Luka 12
12
Farizeu maniaka saiwaa rese
1Asui aintauyumuatiri kuaita miraita siyawaita ainta yawaite aintauyukamirika aintauwari, asui Jesus uyupiru umbeu ainta supe kuaita umbuewaita, unyee ainta supe:
—Pemaa pesui aintamaniaka saiwaa kuaita farizewita nyãse retentuwaa ae.
2Nyã aintauyumimiwaa yaneresa sui yamaa kuri ae, asui kuaita umunyawaita puxi uyumimisawa upe yakuawa kuri aintarese.
3Nyãse panye nyã pembeuwaa uyumimisawa upe aintausendu kuri uyukuawawaa upe, asui nyã pembeuwaa merupiara peapisa upe uka upe aintaumbeu kuri ae iwate sui aintausendu arama panye.
4Ape hambeu penye arama penye seanamaita:
—Tepesikie aintasui kuaita uyukáwaita yanepira asui arirewara timaa nungara aintaupuderi aintaumunya.
5Maa hambeu penye arama:
—Awa sui pesikie arama, pesikie isui kua upuderiwaa umburi penye infernu kiti uyuká rire penye. Supiwa, hambeu penye arama:
—Pesikie isui.
6Maitaa tiyavenderi sinku wirá mirita mukuĩ kruzeru rikuyara? Maa Deus tisesarai yepe aintasuiwara.
7Ukuawate muiritaa isiyasawa peawa peakanga upe, tepesikie, sipiwasu piri penye wirá mirita siyawaita sui.
8Ape hambeu penye arama:
—Awa umbeu seresewara apigawaita usendu arama umbeu yuiri kuri sesewara kua unaseriwaa umaa kua ara aintausendu arama kuaita Deus anjuita.
9Maa awa uyumimi seresewara apigawaita sui hayumimi yuiri kuri sesewara Deus anjuita sui.
10Deus kuri umburi isui ipekadu kua umbeuwaa yepe nyenga puxuwerawa sese kua unaseriwaa umaa kua ara, maa kua umbeuwaa puxi Espiritu Santu rese tikuri Deus umburi isui ipekadu.
11Aintaurasu rame kuri penye sinaguga kiti aintapiri kuaita guvernuita kirimbawawaita yuiri tepeyuka pepia sese mayetaa pesuaxara ainta maye yuiri pembeu arama ainta supe.
12Nyãse nyã ura kuri Espiritu Santu umbue penye pembeu aramawaa ainta supe.
Yanemaa rese
13Asui yepe apigawa uikuwaa aintapiterupi kuaita siyawaita umbeu ixupe:
—Inde umbuesarawaa, rexari semu umee ixe arama pitera rupi sepaya ambira imaa.
14Maa Jesus usuaxara:
—Inde apigawa, awataa uxari ixe hambeu aramawaa perese?
15Asui umbeu ainta supe:
—Pemaa pesui yawaite peyumuasi pemaa resewara, nyãse tiapigawaita upaka aintamaa resewara.
16Asui umbeu ainta supe arama yepe inyenga umbuewaa rupiara ainta:
—Yepe apigawa rikuwaa urikuwaa ikupixawa asui iya ikupixawa turusu.
17Asui umanduari ipia upe, maataa kuri hamunya? Nyãse timame haxari panye seiyaita.
18Asui unyee:
—Yawe kuri hamunya, hamukukui serukaita, asui hamunya yuiri turusuwaita, ape kuri hamukaturu panye iya panye semaa yuiri uka upe.
19Asuiwana kuri hambeu seanga irumu, inde apigawa rerikuana neruka upe turusu nemaa umee arama siya akayu, kuiri timaarese inde, rembau reu yuiri, asui reyumusuuri.
20Maa Deus umbeu ixupe:
—Inde tiwa ukuawa ara, kua pituna remanu kuri, asui awa iyarataa kuri panye nemaa remukaturuwaa inde arama?
21Yawete kua umukaturuwaa imaa ixupe arama maa timaa nungara uriku Deus irumu. Tepeyuka pepia mundu rese
22Asui unyee umbuewaita supe:
—Tepeyuka pepia peresepawa, tiyuiri pembawa rese tiyuiri pepira rese maataa kuri pemundeu arama.
23Nyãse puranga piri yanerikuesawa timbiu sui, asui puranga piri yanepira yanerupa sui.
24Pemaa kuaita urubuita, timaa aintauyutima tiyuiri maa aintaupuu tiyuiri aintauriku aintaruka aintaumukaturu arama aintaumbau arama, maa Deus uxari aintaumbau arama. Sipiwasu piri penye wiraita sui.
25Mayewataa pesuiwara upuderi uyukiriari iwate piri uyuka resewara ipia?
26Ape tirame pepuderi pemunya nyã kuaira xingawaa, marantaa peyuka pepia sese nyã amu?
27Pemaa kuaita putira tiaintaupuraki tiyuiri aintaumunya fazenda maa hambeu penye arama puranga piri aintarupa panye irupa purangawaa sui kua Salumão.
28Ape Deus uxari rame aintaumundeu aintarupa purangawaa kuaita putira upakawaita kampu upe kuiri asui wirande aintaumburi ainta tata kiti, maitaa tiserá uxari kuri penye arama perupa arama, penye tiwaita peruyari puranga.
29Tepesikari kirimbawa pembau arama peu arama yuiri tepeyuka pepia aintarese.
30Nyãse panye kuaita tiwaita judeu kua mundu upe aintausikari nyã, asui pepaya ukuawate watari penye arama nyã nungaraita.
31Perikute pesikari panye runde sui peruixawa arama kua Deus asuiwana kuri uxari penye arama panye peputariwaa.
32Tepesikie penye muiriirawaita, nyãse suuri pepaya uxari imiraita arama penye.
33Pevenderi pemaa asui pexari sikuyara pirasuawaita supe, pesikari pexari pemaa tiwa upawa iwaka kiti tiwa upe tuyuwe ae, ape timundawasu umunda ae tiyuiri trasa umbau ae.
34Nyãse mame pemukaturu pemaa akiti yuiri kuri pexari pepia.
Usaruwaa purangawaa
35Pexari pepira pruntu pepuraki arama pexari umuturi peturi.
36Pemunya aintayawe kuaita apigawaita usaruwaita aintaruixawa uyuiri kazamentu sui aintaupirari arama ixupe ukena usenui irumu ainta.
37Suuri kuri kuaita upurakiwaita aintaruixawa uwasemuwaita aintaupakate usika irumu kuri, supiwa hambeu penye arama uyumukaturu kuri uajudari arama aintauxari kuri aintauwapika meza ruaki asui uri kuri aintapiri uxari arama aintaumbau.
38Suuri kuri kuaita uwasemuwaita usaruwaita ae usika rame pituna rame u kuema rame.
39Hambeu pekuawa arama:
—Kua uka iyara ukuawa rame maa ura usika kua mundawasu timaa uxari uwike suka upe.
40Ape kuri pesaru ae nyãse uri kuri kua unaseriwaa umaa kua ara yepe ura tiwa upe kuri pesaru ae.
41Asui Pedru upurandu:
—Seruixawa, maitaa rembeu yande arama nyã nyenga rembuewaa rupiara u rembeu ainta supe panye?
42Asui yaneruixawa unyee:
—Awataa kua upurakiwaa purangawaa ukuawawaa yawe suixawa uxari usaru suka puraita uxari arama aintaumbau sangawa upe?
43Suuri nyã upurakiwaa suixawa uwasemuwaa usika rame umunya kuaye umbeuwaa yawe.
44Supiwa hambeu penye arama, uxari kuri usaru panye imaa.
45Maa uyumbeu rame aepawa kua upurakiwaa, seruixawa uikure sesui uikupuku, asui uyupiru unupa kuaita upurakiwaita apigawaita kunyaita yuiri asui umbau uu yuiri asui ukau.
46Asui usika kuri suixawa kua upurakiwaa yepe ara tiwa upe usaru ae yepe ura tiwa upe ukuawa asui umpurarakari kuri ae umburi kuri ae aintairumu kuaita tiwaita uruyari.
47Asui aintaunupa kuri ae turusu kua upurakiwaa ukuawawaa maataa suixawa uputari umunya maa timaa uyumukaturu umunya arama kuaye uputariwaa yawe.
48Maa kuairantu umpurarakari nyã umunyawaa puxi tipukusawa ukuawa suixawa nyenga. Aintausaru aintaumaa turusu piri purangawaa irumu nyã urikuwaa turusu, asui nyã aintauxariwaa ixupe turusu, turusu piri aintaupurandu kuri irumu.
Jesus ururi tata kua mundu kiti
49Hayuiri hamburi tata kua mundu kiti haputari maa sendi arama ae kuiri.
50Ape yepe batizmu aintaubatizari arama ixe irumu, asui hapurara hasaru aintaumunya arama ae.
51Maitaa pemanduari hayuiri haxari timaarese ainta kua mundu upe? Umbaa, hambeu penye arama supiwa hayuiri hamutirika ainta.
52Nyãse kuiri kuri aintauyumutirika kuaita sinkuwaita yepe uka puraita musapiri upuamu mukuĩwaita ruaxara, mukuĩwaita upuamu musapiriwaita ruaxara.
53Aintauyumutirika kuri aintapawa, ipaya taira ruaxara, taira ipaya ruaxara, imaya imembira ruaxara, imembira imaya ruaxara, isugra inura ruaxara asui inura isugra ruaxara.
Kua ara rese
54Asui umbeu yuiri ainta supe kuaita siyawaita:
—Pemaa irumu nuvẽ uri kurasi uwikewaa sui ape pembeu: "Amana kuri yande." Asui amana uwari.
55Asui pemaa irumu iwitu upeyu kurasi iarukanga sui ape pembeu: "Saku kuri." Asui sakuana ae.
56Penye retentuwaita, pekuawate mayesawataa kua pemaawaa kua ara ape iwaka rese yuiri maa tipekuawa mayesawataa nyã pemaawaa kuiri?
57Ape marantaa tipenyepawate pekuawa maataa nyã purangawaa?
58Remukaturu neirumu kua umbeuwaa puxi nerese pesuwaa upe serakuenawaa ipiri yawaite usiki uentregari inde delegadu supe umprezu arama inde.
59Supiwa hambeu inde arama:
—Tikuri resemu asui ate mairame repagari panye redeveriwaa.
Currently Selected:
Luka 12: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
