Yohana 2

Inyangi iya ubhwenga mu-mughi ughwa Kana

1Mbe, hano sinsikö ibhërë syaahëtirë, inyangi iya ubhwenga yaakörrwë mu-mughi ughwa Kana, iya mo-mokowa ughwa Ghariraaya. Mu-nyangi iya ubhwenga muyö, nyakuwaabho Yëësu, yaarenga-mo. 2Yëësu hamwë na abheegha abhaaye bhonswe bhaarenga bharaarëkirwë mu-bhwenga iyö. 3Hano idivai#2:3 Idivai. Maaha mo-faharaasa. yaahööyë, nyakuwaabho Yëësu akatëëbhya Yëësu igha, “Idivai ebhahwërëëyë.” 4Yëësu akahonshora nyakuwaabho igha, “Kanaa nkë këkötönëri Nyakörö. Enkaagha iyaane yo etaraabha.” 5Ho nyakuwaabho yaatëëbhëri abhaköri abha emeremo igha, “Ghonswe igho ghano araabhatëëbhi, mokore.”

6Mbe, syaare-ho sinyöngö isansabha isya amaghena, seno syaatorwanga-mo amanshë agha okokorra seteemo isya Abhayahudi isya ukwisaabhuura. Kera inyöngö, yaaishöribhwanga na siriita ighana imwë handë ighana imwë na merongo etatö. 7Mbe, Yëësu akatëëbhya abhaköri abha emeremo bhaara igha, “Mwishöri amanshë mu-sinyöngö siyö.” Bhakaishörya shabhi amanshë mu-sinyöngö siyö. 8Yëësu akabhatëëbhya igha, “Bhoono motahe amanshë ghayö, moherre omonene uwa inyangi.” Bhakakora kya bhuyö bhaatëëbhiibhwi. 9Hano omonene uwa inyangi yaawonshiri amanshë ghayö ghaarenga ghabhaayë idivai, tiyaamanyirë hasë ghaaruurë hë, kasi abhaköri abha emeremo bho mbaamanyirë hano ghaaruurë. Mbe, akabherekera ömötëti. 10Hano ömötëti uyö yaahikirë, akamötëëbhya igha, “Kera ömököri uwa inyangi, nkotangata arë okohaana abhantö idivai inshiiya. Hano bhanywa këmwëkëmwë, ho bhoono akoreeta idivai amaiya ghano. Kasi uwe öbhëëkirë idivai inshiiya eno, m-boono waghereeta!”

11Kiyö nkyo ekemanyërryö ikya mbere keno Yëësu yaakörrë. Ekemanyërryö kiyö, yaakëkörëëyë mu-mughi ughwa Kana iya mo-mokowa ughwa Ghariraaya. Ko okokora igho, yöörökëri ubhuhika ubhwaye, kora abheegha abhaaye bhakamukumya. 12Hano inyangi iya ubhwenga yaahööyë, Yëësu akangʼaaraara ukughya mu-mughi ghono ghwaabherekerwanga igha, Kaperenaumu hamwë na nyakuwaabho, bhamura abhaabho, na abheegha abhaaye. Bhakaikara-yo sinsikö nke igho.

Yëësu ararughya abhaköri abha ibhyasharamo-bhogho ubhwa risengerro

(Mataayo 21:12-13; Maariko 11:15-17; Ruuka 19:45-46)

13Mbe, inyangi iya Epasaka#2:13 Epasaka. Maaha mo-faharaasa. iya Abhayahudi, n-haangʼë yaarë, ku bhuyö Yëësu akatiira ukughya Yërusarëëmu. 14Hano yaahikirë, akasoha mo-bhogho ubhwa risengerro irya Waryobha,#2:14 Risengerro irya Waryobha. Maaha mo-faharaasa. akanyoora abhantö bharaghörya sengʼombe, amangʼöndi na ibhighuuti, na bhano bhaaswënianga seehera, bhaarenga bhaikaayë ko-semeeza. 15Hano Yëësu yaarööshë ghayö, akakora umushariti, akabhakënyia bhonswe igho ukurwa mo-bhogho ubhwa risengerro irya Waryobha, hamwë na amangʼöndi bheena sengʼombe. Akatabhutatabhuta amatöngörö agha abhaswënia, akahenora kora na semeeza isyabho. 16Akatëëbhya bhano bhaaghöryanga ibhighuuti igha, “Muruusi-ho ëbhëntö bheno muhire iyö! Motakaakora inyumba iya Taata ebhe omoteera!” 17Hano abheegha abhaaye bhaaighuurë ghayö, bhakahiita amangʼana ghano ghandëkirwë mo-Maandeko Amahörëëru igha, “Öbhörrö ubhwa inyumba iyaaho mbo bhoremara-ho.”#2:17 Maaha mo-ketabho ikya Zabhuri 69:9.

18Ku bhuyö abhatangati abha Abhayahudi bhakabhöörya Yëësu igha, “N-kemanyërryö kë onakyo, ikya ukwörökya igha oona ubhwera ubhwa okokora amangʼana ghayö?” 19Yëësu akabhahonshora igha, “Motemore risengerro reno, na öni nendaarehaghaashe ku-sinsikö isatö.” 20Bho bhakamohonshora igha, “Risengerro irya Waryobha reno ryaahaghaashirwë ku imyoka merongo ene na isansabha, iyakë oraakore uwe orehaghaashe ku-sinsikö isatö igho?” 21Kasi Yëësu umwene nö-möbhërë ughwaye ngo yaashumaasheranga igha, ngo risengerro irya Waryobha. 22Mbe, hano Yëësu yaaryökirë ukurwa mo-bhaku, abheegha abhaaye bhakahiita igha ni-igho Yëësu yaaghambirë. Engʼana iyö, ekaghera bhakakumya Amaandeko Amahörëëru, na amangʼana ghano Yëësu yaaghambirë.

Yëësu namanyirëghano gharëngë mo-senkoro isya abhantö

23Hano Yëësu yaarenga Yërusarëëmu#2:23 Yërusarëëmu. Maaha mo-faharaasa. ku-nyangi iya Epasaka, abhantö abhaaru bhakamukumya, ko bhoora bhaarööshë ebhemanyërryö bheno yaakoranga. 24Kasi Yëësu tiyakumiri amangʼana aghaabho hë, ko bhoora yaamanyirë ghano gharëngë mo-senkoro isyabho. 25Tiyaatunirë ömöntö wowonswe igho amötëëbhi amangʼana agha abhantö, ko bhoora yaamanyirë ghonswe igho ghano gharëngë mo-nkoro iya ömöntö.

Currently Selected:

Yohana 2: ssc

Highlight

Copy