Maariko 2

Yëësu aana obhotoro ubhwa ukwabhera abhantö ëbhëbhë ibhyabho

(Mataayo 9:1-8; Ruuka 5:17-26)

1Mbe, Yëësu akakyora Kaperenaumu. Hano sinsikö syaahëtirë nke igho, abhantö bhakamanya igha, n-Kaperenaumu hayö arë. 2Abhantö abhaaru bhakaisangerania mu-nyumba iyö, kora umweya ughwa okoheta mo-kesaku teghwatöökirë hë. Yëësu yaabharaarekeranga engʼana iya Waryobha. 3Mbe, enkaagha eno yaaraarekanga engʼana iya Waryobha, bhakaasha-ho abhantö abhane bhasëngʼënsirë ömörööyë uwa risusu kwi-shambi. 4Bhakataamibhwa kya bhono bharaamuhiki ku-Yëësu, ko bhoora abhantö m-baaru bhaarë. Bhakariina ko-rosara urwa inyumba, bhakarëngërrya haara Yëësu yaarë, bhakarebhora-ho, bhakaikya ömörööyë uyö arëngë kwi-shambi. 5Hano Yëësu yaarööshë engʼana iyö abhantö bhayö bhaakörrë, akamanya igha mbaana umukumo. Akatëëbhya ömörööyë uyö igha, “Moona uwaane, wabhëëywë ëbhëbhë ibhyaho.”

6Kasi bhaare-ho abhëëghya nyabhorebhe, abha amaraghërryö agha Mosa. Bhakaitegherra mo-senkoro isyabho igha, 7“M-mangʼana kë ghano ömöntö ono akoghamba? Nkotoka arë Waryobha! Taaho ömöntö ono akotora ukwabhera ömöntö ëbhëbhë ibhyaye hë. Kasi Waryobha umwene igho, we akotora ukwabhera ömöntö ëbhëbhë!”

8Kamwë igho Yëësu akamanya amaitegherro agha mo-senkoro isyabho, akabhabhöörya igha, “N-kwakë mukwitegherra igho mo-metwe ighyënyu? 9Kanaa, ne-ngʼana kë ëntöbhu bhököngʼu, ökötëëbhya ömörööyë uwa risusu igha, ‘Wabhëëywë ëbhëbhë ibhyaho,’ kasi nö-kömötëëbhya igha, ‘Emoka ogheghe rishambi iryaho oghende’?#2:9 Maaha mo-ketabho ikya Maariko 10:25; Ruuka 16:17; Yohana 9:1-7. 10Tigha mbe mbööröki okore momanye igha, öni Omoona uwa Ömöntö,#2:10 Omoona uwa Ömöntö. Maaha mo-faharaasa. neneena ubhwera ubhwa ukwabhera abhantö ëbhëbhë ko-kebhara kono.” Ho Yëësu yaaisyörëëyi ömörööyë uwa risusu uyö, akamötëëbhya igha, 11“Ndakötëëbhya igha, emoka, ogheghe rishambi iryaho, oghende yeeka waaho!” 12Enkaagha eno abhantö bhonswe igho bhamomaaherranga, hayö na hayö igho, ömörööyë uyö akemerra, akaghegha rishambi iryaye, akarishoka kebhara. Abhantö bhonswe igho bhakaroghoora, bhakatöönia Waryobha, bharaghamba igha, “Tetwakarööshë engʼana kya eno hë!”

Yëësu yaasha okore atööri abhasarya

(Mataayo 9:9-13; Ruuka 5:27-32)

13Yëësu akatanora, akaghya ghwiki mbareka iya inyansha iya Ghariraaya. Abhantö abhaaru bhakamosoorana-yo, akabhëëghya.

14Mbe, hano Yëësu yaahetanga ko-nshera, akamaaha Raawi mura uwa Arufaayo. Raawi uyö, yaarenga aikaayë mo-kaghutu akaaye aka righööti. Yëësu akamötëëbhya igha, “Nshö onsoorane.” Raawi akeemoka, akamosoorana.

15Yëësu na abheegha abhaaye, bhakaghya wa Raawi okorya ibhyakorya. Abhaghööti abha righööti#2:15a Abhaghööti abha righööti. Maaha mo-faharaasa. na abha ëbhëbhë#2:15b Abha ëbhëbhë. Abhafarisaayo m-baghööti bhököngʼu bhaarë abha amaraghërryö agha Mosa. Ku bhuyö bhano bhataghootanga amaraghërryö na seteemo isyabho seno bhaarenga bhöngëëyi-ko, bhaabhabherekeranga igha, m-bantö abha ëbhëbhë. Maaha mo-faharaasa engʼana, Abhantö abha ëbhëbhë. abhandë abhaaru, bhaarë korya hamwë nawe, ko bhoora abhaaru abha abhantö bhayö, mbo bhaasoorananga Yëësu. 16Mbe, Abhafarisaayo#2:16 Abhafarisaayo. Maaha mo-faharaasa. abhëëghya abha amaraghërryö agha Mosa, hano bhaarööshë Yëësu arasanga na abhaghööti abha righööti na abha ëbhëbhë abhandë, bhakabhöörya abheegha abha Yëësu igha, “N-kwakë akosanga ibhyakorya hamwë na abhaghööti abha righööti na abha ëbhëbhë abhandë?”

17Hano Yëësu yaaighuurë amangʼana ghayö, akabhatëëbhya igha, “Ömöhöru tatöniibhwi na ömörëri hë, kasi ömörööyë, we akutuna ömörëri. Öni tenaasha okobherekera bhano bhakwimaaha igha, m-ba heene ku-Waryobha, a a! Kasi naasha igha, mberekere abha ëbhëbhë.”

Amëëghyö amahya nkutuna gharë amaitegherro amahya

(Mataayo 9:14-17; Ruuka 5:36-39)

18Enkaagha nyabhorebhe, abheegha abha Yohana Omobhatiisya hamwë na Abhafarisaayo mbaaisasanga ibhyakorya. Urusikö urwöndë abhantö nyabhorebhe bhakaghya ku-Yëësu, bhakamöbhöörya igha, “Abheegha abha Yohana Omobhatiisya, na abheegha abha Abhafarisaayo, nkwisasa bharë ibhyakorya, kasi n-kwakë abheegha abhaaho, bho tebhakwisasa ibhyakorya hë?”

19Yëësu akabhahonshora igha, “Abhaghëndësya abha ömötëti mbaisasa ibhyakorya, hano bharëngë hamwë na ömötëti mu-nyangi iya ubhwenga? Tebhaisase ibhyakorya enkaagha yonswe igho eno ukunyoora bharëngë hamwë nawe! 20Kasi enkaagha irihika-ho, hano ömötëti ariruusibhwa mo-bhasaani abhaaye muyö, hayö ho bhoono abhaghëndësya bhayö bhariisasa ibhyakorya.

21“Ukwishooghania amëëghyö aghaane amahya ghano, ko seteemo isyënyu, n-kya hano ömöntö araatume ekeraka ekehya ku-ngibho ëngötu. Hano araakore igho, ekeraka kiyö, nkeraatandore bhököngʼu ingibho ëngötu iyö. 22Ëkërëngyö ikyëndë, n-keera igha, abhantö tebhakohoma idivai#2:22a Idivai. Maaha mo-faharaasa. eehya mo-bheghansha ëbhëkörö#2:22b Ebheghansha ëbhëkörö. Yëësu yaaghambirë ghayö ukwörökya igha, amëëghyö agha kare agha Abhayahudi teghaishooghanibhwi na amëëghyö agha Amangʼana Amaiya agha Yëësu Kiristo hë. ibhya amaseero. Ko bhoora hano bharaakore igho, ebheghansha ibhya amaseero bhiyö, nkobhaaroka bhërë, idivai yeteka. Idivai eehya, ni-igha etoorwe mo-bheghansha ebhehya.”

Yëësu we Omonene uwa urusikö urwa Obhotooro

(Mataayo 12:1-8; Ruuka 6:1-5)

23Urusikö nyabhorebhe urwa Obhotooro, Yëësu hamwë na abheegha abhaaye, bhaahetanga mö-mëghöndö ighya engano. Abheegha abhaaye bhakabha bharatabhora na ukubhunga ebheghara ibhya engano bhararya. 24Mbe, Abhafarisaayo bhakatëëbhya Yëësu igha, “Maaha, abheegha abhaaho ghano bhakokora, bharasarya umughiro ko okokora emeremo urusikö urwa Obhotooro!”#2:24 Maaha mo-ketabho ikya Ukurishoka 20:8-11, 34:21; Eheetoko iya Etoraati 5:12-15, 23:25.

25Yëësu akabhahonshora igha, “Kasi, temwakasömirë mo-Maandeko Amahörëëru, kya bhono Daudi yaakörrë, enkaagha eno umwene na bharikyaye bhaarenga na umweko? 26Yaasöhirë mu-righutu irya Waryobha, akarya emekaate ëmëhörëëru, enkaagha eno Abhiataari yaarenga omonene uwa abhasëngëri abha Waryobha. Amaraghërryö agha Mosa#2:26a Maaha mo-ketabho ikya Amangʼana agha Abharaawi 24:5-9. ngaaraghërryanga igha, emekaate ghiyö, ghetakaarebhwa na ömöntö wowonswe oora. Abhasëngëri abheene igho, mbo bhaaikërribhwanga okorya emekaate ghiyö. Kasi Daudi akagherya, kora akahaana na bharikyaye bhonswe bhakarya.”#2:26b Maaha mo-ketabho ikya 1 Samwëri 21:1-6. 27Mbe, ghwiki Yëësu akatëëbhya abhantö bhayö igha, “Ti-igha abhantö mbaabhömbirwë okore bhaghoote amaraghërryö agha urusikö urwa Obhotooro, kasi amaraghërryö ghayö, ngaatöörrwë-ho na Waryobha, okore abhantö bhamuunyenga urusikö ruyö. 28Ku bhuyö momanye igha, öni Omoona uwa Ömöntö, neena ubhwera kora na ko-mangʼana agha urusikö urwa Obhotooro.”

Currently Selected:

Maariko 2: ssc

Highlight

Copy