Mateu 14
14
Umanu Juão Batista
1Asui nyã tempu aintaruixawa kua Erudi usendu Jesus resewara.
2Asui umbeu ainta supe kuaita upurakisaraita ixupe:
—Aete Juão Batista uyuiriwaa upaka manusawa sui sesewara umunya kuaita milagri ukuawasawa irumu.
3Kuxima Erudi umundu suraraita aintaupisika arama kua Juão aintaupukuari ae aintaumburi arama ae kadeya kiti sesewara kua imu Filipe rimiriku sera Erudia.
4Nyãse Juão umbeu ixupe kua Erudi:
—Timaa repuderi reyuka nerimiriku arama ae.
5Ape uputari uyuká ae maa timaa upuderi nyãse usikie miraita sui nyãse aintaumanduari utitikawaa kua Juão.
6Asui yepe ara aintaumunya arama festa aintaumanduari aramawaa ipupe iakayu kua Erudi, asui kua Erudia membira uri upurasi aintaumaa arama, asui suuri Erudi umaa ixupe.
7Ape inyenga kirimbawawaa irumu umbeu ixupe:
—Upurandu arama irumu maa uputariwaa irumu.
8Asui upurandu irumu kuaye imaya umbeuwaa yawe ixupe, unyee ixupe:
—Kuiri remee ixe arama Juão Batista akanga pratu upe.
9Asui sasiyara ipia kua aintaruixawa, maa sesewara kua umbeuwaa kirimbawa aintaresewara yuiri kuaita uwapikawaita umbau irumu, asui umundu aintaumee ixupe ae.
10Ape uxari aintaumunuka Juão Batista akanga isui kadeya upe.
11Asui aintaurasu iakanga pratu upe aintauxari arama ixupe ae kua kunyamuku, asui urasu ae imaya supe.
12Asui aintauri kuaita Juão Batista umbuewaita kuera aintaurasu arama ipira aintauyutima arama ae iwi upe, asui aintausu aintaumbeu sesewara Jesus supe.
Umee sinku mili pesua umbau
13Asui Jesus usendu irumu Juão resewara, uwiye igara upe usu arama iyaraimawaa kiti, asui kuaita miraita aintauri aintarendawa sui panye aintausu arama pee rupi Jesus ruaxara aintausendu irumu usuana.
14Asui Jesus usemu irumu igara sui umaa kuaita miraita siyawaita, asui pirasuawaa umaa ainta supe ape umukaturu kuaita imãsiwaita.
15Asui karukana ainta, umbuewaita umbeu ixupe:
—Karukana yande ike iyaraimawaa upe remundu aintauyuiri nesui aintaupiripana arama aintaumbau arama tetama kiti kuaita siyawaita.
16Asui Jesus umbeu ainta supe:
—Timaa arama yamundu aintausu ainta, penyete pemee aintaumbau arama.
17Asui aintaumbeu ixupe:
—Anyunte yariku sinku pão mukuĩ pirá yuiri.
18Asui umbeu ainta supe:
—Peruri ixe arama ainta.
19Asui Jesus umundu aintauwapika kapĩ tiwa upe kuaita miraita, asui upisika sinku pão mukuĩ pirá yuiri, umaa iwate kiti uabensuari ainta, asui upartiri kua pão asui umee ainta supe kuaita umbuewaita aintaumee arama ainta supe kuaita miraita siyawaita.
20Asui aintaumbau aintaapu muiri ainta. Asui aintaumuatiri simirera duzi sextu.
21Sinku mili aintasiyasawa kuaita apigawaita umbauwaita, asui kunyaita tainaita yuiri.
Jesus uwata lagu ara rupi
22Asui Jesus uxari umbuewaita uwiye igara upe aintausu arama senunde suaxara kiti umundu irumu aintauyuiri isui kuaita siyawaita.
23Asui Jesus uxari irumu aintauyuiri isui kuaita miraita siyawaita usu iwitera rese yepenyu upurandu arama ipaya irumu. Ape uikure anyuira ate pituna.
24Asui aintaigara uyatikure uiku lagu piterupi, kirimbawa gapenu upetepeteka aintaigara rese, nyãse iwitu upeyu aintaruaxara.
25Asui pituna xingare Jesus usu aintapiri, uwata parana ara rupi.
26Asui kuaita umbuewaita aintaumaa irumu uwata parana ara rupi aintausikie turusu, aintaunyee:
—Aete ianga. Asui aintausasemu aintausikie resewara isui.
27Asui anyunte Jesus upurungita ainta supe umbeu ainta:
—Timaarese penye ixete kua, tepesikie.
28Asui Pedru unyee ixupe:
—Seruixawa inde rame kua, remundu hasu nepiri parana ara rupi.
29Asui Jesus umbeu ixupe:
—Reyuiriana, asui Pedru usemu igara sui uwata parana ara rupi usu arama Jesus ipiri.
30Maa umaa irumu kirimbawa iwitu upeyu usikie, asui uyupiru usu tiipi kiti paraname, asui usenui Jesus umbeu:
—Seruixawa remukaturu ixe.
31Asui aramete Jesus uri usupiri ae ipu irumu umbeu ixupe:
—Inde apigawa kuairawaa reruyari, marantaa mukuĩ remanduariwaa?
32Asui aintauwiye irumu igara upe aramete upituana iwitu.
33Asui aintaumee purangawaa Jesus supe kuaita uikuwaita igara upe aintaumbeu ixupe:
—Supiwa Deus raira inde.
Jesus uiku Genezare upe
34Asui aintausu irumu suaxara kiti aintauyari iwi rese sera Genezare.
35Asui kuaita apigawaita apewaraita aintaumaa irumu Jesus ae aintausu aintaumbeu panye tetama kiti, asui aintaururi ipiri panye mãsiweraita.
36Asui aintaupurandu ae uxari arama aintaupisika irupa rimbiwa rese, asui purangana panye kuaita upisikawaita sese.
Currently Selected:
Mateu 14: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
