Matiye 8
8
Iisa rayyadda majaddimnice
(Elloŋ Mark 1.40-44, Lik 5.12-14)
1Maa ga Iisa gaamicca giraaniti taata, gaa beeriɗe min jappiti, guu giimi maani maani jobbiyya. 2Gaa gimu kaƴi aɗe ma ay majaddimnice#8.2 Giimi ma lekka judaam pa gu terreyay kayco min giimo, asan gu hukumnigeetee Mellayi leewiko guta kotti samaane ɗa unti Mellayi. asiɗe darsa unti. Gaa wakkiyya gaa: «Miltu, kii aŋka, ki gederra ki rayyiddinno na deeɗo samaane unti Mellayi.» 3Gaa Iisa n̰aamiyya pitti ga eesiyya. Gaa beneyyiyyee gaa: «Haa, na aŋka. Dee samaane unti Mellayi!» Gaa ma haŋka keeke aɗe ga deeɗe samaane min judaamti. 4Gaa Iisa beneyyiyyee gaa: «Warru maaƴi, addo beneyya ɗa ya oko gimu kaƴi. Addo soopa ki deeɗeega gaara ziicum oko soƴoowa ka saɗikaŋgeyyo. Kii itirɗo saɗikane aleŋ maa ga Muusa beneyye Kitamniti#8.4 Elloŋ Soƴoowee ku Saɗikaŋgeyyo 14.2-32.. Ay goŋŋa appe ki gaariyyoo oko giimo kadar ki rayyide.»
Iisa rayyaddaa lubaakati tattuwco asaakargeyyo
(Elloŋ Lik 7.1-10)
5Gaa min iŋaa ga Iisa ƴiiliɗe, gaa garribiɗe geegar ka Kaparnawom. Maa ga un̰n̰iɗe, gaa tattuwco asaakargee orooruwee orro ku Rooma asiyyee. Gaa inniyya gaa: 6«Ban̰n̰u miltu, lubaakatu oƴee giiri. Gata pa roŋgoyye o ga deegeyye ta tirta.» 7Gaa Iisa beneyyiyyee gaa: «Naa saa kataa na deeɗiya rayyida.» 8Gaa tattuwco asaakargeyyo tiiliyyee gaa: «Miltu, naa saabayye ɗa gimu maa ki un̰n̰iɗo girtu, innasoo ki iyyu biicum ka, gaa lubaakatu rayyidiɗo. 9Naa beneyyiya keeke ay asan ga naa kulla ma kayaatu lekka taattuweetaw ma kakawwinoo maa na jobokka, o na lekka kulla asaakargee maa na kakee ma jobokkano. Naa beneyyiyee oko kaƴi naa: “Addo!”, ga kataa, o naa beneyyiyee oko kaƴi naa: “Asu!”, ga asaa, o naa beneyyiyee oko lubaakatu naa: “Leyya keeke!”, ga leewaa.» 10Maa ga Iisa giyyiyya beneyti kaaka, gaa ajjibiɗe. Gaa beneyyiyyoo oko giimi ma jobokkaa gaa: «Na beneyyatoŋca seene, ya min oko giimi ku Isirayel kulla na gasse ɗa ya gimu kaytiŋ maa gi amanniti yaata aleŋ tee ta gimu keeke. 11Giyyino ƴa samaane: Giimi maani ma ay Yawudigee ɗa akka asa min ta jarilti o min ta culumti, guu asiɗo nunta tiyaawi ma Biraayim o ma Isaaka o ma Yakub aattí mulunniti Mellayi. 12A Yawudigee ma moyaa soopa goo gi mulunniti Mellayi ay tanco gu akkiy dawwa renta namtuwwi. Iŋaa pa gu akka erca o gu akkiy ayamma saanco.» 13Gaa Iisa beneyyiyyee oko tattuwco asaakargeyyo gata kee gaa: «Yooku gircum, ga deeɗam aleŋ maa ki amanne!» Gaa oko wikinne kaaka saa ga lubaakati rayyidiɗe.
Iisa rayyaddaca aydinti Piyer o paraayee maani
(Elloŋ Mark 1.29-34, Lik 4.38-41)
14Gaa Iisa kaatiɗe girti Piyer. Gaa gassicca yaatí daatti Piyer, gaa ziití koɗosse gi oƴowɗe daŋgilo. 15Gaa eesicca min pittí, gii rayyidiɗe min ziití ma koɗosse. Gii waciɗe, gii joobiyya samaane. 16Gaa ma pootimooko, gu giimi itiriyyee giimi maani maa gu awaaradgee deegeyye. Gaa ma beneyti kaƴi ka, ga Iisa pittiɗiy awaaradgeeco kotti o ga rayyidiy kulla giimi paracco ma parayya. 17Ay goŋŋa appe ga beneyti Mellayi maa ga nabiinice Esaya beneyye asiɗe butulti. Gata pa beneyye gaa: «Gata icciya maadurruwtine o ga goyyiy paraayiŋgeetine#8.17 Elloŋ Esaya 53.4..»
Giimi ma aŋka gu jobbiɗo Iisa
(Elloŋ Lik 9.57-62)
18Maa ga Iisa elliɗe gu giimi maani kadarriya, gaa beneyyiyyoo oko jobookeetee gaa: «Tappine ta nussantí baharriti katik.» 19Gaa maa gu alɗe kalappa ɗa missa markabati, gaa aalimne kaƴi ka Kitamniti Muusa asiyyee oko Iisa. Gaa beneyyiyyee gaa: «Garaawa, na deeɗum jobokko were paratti maa ki katawɗo.» 20Gaa Iisa pa tiiliyyee gaa: «Gooyagooya lekka beddigee o ɗiiɗi lekka gerra. A Runti Gimi soopa, lekka ɗa were maa ga ooƴiɗo ga nambiɗo.» 21Gaa min oko giimi kotti ma jobokka, ga kaƴi payya beneyyiyee oko Iisa gaa: «Miltu, oyyaw ɗe na deeɗiya tina ƴa omma tattu.» 22Gaa Iisa pa tiiliyyee gaa: «Jobbino, duwayo oko giimi ma ay aleŋ kuu gu mattenta gu saayiɗiy gimco ma matakke.»
Iisa wereɗɗa ussu o lokkomco ammo
(Elloŋ Mark 4.35-41, Lik 8.22-25)
23Gaa min iŋaa, ga Iisa ma jobookeetee kalpiɗe markabati. 24Gaa kaytiŋ ka gi ziiziyo yaata waciɗe aattí baharriti namma gu lokkomco ammo kawaɗɗiti ɗakko oko markabati. Iisa pa oƴee waani. 25Guu jobookeetee sappiyyee, gu asiyya miina, guu beneyyiyyee goo: «Miltini, moogini, ke matakka pe!» 26Gaa Iisa pa tiiliyyoo gaa: «Ayme ku ɓayaɗɗo? Kuŋ keeke gi amannitoŋ paalta ka missa.» Gaa waciɗe ga makkiyyee oko ussi o oko baharriti. Gaa were ƴaapiɗe yil. 27Guu ajjibiɗe ta tirta. Guu beneyɗo goo: «Gata keeke ay me gimta namma ga ussu o baharre kulla gewɗiya kanti?»
Iisa rayyadday giimi seera maa gu awaaradgee bamakke
(Elloŋ Mark 5.1-20, Lik 8.26-39)
28Gaa min iŋaa, ga Iisa sarɗe nussantí baharriti katik, kiɗa ta Gadaara. Guu giimi seera maa gu awaaradgee bamakke oomiyye min kayyeyyo, guu asiyyee oko Iisa. Guta pa ga awaakuwco pocowwiyoo ta tirta namma ga alɗo lekka ɗa ya gimu ma ƴelaa ma botol kaaka. 29Guu diiliɗe gu kawwakɗo goo: «Ki aŋkini ini me, kii Runti Mellayi? Ki ase ki asinni diigiya omma min wikinni e?» 30Arro paalta min wikirco kaaka pa, lekka hidibe yaata ta kinzirnigeyyo ma tawakka iŋaa. 31Guu awaaradgee kotti malmiliyya Iisa goo: «Maa ki peteɗɗini pa, ki n̰aamini oko hidibe ta kinzirnigeyyo taata.» 32Gaa Iisa tiiliyyoo gaa: «Aɗoŋ!» Guu oomiɗe min oko giimi ku seera guta koo. Guu deeɗe un̰n̰a kinzirnigeyyo. Gaa koɗok min uwwa jappiti, gi hidibe taata parattí zar̰agr̰igiɗe ridididi gi subbiɗe aattí baharriti. Guu ammi teeɗica. 33Gaa min iŋaa gu maggee gaɗɗiɗe gu kaatiɗe geegarri. Guu deeɗiy jeppa gaari paracco ma deero o ma asiyoo oko giimi kotti maa gu awaaradgee bamakke. 34Guu giimi ku geegarri paracco oomiɗe ku maa gu asikkiki waaga Iisa. Maa gu elliyya pa, gu malmiliyya goo ga ƴiilu min kiɗaaco.
Currently Selected:
Matiye 8: mmy
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
