Yaaya 8

Daate maa gu gasakka gaa miiɗi oƴowwikiti

1Iisa pa kaate dambu ka olibiyeyyi. 2Gaa ma ta sokkonta kaƴi ma sossoko ka, ga Iisa yookiɗe ga asiɗe un̰n̰a payya dooranti girti Mellayi. Guu giimi maani asiyya gassa. Gaa nuntiɗe ga garawɗiyo beneyti Mellayi. 3Guu aalimnigee ku Kitamniti Muusa o Pariziyennigee itiriyyee daate maa gu gasse gii esekke miiɗi ma ay mittí ɗa. Guu asicca wirra ɗaɗɗakkico giimo unti Iisa. 4Guu beneyyiyyee goo: «Garaawa, daate teete ni ɗeeŋica haŋka aɗe gii esekke miiɗi. 5Hukumnigeetee Muusa pa beneyyine goo ke dawakkineegu ma dambee daatti ma leewa goŋŋa ke dewɗiy. A kii pa, kii me pe?»

6Guta pa beneyye goŋŋa, asan gu aŋka cokkiti, ku maa gu gassiɗo botol gu luumiyiyya. Iisa pa zoone kanti ga gerewɗo kiɗaati ma pitti. 7Gaa maa gu kuddiyiyyee inniti, ga Iisa cipilicca kayaati, gaa beneyyiyyoo gaa: «Maa gaa leelo ɗa kaytiŋ zunubgee, ga iccu dambu gaa diiliɗo ga uwwicca.» 8Gaa zooniɗe payya ga gerewɗo kiɗaati.

9Maa gu giyyiyya beneyti kaaka pa, guu diiliɗe gu n̰or̰owɗo kaƴi kaƴi min baabaŋgeyyo ƴa omma. Gaa Iisa marɗe pe kayti ka ma daate gita taata ma waraɗɗe unti. 10Gaa cipilicca payya kayaati, gaa beneyyitti gaa: «Daate, guu alɗo ŋa pe gu giimi ma loomoyyite? Lekka ɗa gimu ma caaɗite parlane kadar ga kante ay muutu ka pe e?» 11Gii tiiliyyee gee: «Lekka ɗa ya gimu, Miltu.» Gaa Iisa beneyyitti gaa: «Addo, naa kulla caaɗite ɗa parlane ma ka muuti. Innasoopa, ka addo lee ɗa payya zunubgee.»

Iisa ay bahaarane ta dunuune teete

12Gaa Iisa beneyyiyyoo payya oko giimo gaa: «Naata ay bahaarane ta dunuune teete. Gaa gimu jobbino, ga tan̰aa ɗa ta kaw namtuwwi o ga gasakkaca bahaarane ma beraa hayaatane.» 13Guu Pariziyennigee beneyyiyyee goo: «Ki beneyya ma gaari ku kayaacum ka. Goŋŋa pa, ga beneycum keeke maa ki beneyya ni oyaa ɗa kadar ga ay seene.» 14Gaa Iisa tiiliyyoo gaa: «Caŋ na beneyya ma gaari ku kayaatu ka kulla, ga beneytu ay seene, asan na ibinya were maa na asawɗe o were maa na katawɗo. Kuŋ soopa ibinya ɗa were maa na asawɗe o were maa na katawɗo. 15Kuŋ caɗaa parlane aleŋ ta giimo ka maa gu caɗawɗiyo parlane oko gicco. Naa soopa caɗaa ɗa oko gimi. 16A naa caaɗee parlane oko gimi kulla, ga kanni ay seene, asan na caɗaaca ɗa kaytu ka. Mella Baaba ma n̰akamminoo aaye ma naata. 17Beneyye hukumnigeetoŋ goo: “Guu giimi seera beneyye beneyyi kaƴi ka, ga beneyco kaaka daa seene#8.17 Elloŋ Ɗillico Hukumnigeyyo 17.6..” 18Naa beneyya ma gaartaw, o Mella Baaba ma n̰akamminoo kulla beneyya ma gaartaw.» 19Guu inniyya goo: «Taccum ay ŋa?» Gaa Iisa tiiliyyoo gaa: «Ku ibinno ɗa naata, o ku ibinya ɗa kulla Tattu. Kuu ebenɗino naa, ku ebennaa kulla Tattu.»

20Beneyti keeke pa, ga beneyyiyooga wikinne maa ga alɗo dooranti girti Mellayi, katta were maa gu giimi kalawɗo saɗikane ta guruzzi, gaa alɗo lekka ɗa soo ma eesiya asan ga wikinniti asee ɗa missa.

Iisa beneyya ma gaari ku yookiti samaani

21Gaa Iisa beneyyiyyoo payya gaa: «Na kataa. Kuŋ pa akkino diyya kuu alɗino gassa ɗa o ku gederra ɗa ku kaatiɗo were maa na katawɗo. Ku akka matta ma zunubgeetoŋ aɗe.» 22Guu taattuweeco Yawudigeyyo beneyɗo aacco goo: «Akka dee ziiti e? Maa ga beneyɗo pe gaa ke gederra ɗa ke kaatiɗo were maa ga katawɗo.» 23Gaa Iisa tiiliyyoo gaa: «Kuŋ ay giimi ku kiɗaati, naa soopa ay ka uwwa. Kuŋ ay giimi ku dunuune teete, naa soopa ay ka dunuune teete ɗa. 24Ay ɗakko appe na beneyyitoŋ naa ku akka matta ma zunubgeetoŋ aɗe. Kuu amanne ɗa kadar ga ‘Naa ay Ma Aaye Diiman’#8.24 Beneyti Iisa maa gaa Naa ay Ma Aaye Diiman keeke, ay semeetee Mellayi. Wikinne maa ga Mella oomiyee oko Muusa, gaa beneyyiyee gaa gu semeetee goo ‘Naa ay Ma Aaye Diiman’. Ma beneyco Ebireenigeyyo pa goo YAHWEH. Elloŋ Oomiti min Masir 3.14. ku akka matta ma zunubgeetoŋ.» 25Guu inniyya Iisa goo: «Kii pa ay we?» Gaa Iisa tiiliyyoo gaa: «Min diiliti na beneyyitoŋ appe. 26Na lekkitoŋ gaari maani maa na beneyyatoŋ o maa na caɗaatoŋ oko gaari maa ku leewa. Innasoopa, na beneyyayo oko giimo beneyyi maa ga gata ma n̰akamminoo garawwiyaw. Gata pa, ga beneyti keeke ay seene.»

27Guu giimi alɗiya ibina ɗa beneyti kaaka kadar ga beneyyayo ma gaartee Mella Baaba. 28Gaa Iisa beneyyiyyoo gaa: «Wikinne maa kuu asiya paapa Runti Gimi uwwa pe kuruwayi, kuu asiɗo lee ka pe kabarre kadar ga ‘Naa ay Ma Aaye Diiman’, o ku ebenna kulla kadar ga beneyyi maa na beneyyatoŋ asaa ɗa min oko naa, innasoopa ga ay Mella Baaba ma garawwawga. 29Gata ma n̰akamminoo dowwiyaw ɗa kaytu ka. Innasoopa, ga aaye ma naata, asan na leewa diiman gaari ma daanee.» 30Wikinne maa ga Iisa beneyyiɗe goŋŋa, guu giimi maani duwɗiy galbigeeco oko gata.

Giimi ma leewa miɗɗa ay lawweeco zunubgeyyo

31Gaa Iisa beneyyiyyoo oko Yawudigee ma dowwiy galbigeeco oko gata gaa: «Kuu nowottikiki beneytu, ku daa jobookeetaw ku tirta. 32Ku ebennaca seene, o gi seene taata perekkatoŋ min lawwuwwi.»

33Guu tiiliyyee goo: «Nii ay giimi ku balti Biraayim, o ni deero ɗa kaytiŋ lawweetee gimi. Gaa ayme ki beneyɗini kii ni akka dee pirenta min lawwuwwi?» 34Gaa Iisa tiiliyyoo gaa: «Giyyoŋ! Na beneyyatoŋca seene. Kulla gimu ma leewa aɗe goŋŋa zunubgee ay lawwico zunubgeyyo. 35Lawwu nowotta ɗa diiman giiri. Miica ka giiri soopa, ay ka giiri aɗe diiman. 36Gaa Runti Mellayi pirittoŋ min zunubgeyyo, ku gasakkay kayyeetoŋ ma seene, kuu deeɗo gimtee Mellayi. 37Na lekka kabarre kadar ku ay ka balti Biraayim. Innasoopa, ku aŋkiɗo diyawtu, asan ga beneytu un̰n̰itoŋ ɗa o ku poociya. 38Na beneyyatoŋ latta maa na elelle min oko Tattu, kuŋ pa leewa latta maa ga tattoŋ garaatoŋ.»

39Guu tiiliyyee goo: «Tattini ay Biraayim.» Gaa Iisa beneyyiyyoo gaa: «Kuu alɗo aɗe goŋŋa ma seene rontee Biraayim, ku leewa saa kulla garrarritee maa ga leewa. 40Haŋka soopa na beneyyatoŋca seene maa na geewe min oko Mellayi. Gaa ma keeke aɗe ku aŋkiɗo diyawtu. Biraayim pa, bala ga leelo ɗee goŋŋa. 41Kuŋ, leewa garrarri aleŋ ku tattoŋ.» Guu tiiliyyee goo: «Nii ay buumiŋgee ɗa. Ni lekka tattini kaƴi ka ma ay Mella.» 42Gaa Iisa beneyyiyyoo gaa: «Gaa Mella alɗo tattoŋ ma seene, ku ƴekekkano, asan na asaa min oko gata, ay ɗakko appe na alɗo iŋee gaddanti. Na asee ɗa ga naa milco ka, ay gata ma n̰akamminoo. 43Ayme ku alɗiya gasakka ɗa beneytu, maa na beneyyatoŋ? Ay asan ku gederra ɗa giyyiti. 44Kuŋ pa ga tattoŋ ay Seetanne, o ku leewa gaari maa ga aŋka. Gata ay diyaawa min diiliti, o ga jobokka ɗa botol ka seeniti asan ga lekkica ɗa seene. Gaa borolla kulla, gi ay haddanti appe goŋŋa, asan ga ay boroola, o ga ay tatti borooli. 45Naa soopa beneyya seene ka. Ay ɗakko appe ku alɗo amanna ɗa oko beneytu. 46Ay we ma ellinoo kaytiŋ naa leewa zunubgee? A naa beneyyatoŋca seene pa, ayme ku alɗo amanna ɗa oko beneytu? 47Ma ay gimti Mellayi aɗe goŋŋa geewaa beneyti. Kuŋ soopa ay gimtee Mellayi ɗa, ay ɗakko appe ku alɗiya geewa ɗa beneytu.»

Iisa aaye paaɗe omma min wiyawti Biraayim

48Guu taattuweeco Yawudigeyyo beneyyiyyee oko Iisa goo: «Beneytini ay seene maa nii ki ay Samaaritennice o ki lekka aarinne kayaacum.» 49Gaa Iisa tiiliyyoo gaa: «Na lekka ɗa aarinne kayaatu, na on̰aa soo Tattu, gaa kuŋ pa alɗino on̰aa ɗa. 50Na deyekka ɗa cipilo ta semeetaw, lekka soo kaƴi ma deyekkaca. Ay gata pe ma akkiyooca caaɗa parlane oko giimo. 51Giyyoŋ! Na beneyyatoŋca seene: Gaa gimu jobokkiya beneytu, ga mataa ɗa ta kaw.»

52Guu taattuweeco Yawudigeyyo beneyyiyyee goo: «Haŋka pe ni amanne ma seene kadar ki lekka aarinne kayaacum. Biraayim maate o nabiinigee kulla matte, gaa kii pa, kii gaa gimu jobbiya beneycum, ga mataa ɗa ta kaw. 53Ki leewe kii ki tatta ƴiila min oko kaakatini kee Biraayim ma maate e? Nabiinigee kulla matte. Kii pa leewe pe kii ki ay we?»

54Gaa Iisa tiiliyyoo pe gaa: «Naa on̰aa ziitu ga naa milco ka, gi gayee ɗa maatiki. Ma on̰aano ay Tattu. Gata maa kuu ga ay Mella Miltoŋ 55o ku ibinya ɗa, naa soopa ibinya. Naa beneyye naa na ibinya ɗa, na deewa boroola aleŋ kuŋ. A ta seene pa na ibinya, o na jobokkiya beneyti. 56Kaakatoŋ kee Biraayim parhine ta kaw, asan ga ocokke elliti wikinnitu maa na asiɗo. Gaa maa ga elliyya gi deeɗiyee daanee.» 57Guu Yawudigee beneyyiyyee goo: «Kii gu ƴilaakeecam sarakke ɗa missa orooruwee beeƴa kii beneyɗo kii ki elliya Biraayim?» 58Gaa Iisa tiiliyyoo gaa: «Giyyoŋ! Na beneyyatoŋca seene: Min maa gu alɗiya weewa ɗa missa Biraayim ga ‘Naata ay Ma Aaye Diiman’.» 59Maa gu giyyiyya beneyti kaaka pa, guu bulɗe dambee gu aŋkiɗo dawwiti, gaa gata pa n̰oor̰iɗe, ga oomiɗe min girti Mellayi.

Currently Selected:

Yaaya 8: mmy

Highlight

Copy