Sélimɛ 25

Birayima 'liɛ nɛ́ kùu

1A Birayima wi ń'nɛ̀ cɛliwɛ wáà líɛ, pe 'wi míʔɛ yeri gè Ketura. 2A wi 'pìile sii wi mɛ́; peli pe 'puu Zimiran, nɛ́ Yokisan, nɛ́ Mɛdan, Madiyan, nɛ́ Yisibaki, nɛ́ Suwa. 3A Yokisan wi 'Saba nɛ́ Dedan sii. Dedan pìile peli pe 'puu Asuriyé bèle, nɛ́ fàri Letusiyé bèle, nɛ́ Lewumiyé bèle. 4Madiyan jaala peli pe 'puu Efa, nɛ́ Efɛri, nɛ́ Enɔki, nɛ́ Avida, nɛ́ Ɛlidaa. Peli bálì pe mìɛni 'puu Ketura pìile.

5A Birayima wi 'wi kɔrigɔ ki mìɛni kɛn Siaga mɛ́ wè. 6Bà Birayima 'puu nɛ tíin sìi nɛ̄ wè, a wi 'kpuʔɔrɔ kɛn wi cesɛnminɛ jaala mɛ́ bèle nɛ́ pe tórigo liilige kùlo láà mɛ́ cɛngɛnyɛnifoligɔli mɛ́ gè, nɛ̀ núgo wi jaa Siaga táanni wè.

7Birayima yiʔɛlɛ ke mìɛni bìnɛ wi 'puu yiʔɛlɛ tekataanri nɛ́ kpɔrigɔ nɛ́ kogunɔ (175). 8A Birayima 'kùu. Wi yé tɔ̀ni nɛ̀ sɔ́migɔ nɛ̀ liɛ nɛ̀ kùu fundaanra nɛ̄, a pe 'wi tɔ́n a wi 'kɛ́ wi tuuliɛyɛ kúrugu yè. 9A wi jaa Siaga nɛ́ Simayira a pe 'wi tɔ́n Makpela nyaguruwiʔi nī gè, baa Efurɔn siʔi nī gè, Efurɔn ŋáà wi 'puu Zokari jaa wè, Eti wuu wè. Ki tiʔɛ kiī baa Mambire tiʔɛ táanni gè. 10Kire siʔi gáà kire gī Birayima yé suɔ Eti siɛnnɛ mɛ́ bèle. Baa pe 'Birayima tɔ́n wè nɛ́ wi cuɔ Sara ní wè.

11A ki 'nyaa Birayima kùumɔ kàduʔumɛ gè, a Kulocɛliɛ wi 'diba taʔa wè wi jaa Siaga nɛ̄ wè. Siaga wire yé puu tɛ́niwɛ Laʔayi Woroyi kɔ̀lɔ táanni wè.

Simayira pìile tùlugo gè

12Simayira siimɛ tùlugo siɛnrɛ dī dàa dè, Birayima jaa ŋáà wi cé sii Sara sùkulocuɔ Agari nɛ̄ wè, Ezipiti kùlo wuu wè.

13Bàli peli bīɛlɛ Simayira jaala bèle nɛ̀ yɛli nɛ́ pe siigɛnmɛ ní bè nɛ́ pe liɛrɛ kɛnmɛ ní bè: péliwe wè, Nɛbayɔti, nɛ́ Kedari, nɛ́ Adebeyɛli, nɛ́ Mivisami, 14nɛ́ Misima, nɛ́ Duma, nɛ́ Masa, 15nɛ́ Kadadi, nɛ́ Tema, nɛ́ Yeturi, nɛ́ Nafisi, nɛ́ Kedima. 16Bàli peli bīɛlɛ Simayira jaala bèle, peli bīɛlɛ pe pɛ́nì kò vòyo nɛ́ kàaya kiɛ nɛ́ siin kàfɔlilɔ bèle nɛ̀ yɛli nɛ́ pe saʔala ní gèle.

17Simayira sìi yiʔɛlɛ keli gīɛlɛ gàli gèle yiʔɛlɛ tekɔlini nɛ́ kpɔrigɔ nɛ́ kɔlisiin (137). A wi 'kùu nɛ̀ kɛ́ wi tuuliɛyɛ kúrugu yè. 18A Simayira siimɛ pi 'tɛ́ni Avila tiʔɛ nɛ́ Suri tiʔɛ sunʔɔmɔ ní bè. Suri tiʔɛ ki 'puu Ezipiti kùlo táanni lè, nɛ́ Asiri kùlo kɔli mɛ́ gè. A pe sɛ́nì tɛ́ni pe siinyɛninɛ pe mìɛni yiʔɛ mɛ́ gè, nɛ́ ní leguuro nɛ̄ nɛ́ pe ní#25.18 Wéli baa 16.12..

YAKUBA SIƐNRƐ DI

(25.19–36.43)

Erebɛka wi 'pìŋɔrɔ sii Siaga mɛ́

19 Siaga wè, Birayima jaa wè, wire pìile siɛnrɛ dī dàa dè. Birayima 'Siaga sii. 20A Siaga ga liɛ nɛ̀ yiʔɛlɛ togosiin taa wè, a wi 'Erebɛka líɛ wè wi cuɔ, Betuwɛli póri wè, nɛ́ ní Laban cɔni wè. Betuwɛli wire nɛ́ Laban, peli 'puu Arami siɛnnɛ nɛ́ kɔ́n Mɛsopotamii kùlo mɛ́. 21A Siaga 'Yewe náari wi cuɔ kɛnmɛ nɛ́ bè, nɛ́ ki cɛ́n wi yé puu sìndigicuɔ. A Yewe 'Siaga náarigɛ lúʔu gè, a wi cuɔ Erebɛka wi 'laala taa. 22Nɛ̀ wi yaʔa nɛ́ laala ní lè, a pìile pe 'kò nɛ túngu wi liyɛ nī yè, a Erebɛka 'jo: «Cáa ! A ki 'nyaa mmɛ gè o, nyùgo sí yē lé mi laala wuʔu nɛ̄ gè ?»

A Erebɛka sɛ́nì Yewe yúgo, 23a Yewe sí wi yɛ:

«Kùlogolo siin gīɛlɛ baa

muɔ liyɛ nī yè,

nɛ̀ pínɛ siɛnfeliye siin

yi bé yiri muɔ nī,

yi bé ba wáligi bè láʔala

yìi nɛ̄.

Wàa fànʔa bé ba niʔɛ bè tóri

ŋìi wuʔu nɛ̄ gè.

Ŋìi wi yē liɛwɛ wè#25.23 Eburulo mɛ́ bèle, a pe yé pìŋɔrɔ sii dè, ŋàa wi 'puu péliwe wè, wire pe 'puu nɛ tɔ́ri liɛwɛ wè., wi bé

bari màama kúu

kàduʔumɛ wuu mɛ́ wè.»

24Bà wi sii lɛ̀lɛ ni pɛ́nì nɔ̀ lè, a ki 'nyaa ŋɔ̀minɔ pe 'puu liyɛ nī yè. 25A pìpeliwe wi 'yiri, wire ŋáà wī liɛwɛ wè, wi céri ní dè nyìɛrɛ nɛ́ ní tuɔwɔ súgusugu. Kire nɛ̄ pe 'puu nɛ wi yeri Ezawu (ki kɔri wire wī: síire pùɔ)#25.25 Eburu siɛnrɛ nī dè, siɛnrɛ dáà ti 'juu nɛ́ jo pùɔ ŋáà wi 'puu tuɔwɔ súgusugu bɛ̀ sìnbuɔ síire tíɛlɛ dè, dàa pe nìɛ líi nɛ buruyo kpínʔini yè. Pe siɛnrɛ nī dè, Ezawu míʔɛ ki kɔri wire wī síire pùɔ.. 26Kire kàduʔumɛ gè pìsiinwuu wè, ŋàa wi 'puu cɔnifɔli wè#25.26 Siɛnnɛ bálì mɛ́ bèle, a pe 'ŋɔ̀rɔ sii dè, ŋàa wi 'sii kàduʔumɛ gè, wire wi nɛ̂ puu cɔnifɔli wè., a wi 'taʔa Ezawu nɛ̄ wè nɛ̀ wi cò yedagbiɛnnɛ nɛ̄ lè, a pe 'wire míʔɛ le gè nɛ wi ye Yakuba (ki kɔri wire wī: yedagbiɛnnɛ). Ŋɔ̀minɔ bálì pe sii lɛ̀lɛ nī lè, Siaga yiʔɛlɛ ke yé puu yiʔɛlɛ togotaanri.

27A nàgabigele gálì ke pɛ́nì liɛ. Ezawu wè, a wire 'kò dèzuuwo, nɛ̀ tɔ̀ni nɛ̀ dèzuʔu cɛ́n gè cɛ̀ngɛ. A sìnbirinyaarigɛ ki tɔ̀ni nɛ̀ wi dɛ́ni. Yakuba wire wè, wire 'puu siɛnnyiwɛ nɛ kòrí kpáa mɛ́, fɛ̀ni saaya nī. 28Ezawu wire yé Siaga dɛ́ni wè nɛ́ ki cɛ́n Siaga 'puu nɛ wi nyàʔa kaara káa dè, nɛ̀ ki yaʔa Yakuba wire yé Erebɛka dɛ́ni.

29Cɛngɛ káà, Yakuba 'puu nɛ sori, a Ezawu 'kɔ́n siʔi mɛ́ gè fùrɔwɔ. 30A Ezawu pɛ́nì Yakuba yɛ wè: «‑Muɔ jaanyiʔɛnɛ kálì kɛn m'mɛ́ fáari mi‑ káa, muɔ jànyiʔɛnɛ gálì gèle, nɛ́ ki cɛ́n mi tɔ̀ni yē fùrɔwɔ.» Kire nɛ̄ pe 'puu nɛ wi yeri míɛni Edɔmi (ki kɔri wire wī: nyìɛwɛ).

31A Yakuba sí jo: «Ma muɔ luɔfɔlimɔ liɛrɛ liɛlɛ fɛ̀ni lè m'mɛ́ pàngɛ gè jàʔala nɛ̄ gèle.»

32A Ezawu sí jo: «Fungo ki je mi kpúu ! Gáa m'bé kúɔ nɛ́ liɛrɛ ní ?»

33A Yakuba wi sí wi yɛ: «Ma kàli ma kɛn m'mɛ́ sî !»

A Ezawu 'fali nɛ̀ kàli sɛni Yakuba mɛ́ wè nɛ́ wi liɛrɛ fɛ̀ni dè jàʔala nɛ̄ gèle. 34A Yakuba 'búru kɛn wè Ezawu mɛ́ nɛ́ jànyiʔɛnɛ ní gèle. A wi 'káa nɛ́ gbuɔ nɛ́ yɛ̀ nɛ̀ kɛ́.

Bà ki 'kpíʔile á Ezawu sì tɔ́ri nɛ́ wi liɛrɛ wuʔu ní gèʔ.

Currently Selected:

Sélimɛ 25: sev

Highlight

Copy