Luka 19

Wutə Yesu atə Jakayus

1Yesu lide a hu Yeriku de, niya like a tənday hu de. 2Akənahan sahan, dagwa s'iŋgeɗe niya sləmay ene Jakayus. Wuran məlmal ɗa maməsl hadama, ɗu gelipe zlama adəɓa. 3Gwasək tsaɗika Yesu a sənɗiyede, amá dzəgwika ba a ma fuɗəɗay ɗaha hay de, aɗaba wuran ɗu dekkuna. 4Kugwan ga, wuran ane ɗəvəraka ala apə miya, laka a dzənɗide a kevirke de a tsaɗika, aɗaba Yesu like i ma sahan‑a. 5A aŋəde Yesu laka a ma kevirke de sahan ga, pakakude aray ala akufa, dzakəna, wa: «Jakayus, fatayede yakwa yakwa, aɗaba bəkwa saŋa si əŋ le a tsukɗay adiyaka.» 6Jakayus ane ba ciɗa fatayede, təvika abi higəɗay ala adiyana.

7Ɗa gə ɗa tsaka ahan sahan ba cecena tan ɗa takənmandar‑a a dəduŋɗay, wa: «Caka ɗece, le a tsukɗay adə ɗu hipe dəgiya!» 8Amá Jakayus tavaka apə miya a Ɗuduwuna ka, wa: «Ɗuduwuna hwa, ənne əŋ hulɨtənakude tiɗma s'almane hwa a talage hay. Ɗu gə abə əŋ zak təfɗipəna away i zlərma kini, əŋ mbəɗəlhənde aray tənday fuɗaw.» 9Yesu, wa: «Bəkwa ga, ɗa s'adaw saŋa ɗa nzək zluwaɗaya, aɗaba ike kini ba ike shef s'Abraham. 10Aɗaba Kine ɗu səlammərzheŋ ga, naya a gusɗiya atə a zlu ba s'igə zak səzaɗaya saŋa.»

Araja i mbəɗ s'alay i shiŋgu

(Matta 25:14-30)

11Ɗaha hay niya ɗa tsukw me Yesu ga, dzəktəna araja s'iŋgeɗe, aɗaba sləŋa hərzhika Zheruzalem atə aɗaba ɗaha ɗa gurəkəl gurɗay s'Askwaf ǎ nay aba a ahan de sahan. 12Amá gə na igə wuran dzəktəna, wa: «Dagwa eɗe kine məlmal, slabakakude huwaka ala a higay s'iŋgeɗe de kwalala a ləɗay a nzəɗin bay tsəre a ŋa ene, ta ǎ mbəɗiŋa. 13Ndala huke ga, həktənakude ɗa sləra ene jem, huləktənka shiŋgu mbalaw ɓili‑ɓiliya. Dzəktəna, wa: “Mbiɗɨnla alay ha ala a sərte naɗayadaw hwa de.” 14Amá ɗa hu ene ɗa micka ba, ɗa slənika ɗa s'iŋgeɗe adede ayina a ləɗay a dzaɗiya, wa: “Mene ma zləha bə dagwa sahan gɨkiya bay aŋade ayiməna.” 15Wuran ane a aŋəde nzək bay tsəre sahan ga, mbəɗiŋa ala higay ene de. Həktənakude ɗa sləra gə zak huləɗitənka shiŋgu ane, a sənɗiyede a igə gha wiya tan kini nzəkənarde.

16«Ɗu zuŋŋuna naya, wa: “Paba s'adaw hwa, a shiŋgu aka ane ga, əŋ nzəkənaŋade mbalaw jem.” 17Pəban s'adaw ene, wa: “Həslka duna, ike ɗu sləra sələmna. Ba ka aŋa kə gək jire tsəre a ikutewuna de saŋa ga, əŋ gɨlkina ɗu gurə hu hay gərgəra jem.” 18Ɗu gə ala apə caw kini naya, wa: “Paba s'adaw hwa, a shiŋgu aka ane, əŋ nzəkənaŋade mbalaw ɗara.” 19Wuran ane dzakəna ayina kini, wa: “Ike kini əŋ gɨlkina ɗu gurə hu hay gərgəra ɗara.” 20Iŋgeɗe tan naya ga, dzakəna, wa: “Paba s'adaw hwa, na shiŋgu aka gə zak kə vərkuwa ane, əŋ nanide a bagwadza de, əŋ shiɓkəla hakkwa. 21Zləŋwaɗ vəɗkənwa ande ayika, aɗaba əŋ səna ike ɗu zlazlaɗanna. Igə ike bə kə ɗəfka kini ba kə təva. Igə ike bə kə mbətska kini ba kə nzəra.”

22«Pəban s'adaw ene ane, wa: “Ŋguɗi s'aweɗe! Əŋ niŋken abi me hay aka sahan. Kə səna ika ənne ɗu zlazlaɗanna, igə əŋ ɗəfika bə kini əŋ təva, igə əŋ mbətska bə kini əŋ nzəra bəhe? 23I mà, amnaya kə hətskude ba almane hwa sahan a baŋ de, gəni abə əŋ nakayadaw, əŋ nəkay a tsəmɗiyede al ahwam arde?” 24Mezlene dzatəna a ɗa gə wutə akənahan saŋa, wa: “Tivɨnpəna mbalaw ɓile ene sahan, ɗifɨnnəhənaŋade a ɗu gə niya i mbalaw jem saŋa.” 25Ɗa sahan ɗa dzakəna, wa: “Paba s'adaw man, shiŋgu niya tsaw mbalaw jem a ma ene de dəgiya!”

26«Wuran ane, wa: “Na əŋ dzakuna: Ɗu gə abə away niya a ma ene de ga, à ɗá ɗəfənhənaŋade adəɓa. Amá ɗu gə abə away niba a ma ene de ga, aba atə aŋa kutew a ma ene de saŋa kini à ɗá sləɗpəna. 27I ɗa dawa hwa gə ɗa zləhka bə əŋ gɨkiya bay aŋade ayitəna saŋa ga, mikɨntan ala a ma hwa de, kiɗɨnletəna aba apə aray hwa‑a.”»

Ləɗay Yesu ala a Zheruzalem

(Matta 21:1-11; Markus 11:1-11; Zhaŋ 12:12-19)

28Adede a me hay ene sahan ga, Yesu ane lakede apə miya, a dzənɗay ala a Zheruzalem. 29A aŋəde hərzhika Baytifaji atə Baytaniya, apə zhek kuwan‑a gə ɗa hawa i kuwan s'Aniranira saŋa ga, slənika ɗa kutə wuran s'iŋgeɗe caw, 30dzəktəna, wa: «Len ala a hu de gə tá apə miya saŋa. Abə à kwá lɨde ga, à kwá le a nzə kine s'izhuŋwa i nəŋɗay, zlama ɗa dzənəkpəna ba aride, pirkɨnpəna, mikɨnwa. 31Abə ɗeɗe mbutsəkkunamiya, wa: “Amnaya kwa para saŋa?” Jɨnna a ɗuhan kwene, ika: “Ɗuduwuna niya i wudar ene.”» 32Ɗa gə slənəktan ane ba huɗay tan, ɗa laka a nzə s'away hay ba ka aŋa wuran dzəktəna sahan. 33Niya ɗa para izhuŋwa ane ga, ɗahay ene ɗa mbutsəktənamiya, wa: «Amnaya kwa para izhuŋwa saŋa?» 34Ɗa zləmkənhətənaŋa, wa: «Ɗuduwuna man niya i wudar ene.» 35Ɗa minəka kine s'izhuŋwa ane a Yesu‑a, ɗa ndikkinpan ifafətɗay hay tan, ta ɗa dzənkəlpəna Yesu. 36A aŋəde niya like ga, ɗaha hay ɗa fəfətərkənhənande ifafətɗay hay tan a ciba.

37Sləŋa laka ba dikkwa i Zheruzalem, a ma gə de fitkike ada apə ŋa kuwan s'Aniranira ka saŋa ga, ba cecena abaga ɗa kutə wuran saŋa ɗa ruhwaka i higəɗay, ɗa takənmandar‑a a zəmbəl s'Askwaf abi pa taŋw, aɗaba s'ajipu hay gə wutan ɗa tsaka saŋa ba cecena. 38Ɗa dzawa, wa:

«Askwaf á gɨnaŋade barka a bay gə nike i sləmay Ɗuduwuna saŋa#Awar 118:26!

Lapiya tsəre á za a askwaf de,

zhimbilinməna Askwaf gə kwalala a askwaf de saŋa!»

39Farisa hay s'iŋgeɗe a fuɗəɗay ɗaha hay de sahan, ɗa dzakəna a Yesu, wa: «Malum, sləktənaŋade a ɗa kutɨɗiken saŋa ɗá pawande.» 40Wuran zləmkənhətənaŋa, wa: «Na əŋ dzakuna: Gha wutan ɗa pakande kini, kuwan hay saŋa à ɗá ŋgulah!»

Yesu yəm Zheruzalem

41A aŋəde Yesu hərzhika hu sahan, ba hadzəkpan aray ga, kaya a yəmɗiya, 42wa: «Ba s'ike i ŋasaray kə sənkiyede həmba a igə ǎ vərak lapiya tsəre a hənɗay saŋa de! Amá a səgan de ga, i shiɓɗay ande a aray aka. 43Aɗaba hənɗay hay s'iŋgeɗe niya à ɗá naya a njiɗiken ga, ɗa dawa aka à ɗá zləŋakariya i dalaha tan gəni ba ɗu ɓile kini á lede ba, à ɗá pislɨkinakude gha i magəna kini. 44À ɗá naya a ginɗikwenakude atə waghay aka gə wutə a tənday hu de. Ba kuwan ɓile kini à ɗá harənde ba apə miya ene kuwan‑a, aɗaba kə sənkede ba a sərte gə Askwaf naya a tsaɗiyakaŋa aray saŋa.»

Yesu ɓər ɗa mbəɗ s'alay a adaw s'Askwaf de

(Matta 21:12-17; Markus 11:15-19; Zhaŋ 2:13-22)

45Mezlene Yesu lide a adaw s'Askwaf de, kaya a ɓurɗiyede ɗa mbəɗ s'alay ala a geshe, 46dzəktəna, wa: «Niya i hətsɗay a wakita s'Askwaf de, wa: “Adaw hwa ga, ǎ za ba s'adaw gə maduwa,” amá ni, kwene kwa gəkəlka ghəlkwe s'abra hay#Ezayi 56:7; Zheremi 7:11!»

47Tsətsugəkəlhətan away a ɗaha hay a adaw s'Askwaf de ba kəla mandaɗay. Məlmal hay ɗa slumə ɗaha hay atə Askwaf atə malum hay me gurɗay, ŋa məlmal hay hu ga, ɗa zheke aba a gus vəɗɗika shifa ene. 48Amá ɗa səna ba a igə ɗa giya, aɗaba ɗaha hay ba cecena ɗa vərkənka həŋkale tan a tsukw me ene.

Currently Selected:

Luka 19: mlr

Highlight

Copy