Luka 24

Slabaɗayede Yesu ada mika ka

(Matta 28:1-10; Markus 16:1-8; Zhaŋ 20:1-10)

1Ba wərra al aguzlak hənɗay zuŋŋwa s'i tamandar kasuka#24:1 Hənɗay zuŋŋwa s'i tamandar kasuka saŋa gus dza: Bək lade. ga, hər hay ane ɗa laka ande a me mika al atirsheŋ hay tan gə ɗa slumika saŋa. 2Amá ɗa laka a nzə mika abi me, pilmek gə ɗa pakəlhənande saŋa vecakamiya ala apə daya ka. 3Wutan ane ɗa lide a mika de ga, ɗa nzəka bə mətska Ɗuduwuna man Yesu ede. 4Ɗa gika ba kuvam ɗaya. Ciɗa mizhe hay brecaw ɗa dzəkŋa apə zhek tan‑a, wutə a ifafətɗay hay de, piya aray wulwulwula. 5Hər hay ane ɗa zləgutsaka, ɗa nzuɓika ŋa ala agide. Amá mizhe hay sahan ɗa dzəktəna, wa: «Amnaya kwa gus ɗu gə niya aba al aray a dagava ɗa gə de ɗa mutsaka saŋa? 6Wuran niba akəna, slabakede. Rərəkɨnakude me gə wuran zak dzaɗikuna a aŋəde wuran a Galile, wa: 7“Si ɗa ɗəftənde Kine ɗu səlammərzheŋ a alay de a ɗa hipe, ɗa derɨka apə shishka ka, amá a hənɗay de ala apə məŋgan ga, ǎ slabayede ada mika ka” waka saŋa.» 8Mezlene wutan ane ɗa rərəkika me hay Yesu sahan.

9Ɗa mbəɗiŋa ada ande a me mika ka ane, ɗa naya a ruvəɗitənede ihay sahan ba cecena a ɗaha jaŋwa ɓile saŋa atə a ɗa kutə wuran s'iŋgeɗe ba cecena. 10Hər hay sahan ga, wutə Mari hər ɗa Magdala, Yuwanna, Mari məman a wutə Zhak, ŋa hər hay s'iŋgeɗe gə ɗa zak caca saŋa. Ɗa ruvəktən ihay sahan aba amazhekde a ɗa slənɗay. 11Amá ɗa slənɗay ɗa gurəkəl me hər hay sahan ba me hadada, ɗa ɗəfəkpətənŋa ba. 12Piyer ga, tsəkwaɗ slabakakude, ɗəvəraka ala ande a mika ane, kaɓika ŋa ala ande, tsatside aray ede ga, nzək ba s'iraɗay. Mezlene ba huɗay ene ala adaw, ge ba s'ajipu s'igə gaka sahan.

Ande a ciba s'Emmawus

(Markus 16:12-13)

13Ba bək sahan ga, ɗa s'iŋgeɗe caw a ɗa kutə wuran de niya ɗa like ala a hu s'iŋgeɗe de ɗa hawa al Emmawus. Dagava hu sahan atə Zheruzalem slɨkiya kilumetər jaŋwa ɓile. 14Niya ɗa jeke a duvak tan de ala apə ihay‑a gə lalakede saŋa ba cecena. 15Zlama wutə aba aŋade a me sahan, ɗa mbucike a duvak tan de ga, ba Yesu i ŋasaray ene laka a slaɗipətan, ɗa lak caca. 16Niya ɗa ceciya tsa, amá is'iŋgeɗe pakənhətənande a aray a sənɗiyede ayina. 17Mezlene mbutsəktənamiya, wa: «Kwa dza me s'ama kwene apə ŋa ciba ka saŋa?» Wutan ane ɗa tatavaka, ɗa lide a dzəmŋa de. 18Ɗu ɓile tan niya sləmay ene Kleyupas zləmkənhənaŋa, wa: «Ba s'ike ɓile a mbirkwe hay de gə a Zheruzalem, kə səna ba igə lakede akənahan a hənɗay hay saŋa de təku?» 19Mbutsəktənamiya, wa: «Ama lakede?»

Ɗa zləmkənhənaŋa, wa: «Igə ɗa gəkəna a Yesu humas ɗa Nazaret, wuran zak ɗu mbəɗɗitənande me s'Askwaf a ɗaha hay, mbəslkəla nzəɗa ene a sləra hay ene de, atə a me dzaɗay ene de apə miya a Askwaf‑a, atə apə miya a ɗaha hay‑a ba cecena. 20Məlmal hay man ɗa slumə ɗaha hay atə Askwaf atə məlmal hay man s'iŋgeɗe, ɗa ɗəfəktənde a alay de a ɗa Ruma a gəɗin sheriya shifa, mezlene ɗa darika apə shishka ka. 21Mene ga, ma zak ɗəfɗika ŋa man hiŋkilla apəna, gəni ba wuran aŋa a səsəkərki Israyila. Amá aba al ahan kini, na hənɗay ala apə məŋgan bəkwa aŋa ihay sahan lakede apəna. 22Adəɓa ga, hər hay s'iŋgeɗe wutə aba giwa man de, ɗa mimənka igə ma ge ba s'ajipu ene. Aɗaba ba bəkwa saŋa i ŋamandaɗay, wutan ɗa laka ande a me mika ga, 23ɗa lək ba a nzə mətska Yesu ede. Mezlene ɗa nidaw, ɗa naya a mbəɗɗimənande, gəni malika hay ɗa mbəslkəlhətan zhek, ɗa dzəktəna wa wuran niya aba al aray. 24Ɗa s'iŋgeɗe man ɗa laka ala ande a me mika sahan, ɗa laka a nzəɗiya ba ka aŋa hər hay ɗa dzaka saŋa. Amá ŋasaray ene ga, ɗa tsaka ba.»

25Mezlene Yesu dzəktəna, wa: «Kwene saŋa dəgiya, həŋkale kwan niba, kwa ɗəfpənŋa bə yakwa yakwa a me hay gə ɗa mbəɗɗitənande me s'Askwaf a ɗaha hay ɗa dzadzəka ba cecena saŋa! 26Kwa səna bə gəni si Kristu shaka te zlaɗa hay sahan, ta lɨde a duna tsəre ene de saŋa təku?» 27Mezlene paparəktənede igə wakita s'Askwaf dzaka ala apə ayina saŋa ba cecena, takənmandar‑a apə me Musa ka atə me ɗa mbəɗɗitənande me s'Askwaf a ɗaha hay ba cecena.

28A aŋəde sləŋa ɗa laka a hu de gə ɗa like ede sahan ga, Yesu gəka ba ka zlama huke kwalala. 29Amá ɗa sahan ɗa bərkənka taŋw, wa: «Nay han a ma man de, aɗaba sləŋa apas niba cine, mene niya wurke.» Wuran ane təfkaŋade, laka a hənɗay a ma tan de. 30Wutə aŋade a ipəɗay ga, təvika dipeŋ, gəkənaŋade barka, kəɗkənariya, vərəktəna. 31Mezlene aray tan ndaka, ɗa sənkede ayina ane, amá ba ciɗa mimiɗeka ande a aray tan. 32Wutan ane ɗa takənmandar‑a a dzaɗiya a duvak tan de, wa: «Bembec man zak ba ka aməmak bə təku a aŋəde ruvəkmən me ande a ciba, paparəkmənede igə wakita s'Askwaf dzaka saŋa?»

33Aba a ahan de sahan, ɗa slabakakude, ɗa mbəɗiŋa ala a Zheruzalem, ɗa laka a nzə ɗaha jaŋwa ɓile ane, ɗa masləkŋa atə ɗagaditan s'iŋgeɗe. 34Ɗa dzawa, wa: «Ba jire Ɗuduwuna slabakede ada mika ka mbəslkəlhan zhek a Simuŋ!» 35Ɗaha caw ane kini ɗa dzəktən labara s'igə lakede ande a ciba, atə sənɗay gə ɗa sənkede a Yesu a aŋəde kəɗkənariya a dipeŋ‑a saŋa.

Yesu mbazləlhətan zhek a ɗa kutə wuran

(Matta 28:16-20; Markus 16:14-18; Zhaŋ 20:19-23; Sləra 1:6-8)

36Ba me sahan kini zlama ɗa kəɗkəlede bə ga, ɗa tsa ba Yesu i ŋasaray ene a dagava tan de, dzəktəna, wa: «Askwaf á vərkun lapiya tsəre.» 37Amá wutan ɗa zləgutsaka awiba, bembec slaslaɗəktənde, aɗaba ɗa gurəkəl ɗa tsək shinekw ɗu gə a mika de. 38Yesu, wa: «Amnaya ŋa kwan wushakakude? Amnaya kwene i dzəmŋa caw caw‑a? 39Cecɨnka alay hay hwa atə səlay hay hwa, aŋa ba s'ənne. Ɗifɨnpaw alay hay kwan, cɨnnuwa. Aɗaba shinekw ɗu gə a mika de ga, niba i sluwe zhek atə asləslak a zhek de ka aŋa na kwa tsanuwa ənne ənne al ayina saŋa.» 40Dzəktənede ahan sahan, mbəslkəlhətan alay hay ene atə səlay hay ene. 41Ɗa dzəgwika bə te ɗəfɗipənŋa a ahan de sahan, aɗaba ɗa ruhwaka i higəɗay atə gə s'ajipu apəna. Sləŋa dzəktəna, wa: «Ipəɗay niya təku a ma kwan de akəna?» 42Wutan ane ɗa vərkən ŋgəɗɗay kuciɗek ndəɗɗay ɓile. 43Təvika, kutsika aba a ma tan de.

44Mezlene wa: «A aŋəde əŋ zak a ma kwan de saŋa ga, əŋ zak dzaɗikuna, gəni si igə ɗa hətska ala apuwa a me gurɗay Musa de atə a wakita hay ɗa mbəɗɗitənande me s'Askwaf a ɗaha hay de, ŋa a wakita s'Awar hay de saŋa gɨkiya ba cecena.» 45Mezlene pakənhətənmiya a həŋkale ka a sənɗiyede a igə wakita s'Askwaf dzawa. 46Dzəktəna, wa: «Na i hətsɗay a wakita s'Askwaf de kugwan, wa: Si Kristu shaka te zlaɗa, a hənɗay de ala apə məŋgan ga, ǎ slabayede ada dagava ɗa gə ka wutə a mika de. 47Si à ɗá nenilhətan a jiba ɗaha hay ba cecena i sləmay ene, gəni ɗá mbəɗakude zaɗay tan, ta Askwaf ɓushɨtənka hipe hay tan. À ɗá tanmandar‑a nanəɗila a Zheruzalem. 48Ba kwene aŋa kwa siyade hay s'i me hay sahan. 49Ənne ga, ə̌ŋ slənikunka igə Paba wa ǎ vərikuna saŋa. Amá ga, zhɨnkwen aba bərni saŋa de, ha ala a bəga de à kwá ruhwa i hakuma gə ǎ nay ada akufa ka saŋa.»

Huɗay Yesu ala a askwaf de

(Markus 16:19-20; Sləra 1:9-11)

50Mezlene Yesu hukəltənede ada bərni‑a, ɗa laka ba dikkwa i Baytaniya ga, pakakude alay hay ene, gəktənaŋade barka. 51A aŋəde gɨtənaŋade barka sahan ga, hulaka atə ayitəna, ɗa hukəla ala a askwaf de. 52Wutan ane ɗa hətskənka galəmnzay, ta ɗa mbəɗiŋa ala a Zheruzalem, bembec tan ba ka aməmak. 53Ba kəla mandaɗay ɗa ŋgəɗak ba a adaw s'Askwaf de a zəmbəl s'Askwaf.

Currently Selected:

Luka 24: mlr

Highlight

Copy