Luka 22
22
Aintauputari aintauyuká Jesus
1Asui kuayentuana aintarunde kua ara aintaumbau arama pão seẽwaa festa upe serawaa paskua.
2Asui kuaita saserdutita ruixawaita kuaita umpinimawaita yuiri aintauputari aintaukuawa maye aintaupuderi arama aintauyuká Jesus nyãse aintausikie miraita sui.
Yurupari uwike Juda ipia upe
3Asui Yurupari uwike Juda ipia upe kua aintauserukawaa Iskariute, aete yepe aintasuiwara kuaita duziwaita.
4Asui usu aintapiri kuaita saserdutita ruixawaita ikapitãoita yuiri upurungita aintairumu mayetaa upuderi uentregari ainta supe Jesus.
5Asui suuri aintapia, asui aintaumee ixupe dinyeru.
6Asui umunya kuaye aintauputariwaa yawe asui arire usaru sangawa puranga uentregari arama Jesus ainta supe tiwa upe miraita umaramunya.
Aintaumukaturu paskua runde
7Asui usika nyã ara aintaumbau arama pão seẽwaa aintaumanduari arama paskua.
8Asui Jesus umundu Pedru Juão yuiri unyee:
—Pesu pemukaturu yambau arama paskua.
9Asui unyee umbuewaita supe:
—Maa kititaa reputari yamukaturu ae?
10Asui umbeu ainta supe:
—Pewike irumu tetama kiti pewasemu kuri yepe apigawa urasuwaa ii kamuti upe, pesu sakakuera uka kiti maa kiti uwikewaa.
11Asui pembeu uka iyara supe:
—Nyã umbuewaa yande umundu yapurandu inde; mametaa ukapi hambau aramawaa ape paskua hambuewaita irumu?
12Asui umukame kuri pemaa yepe ukapi turusuwaa iwate kitiwaa urikuwaa panye maa uka rupiara, ape kuri pemukaturu yanerunde.
13Asui aintausu aintauwasemu kuaye Jesus umbeuwaa yawe, asui aintaumukaturu paskua rupiara.
Aintaumbau paskua anyu aramawaa
14Asui sangawa upe Jesus uwapika meza ruaki kuaita apustuluita irumu.
15Asui umbeu ainta supe:
—Turusu hasaru hambau arama peirumu kua paskua senundere hapurara.
16Nyãse hambeu penye arama, timaa mukuĩsawa hambau ae ate sangawa usika rame aintaruixawa arama kua Deus.
17Asui upisika yepe kupu asui umee grasa sese umbeu:
—Pepisika ae pepartiri ae penye arama.
18Nyãse hambeu penye arama, kuiri arirewara tiana mukuĩsawa hau mirá iya yukise ate usika rame kuri sangawa aintaruixawa arama kua Deus.
Santa Seya
19Asui upisika yepe pão, asui umee rire grasa upartiri ainta supe ae umbeu:
—Aete sepira hameewaa peresewara, pemunya yawe pemanduari arama ixe.
20Yawete yuiri umunya umbau rire upisika yepe kupu umbeu:
—Kua kupu aete kua nyenga pisasuwaa seruwi rese uyuyusenawaa peresewara.
21Pemaa ipu kua uentregariwaa ixe uwapika seirumu meza ruaki.
22Nyãse kua unaseriwaa umaa kua ara usu usasawa kuaye aintaumpinimawaa yawe sese, maa puxuwera usika kuri sese kua uentregariwaa ae.
23Asui aintauyupiru aintaupurandu aintapawa awataa aintasuiwara umunya kuri nyã.
Awataa kua aintaara kiti piriwaa
24Asui aintauyupiru aintauyupurungita aintapawa, awataa aintaara kiti piriwaa aintasui.
25Maa Jesus umbeu ainta supe:
—Kuaita tiwaita judeu ruixawaita aintaumundu ainta kirimbawa asui kuaita umunduwaita aintauseruka uajudariwaita ainta.
26Maa tikuri yawe pepiterupi, maa kua aintaara kiti piriwaa urikute kuaye kua aintawira kitiwaa, asui kua umunduwaa urikute uajudari ainta panye.
27Awataa aintaara kiti piriwaa u nyã uwapikawaa meza ruaki umbau u nyã uajudarisara ae? Maitaa timaa aintaara kiti piri nyã uwapikawaa meza ruaki? Maa pepiterupi ixete kua uajudariwaa penye.
28Penyete kuaita peikuwaita santa seirumu hapurara pukusawa puxuwera.
29Kuaye sepaya uxariwaa yawe ixe arama aintaruixawa arama ixe yawete yuiri haxari penye arama,
30Pembau arama peu arama seirumu meza upe aintaruixawa irumu kuri ixe, asui pewapika kuri petrunu upe pembeu arama kuri aintarese panye kuaita duzi tribu Israelitaita.
Pedru uyumimi kuri Jesus rese
31Asui unyee Pedru supe:
—Simão, Simão, kua Yurupari uputari penye kirimbawa umuawa arama penye trigu yawe.
32Maa hapuranduana nerese tiarama nekuere reruyari, ape kuri retrukari rire nepia remukirimbawa arama nemuita.
33Asui unyee ixupe:
—Seruixawa, pruntuana ixe prezu arama ixe neirumu hamanu arama yuiri ixe neirumu.
34Maa Jesus, umbeu ixupe:
—Hambeu inde arama, Pedru, musapiri viaji reyumimi serese tirekunyeseri ixe uyi ara senundere galu unyengari.
Mukuĩ espada rese
35Asui Jesus umbeu ainta supe:
—Hamunduwaa kuera pesu tiarama perasu dinyeru riru tiyuiri pesaku tiyuiri pesapatu. Maitaa watari penye arama maa nungara? Aintaunyee ixupe:
—Timaa watari.
36Asui umbeu ainta supe:
—Maa kuiri awa uriku dinyeru riru urikute urasu ae isaku yuiri, asui kua tiwa uriku espada urikute uvenderi ipupekawa upiripana arama yepe espada.
37Nyãse hambeu penye arama, yarikute yamunya kuaye aintaumpinimawaa yawe serese, aintaumaa ae puxuwerawa yawe. Asui nyã aintaumpinimawaa serese hamunya ae.
38Asui aintaunyee ixupe:
—Yaneruixawa remaa mukuĩ espada ike. Asui umbeu ainta supe:
—Usika.
Jesus Getisemani upe
39Asui usu tetama sui iwitera kiti sera Ulivera kuaye umunyawerawaa yawe, asui kuaita umbuewaita aintausu sakakuera.
40Asui usika irumu usuana akiti Jesus umbeu ainta supe:
—Pepurandu Deus irumu tiarama kuri awa uputari uganani penye.
41Asui usu aintasui apekatu xinga maye yayapiwaa yawe ita uwariwaa akiti, asui uyurinipia upurandu Deus irumu.
42Umbeu:
—Sepaya, reputari rame rexari usasawa sesui kua sekupu, maa teremunya kuaye haputariwaa yawe, remunya kuaye reputariwaa yawe.
43Asui uri ipiri yepe anju iwaka sui umukirimbawa ae.
44Asui upurara ipia upe asui upurandu kirimbawa piri. Asui siyai ae tuwi irumu asui uwari isui iwi rese.
45Asui upurandupawa upuamu usu umbuewaita ipiri uwasemu aintaukiri aintauiku nyãse sasiyara ainta.
46Asui umbeu ainta supe:
—Marantaa pekiri? Pepuamu pepurandu Deus irumu tiarama awa uputari uganani penye.
Prezu Jesus
47Asui upurungita ramere uiku ae aintauri ipiri kuaita siyawaita miraita, asui yepe aintasuiwara kuaita duziwaita uri aintarunde, sera Juda, asui umusuaki Jesus ubejari ae.
48Asui Jesus umbeu ixupe:
—Juda maitaa rexari suanyanaita supe kua unaseriwaa umaa kua ara rebejariwaa resewara ae?
49Asui kuaita upuamuwaita kuayentu suaki aintaumaa irumu nyã usasawawaa aintaupurandu isui:
—Yaneruixawa maitaa yanupa ainta espada irumu?
50Asui yepe aintasuiwara unupa saserdutita ruixawa ikriadu asui umunuka inambi katusawa sui.
51Maa Jesus unyee:
—Pexari, usikana. Asui upisika inambi umukaturu ixupe ae.
52Asui Jesus umbeu ainta supe:
—Kuaita saserdutita ruixawaita templu kapitãoita yuiri tuyuweita yuiri kuaita uriwaita umprezu ae, maitaa peyuiri pepisika ixe espada irumu kaseti irumu yuiri kuaye pepisikawaa yawe yepe mundawasu?
53Muiri ara haiku peirumu templu upe maa tipepisika ixe. Maa kuiri usikana perangawa pitunawasuwaa rangawa yuiri.
Pedru uyumimi Jesus resewara
54Asui aintaumprezu ae aintaurasu ae saserdutita ruixawa ruka kiti. Asui Pedru usu sakakuera apekatu xinga.
55Asui aintaumundeka rame tata ukapi piterupiwaa upe aintauwapika suaki panye asui Pedru usu uwapika aintapiterupi.
56Asui uri kua yepe kunya umaa Pedru uyumuaku tata, umaa ixupe unyee:
—Aete sumuara yuiri.
57Maa Pedru uyumimi sesewara unyee:
—Kunya tihakunyeseri ae.
58Asui uikupuku xinga yepe uri yuiri umaa ae unyee ixupe:
—Indete yepe aintasuiwara. Maa Pedru unyee:
—Inde apigawa, ixe timaa.
59Asui yepe ura rire amu yuiri umbeu:
—Supiwa sumuara ae nyãse Galileya suiwara ae.
60Maa Pedru umbeu:
—Inde apigawa, tihakuawa mayesawataa rembeuwaa. Asui upurungita pukusaware uiku galu unyengari.
61Asui yaneruixawa uyereu umaa Pedru supe, asui Pedru umanduari yaneruixawa umbeuwaa ixupe, uyi ara musapiri viaji reyumimi seresewara galu unyengari rundere.
62Asui Pedru usu aintasui asui uyaxiu turusu.
Suraraita aintaukasuari Jesus
63Asui kuaita apigawaita upisikawaita Jesus aintaukasuari ae asui aintaunupa ae.
64Asui aintausikindawa isui sesa aintaunyee ixupe:
—Rembeu kuiri; awataa unupa inde?
65Asui siya xinga nyenga puxuwerawa aintaumbeu ixupe sesewara.
Aintaurasu ae serakuenawaita ipiri
66Asui kuemaite aintauyumuatiri kuaita tuyuweita saserdutita ruixawaita yuiri umpinimawaita yuiri, asui aintaurasu ae serakuenawaita ipiri asui aintaunyee ixupe:
67—Kristu rame inde rembeu yasendu. Maa Jesus usuaxara ainta:
—Hambeu rame maa penye arama ae timaa peruyari ixe.
68Asui hapurandu rame penye timaa nungara pesuaxara ixe arama.
69Asui kuiri kuri kua unaseriwaa umaa kua ara uwapika kuri ikatusawa sui kua Deus kirimbawawaa panye sui.
70Asui muiri ainta aintaupurandu ae:
—Maitaa Deus raira inde? Asui usuaxara ainta:
—Penyete pembeu ixete ae.
71Asui aintaunyee:
—Maa xingataa yaputari yasendu sese? Yandete yasendu umbeuwaa iyuru suite.
Currently Selected:
Luka 22: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
