Banɔkpɛkpɛ Axɔ̃ɛ 23

1Paulo eɖi ɔhamɛ besheshèɛ namɛ pɛ aɖɔ asɛ, “Mɛadzya alɛ mɔ, ɛbhɛtɛ kɛgɛ kɛlɛ sɛ mɛbhɛtɛ petee ɔkɔ Owusoso Akaa nɛ ekpeɖekpeɖe gbangbã mɛ oboyinɔ obuoɔ.” 2Nɛ kibui ɛlɛ gɛ aɖɔ soɔ, Anania gɛenu banɔlũazazã gbagbla etseɖe bagɛ beli kititì nɛ Paulo ɔbha asɛ behu olugbũ ɔlɛ ɛdɔ̃ akɔɛ. 3Kɛlɛ Paulo etseɖe yɛasɛ, “Owusoso Akaa ebehuwɔ ebho, wɔ kigilì gɛ badzã bɔdɔ̃ fufú akɔ! Ɔzã esì nɛ ɛkɛlɛ pɛ okulu kebhu nɛ mɛ nɛ ɔsha nulũ, pɔ wɔtsyɛ ɔgɛ ɔbhɛtɛ tɔɖɔ ɔsha nabha gɛ ɔɖɔ ɔsɛ behu mɛ kɛdɔ̃!”

4Bagɛ balɔɛtití nɛ Paulo ɔbha aɖɔ asɛ, “Kifù tiyìwɔ gɛ ɔkwala Owusoso Akaa anɔlũazazã gbagbla dzã?

5Paulo ebuiliulũ asɛ, “Mɛadzya alɛ mɔ, ɛgɛ mɔsɛ yɛenu banɔlũazazã gbagbla, ɔmɔsɛ bafɔnɔ elú asɛ, ‘Tɛɖɔ kaɖɔkpa ɔkpɛ agɛ yɛaŋã bukusi nɛ wɔnɔ banunɔ abha shu.’

6Kɛlɛ Paulo, gɛenyi asɛ balɛ mɛ beteli enu Zadukianɛ pɛ bagɔgɔɛ nɔ enu Farisianɛ soɔ, aɖɔaɖɔ gagalĩ etseɖe ɔhamɛ besheshèɛ asɛ, “Mɛadzya alɛ mɔ, Farisieyi mɛinu, inu eyianyɛ ɔkɔ Farisieyi. Bekulu kebhu nɛ mɛ ɔmɔsɛ iɖi otugbà mɛ ɔkɔ betsitsíɛ tɛlɔlɔ.” 7Gɛ aɖɔ kibui ɛlɛ koɔ, kawlɔ̃akɛ ebeku Farisianɛ nɛ̀ Zadukianɛ nɛishi, kɛlɛ kazã ebebu ɔtɔ nɛ bagɔlɔ shu. 8(Zadukianɛ balɛ aɖɔ asɛ tɛlɔlɔ odenɔ bekpumɛ bhama, kɛlɛ baxɔ̃ɛdɛ alo ɔfɔfuĩa nanà tsyɛ ɔma, pɔ Farisianɛ xɔnɔ ayɛkɛ ebui alɛ petee abha ŋã.)

9Ozĩ gbagbla ozoyi tɔɖɔ, kɛlɛ ɔshadɔkasɛ teli gɛenu Farisianɛ abalɔɛtití nɛ̀ kawlɔ̃akɛ ebui gagalĩi. Baɖɔ asɛ, bɔgɛmɔ kibui kpà nanà nɛ anyɛ alɛ shu, kiɖuwoe nɔbɔɖɔ gɛ onupɛ edzi asɛ ɔfɔfuĩa alo axɔ̃ɛdɛ teli yɛaɖɔaɖɔ alɛ etseɖe yɛ dza?” 10Kawlɔ̃akɛ nulũ bagagalĩ gɛ kɛkɔ ɔsɛ kifù bayí keyuiza anɔ gbagbla asɛ banunɔ abatsyɔ̃ɛ Paulo mɛ wluiwlui. Kliso akɔ ɔsha asɛ keyuiza ivolo nɔ ezhi avɛ adɛ yɛkɛ yɛ nɛ balɛ ahɔɛmɛ nɛ tɛgagalĩ mɛ tɛ bagbana yɛ amana buyuadɛdɛ ɔzãkɔɔ.

11Kiwui ɛlɛ elishiɛ, Apaleteɛ abazã Paulo ɔbha pɛ etseɖe yɛasɛ, “Kpɛ kité! Kana gɛ ɔɖɔ kaɖɔ dalɛ mɛishu nɛ Yerusalemuɔ, kana kɛlɛ ɔsɛ wɔdɛɖɔ kaɖɔ nɛ mɛishu nɛ Roma tsyɛ.”

Tɛtɔtɔɖɔ Kɔ Paulo Tìyiyi

12Kelizaza nɛvɔlɔɔ, Yudanɛ adɛtɔɖɔ kibui kpa nɛ tikpukpũ mɛ kɛlɛ banya olugbũ akɔ balɛishu asɛ batɛ bàŋã bɔdɔ̃ alo babàwɔɛ kɛdɔ̃ nanà odiyinɔ kibeɛ gɛ beyí Paulo. 13Banunɔ gɛ badɛ tɔɖɔ kibui kpa ɛlɛ ekpè adɛ afɛtalɛ. 14Bavɛ banɔlũazazã gbagbla nɛ̀ besheshèɛ ɔkɔ editseɖe balɛ asɛ, “Bɔtanà bɔdɔ̃ ɔsɛ, bɔtɛ bàŋã bɔdɔ̃ nanà odiyinɔ ɔsɛ buyì Paulo. 15Kliso otsiɛnɔ, wɔnɔ nɛ̀ ɔhamɛ besheshèɛ ɔkɔ ɔsha ganà keyuiza anɔ gbagbla nabha tɛ̀ abhɛtɛ asɛ nɔkɔpɛ kibui mɛ dadalɛ nɛ yɛibuiɛ gɛ abhɛtɛ shu. Bɔlɔ xɔnɔ bɔbalɛ sɛ bɔ̀ba yii flogo pɛ ebekù ɛkɛlɛ.”

16Pɔ kibeɛ gɛ Paulo yɛada yɛeyianyɛ elũ kibui kpa tɔtɔɖɔ ɛlɛ, avɛ buyuadɛdɛ ɔzãkɔ editseɖe Paulo.

17Kɛlɛ Paulo ekulu keyuadɛ anɔ gbagbla tenikpo pɛ etseɖe yɛasɛ, “Gbana anyɛ ayisɔ̃ alɛ ɔvɛnɔ keyuiza anɔ gbagbla ɔkɔ, kibui tili lɛ yɛahɔɛ gɛ apɛ asɛ etseɖe yɛ.” 18Kliso agbana yɛavɛnɔ keyuiza anɔ gbagbla ɔkɔ.

Keyuadɛ anɔ gbagbla aɖɔ asɛ, “Paulo gɛenu ɔɖavũmɛ azazã yɛakpɛ banɔ nɛ mɛɔkɔ kɛlɛ etseɖe mɛ asɛ, ɛgbanà anyɛ ayisɔ̃ alɛ mana wɔkɔ ɔmɔsɛ kibui tili lɛ yɛahɔɛ gɛ apɛ asɛ aɖɔ etseɖe wɔ.”

19Keyuiza anɔ gbagbla anyanã anyɛ nuvɔɛ nɔ kahɔkpɔ, agbana yɛavɛnɔ kɛwɔa pɛ edibisi yɛasɛ, “Kibui ɖuwoe wɔpɛ ɔsɛ tɛ̀ otseɖe mɛ?”

20Aɖɔ asɛ, “Yudanɛ adɛnyã ɛlɛ asɛ tɛ̀ bebisi edenɔ wɔ ahɔɛmɛ tɛ̀ ɔgbana Paulo mana ɔhamɛ besheshèɛ namɛ kivũ tɛ̀ abhɛtɛ asɛ gɛ onupɛ bakaapɛ kibui mɛ pɔpɔ̃ɛ edenɔ yɛɔkɔ ana. 21Tɛ shɛnɛ ahɔɛ nɛ yɛishu kɔ alɛ, ɔmɔsɛ banyɛ gɛ ekpè adɛ afɛtalɛ edikpũ pɛ beepoe. Badɛ tanà bɔdɔ̃ asɛ batɛbàŋã bɔdɔ̃ alo pɛ babàwɔɛ kɛdɔ̃ nanà ɔvɛnɔ kibèɛ gɛ beyii. Batɛ balɛ eli otsiɛ, pɛ beepo wɔ ɔsɛ tɛ ɔbhɛtɛ tɔɖɔ balɛ kibui bibisi nabha.”

22Keyuiza anɔ gbagbla ashɛnɛ ahɔɛ nɛ ayisɔ̃ shu pɛ akpɛ ɔsha akɔɛ asɛ, “Titseɖe ananà asɛ ɔbɔkɔ mɛ kibui ɛlɛ tititì.”

Balɔkɔ Paulo Asɛsɛ Kaesarea

23Kɛlɛ ekulu yɛ buyuadɛ anɔ gbagbla taabha pɛ akɔ alɛ ɔsha asɛ, “Nɔbalɛ buyuadɛ akpã taabha, bagɛ bekũ ɛsɔ afɛtegegene, nɛ̀ bagɛ atà ɛpɔ̃ɛ tsyɛ akpã taabha tɛ̀ bavɛ Kaesarea oboɔ elishi ɛɖa tizhita mɛ. 24Nɔpɛ ɛsɔ ɔkɔ Paulo tsyɛ tɛ̀ azã yɛabha asɛ tɛ̀ bagbana yɛavɛnɔ Felike gɛenu kɛmadi ekusiɛ nɛ ishu yɔyɔ mɛ.”

25Afɔnɔ keplukpa alɛ asɛ,

26Klauda Lisia, yɛafɔnɔ keplukpa alɛ,

Ɛlɔkɔ sɛsɛ wɔ bɔlɔ kɛmadi ekusiɛ Felike anɔ gɛ adzã kiwuhũ.

Ɛsɛnɛ wɔ.

27Yudanɛ evũ anyɛ alɛ, kɛlɛ bapɛ asɛ tɛ̀ beyìi, pɔ mɛ nɛ̀ mɛ keyuiza bayɛkɛ yɛ nɛ balɛ ahɔɛ mɛ̀, ɔmɔsɛ ɛbatì ɔsɛ Romaeyi yɛenu. 28Ɛpɛ sɛ tɛ̀ mɛiti kibui nɔnɔ gɛ kɛlɛ sopɛ bebhui yɛulũɔ, kliso ɛgbana yɛ mana balɛ ɔhamɛ besheshèɛ ɔkɔ. 29Ɛbamɔ ɔsɛ yɛulũɔ gɛ bebhuiɛ enu ebui bibisi yɛ nɛ balɛ ɔshaa shu, pɔ kibuiɛ gɛ balɔkɔ nanà ma gɛ kɛlɛ ɔsɛ beyii, alo tɛ̀ bakpɛ yɛ nɛ ɔɖavũ mɛ nɛ kɛlɛ ishu. 30Gɛ bakɔ mɛitì nɛ kibui kpa gɛ batɔɖɔ nɛ anyɛ alɛ shu soɔ, ɛɛlɔkɔ̀ yɛ sɛsɛ wɔ tsiɔ̃ ɔlɛ. Mɛtsyɛ kɔ bagɛ behui yɛulũ ɔsha asɛ, balɔkɔ kibuiɛ gɛ balɔkɔ ebhui yɛulũɔ mana wɔkɔ.

31Kliso gɛ buyuadɛ, abhɛtɛ tɔɖɔ kɛgɛ betseɖe alɛ nabhaa, bagbana Paulo aplɛnɔ balɛishu elishi alɛ kɛlɛ bavɛnɔ yɛ nɛ kitsí asɛ Antripatre ana. 32Gɛ keliɛ azaa, bakɔ bagɛ bedò ɛsɔ nɔ avɛ ɛplɛnɔ yɛ, kɛlɛ balɛ xɔnɔ etsodzì etsyina aba buyuadɛdɛ ɔzãkɔ. 33Gɛ bagɛ bedo ɛsɔ nɔ ediku Kaesarea nɔ, balɔkɔ keplukpa akɔ kɛmadi ekusiɛ kɛlɛ balɔkɔ Paulo tsyɛ akpɛ ahɔɛ akɔɛ. 34Kɛmadi ekusiɛ abakalà keplukpa kɛlɛ ebisì yɛ kawɔ̃pɛ nɔnɔ gɛ edeɛ. Gɛ ebetì asɛ Kilikia yɛedeɛ, 35aɖɔ asɛ, “Ɛbàlũ wuɛbuiɛ gɛ onupɛ bagɛ bebhui wɔlũɔ ebekù ɛkɛlɛ.” Kɛlɛ akɔ ɔsha sɛ̀ bezaepò Paulo nɛ Romanɛ ekusi Gbagbala ɔpã mɛ.

Currently Selected:

Banɔkpɛkpɛ Axɔ̃ɛ 23: nyb

Highlight

Copy