Yoane 16

Yes asuengs baronki ntshoro siwiy kuwiy

1Minyi ramabiror mey mene isina binu ubuak bo.

2Banta bupabibing u kat a mpuru si romp ; itankua rumawiya, badjak a binu yebukan bampe : Tshukukeri ngun mua Ntsampe.

3Yebubiker makima nkos, isina banta uyeb Tata nto ake minyi bo.

4Di minyi ramabiror mey mene, isin nter yeitor itankua risu, keka binu bukan ampe, minyi ramabisuengs. Bu- kwetshi minyi keratubisuengs a manta, isina awak minyi nto a binu.

5Di kekanko minyi ruwe kuwe ngwa tom ami, rek a muot mwetsh u kat a binu mapor ampe : Wene uwe kue ?

6Isina imabiror minyi mey mene, mitem mia binu mimayor a nkebi.

7Minyi rik birori a barabara : mungwa busek bua binu, minyi ruwe, keka isina mpe minyi rawar rek uwe, Nkers yak uwiy ngwa binu bo, mpe minyi rawe, minyi rupabitoms ante.

8Nter iwiy yante, yante ipasuintsh bat ba man, mey mu bube bua banta, nto ake mu busek buami, nto ake ikuaks ra banta.

9Bube bua banta, isina abera ba untshyes minyi.

10Busek buami, isina iwe minyi ngwar Tata, binu ukatar minyi bo.

11Ikuak, isina kumu a bat ba man amakuak.

12Minyi runkawar a mey mekra ma buiki mubiror, di binu uyeb umaok bo.

13Di nter iwiy Puinki a barabara, ya ipabitshuar u kat a barabara ikima ; isina ya keitot isina yante yamet bo, di ya iror makima maok yante, ya ipabisuengs mey yemuwiy.

14Yante ipatons minyi, isina irab ya mey mami, ya ibisuengs a manta.

15Bikima bingwak bia Tata bingwak biami ake, isin kankos imabiror minyi ampe, ya irab mey mami ipabisuengs a manta.

Yes amabasuengs mey mu iwa rante

16Itankua kakek binu bakekatar minyi bo, ampis itankua kakek keka binu bapakatar isina iwe minyi ngwa Tata.

17Baronki bante bekr kurors ba banta bamet bampe : Mey mene nkos mpuenyi imatshuror ya ampe : Itankua kakek binu bakakatar minyi bo, ampis itankua kakek ake keka binu bapakatar minyi, nto ake ampe : Isina iwe minyi ngwa Tata ?

18Banta kutot bampe : Mene mey ma nake ampe : Itankua kakek ? Bitu rek tshuayeb mey mukutot ya bo.

19Nter ayeb Yes ampe, banta bangan kungoror, ya kubaror yampe : Binu bukoworors binu a binu isina mey mumabiror minyi ampe : Itankua kakek binu bakukatar minyi bo, ampis itankua kakek ake keka binu bapakatar minyi.

20Barabara, barabara, minyi rik birori, binu burer kurer a biesur, bukan kukan, bat ba man, buniang kuniang, di binu buwar a nkebi di nkebi a binu ipabanam nianko.

21Ngat nter imotok yante angwak a ntshoro, isina itankua rante rumawiy ; di nter ibot yante muan, yante keankakukan ntshoro siante bo, isina nianko mua muan amatou u kat a bat.

22Nkos binu ake kekanko bungwar kat a nkebi, di minyi rukakubitar, ntem mua binu mupaniang, rek a muot uyeb ubitampr nianko mua binu.

23Rusu ris binu yekubuporor ruey bo. Barabara, barabara, minyi rik birori, bikima birompo binu Tata i rukompua rami, yante ipabiwek a binta.

24Kakaka a kekanko binu kebaromp iket i rukompua rami bo ; romp ana binu aparab, isina keka nianko mua binu mureks.

25Minyi rumabiror mey mene kat mikonta ; di itankua rumawiy, minyi kerukatot a binu nto mikonta bo, di minyi rupabiror ruey ra Tata irengene irengene.

26Rusu ris binu buparomp i rukompua rami, minyi rek ribiror ampe, minyi ruparomp Tata isin binu.

27Isin Tata yamet amabiwont, isina amapont binu minyi, nto ake ayes binu minyi ratoa ngwa Tata.

28Minyi ratoa ngwa Tata, ramawiy u kat a bat ba man, kekanko minyi rumakobu u kat a bat, isina kuwe ngwa Tata.

29Baronki bante kunor bampe : Kekanko wene umatot iren- gene irengene, wene ukabok nkonta bo.

30Kekanko bitu tshumatar wene wamayeb mey makima, wene rek a ruey isina muot uiworor; isin kankos inyes bitu ampe, Wene watoa ngwa Ntsampe.

31Yes kubasaks yampe : Bumayes kekanko ?

32Rent, itankua rumawiy, rinta ramawiy, binu bupantshr kupantshr muot muot a mpok ante, binu busampompr minyi amet ; di minyi rek rawara miamet bo, isina Tata angwa nto ami.

33Minyi ramabiror mey mene isin binu bunyit u kat ami. Binu yebumon ntshoro kat a bat ba man, nangat ana, minyi ramarek bat ba man bukobu.

Currently Selected:

Yoane 16: EJK2012

Highlight

Copy