Luka 14
14
Umukaturu ipungawaa
1Asui yepe sauru rame Jesus uwike suka upe yepe farizewita ruixawa umbau arama irumu, asui panye aintaumaa ixupe.
2Apete yepe imãsiwaa ipungawaa ipira.
3Asui Jesus umbeu ainta supe kuaita ukuawawaita Muize umpinimawaa kuaita yuiri farizewita:
—Maitaa yapuderi yamukaturu imãsiwaita sauru rame u tiyapuderi?
4Maa aintaukiririntu. Asui Jesus upisika ae ipu irumu asui umukaturu ae, asui uxari usu.
5Asui umbeu ainta supe:
—Awataa pesuiwara tiuyuka ijumentu u itapira uwari rame iwi kuara kiti sauru ara upe?
6Asui tiaintaukuawa maye aintausuaxara ae.
Banku purangawaita
7Asui umbeu ainta supe yepe inyenga umbuewaa rupiara aintaumaa irumu mayetaa aintausikari aintauwapika arama banku purangawaa rese kuaita usenuiwaita aintaumbau arama irumu.
8Ape unyee:
—Yepe usenui rame inde kazamentu kiti teresikari rewapika purangawaa banku rese yawaite uri yuiri yepe usenuiwaa puranga piriwaa nesui,
9asui uri kua usenuiwaa inde umbeu kuri inde arama, rexari nebanku ixupe nyã, asui reyumutiĩ kuri inde resu rewapika anyu aramawaa banku rese.
10Maa usenui rame inde kazamentu kiti resu rewapika anyu aramawaa banku rese, asui uri kuri nepiri kua usenuiwaa inde umbeu inde arama, seanama resu rewapika purangawaa banku rese asui suuri kuri aintaumaa kuri inde panye kuaita amuita uwapikawaita neirumu.
11Nyãse muiri kuaita uputariwaita turusu ainta amuita sui aintawira kiti kuri ainta, asui kuaita aintawira kitiwaita turusu aintaara kiti kuri ainta.
12Asui umbeu yuiri ixupe kua usenuiwaa umbau:
—Remunya rame rembauwaa arama teresenui kuaita neanamaita u kuaita nemuita u kuaita nerumuaraita rikuwaita yawaite aintausenui yuiri inde aintaumbau aramawaa kiti, asui rerikute sikuyara.
13Maa remunya rame rembau aramawaa resenui kuaita pirasuawaita alejaduita yuiri tiwaita upuderi uwata yuiri sesaimawaita yuiri.
14Suuri kuri inde nyãse timaa aintaupuderi aintaupagari inde sikuyara. Asui reriku kuri sikuyara aintausemu rame kuri kuaita purangawaita.
Nyenga umbauwaa rese
15Asui yepe uwapikawaa Jesus irumu meza ruaki usendu irumu kua inyenga umbeu:
—Suuri kuri kua umbauwaa Deus imiraita irumu.
16Maa Jesus usuaxara:
—Yepe apigawa umunya yepe umbau aramawaa turusuwaa asui ukunvidari siya.
17Asui usikana sangawa aintaumbau arama umundu upurakiwaa ixupe umbeu arama kuaita ukunvidariwaita, peyuiriana, pruntuana panye.
18Maa aintauyupiru aintaumbeu muiri ainta aintaresewara. Asui kua primeruwaa umbeu:
—Hapiripana yepe kupixawa harikute hasu hamaa ae, ape hambeu inde tiarama resaru ixe.
19Asui amu umbeu:
—Hapiripana dezi bui hasure hamaa ainta ape hambeu inde tiarama resaru ixe.
20Asui amu umbeu ixupe:
—Hamendariana ixe sesewara tihapuderi hasu nepiri.
21Asui upurakisara uyuiri umbeu suixawa supe panye. Asui ipiaiwa kua uka iyara umbeu upurakiwaa supe:
—Resuana kutara tetama kiti reruri ukara upewaita pee rupiwaita yuiri kuaita pirasuawaita yuiri kuaita tiwaita upuderi uwata kuaita sesaimawaita yuiri alejaduita yuiri.
22Asui arirewara upurakisara umbeu ixupe:
—Seruixawa hamunya kua rembeuwaa maa tire teresemu neruka.
23Asui suixawa umbeu ixupe:
—Resuana panye pee rupi turusuwaa remundu aintauwike arama seruka.
24Nyãse hambeu penye arama, timaa yepe apigawa aintasuiwara kuaita hasenuiwaita umbau kuri kua hambauwaa upe.
Uriwaita Kristu rakakuera
25Asui siyawaita miraita aintausu irumu, asui uyereu umaa ainta kiti umbeu ainta supe:
26—Mayewaa uri sepiri tirame ugustari kuaira xinga sesui kuaita ipaya, imaya ximiriku, imuita, sendiraita, aepawate yuiri, timaa upuderi hambuewaa ae.
27Mayewaa tiupisika ikurusa uri arama serakakuera timaa upuderi hambuewaa ae.
28Asui mayewaa pesuiwara uputariwaa umunya yepe ture, maitaa tiuwapika umanduari muiritaa kuri ugastari sã uriku umbawa arama ae?
29Yawaite uyupiru rire umunya ae tiupuderi umbawa asui aintaukasuari ae.
30Aintaunyee kuri sese:
—Kua apigawa uyupiru umpuamu iture arama asui timaa upuderi umbawa ae.
31Mayewaa tuixawa uputariwaa umunya kera amu tuixawa ruaxara, maitaa tiuwapika umanduari sã upuderi dezi mili apigawaita irumu umuserana arama kua uriwaa suaxara vinti mili apigawaita irumu?
32Asui tirame upuderi umundu ixupe kuekatu apekatu suire ae upurandu arama irumu ukuawa arama mayetaa aintaupuderi timaarese ainta.
33Yawete yuiri mayewaa pesuiwara tirame uxari panye maa urikuwaa tiupuderi hambuewaa ae.
Kua mundu yukira
34Purangawate kua yukira, ape usasawa rame isui kua isembikasawa, maitaa maa yapuderi yaxari sembikate ae?
35Timaa arama ae, tiyuiri maa arama ae iwi supe, anyunte yamburi ae. Awa uriku iapisa urikute usendu.
Currently Selected:
Luka 14: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
