Lubaakico N̰amaakeetee Iisa Masi 2

Asawtí Ruuhanti Mellayi

1Maa gi meene ta laalane ta seɗɗiti ta Yawudigeyyo maa gu kolaa goo Pantekot asiɗe, guu giimi ma dowwiy galbigeeco oko Iisa Masi paracco deeɗe timma were kaƴi aatti Zerizalem. 2Gaa kaytiŋ ka, gu giyyiɗe maatiki ma heereyye min samaani aleŋ ussu ma azakka raɗɗa. Gaa asiyyo un̰n̰a ger kaaka paratti maa gu alɗo. 3Guu elliɗe maatiki aleŋ lettitti okkati. Guu taciliyyo gu suubiyyo kayyeeco giimi paracco. 4Gaa kulla kaƴi aɗe deeɗe unenta ma Ruuhanti Mellayi. Gaa ma gudirane ta Ruuhane taata, gu diiliɗe gu beneyɗo beneyyiŋgee ku ballee daare maa gu ibina ɗa min omma.

5Aatti Zerizalem pa lekka Yawudigee ma bakammiy aadaŋgeeco ma asee min kiɗaayee paracco ku dunuuniti. 6Maa gu turi kotti giyyicca hawwane ta ussi taata, guu asiɗe timma maani. Guu rawruwɗe paracco asan ga kulla kaƴi aɗe min oko turi kotti geeway giimi ma dowwiy galbigeeco oko Iisa guu beneyya beneyyiŋgeeco. 7Guu gaari kooko appe kaawiyyoogu kayyeeco, guu ajjibiɗe. Guu beneyɗo aacco goo: «Giimi kooko ma beneyya soo ay ku kiɗa ta Galilee ɗa aɗe e? 8A gaa ayme ga kulla kaƴi aɗe gewɗiy gu beneyya beneyyiŋgeetine? 9Min aattine pa, gu lekka giimi ma asaa min kiɗaayee kooko: min Parte o min Medee o min Elam o min Mezopotami o min Yudee o min Kapados o min Ponte o min Aazi 10o min Pirizi o min Pampili o min Masir, o min Libi ma aaye sariptí kiɗa ta Siren, o daare pa asaa min geegar ka Rooma. 11Min aattini pa gu lekka maa gu weewe Yawudigee o daare pa rebelle gu dewɗe Yawudigee, o lekka kulla giimi min kiɗa ta Kiret o min ta Arabi. Gaa ma keeke aɗe ke gewɗiy gu beneyyay gaartee Mellayi ku ajjibiti ma beneyyiŋgeetine.» 12Gaa keeke kaawiyyoogu kayyeeco, guu alɗo ibina ɗa latta maa gu mooyiɗo. Guu beneyɗo aacco goo: «Gaari kooko goo me?» 13Daare pa dakkannay ma dowwiy galbigeeco oko Iisa goo: «Guta mowokke ta kaw!»

Beneyti Piyer oko giimo

14Maa ga Piyer giyyiɗiy beneyyiŋgeeco kotti, gaa waciɗe ma gittee ma ay n̰amaakeetee Iisa ku orro o kaƴi, gaa beneyyiyyoo ma raɗɗa oko giimo gaa: «Kuŋ Yawudigee o kuŋ parattoŋ ma nowotte aatti Zerizalem, giyyoŋga ƴa beneytu keeke samaane! 15Giimi kooko mowokke ɗa aleŋ maa ku moyaa kaaka, gita paato maa gi ay dahaane ka missa. 16Innasoopa ga maa ku geewa keeke ay maa ga nabiinice Zowel beneyye min tippa gaa:

17“Mella beneyye gaa:

Oko meeni ku dessití dunuuniti,

na akkica bira Ruuhantu oko giimi paracco,

rontoŋ ku ɗibilta o ku gommosta akkiyoogu tasawwo

beneyyiŋgeetaw oko giimo.

Na garaayo oko rontoŋ ku ɗibilta

gaari maa gu ellay aleŋ ma waano,

o oko baabaŋgeetoŋ pa,

na beneyyayo ma waano.

18Ay seene, oko meeni kotti,

na akkiyooca bira Ruuhantu

oko lubaakeetaw ku miɗitta o ku daatta,

gu asiɗiy tasawwo beneyyiŋgeetaw oko giimo.

19Na leeway gaari ma garaaca gudirantu

uwwa samaani o kiɗaati.

Giimi akka ella baara, o okko

o miyyi namta dil,

20paato akka raama,

o kooyo akka geeza aleŋ baara,

omma min asawtí meenti Miltine,

meene taata pa deewa meene yaata o gi ta ajjibiti.

21Ay goŋŋa appe gu giimi paracco ma lollokka

ma semeetee Miltine asiɗo gassa najjiyo#2.21 Elloŋ Zowel 3.1-5..”»

22Gaa Piyer beneyyiɗe payya gaa: «Seneetaw ku Isirayel, giyyoŋga beneytu keeke. Ay tirta ku lekka kabarre kadar ga Mella leelo garaawi ku ajjibiti aattoŋ ma Iisa ma asaa min geegar ka Nazaret. Gata pa, gaa leelo gaari ku ajjibiti ma kakaa kaya o ma garaaca gudiranti Mellayi, ga ay ku maa ku ibinɗo kadar ga ay Mella ma n̰akammiya. 23Kuu baamiyya, kuu biriyyooga oko giimi ma aabadda ɗa Mella ku maa gu paapiyya kuruwayi gaa maatiɗo. Mella pa lekka paaɗe kabarre min omma kadar ga akkitoŋga bira ku leeɗeega keeke o ga caɗawweega ma aŋkiti. 24Mella soopa naɗiya min diigane ta muuti asan ga muutu lekkee ɗa gudirane maa ga baamiyya. 25Sultan Dawud pa beneyyiy aɗe gaartee Iisa Kitamniti Mellayi gaa:

“Na ellaa aɗe goŋŋa Mella Miltu untu,

o ga aaye sariptu ku maa na alɗo rawruwa ɗa.

26Ay ɗakko appe kulla gi galbantu ooliɗe,

guu beneyyiŋgeetaw paracco na cemeɗɗiy ma parhane.

Naa ma ziitu, na ocokke ma amanno

na gassiyya ka samaane min oko kii,

27asan ga kii, Miltu, dowwaw ɗa oolati,

o ki oyaa ɗa ga naa ma duwenta oko kii ɗupiɗo mooniti.

28Ki garawgu bottolli ku hayaatanti,

o ki onokkano ma parhanne asan ki aaye ma naa#2.28 Elloŋ Soom 16.8-11..”»

29Gaa Piyer beneyyiyyoo payya gaa: «Seneeta, ban̰n̰oŋ giyyoŋ ƴa, na beneyyatoŋ purta. Kaakatine kee Dawud maate, guu deeɗiya issa gur̰bati, o ga ya haŋka ga aaye missa ɗakko. 30Gata soopa ay nabiinice o ga ibina kadar ga Mella leewica haliipinti gaa:

“Na akka gaga gimu kaƴi min oko balcum

wikircum ka salaatiniyyiti#2.30 Elloŋ Soom 132.11..”

31«Dawud pa ibina appe kadar ga Masi, gata maa ga Mella aparre akka naɗa. Ay ɗakko appe ga beneyyiɗe gaa:

“Mella akkee duwa ɗa oolati

o ga ziiti akka ɗupa ɗa mooniti#2.31 Elloŋ Soom 16.10..”

32«Mella naɗiya Iisa, gaa parattini ni elliyya. 33Gaa Mella cipiliyya ga gagiyya tiyaawati, gaa biriyyeeca Ruuhanti maa ga beneyye min tippa gaa ga n̰akammaca. A mileŋ ga gassica Ruuhanti Tatti pa, ga biriniica. Ay keeke appe haŋka maa ku geewa o maa ku ella. 34Dawud pa gata kalpe ɗa samaani, gaa beneyyiɗe soopa gaa:

“Mella Miltine beneyyiyee oko Miltu kee Masi gaa:

Asu ki asiɗo nunta tiyaawatu,

35namma na asiɗiy gaga giimi ma ɗakattum kiɗaati min asincam ki urpiyyo ta rac#2.35 Elloŋ Soom 110.1..”

36«Giyyoŋ ƴa, kuŋ giimi ku Isirayel parattoŋ, leyyoŋ kabarre kadar ga Iisa keeke maa ku paape kuruwayi gaa maatiɗe, ay gata appe maa ga Mella gagiya Miltine o Masi, gata maa ga aparre!»

Giimi ma dowway galbigeeco oko Iisa gayaa ta ƴiila

37Maa gu giimi giyiyya beneyti Piyer kaaka, gaa waaciɗiy galbigeeco. Guu inniya Piyer ma gittee daare goo: «Seneeta, ni lee pe nii me?» 38Gaa Piyer tiiliyyoo gaa: «Meeloŋgu gaartoŋ ku miɗɗa, gaa kulla kaƴi aɗe deeɗo batisiyenta ma semeetee Iisa Masi. Goŋŋa ga Mella saamayyatoŋgu zunubgeetoŋ, gaa birittoŋca Ruuhanti. 39A gata pa Mella Miltine beneyye gaa ga akkitoŋca bira Ruuhanti oko kuŋ o oko ronco rontoŋ ya diiman o oko giimi paracco ma aaye kiɗaayee ku arro. Ruuhane taata pa, ga akkiyooca bira oko giimi maa ga kolaa.»

40Gaa Piyer beneyyiyyoo payya beneyyiŋgee maani ku maa gu dekerriɗo gu oyyiɗo gaa: «Oyyoŋca najjiyo ku maa ku alɗo diigiya ɗa ma giimi ku haŋka kooko ma leewa miɗɗa.»

41Guu giimi ma oyyiya beneyti Piyer kaaka pa, gu batisiyɗiy. Oko meene taata, gu giimi ma deero tappa ma gicco ma dowwiy galbigeeco oko Iisa Masi deewa latta ka alpaŋgee subba.

Nuntico giimi ma dowwiy galbigeeco oko Iisa

42Guu giimi ma dowwiy galbigeeco oko Iisa gewɗo diiman garkiyco n̰amaakeetee Iisa, guu bakamɗe zeneeco, guu tewɗo sawa, o gu enaa Mella sawa. 43Guu n̰amaakeetee Iisa lewɗo garaawi ku ajjibiti. Guu kellemco giimo paracco oomiɗe ta tirta teete. 44Guu paracco ma dowwiy galbigeeco oko Iisa Masi alɗo were kaƴi ka, o gu edekkay lawco paracco sawa. 45Guu geɗeɗɗiko gannaco o lawco daare, guu edeɗɗiya gurus ka lawco kotti beenannico, kulla kee aɗe tamanne maa ga aŋka. 46Kulla meene gu temekka dooranti girti Mellayi ma galbigee ku purta, o gerraco gu teewa paracco sawa ma parhanne, o gu lekka ɗa ya gaari kaƴi galbigeeco. 47Guta logokkaa Mella, o gu deyyo daanayo oko giimi paracco. Gaa Miltine gayawɗiyoo kulla meene giimi maa ga najjayya.

Currently Selected:

Lubaakico N̰amaakeetee Iisa Masi 2: mmy

Highlight

Copy