Sélimɛ 19

Kulocɛliɛ 'Sodɔmi nɛ́ Gomɔri kàaya cúʔɔ yè

1Cɛngɛnyɛnijiin lɛ̀lɛ nī lè, a nyìʔɛnɛ tundunminɔ pe siin pe sɛ́nì nɔ̀ Sodɔmi kàʔa nɛ̄ gè. Lɔti 'puu tɛ́niwɛ nàkpanʔa wìile nī lè. Bà wi 'pe nyaa bèle, a wi 'fali nɛ̀ yɛ̀ nɛ̀ sɛ́nì pe kpàli nɛ́ tuu nɛ̀ yiʔɛ cúbulo gè dàala nɛ̄ lè, 2nɛ́ jo: «Mi kàfɔlilɔ, mi nɛ yeli náari wī, ye‑ wàli yeri báan mi saʔa mɛ́ gè ye pa yeli tɔliyɔ jíge yè, yé súɔn mi saʔa nī gè; mi yē yeli baakuɔwɔ. A kpìɛnmɛ pi 'tuu bè, yeli bé yɛ̀ bèri waa.»

A pe 'cíi nɛ́ jo: «ʔúnʔun, weli bé súɔn kpànʔanɛ gè bile.»

3A wi sí pe ŋàʔana a pe 'jíin wi saʔa nī gè. A wi 'sɔ́migɔ nɛ̀ suʔɔ pe mɛ́, nɛ́ sìnvarifun búru fúɔ wè nɛ̀ kɛn pe mɛ́, a pe 'káa.

4Sínɛ lɛ̀lɛ niì yé fìɛ cɛ́nì nɔ̀ʔ, a Sodɔmi kàʔa nàguɔlɔ pe mìɛni 'pìye pínɛ, nàgapunminɔ yo, nɛ́ nàgaliʔɛlɛ yo, a pe mìɛni 'gbuʔulo, wàa sì yé yiri wàa níʔ, nɛ́ pɛ́nì gbuʔulo nɛ̀ saʔa màʔa gè nɛ̀ suʔu, 5níɛ yékpuʔulo wáari gèle nɛ́ Lɔti yeri nɛ́ jo: «Sé nàguɔlɔ pe yē, bàli pe 'jíin náʔa muɔ saʔa nī gè pìlige nī gè ? ‑Pe yige náʔa weli mɛ́, weli ba sínɛ nɛ́ pe ní.»

6A Lɔti 'yiri saʔa nī gè nɛ́ saʔa tɔ́n gè nɛ̀ wáa pe nɛ̄, 7nɛ́ jo: «Mi nɛ yeli fiɛn, mi wuulo, ye fǎga kapiigbuʔɔ gáà kpíʔile gèʔ ! 8Ye‑ wéli, mi sinborilo piyē náʔa piyè fìɛ nàguɔlɔ cɛ́nʔ, ye‑ ki yaʔa mi‑ pe kɛn yeli mɛ́. A gìi 'yeli dɛ́ni gè, ye‑ ki kpíʔile nɛ́ pe ní. Gàa ki 'nàguɔlɔ bálì kúɔ bèle, ye fǎga yafiɛn kpíʔile pe nɛ̄ʔ, nɛ́ ki cɛ́n mi nabɔnminɔ bīɛlɛ, mi nɛ̄ pe pɛ́nì tìrige. Mi 'yɛli bèri pe wéli.»

9A Sodɔmi nàguɔlɔ pe 'jo: «Núgo baa díɛʔ !» A pe ń'nɛ̀ jo: «Ŋàa wire yē nabɔnwɔ wī, á wi ń'nɛ sɔ̀ngí wi béri tɛnmɛnɛ kanʔa weli mɛ́ !» A pe 'fali nɛ̀ Lɔti yɛ: «Gàa weli bé kpíʔile muɔ nɛ̄ wè, ki bé cɛ pii bè tóri peli wuʔu nɛ̄ gè !» A pe 'fali nɛ Lɔti ŋɔrigi nɛ waa saʔa wìile mɛ́ lè nɛ caa bè kɔ̀ri kaa gè.

10A nabɔnminɔ siin pe 'kiyɛ sáʔala yè nɛ̀ Lɔti cò wè nɛ̀ nyɔ́gɔ saʔa nī gè nɛ́ kɔ̀ri tɔ́n gè, 11á pe 'fúɔnrɔ wáa siɛnnɛ nɛ̄ bèle bàli pe 'puu saʔa yiʔɛ mɛ́ gè, a pe 'kò fúɔnnɔ nɛ̀ séli nàgapunminɔ nɛ̄ fúɔ nɛ̀ sɛ́nì nɔ̀ liɛlɛ nɛ̄, a pe 'kò nɛ saʔa wìile caa lè nɛ fùrɔ́.

12A nabɔnminɔ pe 'Lɔti yɛ wè: «Gáa gī bile muɔ wuʔu gè cígini ? Muɔ jaala lé ? Muɔ pórilo lé ? Muɔ pórilo pe pɔlilɔ lé ? Muɔ wuulo bàli pe mìɛni bīɛlɛ kàʔa nī gè, ‑pe yige peri waa. 13Weli je kàʔa cúʔɔ gè wī, nɛ́ ki cɛ́n Yewe nyɛ́nì kàʔa gáà ki dìgire yékpuʔulo lúʔu gèle, gàli pe wáari ki nī gè, a Yewe sí weli tun weli‑ bàa kàʔa cúʔɔ gè.»

14A Lɔti 'yɛ̀ nɛ̀ kɛ́ nɛ̀ sɛ́nì juu nɛ́ wi pórilo kɔninɔ ní bèle, nɛ́ jo: «Ye‑ yɛ̀, weri yigi kàʔa nī gè, nɛ́ ki cɛ́n Yewe bé kàʔa cúʔɔ gè.» Nɛ̀ ki yaʔa piyè cé tɛ́ngɛ wi siɛnrɛ nɛ̄ dèʔ, a pe 'ki nyaa pùrɔrɔ siɛnrɛ wiī nɛ nyu.

15Sínbiniwuuro nī dè, a nyìʔɛnɛ tundunminɔ pe 'wári Lɔti nɛ̄ nɛ́ jo wi‑ yiri kàʔa nī gè, nɛ́ jo: «Yɛ̀ ! Ma muɔ cuɔ nɛ́ muɔ pórilo pe siin líɛ bèle, bàli bīɛlɛ náʔa nɛ́ muɔ ní bèle, kire ga buu yeli fǎga pínɛ cúʔɔ nɛ́ kàʔa ní gèʔ.» 16A Lɔti 'kò nɛ sùnʔɔsunʔɔ, a nabɔnminɔ pe 'wi cò kɔli nɛ̄, wire nɛ́ wi cuɔ nɛ́ wi pórilo siin ní bèle, nɛ̀ wi píle nɛ̀ yige kàʔa kàduʔu mɛ́ gè, nɛ́ ki cɛ́n Yewe 'nyinimɛ taa wi nɛ̄.

17Bà pe 'pe yige nɛ̀ kúɔ kpànʔanɛ gè, a nabɔnwɔ wáà 'jo: «Te fé ma muɔ sìi suɔ wè ! Fǎga yiʔɛ bè wéli kàduʔu mɛ́ʔ ! Ma fǎga yéri kpàanjali wi tiʔɛ káà nīʔ ! Te fé súuri mari waa nyaguruyo mɛ́ yè, á kire bɛ̀ʔ yeli bé kùu wī !»

18A Lɔti 'pe yɛ: «ʔéʔe, mi kàfɔlilɔ, 19bɛ̀ mi 'kpuʔɔrɔ taa yeli mɛ́ wè, a yeli 'nyuɔ mi nɛ̄ nɛ́ kacɛ̀ngbuʔɔ gáà kpíʔile gè m'mɛ́ wè, nɛ́ mi suɔ kùu mɛ́ wè, miǐ gbɛ̀ fɛ̀ bè nɔ̀ nyaguruyo nɛ̄ yèʔ sɛ́ni kagbɛnnɛ náà ni 'pɛn lè. Ni bé mi cò koligo nɛ̄ gè; m'bé sí kùu wī. 20Ye‑ wéli, vògo gáà ki wè kpuʔɔʔ. Ye‑ mi yaʔa mi‑ sa jíin kire nī, mi nɛ yeli náari wī. Ki wè cíʔɛ lé ? A kire 'kpíʔile m'bé kò sìi nɛ̄.»

21A nabɔnwɔ wi 'wi yɛ: «Mi 'ki lúʔu, gàa muɔ nɛ náari gè m'bé ní ki kɛn muɔ mɛ́, miǐ ga tíi vògo gáà cúʔɔ gèʔ. 22Te fìʔɛlɛ ! Te fé fáari ! Nɛ́ ki cɛ́n miǐ gbɛ̀ yafiɛn kpíʔile fúɔ bè taa muɔ sa nɔ̀ baaʔ.» Kire kɛnmɛ nɛ̄ pe 'vòbiige gáà ki míʔɛ le gè nɛ ki yeri Zowari (ki kɔri wire wī: cíʔɛ).

23Lɛ̀lɛ líì nī cɛngɛnyɛni ni 'foli lè, Lɔti yé nɔ̀ nɛ̀ kúɔ Zowari vògo nɛ̄ gè.

24A Yewe 'siʔɛ#19.24 siʔɛ: Ti nɛ̂ puu bɛ̀ sìndɛnigɛ tíɛlɛ náà puu namiige céri. Ki 'muʔɔrɔ madɛni, nɛ̀ pínɛ ki 'cò madɛni kàsun nī. Siʔɛ kàsunnyige ki nɛ̂ puu wuʔɔ bulɔ céri, ki nùgo ki nàa nyíʔɛri fínawiʔile nī gèle náà nɛ ŋɔ́nɔ celile siɛn nɛ̄. Siʔɛ wi nyɛ́gɛ madɛni a ti gbɛ́nɛ̀ yē kàsun táanni gè. Wéli baa Fàn 29.22;; Zɔbi 18.15; Eza 30.33; Ezek 38.22; Ŋún 11.6; Tìɛ 9.17; 14.10. kàsunsindari tìrige nyìʔɛnɛ nī nɛ̀ wo Sodɔmi nɛ́ Gomɔri kàaya nɛ̄ yè bɛ̀ kàsaʔa tíɛlɛ. Yewe wire tíimɛ wi yé ki tìrige pe nɛ̄, 25nɛ́ kàaya nyáà yi mìɛni cúʔɔ nɛ́ kpàanjali wi mìɛni ní, nɛ́ yɛrɛ dáà ti 'puu nɛ fíin dè, nɛ́ kàʔa siɛnnɛ ní bèle bàli pe 'puu baa bèle. 26A Lɔti cuɔ wi sí kɛ́nì yiʔɛ nɛ̀ wéli, a wi 'fali nɛ̀ waʔa nɛ̀ yéri nɛ́ kò yasuʔɔgɔ.

27A Birayima 'yɛ̀ faʔa sínbinimɛ táanni bè nɛ kári tiʔɛ gíì nī wi cé yéri nɛ́ Yewe ní wè, 28a wi 'wéli baa táanmɛ gè nɛ̀ Sodɔmi nɛ́ Gomɔri kàaya wéli yè, nɛ nyaa nɛ́ kpàanjali wi mìɛni ní, a wi 'ki nyaa kàsunkpuʔɔ wírile ni yɛ̀gí dàala nɛ̄ lè tígi tígitigi.

29Bà ki 'kpíʔile a Kulocɛliɛ kpàanjali ŋáà wi kàaya yi mìɛni sórigo nɛ̀ yi cúʔɔ, a Kulocɛliɛ 'sɔ̀ngi nɛ̀ taa Birayima kaala nɛ̄ lè, a wi 'Lɔti suɔ wè kagbɛnnɛ náà mɛ́ lè lɛ̀lɛ líì nī wi 'puu nɛ kàaya nyáà córi yè nyàa nī Lɔti 'puu wè.

Lɔti nɛ́ wi pórilo siɛnrɛ dè

30Bà tire 'tóri dè, a Lɔti nɛ́ wi pórilo siin ní bèle, a pe 'yiri Zowari vògo nī gè nɛ́ kɛ́ nyaguruyo mɛ́ yè, nɛ́ ki cɛ́n Lɔti puu nɛ fìʔɛ́ bè kò Zowari vògo nī gè. Wire nɛ́ wi pórilo ní bèle, a pe sɛ́nì kò nɛ sùɔ́n nyagurugo kàwiʔi nī gè.

31Cɛngɛ káà, a juɔfɔli wi kɛ́nì ki juu cɔnifɔli mɛ́ wè nɛ́ jo: «Wéli, weli tuu wi nyɛ́nì liɛ, nàguɔlɔ sí wè bile bè ba weli líɛʔ majo bɛ̀ ki kpínʔini tiɛsɛnyɛ nī yè. 32Te báan, we‑ pa diviɛn kɛn weli tuu mɛ́ wè, wi‑ gbuɔ bè tín, wé sí sínɛ nɛ́ wi ní bè siimɛ taa weli tuu mɛ́ wè.» 33Kire pìlige nī gè, a pe 'diviɛn kɛn wè pe tuu mɛ́ wè, a wi 'gbuɔ nɛ̀ tín, a juɔfɔli wi sɛ́nì sínɛ nɛ́ wi tuu ní wè. Lɔti wire sì cɛ́nì ki cɛ́nʔ lɛ̀lɛ líì nī wi 'sínɛ wè, nɛ́ lɛ̀lɛ líì nī wi 'yɛ̀ wè.

34Ki kpìɛnduu gè, a juɔfɔli wi 'ki juu cɔnifɔli mɛ́ wè nɛ́ jo: «Pìlige nī gè, mi nyɛ́nì sínɛ nɛ́ mi tuu ní wè. We‑ ní diviɛn wáà kɛn wi mɛ́ pìlige gáà nī gè wi‑ gbuɔ, dí muɔ sí sa sínɛ nɛ́ wi ní kire ga buu weli bè siimɛ taa weli tuu mɛ́ wè.» 35Kire pìlige nī gè, a pe ń'nɛ̀ diviɛn wáà kɛn pe tuu mɛ́ wè, a wi 'gbuɔ nɛ̀ tín, a cɔnifɔli wi sɛ́nì sínɛ nɛ́ wi tuu ní wè. Lɔti wire sì cɛ́nì ki cɛ́nʔ lɛ̀lɛ líì nī wi 'sínɛ nɛ́ wire ní wè, nɛ́ lɛ̀lɛ líì nī wi 'yɛ̀ wè.

36A Lɔti pórilo siin pe mìɛni 'láʔala taa pe tuu mɛ́ wè. 37A juɔfɔli wi 'nàgabile sii nɛ̀ ni míʔɛ le gè Mowabi (ki kɔri wire wī: mi tuu). Siɛnnɛ bálì pe tíi nɛ yeri Mowabiyé#19.37 Mowabi siɛnnɛ, pe pɛ́nì kò Isirayɛli leguulo. Pe tɛ́nidiʔɛ ki yé puu cɛngɛnyɛnifoligɔli mɛ́ gè, Yasuʔɔniʔɛgɛ kuʔɔjii kúrugu wè. bèle, wire wī pe tuuliʔɛ gè. 38A cɔnifɔli wire míɛni 'nàgabile láà sii, nɛ̀ ni míʔɛ yeri gè Bɛn Ami (ki kɔri wire wī: mi saʔa jaa). Siɛnnɛ bálì pe tíi nɛ yeri Amɔyé#19.38 Amɔ siɛnnɛ, peli míɛni pe yé puu Isirayɛli leguulo. Pe tɛ́nidiʔɛ ki yé puu Zurudɛn cáʔa kúrugu gè, cɛngɛnyɛnifoligɔli mɛ́ gè. bèle, wire wī pe tuuliʔɛ gè.

Currently Selected:

Sélimɛ 19: sev

Highlight

Copy