Sélimɛ 20

Birayima nɛ́ Abimɛlɛki wori dè

1Bà tire 'tóri dè, a Birayima kɛ́nì yɛ̀ nɛ̀ kɛ́ cɛngɛnyɛnifoligɔli mɛ́ gè, Nɛgɛvi waama kùlo nī lè, nɛ̀ sɛ́nì tɛ́ni Kadɛsi kàʔa nɛ́ Suri kàʔa sunʔɔmɔ ní bè; kire kàduʔumɛ a wi ń'nɛ̀ yɛ̀ nɛ̀ sɛ́nì tɛ́ni nɛ̀ lɛ̀lɛ láà kúɔ baa Gerari kàʔa nī gè. 2Birayima 'puu nɛ ki nyu siɛnnɛ mɛ́ bèle nɛ́ jo, wire cuɔ Sara wè, wiī wire cɔni wī. Abimɛlɛki wè, Gerari tɛ́nimɛ kùlofɔli wè, a wire 'siɛnnɛ tun a pe sɛ́nì Sara kɔ́ri wè.

3Cɛngɛ káà pìlige nī, a Kulocɛliɛ pɛ́nì juu nɛ́ Abimɛlɛki ní wè ŋɔ́nigɔ nɛ̄, nɛ́ jo: «Muɔ bé kùu wī, cɛliwɛ ŋáà wire kɛnmɛ nɛ̄ ŋàa muɔ 'líɛ wè, nɛ́ ki cɛ́n, nàguɔ cuɔ wī.»

4Nɛ̀ ki yaʔa Abimɛlɛki sì cé fìɛ cò cɛliwɛ nɛ̄ wèʔ.

A wi 'jo: «ʔá, mi Kàfɔli, muɔ bé mi nɛ́ mi siɛnnɛ kpúu bèle lé nɛ̀ ki yaʔa weli sì kapiile kpíʔileʔ ? 5Birayima wire tíimɛ bɛ̀ lé wi 'mi yɛ wire cɔni wī; cɛliwɛ wire tíimɛ sì ki juu lé nɛ́ jo wire luɔ wī lè ? Mi nyɛ́nì ki kpíʔile nɛ́ funviige ní. Mi kiyɛ yiì núʔɔʔ.»

6A Kulocɛliɛ 'ki juu wi mɛ́ ŋɔ́nigɔ nī gè nɛ́ jo: «Mi 'ki cɛ́n muɔ nyɛ́nì ki kpíʔile nɛ́ funviige ní. Mi tíimɛ mi nyɛ́nì ki yaʔa muɔ sì kapiile kpíʔile mi nɛ̄ʔ. Ma ki cɛ́n, mi míɛni mi nyɛ́nì muɔ yérige muɔ sì cò cɛliwɛ nɛ̄ wèʔ. 7Píra ŋáà nī wè, sa nàguɔ wi cuɔ kɛn wè wi mɛ́, nɛ́ ki cɛ́n Kulocɛliɛ siɛnjuuwo wī. Wi bé Kulocɛliɛ náari muɔ mɛ́ kire ga buu muɔ fǎga kùuʔ. A muɔ sí cíi wè, ma ki cɛ́n muɔ bé kùu wī, muɔ nɛ́ muɔ siɛnnɛ pe mìɛni ní.»

8A Abimɛlɛki 'yɛ̀ sínbiniwuuro nī dè nɛ̀ wi baakuɔlɔ pe mìɛni yeri nɛ̀ tɛ́ngɛ, nɛ̀ ti mìɛni juu nɛ̀ tìɛ pe nɛ̄. A pe 'fíɛ kpuʔɔ. 9A Abimɛlɛki wi 'Birayima yeri wè, nɛ́ wi yɛ: «Gáa muɔ 'kpíʔile weli nɛ̄ mmɛ gè ? Kapiile níi mi 'kpíʔile muɔ nɛ̄ á muɔ 'ki yaʔa kapiigbuʔɔ gáà felige ki 'nɔ̀ mi nɛ̄, nɛ́ mi kùlo ní lé ? Gàa muɔ 'kpíʔile mi nɛ̄ mmɛ gè, kiì cé yɛli ki‑ kpíʔileʔ.» 10A Abimɛlɛki 'ki juu Birayima mɛ́ wè nɛ́ jo: «Gáa ki 'jíin muɔ nī á muɔ 'ki kpíʔile mmɛ gè ?»

11A Birayima 'ki juu Abimɛlɛki mɛ́ wè nɛ́ jo: «Mi 'puu nɛ sɔ̀ngí nɛ́ jo, siɛn wè náʔa ŋàa wi fìʔɛ́ Kulocɛliɛ nɛ̄ wèʔ; pe bága mi kpúu, bé mi cuɔ líɛ wè. 12Nɛ̀ taʔa ki nɛ̄, kányiʔɛ gī, wiī mi cɔni, nɛ́ ki cɛ́n wire nɛ́ mi ní wè, wiyē tuufɔnuwɔ nɛ̄ wī, we wè nuufɔnuwɔ nɛ̄ʔ. Á mi pɛ́nì wi líɛ mi cuɔ. 13Kire nɛ̄ lɛ̀lɛ líì nī Kulocɛliɛ 'mi yige mi tuu kpáa nī gè mi de nyaari de mári wè, a mi 'ki juu mi cuɔ Sara mɛ́ wè nɛ́ jo: ‹Kacɛ̀ngɛ gáà kire muɔ béri kpínʔini mi nɛ̄: a we 'kɛ́ tiʔɛ ó tiʔɛ nī gè, a siɛn 'muɔ yúgo wè, ma wi yɛ mi yē muɔ luɔ wī.› »

14Bà Birayima 'juu nɛ̀ kúɔ wè, a Abimɛlɛki 'yajuuro cò nɛ̀ kɛn wi mɛ́, nìɛyɛ, nɛ́ sìnbaara, nɛ́ síkaala, nɛ́ sùkulolo kɛn wi mɛ́, cɛlilɛ nɛ́ nàguɔlɔ, a wi 'ti mìɛni pínɛ nɛ̀ kɛn Birayima mɛ́ wè, nɛ́ wi cuɔ Sara kɛn wè wi mɛ́ nɛ̀ taʔa baa. 15A Abimɛlɛki 'Birayima yɛ wè: «Mi kùlo n'nɛ muɔ yiʔɛ mɛ́ gè, sa tɛ́ni a tiʔɛ gíì 'muɔ dɛ́ni wè.»

16A wi 'ki juu Sara mɛ́ wè nɛ́ jo: «N'gɛ, gàa m'bé kpíʔile gè, m'bé walifiiwe walikpegele sirakogunɔ (1 000) kɛn muɔ luɔ mɛ́ wè. Kire ki bé fìɛrɛ láʔa dè muɔ nɛ̄, bé ki tìɛ siɛnnɛ nɛ̄ bèle bàli bīɛlɛ nɛ́ muɔ ní wè, muɔ sì tàa cɛ́n ti nīʔ.»

17A Birayima 'Kulocɛliɛ náari wè, a Kulocɛliɛ 'Abimɛlɛki puʔɔ, wire nɛ́ wi cuɔ ní wè, nɛ́ wi sùkulocɛlilɛ ní bèle, a pe nɛ́ gbɛ́nɛ pìile sii. 18Nɛ́ ki cɛ́n Yewe cé Abimɛlɛki kpáa cɛlilɛ pe mìɛni kpíʔile sìndigicɛlilɛ, Sara kɛnmɛ nɛ̄ bè, Birayima cuɔ wè.

Currently Selected:

Sélimɛ 20: sev

Highlight

Copy