Luka 9
9
Umundu kuaita duziwaita
1Asui Jesus usenui rire ipiri kuaita duziwaita uxari ainta supe ukuawasawa ikirimbawasawa yuiri aintaumburi arama demuniwita aintaumukaturu arama mãsiweraita yuiri.
2Umundu yuiri aintausu aintaumbue arama sese kua Deus imiraita arama ainta, aintaumukaturu yuiri kuaita imãsiwaita.
3Asui umbeu ainta supe:
—Timaa nungara perasu peviaji rupiara, tiyuiri pebatuna, timaa yuiri pesaku tiyuiri pão, nẽ dinyeru yuiri, timaa kuri pepuderi perasu mukuĩ pepupekawa.
4Mayewaa uka upe pewike ape kuri peiku ate mairame peyuiri isui kua tendawa.
5Mame rame tiaintausuanti penye peyuiri rame isui kua tendawa pepiri peipi sui iwi aintaukuawa arama kuri aintarese.
6Asui aintausu isui, asui aintausu panye tetama kiti aintaumbeu ainta supe kua nyenga purangawaa asui aintaumukaturu imãsiwaita panye tetama upe.
Erudi uputari umaa Jesus
7Asui aintaruixawa Erudi usendu sesewara panye kua usasawawaa asui tiukuawa mayetaa umanduari, nyãse amu miraita umbeu Juão uyuiri upaka manusawa sui.
8Yepeyepe umbeu Elia kua usikawaa, amuita umbeu:
—Usemuana yepe utitikawaa ambiraita suiwara.
9Maa Erudi umbeu:
—Kuxima hamundu aintaumunuka Juão akanga, ape awataa nyã hasenduwaa sese yawewaa? Asui kirimbawa uputari umaa ae.
Jesus umusiya pão
10Asui aintauyuiri irumu kuaita apustuluita aintaumbeu Jesus supe panye kua aintaumunyawaa. Asui urasu aintairumu usu miraita sui yepe tetama kiti serawaa Betisaida.
11Asui aintausendu irumu sesewara kuaita miraita siyawaita aintausu sakakuera. Asui usuanti ainta, asui umbeu ainta supe Deus rese maye imiraita arama ainta asui umukaturu kuaita uputariwaita ikatu ainta mãsi sui.
12Asui karukana ainta. Asui aintauri ipiri kuaita duziwaita asui aintaumbeu ixupe:
—Rexari aintauyuiri kuaita siyawaita tetama kiti kuayentuwaa kampu upe aintauwasemu arama aintaumbau aintaukiri arama yuiri nyãse iyaraimawaa upe kua mame yaikuwaa.
13Maa umbeu ainta supe:
—Penyete pexari aintaumbau arama. Asui aintausuaxara:
—Anyunte yariku sinku pão mukuĩ pirá yuiri tirame yasu yapiripana aintaumbau arama panye kuaita miraita.
14Nyãse aikue kuaji sinku mili apigawaita, asui umbeu umbuewaita supe, pexari sinkuentapawa aintauwapika.
15Asui aintaumunya kuaye umbeuwaa yawe, asui aintauxari aintauwapika muiri ainta.
16Asui upisika kuaita sinku pão mukuĩ pirá yuiri, asui umaa iwate kiti uabensuari ainta asui upartiri ainta asui uxari ainta umbuewaita supe aintaumee arama ainta supe kuaita miraita.
17Asui aintaumbau asui aintaapu muiri ainta. Asui aintaumuatiri aintaumbauwaa rimirera duzi sextu.
Pedru umbeu Kristu kua Jesus
18Asui upuranduwaa uiku Deus irumu ipesua, irumute kuaita umbuewaita asui upurandu ainta:
—Mayetaa aintaunyee serese kuaita siyawaita, awataa ixe?
19Asui aintausuaxara:
—Juão Batista, maa amuita umbeu Elia, asui amuita umbeu usemuana yepe aintasuiwara kuaita utitikawaita ambira.
20Asui umbeu ainta supe:
—Penyetaa, maataa peseruka ixe? Asui Pedru usuaxara ae unyee:
—Indete Kristu Deus suiwara.
21Maa umundu ainta tiarama aintaumbeu sesewara yawewaa.
22Umbeu:
—Kua unaseriwaa umaa kua ara urikute upurara turusu, urikute uxari aintaumburi ae kuaita tuyuweita kuaita yuiri saserdutita ruixawaita umpinimawaita yuiri, urikute uxari aintauyuká ae, asui musapiri ara rire uyuiri upaka kuri ae.
Usuwaita Kristu rakakuera
23Asui umbeu ainta supe panye:
—Yepe uputari rame usu serakakuera urikute uyuxari aepawate, asui muiri ara usupiri ikurusa usu arama serakakuera.
24Maa kua uputariwaa uyumukaturu sikuesawa upepawa ukanyemu kuri isui ae, awa uxari ukanyemu sikuesawa seresewara uwasemu kuri sikuesawate.
25Maataa kuri uriku sikuyara kua apigawa uganyariwaa panye kua mundu iyara asui ukanyemu u uyumuaiwa aepawate?
26Awa kuri utiĩwaa seresewara senyenga resewara yuiri utiĩ kuri yuiri umaa ae kua unaseriwaa umaa kua ara uri rame kuri iwaka sui ipaya gluria irumu ianjuita purangawaita gluria irumu yuiri.
27Supiwa hambeu penye arama, yepeyepe pesuiwara tikuri aintaumanu senundere aintaumaa imiraita arama ainta kua Deus.
Ipira uyutrukari
28Asui uitu ara umbuewaa rire kua inyenga urasu irumu Pedru Juão Tiagu yuiri yepe iwitera rese upurandu arama Deus.
29Asui upuranduwaa upe uiku uyutrukari suwa asui irupa umuturi murutinga piri panye sui.
30Asui mukuĩ apigawaita aintaupurungita irumu, aete kua Muize Elia yuiri.
31Aintayuiri aintaumuturi, aintaupurungita maye Jesus usu arama umanu Jeruzalẽ kiti.
32Asui Pedru sumuaraita yuiri tipusi aintaresa maa timaa aintaukiri, asui aintaumaa Jesus umuturi kuaita mukuĩwaita yuiri irumuwaita.
Umbeu yuiri umanu kuri ae
33Asui kuaita mukuĩwaita aintauyuiri irumu Jesus sui Pedru unyee ixupe:
—Inde umbuesarawaa purangate yaiku ike, purangate yamunya musapiri baraka, yepe inde arama, yepe Muize supe yepe Elia supe, maa tiukuawa mayesawataa umbeuwaa.
34Asui upurungita ramere uiku ae uri yepe nuvẽ umusikindawa ainta, asui aintausikie turusu katu aintauwike irumu nuvẽ piterupi.
35Asui aintausendu yepe nyenga nuvẽ pitera sui umbeu:
—Aete seraira haparawakawaa, pesendu ixupe arama.
36Asui upurungita rire kua nyenga nuvẽ pitera sui Jesus upita yepenyu, asui nyã ara upe aintaukiririntu tiawa supe aintaumbeu kua aintaumaawaa.
Umukaturu urikuwaa demuniu
37Asui wirande kiti aintauwiye irumu iwitera sui aintauri Jesus ruaxara kuaita miraita siyawaita.
38Asui yepe apigawa aintasuiwara usenui kirimbawa, unyee:
—Inde umbuewaa, hapurandu inde reyuiri remaa seraira piri nyãse seraira yepenyuwaa ae.
39Yepe demuniu upisika ae asui direpenti usasemu asui umburi uwari iwi upe asui uriri ipira rupi ate itiesawa usemu isui, asui iwasu uxari ae umpurarakari rire ae.
40Asui hapurandu rembuewaita irumu aintaumburi arama ae maa tiaintaupuderi.
41Asui Jesus usuaxara ainta:
—Penye miraita kuiriwaraita tiwaita uruyari tenyuntuwaita, muiri arataa haikure peirumu haaguentari aramare peirumu? Reruri ixe arama neraira.
42Asui uri irumu kuayentu kua demuniu upisika ae umburi uwari iwi upe, umuriri ae, maa Jesus umundu kirimbawa kua demuniu ikiawaa, asui umukaturu kua taina asui uxari ipaya supe ae,
43Asui aintaakayemu aintaumaa panye ainta sesewara kua Deus ukuawasawa purangawaa. Asui aintaakayemu irumu aintaumaa panye Jesus umunyawaita, sesewara unyee umbuewaita supe:
44—Pemukaturu santa peapisa upe kua hambeuwaa, aintauxari kuri apigawaita ipu upe kua unaseriwaa umaa kua ara.
45Maa tiaintaukuawa mayesawataa kuawaa, asui uyumimi aintasui ae yawaite ukuawa mayesawataa ae, asui aintausikie upurandu ae mayesawataa ae.
Awataa puranga piriwaa
46Asui aintauyupurungita aintapawa awataa aintasuiwara ukuawa piriwaa aintaara kiti panye.
47Asui Jesus ukuawa irumu maye aintaumanduari aintapia upe upisika yepe taina uxari upuamu suaki.
48Asui umbeu ainta supe:
—Awa usuanti kua taina serera rese usuanti kuri yuiri ixe, awa usuanti ixe usuanti kuri yuiri kua umunduwaa ixe, nyãse kua aintawira kiti piriwaa aete kuri aintaara kitiwaa.
Yayumaa arama puranga
49Asui Juão umbeu ixupe:
—Inde umbuewaa, yamaa yepe apigawa umburi demuniwita nerera rupi, asui yasaisu umburi demuniu nyãse timaa usu yaneirumu nerakakuera.
50Maa Jesus unyee ixupe:
—Tepesaisu ae, awa tiumuruanyana penye perumuarate ae.
Samariawaraita tiaintausuanti Jesus
51Asui kuayentuana sangawa usu arama iwaka kiti kirimbawa uputari usu Jeruzalẽ kiti, asui umundu aintaumbeu sesewara senunde kiti.
52Asui aintausu aintauwike yepe tetama kiti Samaria upewaa aintaumukaturu arama ixupe ukiri rendawa.
53Maa tiaintausuanti ae nyãse aintaukuawa usu Jeruzalẽ kiti.
54Asui Tiagu Juão yuiri aintaumaa irumu yawewaa aintaupurandu Jesus:
—Yaneruixawa maitaa reputari yapurandu tata uwari iwaka sui usapi arama ainta?
55Maa Jesus uyereu aintabanda kiti umukiriri ainta.
56Asui aintausu amu tetama kiti.
Umbeu satambika kuaita usuwaita sakakuera
57Asui aintausuwaa aintauiku pee rupi yepe apigawa umbeu ixupe:
—Hasu kuri nerakakuera maa kiti resu.
58Maa Jesus unyee ixupe:
—Kuaita paka aintaurikute aintaruka iwi upe, kuaita yuiri wirá mirita aintaurikute aintaninyu, maa kua unaseriwaa umaa kua ara tiuriku upituwaa rendawa.
59Asui Jesus umbeu amu supe:
—Reyuiri serakakuera. Maa usuaxara:
—Rexarire hasu hasaru hamburi arama sepaya.
60Asui umbeu ixupe:
—Rexari kuaita umanuwaita aintaumburi kuaita aintarumuaraita umanuwaita, maa inde resu rembue sese kua Deus imiraita arama ainta.
61Asui amu umbeu ixupe:
—Seruixawa, hasu kuri nerakakuera maa rexarire hasu hambeu seresewara serukapuraita.
62Maa Jesus unyee ixupe:
—Awa upuraki ixe arama uyereu rame umaa sakakuera kiti timaa pruntu ae imira arama ae kua Deus.
Currently Selected:
Luka 9: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
