Lubaakico N̰amaakeetee Iisa Masi 17

Pol ma giiti Silas sarakka geegar ka Tesalonik

1Maa ga Pol ma giiti Silas oomiɗe min Pilip, guu tappiyya geegar ka Ampipoli o geegar ka Apoloni, guu sarɗe geegar ka Tesalonik. Iŋaa pa, gu Yawudigee lekka ger ka giraaniti. 2Gaa aleŋ kee aɗe maa ga Pol leewa diiman, ga katawɗo ger ka giraaniti ka Yawudigeyyo, gu diiraŋgee subba ga katawɗo ger ka giraaniti ma meene ta nambiti. Gaa melewɗo iŋaa ma Yawudigee ma gaari ku Kitamniti Mellayi. 3Gaa jepeɗɗiyo o ga garaayooga beneyyi ka Kitamniti Mellayi gaa ga Masi, gata maa ga Mella aparre, akka diigiya, gaa maatiɗo, gaa naɗiɗo min muuti. Gaa Pol beneyyiyyoo gaa: «Iisa keeke maa na tasaatoŋ gaartee, ay gata appe ma ay Masi keeke maa ku ocokke.»

4Guu Yawudigee daare oyyiyya beneyti. Guu timmiɗe ma Pol o Silas. Guu maani min Gireknigeyyo ma bakammiya ka Mellayi o daati ma karmiyenta ku geegarri oyyiyya kulla beneyti Pol o gu timme ma gata o Silas. 5Guu Yawudigee soopa ma dowwiy ɗa galbigeeco oko Iisa leeɗiyoo galbigee ku namta oko ini Pol ma giiti Silas. Guu deeɗe kolla giimi ku gidaani ɗa, ma tan̰aa bottollo. Guu timmiɗiy gu issiyyooca namma gu cipilɗe hawwane ta tirta teete geegarri. Guu un̰n̰iɗe girti Jaason gu deyeɗɗiy ini Pol ma giiti Silas asan gu aŋka gu cimmiɗiy gu kaatikkiko unco giimo. 6Guu alɗiy gassa ɗa soopa girti Jaason, guu bammiɗiy pe ini Jaason ka ma seneeta daare ma dowwiy galbigeeco oko Iisa. Guu kaatikkikoo unco taattuwee ku geegarri. Guu cayyakɗo goo: «Giimi kooko cepellayo hawwane oko giimi ku dunuune parattí, gaa haŋka pa gu asiɗe wikirtine. 7Jaason pa joobiy girti. Guta pa paracco pooce jobbico hukumnigeetee tattuwe ka tatta ka Rooma asan gu beneyya goo ga lekka sultan kaƴi maa gu joraa goo Iisa.»

8Beneyyi keeke pa cimmiyoogu maani giimi kotti o taattuwee ku geegarri. 9Guu leeɗiyoo goo gu ini Jaason ma gittee biru ƴa omma gurus, ma garaa kadar gu leewa ɗa payya gaari. Maa gu birɗe, guu cappiyyoo ka pe.

Pol ma giiti Silas kataa geegar ka Beree

10Gaa ma aandoŋ gu seneeta ma dowwiy galbigeeco oko Iisa iziɗiy ini Pol ma giiti Silas. Guu kaatikkikoo geegar ka Beree. Maa gu sarɗe gonek pa, gu dee un̰n̰a girco Yawudigeyyo ka giraaniti. 11Yawudigee ku Beree pa, karmayyay ƴiila gaari min oko Yawudigee ku Tesalonik. Guta geewaa beneyti Mellayi ma aŋko maani. Kulla meene gu enaa Pol oko beneyyiŋgeetee ku maa gu ibinɗiy baŋ gu wagee aɗe ma ku Kitamniti Mellayi. 12Guu maani min aacco duwɗiy galbigeeco oko Iisa, aacco giimi kotti pa gu lekka Gireknigee, miɗi maani o daati ku karmiyenta. 13Innasoopa, ga maa gu Yawudigee koo ku Tesalonik giyyiɗe kadar ga Pol taasiya kulla beneyti Mellayi aatti Beree, gu kaate iŋaa gu deeɗiyooca issa oko giimo maa gu boŋsiɗo. 14Gaa koɗok, gu seneeta ma dowwiy galbigeeco oko Iisa cimmiyya Pol min Beree, guu kaatikkiki namma ya biití baharre ta yaata. Silas ma giiti Timote soopa mare Beree. 15Giimi ma ezekkiya Pol pa kalpe markaba ma gata, guu kaatiɗe namma ya geegar ka Aten. Gaa Pol leeɗiyoo gaa: «Yookoŋ Beree ku deeɗiyo beneyya oko Silas ma giiti Timote gu jobbinno koɗok.»

Pol aaye geegar ka Aten

16Maa ga Pol ocoɗɗiy gittee koo ini Silas ma giiti Timote geegar ka Aten, gaa elliɗe geegar kaaka gaa onokke ma lawwi ku panenta ma saabayye zorri, gaa zorontiyɗe ta kaw. 17Gaa kaatiɗe girco Yawudigeyyo ka giraaniti, guu melewɗo ma Yawudigee o ma ku ma ay Yawudigee ɗa ma aabadda Mella, o ga Pol kataa kulla meene were maa gu giimi temeɗɗo aatti geegarri o ga beneyyayo oko giimo. 18Guu lekkiɗo iŋaa aalimnigee ku gaari ku dunuuniti ma meele ma Pol. Aalimnigee kotti pa, gu ku daare ƴa goo Epikuriyennigee#17.18 Epikuriyennigee pa aŋka ɗa diigane o goo gi lekka ɗa hikimiyo ta dunuuniti. o daare pa goo Estowisiyennigee#17.18 Estowisiyennigee kooko pa, ay giimi ku ma jobokkiya ɗa ka Mellayi o diigane gu oyowwica o ga beneyyi kee ka naɗaawi keeke oko guta ay latta kee ka marawta.. Maa gu giyiyya beneyti Pol ma gaartee Iisa o ku naɗawti, guu daare enewɗo aacco goo: «Baabarre keeke pa soo gaa ga me?» Daare pa goo: «Gata taseene ma ka zorri ma ay kuntine ɗa.»

19Guu kaatikkiki Pol oko timmo ta ajaawaŋgee ku geegarri maa gu kolaa goo Areyopaz#17.19 Areyopaz pa goo ‘jappe ta Ares’ o ga ay were ka timmico ajaawaŋgeyyo. Ares pa ay zooru ka bookati oko Gireknigeyyo., guu inniyya goo: «Ni aŋka ni ibinɗiy beneyyiŋgee ku marawta ma ki tasaa kooko. 20Ki beneyyani ma gaari ma ni ibina ɗa. Nii aŋkiɗo ni ibiniyya samaane baŋ ga beneycum keeke garaa ini me.» 21Maa gu beneyyiɗe kaaka pa, ay asan gu giimi ku Aten paracco o turi ma nowottiyyoo aacco ƴekka beneyyi o giyyo ta kabaayargee ku marawta ka.

22Gaa Pol waciɗe unco ajaawaŋgee ku Areyopazzi, gaa beneyyiyyoo gaa: «Kuŋ giimi ku Aten, naa ellatoŋ goŋŋa ku abakkiy maani zortoŋ kooko. 23Maa na amalɗo aatti geegarri na elle wereeriyeetoŋ ku aabiditi zortoŋ, naa gassiɗe kulla were ka aabiditi maa ku gekee, kuu ketepeyɗiyee kuu: “Keeke pa ay oko zooru maa ke ibina ɗa.” Haŋka pa, ga maa ku aabadda o ku ibinya ɗa, na tasaatoŋgu gaartee. 24Mella ma kilgiyca dunuune o lawwi paracco ma aaye aatti, gata ma ay Mella ka samaani o ka kiɗaati, nowotta ɗa gerra ku aabiditi maa gu giimi ka gekee, 25o ga aŋka ɗa lubaakico giimo aleŋ kuu ga maatiki koyowwiyee. Ay gata soo ma beraaca hayaatane o naaso o lawwi paracco oko giimo, 26o ga kilgiyiy ballee paracco min oko gimu kaƴi ka ku maa gu nuntiɗo kiɗa parattí o ga caaɗiyoogu girrarriŋgee ku kiɗaayeeco ku maa gu nuntiɗo o ga duwiyo piɗiwaŋ o gorgor. 27Gata pa leyya keeke ku maa gu giimi diyyiyya. Gaa ma diyyico taata pe walaŋ gu gasakkaa. A gii seene soopa, ga aaye ɗa arro min oko kulla kaƴi min aattine, 28asan kaƴi min aattoŋ ketepeyye gaa:

“Ay ma gata ke lekkiɗo hayaatane o gudirane

ke weseɗɗo o ke alɗo#17.28 Beneyyi keeke ay maa ga Gireknice maa gu kolaa goo Epimenide ketepeyye..”

Kitipaayee daare min aattoŋ kitipiye kulla goo:

“Keeta kulla ay rontee Mellayi#17.28 Beneyyi keeke ay maa ga Gireknice maa gu kolaa goo Aratos ketepeyye..”

29Mileŋ ke ay rontee Mellayi pa, ke anne mooya ɗa kee ga Mella ay aleŋ lawwi maa gu giimi panakke ma saabayye zorri, e baŋ ga ma poddane e baŋ ga ma dambee ma dabbiro ta mooyo tanco ka. 30Tippa gu giimi ibinya ɗa Mella ka tirta. Gaa Mella alɗiyoogu bakamma ɗa gaarco kotti. Haŋka soopa ga jorowwiy giimi oko wereeriyee paracco ku maa gu meeliɗiy gaarco ku miɗɗa, 31asan ga caaɗe meene maa ga asiyyo caaɗa cur parlane oko giimi paracco. Gaa apirɗe gimu ma akkiyooca caaɗa parlane taata. Gimu kaaka pa, ga naɗiya min aacco giimi ku mattenta, ku maa gu giimi paracco ibiniyya kadar ga ay gata kaaka appe maa ga aparre!»

32Gaa maa gu giimi kotti giyiyya beneyti Pol ma ka naɗawti gimu kaaka min muuti, guu daare noƴoɗɗee gaari, daare pa leyyee goo: «Ni aŋka ki asinni ga beneyya payya ma meene beneycum keeke.» 33Ay goŋŋa appe ga Pol oomiɗe ga uttiyyo. 34Guu daare soopa timmiɗe ma gata, guu duwɗiy galbigeeco oko Iisa. Gaa aacco giimi kotti, ga lekkiɗo gimu kaƴi aɗe ma ay min oko ajaawaŋgee ku Areyopazzi maa goo Denis, o daate kaƴi kulla maa gu semeeti goo Damaris, o giimi daare kulla.

Currently Selected:

Lubaakico N̰amaakeetee Iisa Masi 17: mmy

Highlight

Copy