Yaaya 6

Iisa beraayo tiyaw oko alpaŋgee beeƴa ku giimo

(Elloŋ Matiye 14.13-21, Mark 6.30-44, Lik 9.10-17)

1Maa gu gaari kooko ƴiiliɗe, gaa Iisa kaatiɗe ma jobookeetee kiɗa ta Galilee. Gaa meene kaƴi gu tappicca baharre ta yaata tee ta Galilee maa gu kolaa kulla goo baharre ta Tiberiyad. 2Guu giimi maani jobbiyya Iisa, asan gu elle garaawi ku ajjibiti ma garaa gudiranti Mellayi maa ga leelo maa gu giimi ma parayya rayyidiɗe. 3Gaa Iisa ma jobookeetee deeɗe kalpa jappiti, gu deeɗe nunta iŋaa. 4Oko wikinne kaaka pa, gi laalanco Yawudigeyyo maa gu kolaa goo Pak katta.

5Gaa maa ga Iisa elliɗe gu giimi maani asaayo, gaa inniyya Pilip gaa: «Kee gasakkeene ŋa mappa ke giɗinne, maa ke biryoo oko giimi ku maani kooko?» 6Iisa pa beneyyiyyee goŋŋa oko Pilip asan ga aŋka ga giyyiyya baŋ ga telee gaa me. Gii seene aaye pa, ga Iisa ibinya paaɗe latta maa ga leewaa.

7Gaa Pilip tiiliyyee gaa: «Caŋ ke giɗe mappa ma lubbiti gimi ka koyyee paysara kulla, ga arakkayo ɗa maatiki ku maa ga kulla kaƴi aɗe gassiɗo rootta.» 8Gaa kaƴi min oko jobookeetee, maa goo Andire ma ay sinti Simo Piyer beneyyiyyee oko Iisa gaa: 9«Lekka miica iŋee, ma ecekke mappa beeƴa maa gu leewe ma bitta ku orzeyyi#6.9 Orze pa, saabayye aleŋ geme. Ay giimi ku saamo ma leewe mappa ma bitta ku orzeyyi. o buusi seera. A kooko pa arakkayo pe ini me oko giimi ku maani kooko?»

10Gaa Iisa beneyyiyyoo oko jobookeetee gaa: «Beneyyaniyo oko giimi paracco gu nuntiɗo kiɗaati.» Were kaaka pa lekka n̰aalu maani. Guu giimi nuntiɗe. Miɗi kotti pa, deewa latta ka alpaŋgee beeƴa. 11Gaa Iisa icciyya mappa kaaka, gaa leeɗiyee barkinti oko Mellayi, gaa erriyya, gaa biriyyooga oko jobookeetee, gu ɗeddiyyooga oko giimi kotti paracco ma nowotte. Gaa icciɗiy buusi kulla, gaa leeɗiyee barkinti oko Mellayi, gaa ɗeddiyyoogu oko giimo, gu aymiɗe namma gu ayyiɗe paracco. 12Maa gu giimi paracco teeɗe, gu ayyiɗe, gaa Iisa beneyyiyyoo oko jobookeetee gaa: «Buloŋgu kollee ma mare, ku maa ga ya kaƴi kulla alɗo naŋga ɗa.» 13Guu jobookeetee Iisa bulɗiy kollee ku mappa ma mare, guu onniɗe laŋgee orro o seera.

14Maa gu giimi kotti ma teero elliɗiy garaawi ku ajjibiti ma garaa gudiranti Mellayi maa ga Iisa leelo, guu beneyyiɗe goo: «Ay ma tirta pe ga gimu keeke ay Nabiinice, gata appe maa ga Mella beneyye gaa ga akkiya n̰aama dunuune teete.» 15Iisa pa, lekka kabarre kadar gu giimi aŋka baamiti ma guu, guu gagiyya ga deeɗo sultan. Ay ɗakko appe ga waciɗe ga deeɗe kalpa payya jappiti kayti ka pe.

Iisa tan̰aa kayaaco ammo

(Elloŋ Matiye 14.22-27, Mark 6.45-52)

16Maa gi paato galɗe, guu jobookeetee Iisa kaatiɗe biití baharriti. 17Guu kalpiɗe markabati, guu tappaɗɗica baharre gu katawɗo ta geegar ka Kaparnawom. Wikinne kaaka pa, ay aandoŋ appe, o ga Iisa jobokkiy ɗa missa. 18Gaa ussu maani diiliɗe ga azaɗɗo ma raɗɗa namma ga cepelɗiy ammi ku baharriti. 19Maa gu jobookeetee awalɗiy ammi gi markaba sapaɗɗo, guu kaatiɗe arro latta ka kilometir beeƴa goŋŋa, guu elliyya Iisa gaa tan̰aa kayaaco ammoo ga asawɗiyo. Gaa ɓayaw icciyyooca. 20Gaa Iisa soopa beneyyiyyoo gaa: «Aɗoŋ ɓaya ɗa, ay naa ka.» 21Guu jobookeetee aŋkiɗo gu icciyya markabati, gaa kaytiŋ ka oko wikinne kaaka saa, gi gita pa kulla eesiɗe paaɗe goŋgomni were ma gu aŋkiɗo warro.

Iisa ay mappa ma beraa hayaatane

22Gaa ma ta sokkonta kaƴi, gu giimi ku maani koo ma nowotte ta tappití baharriti katik, elliɗe kadar gi markaba kaƴi ka ma kaate, o gu lekka kabarre kadar ga Iisa kalpe ɗa iŋaa, ay jobookeetee kayco ka ma kalpe gu kaatiɗe. 23Guu lekkiɗo markabanigee daare ma ase min geegar ka Tiberiyad, gu asiɗe warra biití baharriti saripti were maa ga Miltine leeɗiyee barkinti oko Mellayi, gaa ɗeddiyyooga mappa oko giimo gu aymiɗe. 24Maa gu giimi elliɗe kadar ga Iisa o jobookeetee aaye ɗa pa, guu kalpiɗe markabanigee kotti, guu kaatiɗe geegar ka Kaparnawom diyyiti.

25Gaa maa gu deeɗiya gassa ta tappití baharriti katik, guu inniyya goo: «Garaawatini, kii ase minke iŋee?» 26Gaa Iisa tiiliyyoo gaa: «Giyyoŋ! Na beneyyatoŋca seene: Ku deyekkano oko mappa maa na birtoŋ ka, ku aymiɗe ku ayyiɗe. Ay oko garaawi ɗa maa na leelo ku ajjibiti maa ku elle. 27Aɗoŋ lubba ɗa oko tiyaw ma ɗopokka ka, innasoopa, ku lubboŋ oko tiyaw ma domokka o gi beraatoŋ hayaatane ma gakamma ɗa ta kaw. A tiyaw taata pa, ay Runti Gimi ma beraatoŋca, asan ga Mella Baaba oyowwiyee oko Runti Gimi.»

28Guu inniyya goo: «Ni lee pe nii me ni leeɗiya lubbi maa ga Mella aŋka?» 29Gaa Iisa tiiliyyoo gaa: «Lubbi maa ga Mella aŋka ku leeɗiya, ay ku duwɗiy galbigeetoŋ oko n̰amaakati.» 30Guu inniyya goo: «Ki garaani ini me lattata ka ajjibiti, nii duwɗiy galbigeetini oko kii? Kii leewa pe ini me gaarta? 31Tippa maa gu kookuweetini tan̰awɗo goosigeyyo gu teero tiyaw ma gu kolaa goo man#6.31 Man ay latta kaƴi aɗe ma ay aleŋ korƴo maa ga Mella biryoo oko Isirayelitnigeyyo maa gu tan̰awɗo goosigeyyo. Wikinne maa gu oomiɗe min kiɗa ta Masir maa gu alɗo lawwee, guu katawɗo kiɗa ta Kanaan ma ga Mella berewwiyoo., aleŋ maa gi Kitamniti Mellayi beneyye gee: “Gata biryoo mappa ma asaa min samaani#6.31 Elloŋ Soom 78.24. Elloŋ kulla Oomiti min Masir 16.4,13-15..”»

32Gaa Iisa tiiliyyoo gaa: «Giyyoŋ! Na beneyyatoŋca seene. Ay Muusa ɗa ma birtoŋ mappa ma asaa min samaani. Ay Mella Baaba ma birtoŋ mappa ka tirta ma asaa min samaani. 33A gata pa mappa maa ga Mella beraa, ay gata ma asaa min samaani, o ga ay gata ma beraa hayaatane ma gakamma ɗa ta kaw oko giimi ku dunuune teete.»

34Guu beneyyiyyee goo: «Miiɗi, berewwani ɗe diiman mappa kaaka.» 35Gaa Iisa beneyyiyyoo gaa: «Tiyaw ma beraa hayaatane ay naata. Gaa gimu ase oko naata, gi maya deewa ɗa ta kaw, o ma dowwica galbanti oko naata, gu ibini deewa ɗa ta kaw. 36Naa ɗe beneyyitoŋ appe, o ku ellinoo, gaa ma keeke aɗe pa, ku alɗiy duwa ɗa galbigeetoŋ oko naa. 37Giimi paracco maa ga Mella Baaba beraw jobokkano, o maa gaa jobbino naa pa, na pocaa ɗa ta kaw, 38asan na ase min samaani ku maa na asiɗo lee aŋkiti Mella ma n̰akamminoo. Na asee ɗa na asiɗo lee latta maa ga naa ka aŋka. 39Mella ma n̰akamminoo pa, aŋka ɗa na misilɗo ya gimu kaƴi kulla min oko giimi maa ga berewwiyaw. Innasoopa, ga aŋka na asiɗiy naɗa min muuti meene ta gammití dunuune teete wikinne ka parlanti Mellayi. 40Maa ga Tattu aŋka, ay gu giimi paracco ma ibinya Runti, o gu dowwiy galbigeeco oko gata gassiɗo hayaatane ma gakamma ɗa ta kaw, o na asiɗiy naɗa min muuti meene ta gaamití dunuune teete wikinne ka parlanti Mellayi.»

41Guu Yawudigee diiliɗe gu ŋor̰omr̰omɗo, asan ga Iisa beneyye gaa: «Naata ay mappa ma asaa min samaani.» 42Guu beneyyiɗe payya goo: «Keeke ay Iisa ɗa aɗe runti Yuusup e? Ke ibiniy pe aɗe samaane gaayitee. Gaa haŋka pa, ga beneyɗo pe gaa ga asaa min samaani?»

43Gaa Iisa tiiliyyoo gaa: «Aɗoŋ ŋor̰omr̰uma ɗa! 44Lekka ɗa gimu ma gederra ga asiɗo kayti ka oko naa, gaa Mella Baaba ma n̰akamminoo askiki ɗa, o na akkiya naɗa meene ta gaamití dunuune teete.» 45Gaa Iisa beneyyiyyoo payya gaa: «Nabiinigee ketepeyye goo: “Mella akkiy ɓelda giimi paracco#6.45 Elloŋ Esaya 54.13 o Zeremi 31.34 o Ayuub 36.22..”» Gaa beneyyiyyoo payya gaa: «Gimu ma geewaa beneyti Mella Baaba o ga dowwaca galbanti asaa oko naata. 46Lekka ɗa gimu ma elliyya Mella Baaba, illa ay gata ka ma asaa min Mellayi ma elliyya. 47Giyyoŋ! Na beneyyatoŋca seene. Gimu ma dowwaca galbanti oko naa lekkica appe hayaatane ma gakamma ɗa ta kaw. 48Naata ay mappa ma beraa hayaatane. 49Kookuweetoŋ teero tippa goosigeyyo tiyaw maa gu kolaa goo man, maa ga Mella biryoo, guu mattiɗe. 50Gaa gimu soopa teero mappa ma asaa min samaani ga mataa ɗa. 51Tiyaw ma asaa min samaani o gi beraa hayaatane ma gakamma ɗa ta kaw ay naata. Gaa gimu teero mappa keeke pa, ga nowotta diiman o ga mappa keeke maa na beraatoŋ ay ziitu. Na beraa oko giimi ku dunuune teete ku maa gu gassicca hayaatane ma gakamma ɗa ta kaw.»

52Guu Yawudigee kaltiyɗe ta seene aacco goo: «Keeke ay seene ɗa. Gimu keeke gederra ɗa ga birinneega ziiti ke aymiyya!» 53Gaa Iisa beneyyiyyoo gaa: «Giyyoŋ! Na beneyyatoŋca seene: Kuu ayme ɗa ziiti Runti Gimi o kuu aar̰e ɗa baartee, ku gasakkaca ɗa hayaatane ta seene. 54Gimu ma ayamma ziitu, o ga ar̰aa baartaw gasakkaca hayaatane ma gakamma ɗa ta kaw, o na akkiya naɗa min muuti meene ta gaamití dunuune teete, 55asan ga ay ma tirta ga ziitu ay tiyaw o ga ma tirta gu baartaw ay aar̰o. 56Gaa gimu ayme ziitu o ga aar̰e baartaw, ga naa aaye galbanti, o gata kulla aayaw ɗakko galbantu. 57Mella Baaba ma n̰akamminoo ay Miltí hayaatanti, o ga gata ma beraw hayaatane, o naa kulla lekkica hayaatane ma gakamma ɗa ta kaw ma gata. Ay goŋŋa appe gu giimi kulla ma ayamma ziitu gassicca hayaatane ma gakamma ɗa ta kaw ma naa. 58Ziitu keeke ay mappa ma ase min samaani. Gata pa ay aleŋ tiyaw ɗa maa gu kookuweetoŋ teero maa gu alɗo goosigeyyo guu mattiɗe. Gaa gimu teero tiyaw teete soopa, ga gasakkaca hayaatane ma gakamma ɗa ta kaw.» 59Iisa pa, beneyyiya beneyyi keeke wikinne maa ga garawɗiyo oko giimo beneyti Mellayi girco ka giraaniti ma aaye geegar ka Kaparnawom.

Jobookeetee Iisa daare poociya

60Maa gu jobookeetee Iisa daare giyyiyya beneyti keeke, guu beneyyiɗe goo: «Beneyti keeke raɗɗa maani. Lekka ɗa gimu ma gederra pe ga nuntiɗo ga gewɗiya.» 61Iisa pa, leelo saa kabarre kadar gu jobookeetee ban̰aa oko gaari kooko. Ay ɗakko appe ga beneyyiyyoo gaa: «Beneytu keeke raɗakkatoŋ maani e? 62A kuu asiya ella Runti Gimi, gaa yokaa uwwa wikirti ka omma maa ga alɗo, ku akka beneyya pe kuu me? 63Ay Ruuhanti Mellayi ma beraa hayaatane ma gakamma ɗa ta kaw oko giimo. Gimu kayti ka gederra ɗa ga leeɗo maatiki. Beneyyiŋgee maa na beneyyitoŋ kooko asaa min oko Ruuhanti Mellayi, o gu beraa hayaatane ma gakamma ɗa ta kaw. 64Lekka daare min aattoŋ ma duwiy ɗa galbigeeco oko naa.» Iisa pa beneyyiya keeke asan ga ibiniy saa min diiliti giimi ma dowwiy ɗa galbigeeco oko gata, o gimu ma akkiya bira picco giimo. 65Gaa beneyyiyyoo payya gaa: «Ay ɗakko appe na beneyyitoŋ naa ga gimu gederra ɗa ga asiɗo kayti ka oko naa, gaa Mella Baaba oyowwiyee ɗa aɗe goŋŋa.»

66Gaa min iŋaa gu maani min oko jobookeetee meeliɗe jobbiti, guu tacilɗe. 67Gaa Iisa inniɗiy jobookeetee ku orro o seera gaa: «Kuŋ kulla aŋka kaato e?» 68Gaa Simo Piyer tiiliyyee gaa: «Miltu! Ni jobokka pe we? Ki lekkiya beneyyi ma beraa hayaatane ma gakamma ɗa ta kaw. 69Ni amanne o ni lekka kabarre kadar ga kiita ay gata maa ga Mella n̰akamme.» 70Gaa Iisa tiiliyyoo gaa: «Ay naata aɗe ma apirtoŋ kuŋ jobookeetaw ku orro o seera keeke. Gaa kaƴi min aattoŋ pa alɗo gimti Seetanni.» 71Beneyti Iisa keeke pa, ga baarayye Yudas runti Simo Iskariyot, asan ga ay kaƴi min oko jobookeetee ku orro o seera o ga akkiya bira Iisa picco giimo.

Currently Selected:

Yaaya 6: mmy

Highlight

Copy