipata nang'amarie. Inia aaitanapa Papa.>>

19Nepuku aitoki nchankar taatua larikok loo Lyiaudi tankaraki e lolo rerei ootejo Yeso. 20Kore lkumo lenche nejo, <<Keata lairirua, nemada! Nyo iwuenini ainining ninye?>> 21Kake nejo lkulikae, <<Meatae ltung'ani oata lairirua oiro aikonyi! Amaa, keatae sa lairirua oidim atobolo nkonyek ee lmodook?>>

Etanya ꞉larikok loo Lyiaudi Yeso

22-23Kore ta ng'amata apa nairobi nkop te inia kop, naaku inia kata enyaitae ntasim e nkitisinyata e nkaji e Nkai#10:22–23 Kore ntasim e nkitisinyata e nkaji e Nkai naa keji to nkutuk ee Lburania Hanuka, naa ntasim nanyae aaparru nkata apa naitisinyaki nkaji e Nkai. te Yerusalem. Kore mparri nabo, nemanaa Yeso taatua nkaji e Nkai to ng'oji neji ne Solomon natii suntai mbata nabo, netii lng'opeta nkae. 24Nepuonu larikok loo Lyiaudi aaigeru Yeso nejoki, <<Anu kenya ipik iyioo lng'ach, milimu sipata? Kore tanaa ira iyie ilo Aitejeunoni oaanyutae oji Kristo, Tiliki iyioo aibalunyie.>> 25Newoliki ajoki, <<Aidipa apa atiliki ntae, nimirukuruk. Kore asat naasita ta nkarna e Papa lai naa kelimu sipat naipirita nanu, 26kake mirukuruk amu mirara nkerra ainien. 27Kore nkerra ainien naa kening ltoilo lai, nayielo ninche, naa kaairukurukore nanu. 28Kaicho nanu ninche nkichon nemeiting, nemeidaari aikata, nemeatae loidim atowuapai ninche ta nkaina ai. 29Kore Papa lai laaichoo nanu ninche, naa keisul pooki, nemeatae loidim atowuapai ninche ta nkaina e Papa. 30Kore nanu o Papa, naa nabo kira.>>

31Nerrapu aitoki larikok loo Lyiaudi soito aanang ninye. 32Nejoki ninche, <<Kaitodua ntae asat kumo supati naaing'uaa Papa, kaa nabo te nenia asat kinang'ieng'ie soito?>> 33#Lal 24:16Newoliki aajoki, <<Mara tankaraki e asata supat kinang iyie too soito, kake tankaraki nitedia Nkai! Amu kore ira ake ltung'ani, nintaa koon Nkai!>> 34#SNk 82:6Newoliki Yeso ajoki, <<Amaa, meigero tee Lkigerot Sinyat lirukurukorere nchere, <Katejo irara ntae nkaitok>? 35Amaa lolo ooyewuo ꞉rerei le Nkai netii, tanaa keipoto ꞉Nkai ninche ajo nkaitok, nemeitaa lkigerot meitoki, 36aji sa inkoko tinijiejo ilo oitisinya Papa, neirriu meyeu nkop ketedia Nkai tankaraki natejo, <Kara Nkerai e Nkai>? 37Kore tanaa maasita asat e Papa lai, emikurukuruk! 38Naa tanaa kaasita, abaki tanaa mikirukuruk nanu, eruko nenia asat payie eyielouu, nining'ung'u aajo ketii Papa atua nanu, natii nanu atua Papa.>> 39Nenyok aitoki aaibung ninye, kake neing'uaa ninche.

40 # Yoa 1:28 Nerrinyo aitoki Yeso alang'aki ildo kokun le sere e Yordan, inie apa neibatisie ꞉Yoana ltung'ana, nebik teinie. 41Nepuonu ltung'ana kumo neti ninye. Nejo ninche, <<Kore abaki eitu eas ꞉Yoana Laipatisani mbae nabo naitodolu nkitoo enye, kake kore pooki natejo naipirita ele tung'ani naa kedede.>> 42Neiruk ꞉ltung'ana kumo Yeso te inie.

Currently Selected:

Yoana 10: saq

Highlight

Copy