Kut 32
32
1Yakobo akagumizamu orugyendo rwe, haza baamaraika ba Ruhanga baamubugana. 2Yakobo ku yaabareebire yaagira ati: Aba n'eihe rya Ruhanga. Nawe omwanya ogwo nikwo kugweta Mahanaimu.#32:2 Mahanaimu: Amakuru ngu amahe abiri.
3Yakobo reero yaatuma entumwa kumwebembera bakamubandiza ahari Esau mukuru we omu nsi ya Seiri omu kyanga kya Edomu. 4Yaabahabura ati: Oku nikwo muraagire mukama wangye Esau muti: Omwiru waawe Yakobo yaakututumaho naagira ati: Nkashuuhuukira owa Labaani naagumayo okuhitsya eri izooba. 5Hati nyine ente, endogoya, amasyo g'embuzi n'ag'entaama, abahuuku n'abazaana. Mbwenu mukama wangye, naakutumaho ngu ongirire embabazi.
6Entumwa ku zaagarukire ahari Yakobo, zaamugira ziti: Esau mukuru waawe tumuhikireho, mbwenu naija n'abashaija magana ana kukubugana. 7Yakobo atiina munonga ashoberwa; nikwo kubaganisamu abantu abu yaabaire aine hamwe n'amasyo g'entaama n'embuzi, n'ag'ente n'engamira, ebicweka bibiri, 8naagira ati: Esau ku araahikye aha kicweka kimwe yaakicwekyereza, ekindi kikire.
9Mpaho Yakobo ashaba ati: Ai Ruhanga wa tatenkuru Aburahamu, Ruhanga wa tata Isaaka, Iwe Nyakubaho owangizire oti: Garuka omu nsi y'owaanyu omuri beene waanyu, kandi oti ndyakugira gye, 10nyowe omuheereza waawe tinshemereire n'akakye rukundo yaawe yoona etahararuka n'obwesigwa bwawe bwona ebi waanyorekire. Manya nkambuka Yorudaani egi, nyine enkoni yangye yonka, mbwenu reeba ndugirwemu ebimbuuro bibiri. 11Naakweshengyereza onkize mukuru wangye Esau, ahabw'okuba nimmutiina, atakaija akatwita twena n'abaana na baanyinabo. 12Kandi okagira oti: Ndyakugira gye, baijukuru baawe mbakanyise, babe nk'omusheenyi gw'aha nyanja ogutabaasa kubarwa aha bw'obwingi.
13Ekyo kiro yaaraara aho; kandi omu bi yaabaire aine yaihamu ekiconco ky'okuha Esau mukuru we; 14nizo buguma z'embuzi magana abiri n'empaya makumi abiri; 15taho ejigija z'engamira makumi ashatu n'abaana baazo, ente ejigija makumi ana n'enimi ikumi; ejigija z'endogoya makumi abiri n'enimi endogoya ikumi. 16Ezo zoona yaazikwatsa abaheereza be, buri siba eri yonka, haza yaagira abo baheereza be ati: Nimuunyebembere, kandi mutsigye omwanya ahagati y'esiba na ngyenzi yaayo. 17Reero yaaragiira oyebembeire ati: Mukuru wangye Esau ku araakubugane yaakubuuza ati: Ori ow'oha, kandi nooza hi? N'aga matungo gu ofunyire n'ag'oha? 18Omugarukyemu oti: n'ag'omuheereza waawe Yakobo, ekiconco ki akutwekyeire mukama wangye Esau, kandi ari enyima. 19Yaaragiira atyo owa kabiri n'owa kashatu, n'abandi boona abaabaire nibafunya ezo siba, ati: Naimwe mube nikwo mwagambira Esau ku muraamubugane. 20Haza mumugire muti: Nangwa na Yakobo omuheereza waawe atukuratiire. Ahabw'okuba akateekateeka ati: Nkaabaasa kumwikaikanisisa ebiconco bi naabanzayo, bwanyima tureebana, shana akaanyikiriza. 21Bityo ebyo biconco byagyenda bimwebembeire; we ekyo kiro yaakiraara ahi baabaire bagombekire.
Yakobo okufukaana n'entumwa ya Ruhanga
22Ekyo kiro Yakobo akaimutsya, yaatwara abakazi be bombi n'abazaana be bombi, n'abaana be ikumi n'omwe, yaayambukira aha nyambukiro ya Yaboki; 23yaabatwara yaabambutsya ako kagyera, yaayambutsya atyo n'ebi yaabaire aine byona. 24Kwonka Yakobo we yaatsigarayo wenka, haza omushaija yaafukaana nawe bwarugaho bwataagurukana. 25Ogwo mushaija ku yaareebire yaaremana na Yakobo, yaamuteera aha izinio; eigufa ry'enyugunyu ryateruka naakifukaana nawe. 26Bwanyima ogwo mushaija yaagira ati: Ndekura ngyende, ahabw'okuba bwataagurukana. Kwonka Yakobo amugira ati: Tindikwija kukureka okagyenda waaba otampaire omugisha. 27N'onu amubuuza ati: Eiziina ryawe ori oha? Onu ati: Ndi Yakobo. 28Nawe amugira ati: Eiziina ryawe tokyeetwa Yakobo, kureka Isiraeli, ahabw'okuba ofukaine na Ruhanga n'abantu, kandi waasinga. 29Yakobo nawe nikwo kumushaba ati: Naakweshengyereza, ngambira eiziina ryawe. Onu ati: N'ombuuriza ki eiziina ryangye? Atyo amuheera aho omugisha. 30Yakobo nikwo kweta omwanya ogwo eiziina Penieli, naagira ati: Ahabw'okuba nyereebaniire na Ruhanga, haza tinaafa.
31Eizooba ryamurasiraho naarenga Penieli, naateera omunyugu ahabw'eigufa ry'ekibero. 32Nikyo okuhitsya hati Abaisiraeli batariira nyama y'embura butuuro, ahabw'okuba ogwo mushaija akateera Yakobo aha izinio.
Yakobo okubugabugana na Esau bakagarukana
Currently Selected:
Kut 32: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
