Luka 21
21
Pirasuawaa viuva uferta
1Asui Jesus umaa kuaita rikuwaita aintauxari aintadinyeru uferta riru upe templu upe.
2Asui umaa yuiri yepe kunya viuva uxari mukuĩ dinyeru mirita.
3Asui umbeu:
—Supiwa hambeu penye arama, kua viuva pirasuawaa umee turusu aintasui kuaita amuita.
4Nyãse panye kuaita amuita aintaumee isuiwara kua aintadinyeru tiwa watari ainta supe, maa kua kunya umeepawa isui kua watariwaa ixupe, umeepawa kua upiripana aramawaa ipupe ixupe.
Aintaumukurui kuri templu
5Asui yepeyepe upurungita templu rese aintaumaa maye purangawaa ae ita purangawaita irumu panye miraita umeewaita ufertaita irumu yuiri.
6Asui umbeu:
—Panye kua pemaa, uri kuri yepe ara aintaumburi kuri panye ae tikuri yamaa yepe ita upuamu sendawa upe.
Aintauyupiru aintaupurara
7Asui unyee umbuewaita supe:
—Inde umbuewaa, mairametaa kuri usasawa kua rembeuwaa? Maataa rexari yamaa yakuawa arama sangawa usika?
8Asui umbeu ainta supe:
—Pemaa pesui yawaite yepe uganani penye, nyãse aintauri kuri siya serera rese, aintaumbeu kuri:
—Ixete ae, aintaumbeu yuiri kuri:
—Usikana sangawa. Tepesu aintarakakuera.
9Asui pesendu rame kuri aintaupurungita kera rese, aintaumaramunya yuiri kuri aintarendawa upe, tepesikie nyãse yawe aintaurikute aintaumunya, maa tire usika upawa arama.
10Asui aintaupuamu amu miraita aintaumuruanyana arama amu miraita, asui amu guvernuita aintaumuruanyana amu guvernu.
11Asui uriri kuri iwi kirimbawa, aintamãsi kuri siya, asui aintaupurara kuri yumãsi siya tetama rupi, asui aintauyumusikie turusu kuaita miraita asui aintaumaa kuri tiwaitare aintaumaa iwaka rese.
12Maa senundere panye kuayewaa aintaupisika kuri penye aintaumuruanyana kuri penye, aintauxari kuri penye sinaguga upe kadeya upe yuiri, asui aintaurasu kuri penye aintapiri kuaita tuixawaita guvernuita yuiri serera resewara.
13Yawe kuri pesasawa pembeu arama kuri testemunyu seresewara.
14Maa perikute pemanduari santa pepia upe tiarama kuri peyuka pepia sese mayetaa pesuaxara arama ainta.
15Nyãse ixe kuri hamee penye arama peyuru pekuawasawa yuiri, ape tikuri aintaukuawa aintausuaxara penye panye peruanyanaita.
16Asui kuaita pepayaita, peimuita yuiri, pemiraita yuiri panye peanamaita yuiri aintauentregari kuri penye peruanyanaita supe, asui aintauyuká kuri yepeyepe pesuiwara.
17Puxi kuri aintaumaa penye panye ainta serera resewara.
18Maa tikuri ukanyemu nẽ yepe peawa peakanga sui.
19Asui santa resewara peiku pepaka kuri.
Aintaumukurara Jeruzalẽ
20Asui pemaa rame kuri aintaumukurara Jeruzalẽ suraraita irumu pekuawa kuri kuayentuana sangawa aintaumburi arama ae.
21Asui pexari kuri aintauyawawa iwitera kiti kuaita Judeya upewaita, asui kuaita tetama upewaita pexari aintauyawawa isui, asui kuaita uikuwaita kupixawa upe tepexari aintauyuiri tetama kiti.
22Nyãse yawe kuri Deus uxari aintaupurara aintapekadu resewara aintaumunya arama kuri kuaye aintaumpinimawaa yawe kuxima papera upe.
23Puxuwera kuri usika aintarese kuaita ipuruãwaita kuaita yuiri uxariwaitare aintamembira uu kambi nyã ara kuri, aintaupurara kuri turusu kuaita mundu puraita, asui ipiaiwasawa usika kuri aintarese kuaita miraita.
24Aintauyuká kuri ainta espada irumu, asui aintaurasu kuri prezu ainta panye kua mundu kiti, asui kuaita tiwaita judeu aintaupiru kuri Jeruzalẽ rese ate aintarangawa usika.
Jesus uri mukuĩsawa
25Asui aintaumaa kuri tiwaitare aintaumaa kurasi rese yasi rese estrela rese yuiri, asui kuaita mundu puraita aintausikie kuri nyãse tiapu kua gapenu parana turusuwaa upe.
26Pituana kuri siya apigawaita aintausikie resewara turusu panye kua usasawawaa kua mundu upe, asui kuaita kirimbawawaita iwaka rese aintaukataka kuri.
27Asuiwana kuri aintaumaa kua unaseriwaa umaa kua ara, uri nuvẽ rese panye ikirimbawasawa irumu, igluria turusuwaa irumu yuiri.
28Asui mairame kuri aintauyupiru aintausasawa kua hambeuwaa pesupiri peakanga pemaa iwate kiti nyãse kuayentuana perunde uyurawa arama penye.
Yarikute yasaru
29Asui umbeu ainta supe yepe inyenga umbuewaa rupiara ainta, unyee:
—Pemaa kua mirá figera panye mirá yuiri.
30Pemaa irumu usemu sawa pisasua pekuawa kuri kuayentuana kurasi ara.
31Yawete yuiri pemaa irumu usasawa panye kua hambeuwaa pekuawa kuri kuayentuana perunde peruixawa arama kua Deus.
32Supiwa hambeu penye arama, tire kuri aintaupawa kuaita miraita kuiriwaraita senundere usasawa panye kua hambeuwaa.
33Upawa kuri panye iwaka panye ara yuiri maa senyenga tikuri upawa.
34Pemaa pesui yawaite peyuka pepia peresepawantu, yawaite pekau, yawaite peyuka pepia kua mundu rese, yawaite nyã ara uriwaa umuyusana penye kutara.
35Nyãse usika kuri aintarese panye kuaita uikuwaita mundu upe.
36Pesaru pemaa yawewarawate pepurandu Deus irumu uxari arama penye arama kirimbawasawa pepuderi arama peyawawaa isui panye kua usasawawaa kuri, pepuderi arama kuri pepuamu umaa nyã unaseriwaa umaa kua ara.
Aintauri aintausendu ixupe
37Asui umbue ainta templu upe muiri ara, maa pituna rame usu uiku iwitera rese sera Ulivera.
38Asui kuemaite aintauri ipiri templu kiti panye kuaita miraita aintausendu arama ixupe.
Currently Selected:
Luka 21: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
