Kut 30
30
1Rakeeli ku yaareebire atazaariire Yakobo baana, yaagirira mukuru we eihari. Yaagira Yakobo, ati: Mpa abaana; nari kitari kityo nfe! 2Yakobo nikwo kugirira Rakeeli ekiniga ky'ahonaaho akamugira ati: Niinye waata omu mwanya gwa Ruhanga owaakwimire oruzaaro? 3Onu amugarukamu ati: Reeba hariho omuzaana wangye Biliha, omuraarire abone kunzaarira aha bibero, naanye mmuzaariremu abaana. 4Atyo amuha omuzaana we Biliha kumushwera, na Yakobo amuraarira. 5Biliha abaka, azaarira Yakobo omutabani. 6Rakeeli nikwo kugira ati: Mbwenu Ruhanga yammarira ekindi aha mutima; ahuriire okushaba kwangye, yampa omwana omwojo. Nikyo yaamweteire eiziina Daani. 7Biliha omuzaana wa Rakeeli, yaagaruka yaagira enda, yaazaarira Yakobo omutabani wa kabiri. 8Rakeeli yaagira ati: Nfukaine munonga na mukuru wangye naarugaho naamwikarira. Atyo yaamweta eiziina Nafutaali.
9Leeya ku yaareebire arekyeire aho kuzaara, yaatwara omuzaana we Zilipa, yaamuha Yakobo kumushwera. 10Reero Zilipa, omuzaana wa Leeya, yaazaarira Yakobo omutabani. 11Leeya nawe nikwo kugira ati: Ebishi naahiirwa! Atyo yaamweta Gaadi. 12Zilipa ogwo, omuzaana wa Leeya akazaarira Yakobo omutabani owa kabiri. 13Na Leeya yaagira ati: Ebishi nyine omugisha! N'ahabw'ekyo abakazi baryanyeta ow'omugisha. Atyo amweta Asheri.
14Mbwenu omu biro by'eigyesha ry'engano, Reubeeni akagyenda yaagwa aha ntobo omu ishwa, yaazireetera Leeya nyina. Reero Rakeeli yaagira Leeya, ati: Naakweshengyereza, mpa aha ntobo za mutabani waawe. 15Leeya amugira ati: Ebyo nookyeeta ekintu kikye, okureeba iwe oncwire ahari ibanye? Mbwenu nooyenda kukuratsaho entobo za mutabani wangye? Rakeeli amugarukamu ati: Mbwenu eki kiro arabukuraarire ahabw'entobo za mutabani waawe. 16Yakobo ku yaizire naaruga omu ishwa omu mwabazyo, Leeya yaashohora kumubugana, haza yaamugira ati: Eki kiro nondaarira ahabw'entobo za mutabani wangye ezi naaha ahabwawe. N'onu ekyo kiro araara nawe. 17Ruhanga ahurira okushaba kwa Leeya; agira enda, azaarira Yakobo omutabani wa kataano. 18Leeya nikwo kugira ati: Ruhanga yanzimuurira, ahabw'okuba nkaha ibanye omuzaana wangye. Nikyo yaamweteire eiziina Isakaari. 19Bwanyima Leeya yaagaruka yaatwara, yaazaarira Yakobo omutabani owa mukaaga. 20Leeya ogwo nikwo kugira ati: Ruhanga yampeera kimwe enshagarirano nungi. Mbwenu ibanye naija kuntetsa, ahabw'okuba mmuzaariire abatabani mukaaga. Atyo amweta eiziina Zebuluuni. 21Reero aha muheru azaara omuhara, amweta Dina.
22Bwanyima Ruhanga akaijuka Rakeeli, yaahurira okushaba kwe, yaigura enda ye. 23Rakeeli yaabaka enda, yaagizaaramu omutabani. Haza yaagira ati: Ruhanga yaanyihaho ekihemu! 24Ogwo mwana yaamweta Yosefu, amakuru ngu: Nkaabaasibwa ki Nyakubaho anyongyera akandi koojo!
Yakobo okwetungisiza owa Labaani
25Rakeeli ku yaazaire Yosefu, Yakobo yaagira Labaani ati: Ndagiira ngarukye owaitu. 26Mpa abakazi bangye n'abaana bangye abu nkukorereire, reero ondekye ngyende. Manya noomanya omurimo gu nkukoreire. 27Kwonka Labaani yaamugira ati: Ku oraabe noonyikiriza, reka nkugambire: Guma aha, manya ntungire obumanyiso burikuunyoreka ku Nyakubaho ampaire emigisha ahabwawe. 28Mbwenu ngambira ebihembo byawe, mbikuhe. 29Yakobo yaamugira ati: Naiwe wenka noomanya oku nkuheereize, n'oku amatungo gaawe gabaire gye ningariisa. 30Manya obu naabaire ntakaizire, okaba oine makye, mbwenu gakanyire munonga; na Ruhanga akakuha emigisha, hoona ahi naabaire nza. Mbwenu shi nyowe ndyatunga ryari eby'okukwatsa eka yangye? 31N'onu yaamugira ati: Mbwenu nkuhe ki? Yakobo ati: Toine ki orampe, kureka niinyija kuguma nindiisa amasyo gaawe n'okugarinda, waaba onkoreire eki: 32Mbwenu eri izooba onyikirize, ndabe omu masyo gaawe, ngyende niinyihamu entaama zoona ez'ebitanga n'ez'obugondo, n'abaana b'entaama boona baakiiraguju; reero kandi omu mbuzi nyihemu ez'ebitanga n'ez'obugondo. 33Bwanyima ku oraije kureeba ebihembo byangye ebi oine, obwesigwa bwangye nibwo burampakanire. Embuzi yoona ei oraashangye nyine etaine bitanga nari obugondo, nainga omwana gw'entaama ogutari kiiraguju, biri n'enyibano. 34Ndi Labaani ati: Ni kirungi. Ka kibe nk'oku waagamba. 35Kwonka eryo izooba Labaani yaashorooramu embuzi empaya ez'ebigabo n'ez'ebitanga, n'ebuguma zoona ez'obugondo n'ez'ebitanga, yoona eyaabaire eine eibara ririkwera, na buri mwana gw'entaama ogwabaire nigwiragura; yaaziha abatabani kuzireeberera. 36Kandi yaafuruka, yaatsiga ahagati ye na Yakobo omwanya gw'orugyendo rw'ebiro bishatu. Yakobo yaaguma naariisa obusyo bwa Labaani obwatsigaireho.
37Reero Yakobo yaareeta enkoni mbisi z'emikoma n'emizo n'emirokora yaazishuubura, zaagira amabara garikwera maraingwa, gaareebeka ahari ezo nkoni. 38Enkoni zi yaashuubura yaazita omu maisho g'amasyo omu mikura erikutwara amaizi omu maato ahu amasyo gaabaire gatsyorera, haza gakiija kunywa geema nigareeba enkoni. 39Amasyo gaayemera omu amaisho g'ezo nkoni, reero gaazaara ez'ebigabo n'ez'obugondo n'ez'ebitanga. 40Yakobo yaashorooramu abaana b'entaama, kandi amaisho yaagareebesa ei ez'ebigabo ziri, n'ezirikwiragura zoona eziri omu busyo bwa Labaani. 41Ez'omu busyo ez'amaani, ku zaabaire ziba nizeema, Yakobo ata enkoni omu mikura omu maisho g'obusyo, ngu zeemere ahagati y'enkoni. 42Kwonka ez'omu busyo ezitaine maani akaba ataziteerayo nkoni. N'ahabw'ekyo ezitaine maani zaaba eza Labaani, n'ez'amaani zaaba eza Yakobo. 43Okwo nikwo Yakobo yaayeyongyeire kutunga, akagira amasyo maingi g'embuzi n'entaama, abazaana n'abahuuku, engamira n'endogoya.
Yakobo okuhunga Labaani
Currently Selected:
Kut 30: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
