Sélimɛ 31

Yakuba 'wi wuulo kɔ́ri bèle nɛ̀ kɛ́

1A Yakuba 'Laban jaala pe siɛnrɛ lúʔu dè, dàa pe 'puu nɛ nyu nɛ́ jo: «Yakuba nyɛ́nì weli tuu lɔri ti mìɛni líɛ; weli tuu lɔri tire ti 'wi yaʔa a wi 'kò lɔriniʔɛrɛfɔli.»

2A Yakuba 'ki nyaa míɛni Laban yiʔɛ ki tɛ́ngɛgɛnmɛ piì puu nubo bɛ̀ faʔa tíɛlɛ gè wire kɔli mɛ́ gèʔ.

3A Yewe wi ń'nɛ̀ juu nɛ́ Yakuba ní wè nɛ́ wi yɛ: «Koli mari waa muɔ tuu kùlo mɛ́ lè, muɔ narigɛ tiʔɛ nī gè, nɛ́ ki cɛ́n m'bé puu nɛ́ muɔ ní.»

4A Yakuba wi 'tunduro tórigo wi cɛlilɛ mɛ́ bèle, Arasɛli nɛ́ Leya ní wè, peri báan náʔa wire kúrugu siʔi mɛ́ gè yajuuro nàʔadiʔɛ nī gè, 5nɛ̀ pɛ́nì pe yɛ: «Mi 'yeli tuu wi yiʔɛ tɛ́ngɛgɛnmɛ nyaa bè pi ní wè tíin bɛ̀ faʔa tíɛlɛ gè nɛ́ mi níʔ, kire nɛ́ ki mìɛni mi tuu Siaga wi Kulocɛliɛ wire wi 'kò nɛ́ mi ní. 6Yeli nyɛ́nì ki cɛ́n, yeli tíimɛ bèle, kɛnmɛ bíì nɛ̄ mi 'baara kúɔ dè yeli tuu mɛ́ wè nɛ́ mi ŋɔri ti mìɛni ní dè. 7Kire ki mìɛni ní, yeli tuu wi 'mi nùʔɔrɔ nɛ̀ taa tɔliyɔ kiɛ, nɛ̀ mi sàri yiʔɛ wè. Nɛ̀ ki yaʔa Kulocɛliɛ sì fɔ̀li ki nɛ̄ a wi‑ kapiʔi kpíʔile mi nɛ̄ʔ. 8A Laban cé gbɛ́nɛ ki juu nɛ́ jo: ‹Muɔ sàri wire wi bé puu yajuuro dáà dī kàba wori dè,› yajuuro ti mìɛni nɛ̂ kò nɛ sii kàba wori. A wi cé ń'nɛ̀ ki juu nɛ́ jo: ‹Muɔ sàri wire wi bé puu yajuuro dáà dī tùluyo ní yè,› yajuuro ti mìɛni nɛ̂ kò nɛ sii tùluyo ní. 9Bà ki 'kpíʔile a Kulocɛliɛ 'yeli tuu wi yajuuro suɔ dè nɛ̀ kɛn m'mɛ́.

10«Lɛ̀lɛ líì nī yajuuro ti 'puu nɛ tári tìi nɛ̄ dè, a mi 'ki nyaa ŋɔ́nigɔ nī: sìnbapɔlilɔ bálì pe 'puu nɛ tári sìnbacɛlilɛ nɛ̄ bèle, pe 'puu nɛ́ tùluyo ní, nɛ́ tiʔɛlɛ ní, nɛ́ ní kàbawuulo. 11A Kulocɛliɛ tundunwɔ wi 'mi yeri ŋɔ́nigɔ nī gè, nɛ́ jo: ‹Yakuba yo !›

«A mi 'suɔ: ‹Coo‑i !›

12«A tundunwɔ wi 'jo: ‹‑Ki wéli, sìnbapɔlilɔ bálì pe tári sìnbacɛlilɛ nɛ̄ bèle, piyē nɛ́ tùluyo ní, nɛ́ tiʔɛlɛ ní, nɛ́ ní kàbawuulo. Mi mi 'kire kpíʔile, nɛ́ ki cɛ́n gàa Laban 'kpíʔile muɔ nɛ̄ gè, mi nyɛ́nì ki nyaa. 13Mi wī Kulocɛliɛ ŋáà wi 'wìi tìɛ muɔ nɛ̄ wè Betɛli tiʔɛ nī gè, tiʔɛ gíì nī muɔ 'kàdɛnigɛ yɛ̀gɛ gè nɛ̀ yérige gè, nɛ́ sùnmɔ wo bè ki nɛ̄ naamɛ gè ki‑ puu sɔ̀ngidaadiʔɛ, nɛ́ nyuɔ kún nɛ̀ kɛn m'mɛ́ wè. Píra ŋáà nī wè, yɛ̀ fáari ma yiri kùlo náà nī lè mari waa muɔ wuulo kùlo mɛ́ lè.› »

14A Arasɛli nɛ́ Leya peli sí Yakuba yɛ wè: «Kɔrigɔ ń'nɛ tíin náʔa lé weli mɛ́ weli tuu saʔa nī gè ? 15Nɛ́ ki cɛ́n weli tuu wiì weli cò lé bɛ̀ nabɔnminɔ tíɛlɛ ? Wi nyɛ́nì weli pári nɛ̀ weli wali lìi wè, nɛ́ cepɔrigɔ yɛrɛ ní dè, dàa weli yé yɛli bè taa dè#31.15 Laban sì yé cepɔrigɔ yɛrɛ kɛn dè wi pórilo mɛ́ bèleʔ nɛ̀ yɛli nɛ́ pe kùlo kaliʔɛlɛ ní gèle.. 16Kire kɛnmɛ nɛ̄ lɔri dáà Kulocɛliɛ wi 'suɔ weli tuu mɛ́ wè, tire 'kò weli wori, weli nɛ́ weli pìile ní bèle. Píra ŋáà nī wè, ‑ki kpíʔile ma yɛli nɛ́ gàa ní Kulocɛliɛ wi 'juu muɔ mɛ́ gè.»

17A Yakuba 'fali nɛ̀ yɛ̀ fáari nɛ̀ gbòbori bè kɛ́, nɛ̀ wi cɛlilɛ nɛ́ wi jaala líɛ bèle nɛ̀ tárigɛ nyuʔɔmɔnɔ nɛ̄ bèle, 18nɛ́ wi yajuuro kɔ́ri dè nɛ̀ kínige wi yiʔɛ mɛ́, nɛ́ wi lɔri ti mìɛni ní dàa wi yé taa dè, nɛ́ yajuuro dáà ti 'puu wi wori dè tire dáà ti mìɛni wi yé taa Mɛsopotamii kùlo nī lè, nɛ̀ koli nɛ waa wi tuu Siaga tiʔɛ mɛ́ gè, Kanaa kùlo nī lè.

19Laban wire yé kɛ́ sìnbasiire kùnudiʔɛ nī. A Arasɛli 'wi tuu gbèdegele yùu gèle nɛ̀ líɛ nɛ̀ kɛ́ nɛ́ ke ní. 20A Yakuba míɛni 'Laban nùʔɔrɔ wè, Laban ŋáà wi 'puu Aramiyé wuu wè, nɛ̀ fɛ̀ nɛ̀ kɛ́; wiì juu nɛ́ wi níʔ. 21A Yakuba 'fɛ̀ nɛ̀ kɛ́ nɛ́ wi yɛrɛ ti mìɛni ní, nɛ̀ sɛ́nì Efirati cáʔa jeli gè, nɛ̀ fali nɛ waa Galaadi nyaguruyo kɔli mɛ́ gè.

Laban 'yɛ̀ nɛ̀ taʔa Yakuba nɛ̄

22Cɛnyɛ taanri tórilo kàduʔumɛ gè, a pe 'ti juu Laban mɛ́ wè nɛ́ wi yɛ: «Yakuba nyɛ́nì fɛ̀.» 23A Laban wi 'wi narigɛ siɛnnɛ pálì kɔ́ri nɛ̀ taʔa wi nɛ̄. A pe 'tánʔa cɛnyɛ kɔlisiin nɛ̀ sɛ́nì nɔ̀ Yakuba nɛ̄ wè Galaadi nyaguruyo nɛ̄ yè.

24Bà pìlige ki 'wúɔ gè, a Kulocɛliɛ pɛ́nì juu nɛ́ Laban ní wè, Aramiyé wuu wè, ŋɔ́nigɔ nɛ̄ nɛ́ jo: «‑Mìɛ cò díɛʔ ! Fǎga yakaa juu Yakuba mɛ́ wèʔ, gàa gī cɛ̀ngɛ gè, kire ga laa, gàa ki 'pii gè.»

25A Laban sɛ́nì Yakuba cò wè. Bà Yakuba wi cé wi fɛ̀ni saaya kóri yè nyaguruyo nɛ̄ yè, a Laban nɛ́ wi siɛnnɛ ní bèle a pe míɛni 'pɛn nɛ́ pɛ́nì pe fɛ̀ni saaya kóri yè Galaadi nyaguruyo nɛ̄ yè.

26A Laban sí wi yúgo nɛ́ jo: «Gáa muɔ 'kpíʔile mmɛ gè ? Gáa nɛ̄ muɔ 'mi nùʔɔrɔ mmɛ gè, nɛ́ mi pórilo yùu bèle nɛ̀ kɔ́ri majo bɛ̀ kapiɛnnɛ kasuulebile tíɛlɛ. 27Gáa nɛ̄ muɔ 'làri nɛ̀ fɛ̀ nɛ́ mi nùʔɔrɔ mmɛ gè ? A muɔ cé ti juu m'mɛ́ wè, mi cî muɔ yaʔa muɔ de waa nɛ́ fundaanra ní, bèri ŋú, bèri pìnbigele kpúɔn gèle, nɛ́ gɔri ní wè. 28Muɔ sì cɛ́nì mi yaʔa a mi 'mi pórilo suɔn suɔn bèle gàangbuʔulo nɛ̄ gèleʔ, nɛ́ pe pìile ní bèleʔ. Kányiʔɛ nɛ̄, muɔ tɔ̀ni nɛ̀ cúro wī. 29Ki fànʔa yē m'mɛ́ mi gbɛ̀ kapiʔi kpíʔile yeli nɛ̄, nɛ̀ sí ki yaʔa muɔ tuu Siaga wi Kulocɛliɛ wi sí ki juu m'mɛ́ pìlige gáà ki 'tóri gè, nɛ́ mi yɛ: ‹Fǎga yakaa juu Yakuba mɛ́ʔ, gàa gī cɛ̀ngɛ gè, kire ga laa, gàa ki 'pii gèʔ.› 30Píra ŋáà nī wè, muɔ sí yiri nɛ waa nɛ́ ki cɛ́n muɔ tuu saʔa láa ki kɛ́nì muɔ taa. Gáa sí nɛ̄ muɔ 'mi kulocɛlɛlɛ yùu bèle ?»

31A Yakuba wi sí Laban yɛ wè: «Mi 'làri nɛ̀ fɛ̀ nɛ́ ki cɛ́n mi 'puu nɛ fìʔɛ́, nɛ́ míɛni a mi 'ki sɔ̀ngi nɛ́ jo muɔ bága muɔ pórilo suɔ bèle mi mɛ́ fànʔa nɛ̄. 32A muɔ kɛ́nì muɔ kulocɛlɛlɛ nyaa bèle siɛn ŋíì mɛ́ wè, kire siɛn wiǐ kò sìi nɛ̄ʔ ! ‑Ki tìɛ weli nɛ̄ gìi gī muɔ wuʔu gè, weli siɛnnɛ pe mìɛni nyaamɛ nɛ̄; a gìi yē muɔ wuʔu gè ma ki líɛ.» Yakuba sì yé sí ki cɛ́n Arasɛli wi yé gbèdegele yùu gèleʔ.

33A Laban sɛ́nì jíin Yakuba fɛ̀ni saʔa nī gè, nɛ̀ sɛ́nì jíin Leya fɛ̀ni saʔa nī gè, nɛ̀ sɛ́nì jíin sùkulocɛlilɛ siin fɛ̀ni saʔa nī gè, wiì yafiɛn nyaaʔ. A wi 'yiri Leya fɛ̀ni saʔa nī gè nɛ waa Arasɛli wuʔu mɛ́ gè.

34Nɛ̀ ki yaʔa Arasɛli wi yé gbèdegele líɛ gèle nɛ̀ ke le nyuʔɔmɔ suɔnkogo kpɔ̀bi nī wè, nɛ́ tɛ́ni ki nɛ̄. A Laban sɛ́nì saʔa ki mìɛni caa nɛ̀ màʔa, wiì yafiɛn nyaaʔ.

35A Arasɛli wi 'ki juu wi tuu mɛ́ wè nɛ́ jo: «Mi kàfɔli, fǎga muɔ fungo yɛ̀gɛ gèʔ. A muɔ 'ki nyaa mi sì yɛ̀ muɔ yiʔɛ mɛ́ gèʔ, mi yē yege nɛ̄ wī.»

A Laban ń'nɛ̀ caa nɛ̀ màʔa, kire nɛ́ ki mìɛni, wiì gbèdegele nyaa gèleʔ.

36A Yakuba fungo ki 'yɛ̀ a wi 'juu nɛ̀ kpɛ̀ni Laban nɛ̄ wè nɛ́ jo: «Mi tuudiɛlɛ lire nī níi lè pugo ? Gáa mi 'kpíʔile sìpiʔi gè, dí muɔ sí taʔa mi nɛ̄ nɛ́ muɔ ŋɔri ti mìɛni ní mmɛ gè ? 37Bà muɔ 'caa nɛ̀ màʔa mi yɛrɛ ti mìɛni nī dè o, muɔ 'yakaa nyaa lé baa muɔ saʔa wuʔu ? Ma ki tìɛ mi siɛnnɛ pe mìɛni nɛ̄, nɛ́ muɔ siɛnnɛ ní bèle, pe sí we láʔala wìye nɛ̄.

38«Ki yiʔɛlɛ togo wī ŋàa wè, bà mi yē nɛ́ muɔ ní wè; muɔ síkacɛlilɛ nɛ́ muɔ sìnbacɛlilɛ pe wàa nigbe sì kɛ́nì serige cúʔɔʔ. Mi sì muɔ sìnbapɔlilɔ káa bèleʔ. 39Mi sì kɛ́nì pɛn nɛ́ yajuʔu káà ní gàa nyàʔayɛgɛ 'kpúu gèʔ. A ki yé cɛ́nì kpíʔile, mi nɛ̂ cé ki sìndiʔɛ kɛn gè muɔ mɛ́. A pe yé yajuʔu káà yùu m'mɛ́ gè, cɛnvugo nɛ̄ yo, pìlige nī yo, muɔ nɛ̂ cé jo mi‑ ki fuʔɔ tɔ́n gè. 40Cɛngɛ káfugo ki 'mi wuʔɔ, a pìlige wiire ti 'mi kúru; mi sì cɛ́nì puu nɛ ŋɔ́niʔ.

41«Bɛ̀ ki 'kpíʔile mi nɛ̄ fúɔ nɛ̀ pɛ́nì taa yiʔɛlɛ togo gálì mi 'kúɔ baa muɔ tiʔɛ nī gè. Á mi 'baara kúɔ muɔ mɛ́ yiʔɛlɛ kiɛ nɛ́ sicɛri muɔ pórilo pe siin kɛnmɛ nɛ̄, nɛ́ ń'nɛ̀ baara muɔ mɛ́ yiʔɛlɛ kɔlini nɛ muɔ yajuuro gbún dè. Kire nɛ́ ki mìɛni a muɔ 'mi sàri yiʔɛ wè nɛ̀ taa tɔliyɔ kiɛ. 42A mi tuu wi Kulocɛliɛ wire cé bɛ̀ wè, Birayima Kulocɛliɛ wè, nɛ́ ní Kulocɛliɛ ŋáà nɛ̄ mi tuu Siaga 'puu nɛ fìʔɛ́ wè, a wire sì cé puu nɛ́ mi ní wèʔ, muɔ cî mi yaʔa mi‑ kɛ́ nɛ́ kiyɛ ní yè waaya. Bà Kulocɛliɛ sí mi wuʔɔgɔ nyaa gè, nɛ́ baagbɛnrɛ ní dè dàa mi 'kúɔ dè, kire nɛ̄ pìlige nī gè a wi 'kàyuʔu juu gè nɛ̀ tànʔa kɛn m'mɛ́.»

Yakuba 'nyakungɛngɛ kpíʔile nɛ́ Laban ní wè

43A Laban sí siɛnnugoro kɛn dè Yakuba mɛ́ wè nɛ́ jo: «Mi pórilo bɛ̀ lé bàli bèle, pe pìile bèle o, mi wuulo bɛ̀ʔ lé ? Yajuuro dáà dè, mi wori bɛ̀ʔ lé ? Dàa ti mìɛni muɔ nɛ nyaʔa dè, mi wori dī. Gíi sí m'bé ní gbɛ̀ kpíʔile mi pórilo mɛ́ bèle pàngɛ gè, a kire ga laa pe jaala mɛ́ bèle cígini ? 44Píra ŋáà nī wè, te báan we‑ nyakungɛngɛ kpíʔile mi nɛ́ muɔ ní wè, we‑ fìɛ tɛ́ngɛ náʔa gè bɛ̀ kaala nyaafɔli tíɛlɛ, fìɛ ŋàa wi bé ki tìɛ dí mi nɛ́ muɔ ní wè, we nyɛ́nì nyakungɛngɛ kpíʔile wìye mɛ́.»

45A Yakuba sí kàdɛnigɛ líɛ nɛ̀ ki cɔ́ri nɛ̀ yérige ki‑ puu sɔ̀ngidaadiʔɛ. 46Nɛ́ ki juu wi siɛnnɛ mɛ́ bèle, nɛ́ jo: «Yeri kàdari táà jún yeri báan nɛ́ ti ní.» A pe 'fali nɛ kàdari jò dè nɛ̀ pɛ́nì ti gbuʔulo tìi nɛ̄. A pe 'lìi baa kàdɛnigboli nɛ̄ lè#31.46 Siɛnnɛ bálì pe lɛ̀lɛ nī lè, a pe yé nyakungɛngɛ kpíʔile gè, pe nɛ̂ kúɔ níɛ̀ lìi baa ki tiʔɛ nī gè.. 47A Laban 'tiʔɛ ki míʔɛ le gè nɛ̀ ki yeri Yegari Saʔaduta (ki kɔri wire wī: kàdɛnigboli fìɛ), a Yakuba wire sí ki yeri nɛ́ jo Galedi (ki kɔri wire wī: kàdɛnigɛ fìɛ)#31.47 Laban wire yé míʔɛ le gè wi siɛnrɛ nī, dàa ti 'puu Aramiyé siɛnrɛ dè. A Yakuba wire sí wi míʔɛ le gè wi siɛnrɛ nī, dàa ti 'puu eburu siɛnrɛ dè. Míɛyɛ nyáà yi siin kɔri wi 'puu nuwɔ, dàa ti 'juu nɛ́ jo: kàdɛnigboli fìɛ..

48A Laban sí ń'nɛ̀ jo: «Kàdɛnigboli náà niī fìɛ pàngɛ gè mi nɛ́ muɔ sunʔɔmɔ ní bè bɛ̀ kaala nyaafɔli tíɛlɛ.» Kire nɛ̄ a pe 'kò nɛ ki tiʔɛ yeri gè Galedi. 49Pe 'puu nɛ ki tiʔɛ yeri gè míɛni Misipa (ki kɔri wire wī: wélidiʔɛ), ki 'nyaa Laban yé ki juu nɛ́ jo: «Yewe wiri we nyaʔa, a we kɛ́nì láʔala wìye nɛ̄ wè, mi nɛ́ muɔ ní wè. 50A muɔ sɛ́ni mi pórilo wuʔɔ bèle, kire ga laa a muɔ sɛ́nì cɛlilɛ pálì líɛ nɛ̀ fàri mi pórilo nɛ̄ bèle, a siɛn sí wè nɛ muɔ nyaʔa wèʔ, ma sɔ̀ngi ma taa, ma ki cɛ́n Kulocɛliɛ wire tíimɛ wiī nɛ muɔ nyaʔa.»

51A Laban wi ń'nɛ̀ Yakuba yɛ wè o: «Ki n'gɛ, kàdɛnigboli náà lè, nɛ́ kàdɛnigbuʔɔ gáà mi 'cɔ́ri nɛ̀ yérige ki‑ puu sɔ̀ngidaadiʔɛ gè, tire mi 'tɛ́ngɛ mi nɛ́ muɔ sunʔɔmɔ ní bè. 52Kàdɛnigboli náà lè, nɛ́ sɔ̀ngidaadiʔɛ gáà ní gè, tire ti bé puu fìɛ mi nɛ́ muɔ sunʔɔmɔ ní bè bɛ̀ kaala nyaafɔli tíɛlɛ. Mi sì yɛli bè kàdɛnigboli náà nɛ́ ní sɔ̀ngidaadiʔɛ gáà fɛ́nigɛ gè bè kɛ́ muɔ kúrugu nɛ́ sɔ̀ngibiire níʔ; muɔ míɛni sì yɛli bè ti fɛ́nigɛ bè pɛn mi kúrugu nɛ́ sɔ̀ngibiire níʔ. 53Birayima Kulocɛliɛ wè, nɛ́ míɛni Nakɔri kulocɛliɛ wè, pe tobilo kulocɛlɛlɛ bèle, peli pe bé puu kàyuʔujuufɔlilɔ bèle mi nɛ́ muɔ sunʔɔmɔ ní bè.»

A Yakuba wire sí kàli Kulocɛliɛ nɛ̄, ŋàa nɛ̄ wi tuu Siaga 'puu nɛ fìʔɛ́ wè#31.53 Nakɔri wire yé puu Birayima cɔni (wéli baa 11.26 ) nɛ́ ní Laban tuuliʔɛ (wéli baa 24.24,29 ). Laban wire yé puu nɛ kulocɛlɛlɛ pálì gbùʔɔrɔ́ bɛ̀ Birayima tobilo tíɛlɛ bèle. Yakuba wire yé kàli wi tuu Siaga Kulocɛliɛ wire yákuɔ nɛ̄ (wéli baa 31.42 ).. 54A Yakuba wi 'kakuɔrɔ yajuʔu káà kpúu nɛ̀ yanyige surosuʔɔ, nɛ́ wi siɛnnɛ yeri bèle a pe 'pínɛ nɛ̀ suro lìi dè nɛ́ súɔn baa nyagurugo nɛ̄ gè.

Currently Selected:

Sélimɛ 31: sev

Highlight

Copy