Sélimɛ 39

Yusufu wi 'kò sùkulowo

1Bà pe yé Yusufu 'kɔ́ri wè nɛ̀ kɛ́ Ezipiti kùlo mɛ́ lè, á Potifari sɛ́nì wi suɔ wè, wire ŋáà wi 'puu Ezipiti kùlo siɛnkpuɔwɔ wáà wè. Wi 'puu Ezipiti kùlofɔli Farawɔn wi wélifɔlilɔ kàfɔli#39.1 Farawɔn míʔɛ ki yé puu kɔrigɔ kùlofɔlilɔ mɛ́ bèle, Ezipiti kùlo nī lè. A kùlofɔli ŋíì gbɛ́nɛ tɛ́ni fànʔa nɛ̄ gè, pe nɛ̂ ki le wi nɛ̄. Farawɔn wáà yé kíni nɛ̀ tɛ́ni fànʔa nɛ̄ gè Birayima lɛ̀lɛ nī lè. Wéli baa 12.15.. A wi 'Yusufu suɔ wè Simayira siɛnnɛ mɛ́ bèle, peli bálì pe yé kɛ́ nɛ́ wi ní Ezipiti kùlo mɛ́ lè. 2A ki pɛ́nì nyaa Yewe yē nɛ́ Yusufu ní wè, a kire ki 'yaʔa wi kele ke mìɛni 'puu nɛ nyuʔɔ. A wi 'kò baa wi kàfɔli Potifari kpáa nī gè, Ezipiti kùlo wuu wè.

3A Potifari kɛ́nì ki nyaa Yewe yē nɛ́ Yusufu ní wè, á wi kele ke mìɛni ní nɛ nyuʔɔ gèle, gàli wi 'puu nɛ kpínʔini gèle. 4Bà ki 'kpíʔile a wi sí tɔ̀ni nɛ̀ kpuʔɔrɔ taa Potifari mɛ́ wè, a wi 'wi sìʔɛrɛ nɛ̀ kpɔni wìi nɛ̄, a wi 'kò nɛ wi saʔa kele ke mìɛni kàrigí nɛ́ wi lɔri ní dè. 5Bà Potifari wi 'Yusufu tɛ́ngɛ wè wi saʔa nyùgo nɛ̄ gè nɛ́ wi kpíʔile wi kɔliyɛrɛ ti mìɛni kàrigɛfɔli wè, a Yewe 'diba taʔa wè Potifari saʔa nɛ̄ gè, Ezipiti kùlo wuu wè, Yusufu kɛnmɛ nɛ̄ bè. Wi diba wi yé puu wi yɛrɛ nɛ̄ dè dàa wi 'puu nɛ taʔa dè, saʔa wori dè nɛ́ siʔi wori ní dè. 6A Potifari wi sí wi yɛrɛ ti mìɛni yaʔa Yusufu kiyɛ nī yè. Wire sì ń'nɛ puu nɛ yafiɛn ciʔigeʔ, nɛ̀ yiri wi siliire tire yákuɔ nīʔ.

Yusufu nɛ́ wi kàfɔli cuɔ wori dè

Yusufu wi yé sí tɔ̀ni nɛ̀ puu cɛ̀nwɛ cetinnɛ nɛ̄ lè, wi yiʔɛ míɛni ki 'puu cɛ̀ngɛ.

7Bà lɛ̀lɛ láà pɛ́nì kúɔ wè, á ki pɛ́nì nyaa cɛngɛ káà, a Yusufu kàfɔli cuɔ wi 'wi wéli nɛ̀ ciʔige nɛ́ kɛ́nì Yusufu yɛ wè: «Sínɛ nɛ́ mi ní !»

8A wi 'cíi nɛ́ ki juu wi kàfɔli cuɔ mɛ́ wè, nɛ́ wi yɛ: «Mi kàfɔli wi nyɛ́nì wi saʔa kele ke mìɛni le mi kɔli nī, wi nyɛ́nì tɛ́ngɛ mi nɛ̄; wi ní wè yakaa ciʔige saʔa nī gèʔ. 9Wire tíimɛ fànʔa kiì kpuʔɔ saʔa nī gè mi wuʔu nɛ̄ gèʔ, wiì cíi yafiɛn nɛ̄ m'mɛ́ʔ, ka laa muɔ nigbe bɛ̀ʔ, nɛ́ ki cɛ́n muɔ yē wi cuɔ. Gáa nɛ̄ m'bé ba kapiigbuʔɔ gáà kpíʔile gè Kulocɛliɛ nɛ̄ wè ?» 10Cɛngɛ ó cɛngɛ, cɛliwɛ wi nìɛ siɛnrɛ dáà nyu dè Yusufu mɛ́. Yusufu nɛ̂ cíi, wi nɛ̌ cɛ ti lúʔu wi mɛ́ʔ, wi míɛni nɛ̌ fɔ̀li ki nɛ̄ bè sínɛ nɛ́ cɛliwɛ ní wèʔ, nɛ́ míɛni bé puu nɛ́ wi ní tiʔɛ nugo nīʔ.

11A ki pɛ́nì nyaa cɛngɛ káà, bà Yusufu 'jíin saʔa nī gè bè wi baara kúɔ dè, baakuɔwɔ wáà sì yé sí puu baa saʔa nī gèʔ. 12A cɛliwɛ wi 'Yusufu cò burugo nɛ̄ gè, nɛ́ jo: «Sínɛ nɛ́ mi ní !» A Yusufu wi 'fɛ̀ nɛ̀ yiri kpànʔanɛ, nɛ́ burugo yaʔa gè wi mɛ́ kɔli nī gè. 13Bà cɛliwɛ wi kɛ́nì ki nyaa Yusufu 'fɛ̀ nɛ̀ yiri kpànʔanɛ gè nɛ́ burugo yaʔa gè wire mɛ́ kɔli nī gè, 14a wi 'yékpoli wáa lè nɛ̀ wi baakuɔlɔ yeri bèle, nɛ́ pe yɛ: «Cáa ! Je mi pɔli wi 'Eburu nàguɔ sùkulowo líɛ wè nɛ̀ pɛn wi‑ pa weli tíʔɛ wī. Wi 'jíin mi kúrugu bè pa mi cáan daa, a mi 'yékpoli wáa lè ! 15Bà wi kɛ́nì ki nyaa a mi 'yékpoli yɛ̀gɛ lè mmɛ gè, a wi 'fɛ̀ nɛ̀ yiri kpànʔanɛ nɛ́ wi burugo yaʔa gè mi táanni.»

16A cɛliwɛ wi 'burugo tɛ́ngɛ gè wìi táanni nɛ wi pɔli siri wè. 17Bà wi kɛ́nì pɛn wè, a wi 'siɛnnuro juu dè nɛ̀ tìɛ wi nɛ̄ nɛ́ jo: «Eburulo sùkulonaguɔ ŋáà ní muɔ 'pɛn wè, wi pɛ́nì jíin mi kúrugu saʔa nī gè nɛ́ jo wire bé mi cáan daa bè fìɛrɛ wáa mi nɛ̄. 18Bà mi kɛ́nì yékpoli wáa lè, a wi 'wi burugo yaʔa gè mi táanni nɛ́ fɛ̀ nɛ̀ yiri kpànʔanɛ.»

19Bà Yusufu kàfɔli wi 'siɛnrɛ dáà lúʔu dè mmɛ gè, dìi wi cuɔ wi yé juu dè nɛ́ jo, «ki n'gɛ gàa muɔ sùkulowo wi yé jo kpíʔile mi nɛ̄ gè,» a wi 'fungo ki yɛ̀ kpuʔɔ. 20A wi 'Yusufu cò wè nɛ̀ sɛ́nì le kasuu nī, saʔa gáà nī kùlofɔli wi cî nɛ wi kasuulebile nii bèle. A Yusufu wi 'kò baa kasuu nī wè.

21A ki pɛ́nì nyaa, kire tiʔɛ míɛni nī gè, Yewe 'puu nɛ́ wi ní. A wi 'kacɛ̀ngɛ kpíʔile Yusufu mɛ́ wè, a Yewe 'ki yaʔa a Yusufu sí kpuʔɔrɔ taa kasuusaʔa kàfɔli mɛ́ wè. 22A kasuusaʔa kàfɔli wi 'kasuulebile pe mìɛni yaʔa Yusufu kɔli nī gè. A yɛgɛ ó yɛgɛ 'kpíʔile kasuu nī wè, wire wi 'puu nɛ ki kele cuɔnri gèle. 23Kasuusaʔa kàfɔli wiì cé ń'nɛ puu nɛ yakaa ciʔigeʔ, nɛ́ ki cɛ́n wi yé kele ke mìɛni yaʔa Yusufu kɔli nī. Bɛ̀ Yewe yé puu nɛ́ Yusufu ní wè, a wi yé kɔli le kaala ó kaala nī, Yewe nɛ̂ ki kaala nyuɔ lè.

Currently Selected:

Sélimɛ 39: sev

Highlight

Copy