Matiye 25

Masal ta gommossi ku orro

1Gaa Iisa beneyɗo missa ma masal gaa: «Oko wikinne kaaka pa, maa gaa Runti Gimi asawɗo, gi mulunniti Mellayi saabayye aleŋ gommossi orro ma icciy lampiŋgeeco, guu oomiɗe ku maa gu deeɗiya jooba ɗibilu maa gu jawwazze. 2Guu ku beeƴa ɗe alɗo ibina ɗa gaari, ku beeƴa pa ibina gaari. 3Guu ma ibina ɗa gaari icciɗiy lampiŋgeeco, guu alɗe mooya ɗa gu gulmiɗe sewen ka gaayiti. 4A gicco ma ibina gaari soopa icciy lampiŋgeeco o gu gulme kulla sewen koloŋgiŋgeyyo ma deewayo dukurre ka gaayiti. 5Gaa maa gu jawwazze alɗo asaa ɗa koɗok, guu waani icciɗiy paracco, gu ooƴiɗe.

6«Gaa ɗaɗɗakkiti aandoŋŋi, gu giyyiɗe ur̰e ma cayyakka gee: “Ay gata appe keeke ga mittí daatti. Oomoŋ ku joobiyya!” 7Guu gommossi kotti paracco waciɗe. Guu yayyimɗiy lampiŋgeeco. 8Guu gommossi ma ibina ɗa gaari inniɗiy gommossi ma ibina gaari goo: “Biraani ɗe siwintoŋ paalta, asan gu lampiŋgeetini batakka.” 9Guu ma ibina gaari pa tiiliyyoo goo: “Kaw, arakkeene ɗa parattine oko nii o oko kuŋ, kaaka pa ku aɗoŋ oko ma saawagga ku deeɗo giɗa.” 10Gaa maa gu katawɗo giɗaawi siwinni pa, gaa mittí daatti asiɗe. Guu gommossi ku beeƴa ma yayyamme samaane un̰n̰iɗe ma gata giiri, aatti ger ka jiizanti. Gii burgo ta giiri gu tagisicca rac. 11Gaa sulaayi, gu ku beeƴa koo kulla asiɗe. Guu beneyyiyyee oko miltí daatti goo: “Miltini, miltini, iyyani ɗe ni un̰n̰iɗo.” 12Gaa miltí daati pa tiiliyyoo gaa: “Na beneyyatoŋca seene, na ibintoŋ ɗa.”» 13Gaa Iisa pa gaayiɗe payya gaa: «Kaaka pa ku nuntoŋ nadiraŋgee, asan ku ibinca ɗa bala gi meentu o bala gi sahatu maa na asawɗo.»

Masal ta lubaakee ku subba

(Elloŋ Lik 19.11-27)

14Gaa Iisa beneyɗo missa ma masal gaa: «Mulunniti Mellayi saabayye aleŋ gimu ma aŋka turguwe, gaa kolliɗiy lubaakeetee, gaa kappiyyoogu lawtee. 15Oko ka omma ƴa ga biryee tammayigee ku dahamni beeƴa. Ma daa ka seera pa ga biryee tammayigee seera, oko ma daa ka subba pa ga biryee kaƴi, kulla kee aɗe oko gudiranti. Maa ga biriyyoogu pa, gaa turguwɗe paaɗe. 16Gaa koɗok ga ma gasse tammayigee beeƴa kee kaatiɗe taajirti. Gaa deeɗe gassa payya tammayigee daare beeƴa. 17Gaa ma gasse tammayigee seera kulla leeɗe saa aleŋ teete aɗe. Gaa gassiɗe payya seera daare. 18A ma gasse tammaye kaƴi soopa, kaate ga deeɗe caara beena kiɗaati. Gaa deeɗiya kiila iŋaa gurus maa ga tattuwti berewwiyee.

19«Maa ga dummiɗe, gaa tattuwco lubaakee koo yookiɗe. Maa ga yookiɗe pa, ga leelo ka gemmiti gurusti maa ga kapakkiyoo. 20Gaa ma gasse tammayigee ku dahamni beeƴa saapiyyee katta oko tattuwti. Gaa itiriyyeegu tammayigee ku beeƴa daare maa ga gasse. Gaa beneyyiyyee gaa: “Ellu ƴa tattuwtu, ki biryaw beeƴa. Haŋka pa ki elliy kooko payya daare beeƴa maa na gasse.” 21Gaa tattuwti tiiliyyee gaa: “Adal, adal, kii ay lubaaka ka ɗayaŋ o ka damannenta. Oko lawwi ku paalta kooko, ki deero daŋgam. Kaaka pa na akkamgu kappa ku maani ƴiila. Asu ki asiɗo parhina ma naa tattuwcum.”

22«Gaa lubaaka maa gu biryee tammayigee seera kulla saapiɗe katta. Gaa beneyyiyyee oko tattuwti gaa: “Tattuwtu, ki biryaw tammayigee seera. Haŋka pa ki elliy kooko payya seera daare maa na gasse.” 23Gaa tattuwti tiiliyyee gaa: “Adal, adal, kii ay lubaaka ka ɗayaŋ o ka damannenta. Oko lawwi ku paalta kooko, ki deero daŋgam. Kaaka pa, na akkamgu kappa ku maani ƴiila. Asu ki asiɗo parhina ma naa tattuwcum.”

24«Gaa dessiti, ga maa ga tattuwti biryee tammaye kaƴi kulla saapiɗe katta gaa beneyyiɗe gaa: “Tattuwtu, na lekka kabarre kadar ki ay gimu ka talta. Ki seɗekka korƴo maa ki lowokke ɗa o ki temekka busini min oko were maa ki alɗe soƴokka ɗa. 25Kaaka pa na ɓaye. Naa deeɗiya saaya kiɗaati guruscum. Haŋka pa ay gata aɗe keeke. Cawwiya!” 26Gaa tattuwti tiiliyyee gaa: “Kii ay lubaaka ma gidaani ɗa o ki ay aayumne. Kii lekkiɗo aɗe goŋŋa kabarre kadar na seɗekka korƴo maa na lowokke ɗa o na temekka busini min oko were maa na alɗe soƴokka ɗa, 27ki alɗiya gagaw ɗe bankiyyi. Goŋŋa naa yooke na akkiya icca gurustu ma paydane. 28Kaaka pa, ku iccineega tammayiti ka kaƴi, kuu biriyyeega oko ma lekka orro. 29A gata pa gimu ma lekka gu beree payya, ga gassiɗo maani ƴiila. A ma lekka ɗa soopa gu ecekkeega payya ka paalta kulla maa ga lekka. 30Lubaaka ma gayee ɗa maatiki pa, ku uwwoŋga maaƴi renta namtuwwi. Iŋaa pa gu giimi erecca o gu ayammay saanco.”»

Meene ta parlanti

31Gaa Iisa beneyɗo missa gaa: «Gaa Runti Gimi ase asa ma darjanti o ma malaykatnigeetee paracco, ga akka nunta wikirti ka mulunniti ma garaa darjanti. 32Guu giimi ku ballee paracco asiɗo timma unti. Gaa jagiɗiy durgee seera aleŋ maggu ma darakkay tameetee o iintee. 33Gaa timmiɗiy tamee ma nussane ka tiyaawati o iini pa ma nussane ka n̰ugilati. 34Gaa gata ma ay sultan asiyyo beneyya oko ma aaye nussane ka tiyaawati gaa: “Asoŋ, ga kuŋ ma baarikenta ma Tattu. Asoŋca icca haggantoŋ, gita pa ay mulunne maa ga Mella hassallitoŋca min kilgiytí dunuuniti, 35asan gi maya deenoo, kuu biriyyaw tiyaw, o ibini deenoo, kuu biriyyaw na aar̰iɗe, o na deero turuutoŋ kuu joobinnoo samaane. 36Na lekka ɗa kaɗiyyu ka issiti kuu birinnaw, o na parayya kuu asiɗe ellitu, o gu bakamminoo daŋayi ku asiɗe ellitu.”

37«Guu ku ɗayaŋ unti Mellayi asiyyee tiila goo: “Minke ni ellum kii mayaata nii biriyyam tiyaw o ibinta nii biriyyam ammi ki aar̰iɗe? 38Minke ni ellum kii ay turu, nii joobiɗum samaane o ki lekka ɗa kaɗiyyu ka issiti nii biriyyam ki issiɗe? 39Minke ni ellum kii parayya e baŋ gu bakammum daŋayi, nii elliɗum?” 40Gaa sultan pa asiyyo tiila gaa: “Na beneyyatoŋca seene, kulla wikinne aɗe maa kuu leelo liyaw kaƴi min oko liyawiŋgee kooko oko kaƴi min oko seneetaw ku marenta, ga ay oko naa saa ku leyya.”

41«Gaa sultan asiyyo beneyya oko ma aaye ma nussane ka n̰ugilati gaa: “Sappoŋ maaƴi arro min oko naa, ga kuŋ ka boolenta. Aɗoŋ aattí okko ma batakka ɗa ta kaw maa ga Mella hassalliyooca oko Seetanne ma malaykatnigeetee#25.41 Malaykatnigee kooko pa iŋee, ay ma jobokka Seetanne., 42asan gi maya deenoo kuu alɗinaw bira ɗa tiyaw o ibini deenoo kuu alɗinaw bira ɗa na aar̰iɗe. 43Na deero turuutoŋ, kuu alɗino jooba ɗa o na lekka ɗa kaɗiyyu ka issiti kuu alɗinaw bira ɗa. Na parayya e baŋ pa gu bakamminoo daŋayi, kuu alɗino ella ɗa.”

44«Guu guta kulla asiyyee tiila goo: “Miltini, minke ni ellum kii deegeyye ma maya e baŋ ga ma ibini? Minke ni ellum ki ay turu e baŋ pa ki lekka ɗa kaɗiyyu ka issiti, o ki parayya e baŋ pa gu bakammum daŋayi, nii poociɗe ni alɗiyam lee ɗa samaane?” 45Gaa sultan pa asiyyo tiila gaa: “Na beneyyatoŋca seene: Kuu leelo ɗa ya kaƴi min oko liyawiŋgee kooko oko kaƴi min oko seneetaw ku marenta, ga ay oko naa saa ku leyyawga ɗa.” 46Guu guta kooko asiɗo un̰n̰a aattí okko ma batakka ɗa ta kaw, ku ɗayaŋ unti Mellayi soopa kataa gu deeɗo gassa hayaatane ma gakamma ɗa ta kaw.»

Currently Selected:

Matiye 25: mmy

Highlight

Copy