Banɔkpɛkpɛ Axɔ̃ɛ 9

Saulo Yɛitúmɛ Titsyitsyina

1Nɛ kibe ɛlɛ, Saulo ezewlui akãkɔ Apaleteɛ yɛadɔkpasɛanɛ. Atɔnɔ banɔlũazazã gbagbla avɛ 2kɛlɛ edibisi buplukpa asɛ bakɔɛ tɛ avɛ ɛtsyɔakɔ nɛ Damasko, sɛ tɛ onupɛ amɔ balɛ ɔmayɛ teli nɛ Kidzo Ɛlɛ Nabha, onupɛ benu banyɛ alo badzɛ tsyɛ, tɛ evũ alɛ asɛ ɔɖavũmɛ elete ana avɛnɔ Yerusalem. 3Gɛ Saulo agã idzoɔ pɛ etso aplɛnɔ Damasko ebekeɛ, nɛ yɛ matìmatì mɛɛ, kifu boele odenɔ kititíɛ bakana yɛishu. 4Eglebe adɔ kesiakpa pɛ elũ ozĩ toli gɛ lotseɖe yɛɔsɛ “Saulo, Saulo! Kiɖeso pɛ ɔtɔnɔ miede ana?”

5Saulo ebisi asɛ, “Apalete, wonu afana?”

Ebuiliulũ akɔɛ asɛ, “Mɛinu Yesu, anɔ nɔ̀ gɛ yiede wɔtɔnɔɔ.” 6“Lɔ otsiɛ tɛ̀ ɔvɛ ɔmahohoeɛ mɛ, kɛlɛ bebètseɖewɔ kɛgɛ̀ kɛlɛ ɔsɛ̀ wɔbhɛtɛɛ.”

7Banunɔ gɛazã gã kidzoɔ ɔplɛnɔ Saulo awɔeli kititi kaɖɔ maɖɔmaɖɔ, belũ kaɖɔ, pɔ bagɛmɔ anɔ nanà. 8Saulo alɔ nɛ kesiakpa, pɔ gɛ adalɛ yɛawuhũɔ, lagɛ zamɔ kɛdɔ̃ nanà. Kliso banyana yɛahɔɛ pɛ bagbana yɛ avɛnɔ Damasko ɔmamɛ. 9Nɛ ewui tata mɛɛ, Saulo edzi awuhũpu, kɛlɛ agɛŋã bɔdɔ̃ alo pɛ awɔ̃ɛ kɛdɔ̃ nanà tsyɛ.

10Nɛ Damasko ɔma mɛɛ, adɔkpasɛnɛ teli azã ɛkɛlɛ gɛ bezekulu yɛasɛ Anania. Apaleteɛ ebu yɛishu akasi nɛ bɔlala mɛ asɛ, “Anania!”

Adɛmɛ akɔɛ asɛ, “Apalete, mɛ nɛ alɛ.”

11Apaleteɛ etseɖe yɛasɛ, “Lɔ tɛ ɔvɛ Yuda bɔpã mɛ nɛ Tipɔɔ Tĩi nabha tɛ odibisi anyɛ teli gɛede Tarso pɛ bekulu asɛ Sauloɔ nɛtɔ, ɔmɔsɛ eekulu Owusoso Akaa.” 12Nɛ bɔlala mɛɛ, Saulo amɔ anyɛ teli gɛ bekulu asɛ Anania gɛaba yɛɔbha pɛ abatɔɖɔ ahɔɛ nɛ yɛabha asɛ tɛ amɔ bɔdɔ̃.”

13Anania ebuiliulũ asɛ, “Apalete, bakɔ mɛ tititì gelee nɛ anyɛ alɛ shu, nɛ̀ bɔdɔ̃ gɛ ezĩ nɛ banɔ dadalɛ shu nɛ Yerusalemuɔ. 14Kɛlɛ aba ɛkɛlɛ nɛ̀ ohumi edenɔ banɔlũazazã agbagbla ɔkɔ asɛ tɛ ebevũ anɔ ka nyia ka gɛekulu wɔɛnyeɛ.”

15Pɔ Apaleteɛ etseɖe Anania asɛ, “Gavɛ! Anyɛ alɛ enu anɔ gɛ ibú ɔsɛ tɛ̀ alɔkɔ mɛinyeɛ avɛnɔ bagɛ betinu Yudanɛ nɛ̀ balɛ bekusiɛ nɛ̀ Israel kɛmadiɛ ɔkɔ. 16Ɛbakasɛ yɛ bɔtɔ nɔnɔ́ɛ ɛdi gɛ kɛlɛ ɔsɛ amɔ nɛ mɛinye nɛ takpu.”

17Kliso Anania avɛ bɔpã mɛ, kɛlɛ editsoku bɔlɛ̀ mɛ. Atɔɖɔ ahɔɛ nɛ Saulo abha pɛ etseɖe yɛasɛ, “Mɛadzya Saulo, Apalete Yesuɔ gɛ ebu yɛishu akasɛ wɔ nɛidzoɔ mɛ gɛɔba ɛkɛlɛ, yɛakpɛ mɛ nɛ wɔkɔ, tɛ̀ wɔ awuhũɔ adalɛ tɛ̀ Ɔfɔfuĩa Gbangbã oyuku wɔ mɛ.” 18Tsiɔ̃ ɔlɛ koɔ, kɛdɔ̃ tili asɛ akɔlɔ ana wɔlɛ nɛ Saulo yɛawuhũ nabha, kɛlɛ azakpa bɔdɔ̃ mɔ. Alɔ kɛlɛ bakpɛ bulĩ nɛ kɛtakpu akɔɛ, 19kɛlɛ gɛ bakɔɛ kɛdɔ̃ tili yɛaŋã ebekeɛ, azamɔ yɛohumi nɔ.

Saulo Aɖɔ Owusoso Akaa Kibuiɛ Nɛ Damasko Nɛ̀ Yerusalem

Saulo azã aplɛnɔ badɔkpasɛanɛ nɛ Damasko ewui gelee. 20Odunu ɔlɛ koɔ, Saulo akpɛ bɔdɔ̃ kakasɛ esi nɛ ɛtsyɔakɔ asɛ Yesu yɛenu Owusoso Akaa Yɛeyiɛ. 21Kɛbhɛtɛ banunɔ gɛ bazataatɔ̃ elũ yɛebuiɛ petee nɛibi kɛlɛ bebisi asɛ, “Gɛnɛ anyɛ alɛ yɛaza atɔɖɔ kɛtakpu mɛ̀ zizĩ nɛ banunɔ gɛ beze kulu Yesu kinye ɛlɛ dza? Pɔ gɛnɛ yɛazaba ɛkɛlɛ̀ ebeevũ banunɔ pɛ azagbanà alɛ avɛnɔ banɔlũazazã gbagbla ɔkɔ asɛ ɔɖavũmɛ azazãa dza?” 22Pɔ ohumi nɔ gɛ lɔzã Saulo mɛ lɔzɔ gagalĩ ɔtɔɖɔ, kɛlɛ kɛbhɛtɛ Yudanɛ gɛazã Damasko nɛibi gɛ azadalɛ kɛlɛ mɛ ɔsɛ Yesu yɛenu Kristoɔ.

23Gɛ ewui gelee teli abafala, Yudanɛ atɔɖɔ asɛ tɛ beyìi, 24pɔ Saulo elũ balɛ ebui tɔtɔɖɔ nɛishuɔ. Yudanɛ ezepo budulũɔ elishi nɛ̀ kemuze tɛbevũi eyí. 25Pɔ yiede azazã adɛgbana yɛ elishi pɛ bakpɛ yɛ nɛ kashɔ̀ mɛ pɛ bezhini yɛ aganà ozĩ toli gɛ lɔzã kigiliɛ mɛ.

26Gɛ Saulo ebeku Yerusalemuɔ, apɛ asɛ tɛ̀ etsoku badɔkpasɛnɛ nɛishi, pɔ balɛ nyɔ̃ɔ ezesi yɛifu, bagɛza ayɛkɛ aŋã asɛ adɔkpasɛnɛ gɛ babà yɛkɛ yɛabha aŋã yɛenu. 27Pɔ Banaba agbanà yɛ kɛlɛ alɔkɔ yɛavɛnɔ banɔkpɛkpɛ. Etseɖe balɛ kana gɛ Saulo amɔ Apaleteɛ nɛ yɛidzo gagã mɛ, kana gɛ Apaleteɛ aɖɔaɖɔ niyɛ, ɔplɛnɔ kana gɛ adɛɖɔ kibui Gbangbã nɛ kifu masi masi mɛ nɛ Damasko nɛ Yesu kinyeɛ mɛɛ. 28Kliso Saulo azã balɛ ɔbha pɛ azagã afala nɛ ishu yɔyɔ mɛ̀ nɛ̀ Yerusalem ɔmamɛ pɛ azaɖɔaɖɔ nɛ Apalete nɛinyeɛ mɛ. 29Aɖɔ kaɖɔ alɔkɔ apɔ̃ɛ ebui mɛ nɛ̀ Yudanɛ gɛenu Helanɛ, pɔ bapɛ asɛ tɛ beyii. 30Gɛ badzya ebetì kibui ɛlɛ, bagbana yɛ ezhinɔ avɛnɔ Kaisarea, kɛlɛ odenɔ ɛkɛlɛ, basɛsii nɛ Tarso.

31Kɛlɛ ɔhaa petee gɛzã Yudea, Galilea nɛ̀ Samaria ɔdɔ̃ mɛɛ abamɔ ishu yɔyɔ nɛ kibè ɛlɛ. Ɔfɔfuĩa Gbangbã ɔkpɛ kemì ɔkɔ ɔhaa, kɛlɛ ɔhamɛ banunɔ ekpè atɔɖɔ kɛlɛ bazã nɛ̀ ɛkpã pɛ beesi Apaleteɛ nifù.

Ainea Nɛ̀ Tabita

32Gɛ Petro anyɔ afala nɛ kesiakpa alɛ nabhaa, avɛ asɛ ediɖi banɔ dadalɛ nɛ Lida ɔmamɛ. 33Ɛkɛlɛ yɛadɛ̀ tɔnɔ anyɛ teli gɛ bezekului asɛ Ainea, anɔ gɛ agbã pɛ azã oputso abha agɔ tasɛ nɛ alɛ. 34Petro etseɖe yɛasɛ, “Ainea, Yesu Kristo ebu bɔnyãa akɔ wɔ. Lɔ tɛ̀ olù wɔoputso nɔ.” Odunũ ɔlɛ koɔ, kɛlɛ Ainea alɔ. 35Bagɛ bazã Lida nɛ̀ Saron kibeɛ bamɔ yɛ kɛlɛ betsyina atɔnɔ Apaleteɛ.

36Nɛ Yopa ɔmamɛɛ, adɔkpasɛnɛ teli gɛ bezekulu yɛasɛ Tabita azã ɛkɛlɛ. (Nɛ Hela buluhũɔ mɛɛ, bekului asɛ Dorkas.) Tabita azabhɛtɛ ebui gbangbã pɛ alɔkɔ aplɛnɔ betsyuitsyuiɛ nɔ. 37Nɛ kibe ɛlɛ abadɔ bɔnyã kɛlɛ etsí, kɛlɛ bewulu niyɛ etsitsíɛ pɛ bavɛnɔ yɛedi lu kabhavũ tulì mɛ. 38Lida ɔmãa otsò ɔplɛnɔ Yopa, kliso gɛ badɔkpasɛanɛ elũ asɛ Petro azã Lida ɔmãmɛɛ, bakpɛ banɔ taabha nɛ yiede tɛ̀ betseɖe yɛasɛ, “Budzu kɛtakpu esi kɔ wɔ, ba tsĩɔɔ ɔlɛ!”

39Petro avɛ nɛ̀ alɛ, kɛlɛ gɛ ediku ɛkɛlɛɛ, bagbani yɛavɛnɔ kabhavũɔ mɛ. Kɛlɛ bavɛvɛ edziniɛ alɛ pete abalɔɛtití nɛ Petro ɔbha, pɛ bezebi yoyo kɛlɛ balɔkɔ bɔdɔ̃ kpɛkpɛ gɛ Tabita eyú nɛ kibeɛ gɛ azã balɛ ɔbha aakasɛ alɛ.

40Petro akakà banunɔ pete ebu nɛ buvũɔ mɛ, kɛlɛ edzu ekluisi esi pɛ ekulu kitití ayɛ. Kɛlɛ gɛ etsyina yɛamɛ akpɛ adzɛ ɔkɔɔ, etseɖe yɛasɛ, “Tabita, lɔɛtití!” Adalɛ yɛawuhũɔ kɛlɛ gɛ amɔ Petroɔ, alɔ azã kititì. 41Petro anyana yɛahɔkpɔɔ, pɛ aplɛni yɛalɔ azã yɛtsɛɖɛ nabha. Kɛlɛ ekulu bayɛyɛkɛŋã nɛ̀ bavɛvɛ edzini alɛ pɛ alɔkɔɛ akpɛ ahɔɛ akɔ alɛ enunù. 42Kibui ɛlɛ bayìfala nɛ Yopa bɔdɔ̃ mɛ, kɛlɛ banɔ kpekpè abayɛkɛ Apalete nabha aŋã. 43Petro azã bagãpi axɔ̃ɛ wɔawɔa elete teli gɛ bezekulu asɛ Simon ɔkɔ nɛ Yopa ɔdɛ nanà kibè tili.

Currently Selected:

Banɔkpɛkpɛ Axɔ̃ɛ 9: nyb

Highlight

Copy