Juão 4
4
Samaria suiwara
1Asui yaneruixawa ukuawa irumu kuaita farizewita aintaukuawa uriku siya umbuewaita ubatizariwaita yuiri Juão sui,
2Umbaa Jesus ubatizari anyunte umbuewaita aintaubatizari,
3Asui usu Judeya sui usu arama mukuĩsawa Galileya kiti.
4Urikute usu usasawa Samaria piterupi.
5Asui usika yepe tetama Samaria upewaa sera Sikar kuayentu isui kua kampu Jaku uxariwaa kuera taira Juze supe.
6Ape Jaku umunyawaa yepe pusu uyuka arama ii; asui Jesus usu uwapika pusu ruaki nyãse ikuereana uwata viaji rupi, kuaji yandara kurasi.
7Asui uri kua kunya Samaria suiwara uyuka arama ii. Asui Jesus upurandu ae:
—Remee hau arama ii.
8Nyãse umbuewaita aintausure aintaupiripana aintaumbau arama tetama kiti.
9Asui kua kunya Samariawara unyee ixupe:
—Maitaa inde judeu repurandu seirumu reu arama ii ixe Samariawara? Nyãse kuaita judewita nemaa nungara aintauriku Samariawaraita irumu.
10Asui Jesus usuaxara ae:
—Rekuawa rame maa kua Deus uxariwaa kua upuranduwaa yuiri neirumu, remee hau ii, repurandu maa irumu reu arama ii upakawaa.
11Asui kua kunya unyee ixupe:
—Seruixawa siru tireriku reyuka arama ii, nyãse kua pusu tiipi ae, maa suiwarataa kua ii upakawaa rerikuwaa?
12Maitaa puranga piriwaa inde isui kua Jaku uxariwaa yande arama kua pusu uuwaa ape ii panye tairaita panye simbawaita yuiri?
13Asui Jesus unyee ixupe:
—Awa uu kua ii iisi mukuĩsawa.
14Maa awa kuri uu kua ii hameewaa ixupe nẽ mairame kuri iisi ae, maa kua ii hameewaa ixupe arama uikuwaa kuri ipia upe kuaye ii rukena yawe umee aramawaa ixupe mundu nunkawaa upawa.
15Asui unyee ixupe arama kua kunya:
—Seruixawa remee ixe arama nyã ii tiarama kuri seisi mukuĩsawa tiarama kuri hayuiri hayuka ii ike.
16Asui Jesus unyee ixupe:
—Resu resenui nemena asui reyuiri kua kiti.
17Asui kua kunya unyee ixupe:
—Tihariku semena. Asui Jesus unyee ixupe:
—Supiwa rembeuwaa, tireriku nemena.
18Nyãse reriku kuera sinku nemena, asui kua uikuwaa neirumu kuiri umbaa nemena ae, supiwa rembeuwaa.
Yapurandu Deus irumu supiwa
19Asui kua kunya unyee ixupe:
—Seruixawa, hakuawa utitikawaa inde.
20Yaneramunyaita aintaupurandu kuera Deus irumu sese kua iwitera, maa penye pembeu yarikute yapurandu Deus irumu Jeruzalẽ kiti.
21Asui Jesus unyee ixupe:
—Kunya, repuderi reruyari senyenga, amu ara kuri tiainta upurandu yanepaya irumu sese kua iwitera tiyuiri Jeruzalẽ kiti.
22Penye pepurandu irumu kua tiwa pekunyeseri, maa yande yapurandu irumu kua yakunyeseriwaa, nyãse kua salvasão uri judewita sui.
23Amu ara kuri, maa usikana kuiri, aintaupurandu arama yanepaya irumu, aintaupurandu kuri irumu supiwa aintapia sui nyãse yanepaya usikari yawewaita aintaupurandu arama irumu.
24Espiritu kua Deus, asui kuaita upuranduwaita irumu aintaurikute aintaupurandu aintapia sui supiwa.
25Asui kua kunya unyee ixupe:
—Hakuawate uri kuri kua Mesia aintauserukawaa Kristu, asui usika rame kuri umbeu kuri yande arama panye mayewaa rese.
26Asui Jesus umbeu ixupe kua kunya:
—Ixete kua rembeuwaa, ixete kua hapurungitawaa neirumu.
27Asui aramete umbuewaita aintauyuiri usika, aintaakayemu aintaumaa Jesus upurungita irumu kua kunya, maa tiawa upurandu ae:
—Maataa reputari u marantaa repurungita irumu kua kunya?
28Asui kua kunya uxari kua ikamuti asui usu tetama kiti asui umbeu ainta supe kuaita miraita,
29Peyuiriana seirumu pemaa arama yepe apigawa umbeuwaa ixe arama panye hamunyawaita. Maitaa tiserá aete kua Kristu?
30Asui aintausu tetama sui aintaumaa arama ipiri.
Yapuu aramawaa
31Asui kuaita umbuewaita aintaupurandu ae umbau arama aintaunyee:
—Rembau inde rembuewaa yande.
32Asui unyee ainta supe:
—Harikute hambau aramawaa tiwa pekunyeseri.
33Asui kuaita umbuewaita aintauyupurungita aintapawa, aintaunyee:
—Maitaa yepe ururiana umbau aramawaa?
34Asui Jesus unyee ainta supe:
—Hambau aramawaa aete kua hamunya aramawaa kuaye uputariwaa yawe kua umunduwaa ixe hambauwaa arama kua imuraki.
35Maitaa tipembeu, kuatru yasi rundere aintauyupiru aintaupuu. Maa hambeu penye arama:
—Pemaa apekatu kiti pemaa arama aintamitima nyãse tiaruana ae aintaupuu arama ainta.
36Kua upuusara uriku sikuyara, asui umuatiri iya mundu tiwa upawa kiti, asui kua uyutimawaa uyumusuuri kuri irumu kua upuusara.
37Nyãse supiwa kua aintaumbeuwaa, yepe uyutimasara asui amu upuusara.
38Hamundu penye pepuu arama kua tiwa peyutima, amuita aintaupuraki asui penye pewike aintamuraki upe.
Siya Samariawaraita uruyari Jesus
39Asui siya Samariawaraita nyã tetama suiwaraita aintauxari aintapia sese sesewara kua kunya umbeuwaa, unyee ainta supe:
—Umbeu ixe arama panye hamunyawaita.
40Asui aintauri kuaita Samaria suiwaraita Jesus ipiri aintaupurandu ae uiku arama aintairumu, asui uiku aintairumu mukuĩ ara.
41Asui siyapiri aintauxari aintapia sese inyenga resewara.
42Asui aintaunyee ixupe kua kunya:
—Kuiri tiyaruyari nenyenga resewara, maa kuiri yaruyari nyãse yasenduana yandepawate asui yakuawate supiwa aete kua umukaturuwaa kuaita mundu puraita.
Jesus uyuiri Galileya kiti
43Asui mukuĩ ara rire uyuiri aintasui usu Galileya kiti.
44Asui Jesus umbeu:
—Kuaita utitikawaita tipuranga aintaumaa ainta aintarendawa upe.
45Asui usika irumuana Galileya kiti kuaita Galileya upewaraita aintausuanti ae nyãse aintaumaa panye umunyawaita Jeruzalẽ upe festa upe, nyãse aintausu yuiri aintaumaa akiti.
Umukaturu yepe tuixawa rumuara raira
46Asui usu yuiri mukuĩsawa Kanaã Galileya kiti umuyereuwaa ape vinyu ii irumu. Ape yepe tuixawa rumuara raira imãsiwaa Kafarnaum kiti.
47Usendu rireana Jesus uri Galileya kiti Judeya sui usu upurandu ae umukaturu arama taira nyãse umanu putariana uiku.
48Ape Jesus unyee ixupe:
—Tirame pemaa milagri tiperuyari nẽ kuaira.
49Asui kua tuixawa rumuara upurandu Jesus:
—Seruixawa, reyuiriana tiramere umanu kua seraira.
50Asui Jesus unyee ixupe:
—Resuana, upakate neraira. Asui kua apigawa uruyari Jesus nyenga asui usuana.
51Asui usuwaa irumu kuaita impregaduita aintauwasemu ae aintaunyee ixupe:
—Upakate neraira.
52Asui upurandu ainta maa urataa purangana taira. Asui aintaumbeu ixupe:
—Kuaji yandara rame kurasi irusangana ipira.
53Asui kua taina ipaya ukuawa purangana taira Jesus umbeu irumute:
—Upakate neraira. Asui uxari ipia Jesus rese panye suka puraita yuiri.
54Yawe Jesus umunya kua milagri mukuĩsawa uyuiri rire Judeya sui Galileya kiti.
Currently Selected:
Juão 4: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
